Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

1 Tupu 14:1-31

14  I lenā lava taimi, na maʻi+ ai Avia le atalii o Ierepoamo.  Ona fai atu lea o Ierepoamo i lana avā: “Faamolemole, inā tulaʻi ia, ia e faafoliga+ atu o se tagata ese ina ia o latou lē iloa ai o oe o le avā a Ierepoamo, ma ia e alu atu i Sailo. Faauta! O loo iai i inā le perofeta o Akia.+ O ia na taʻuina mai iā te aʻu, o le a fai aʻu ma tupu i lenei nuu.+  Ia e ave i lou lima o falaoa+ e sefulu, o keke, ma le fagu+ meli, ma ia e alu atu iā te ia.+ Na te faailoa mai lava iā te oe le mea o le a tupu i le tama.”+  Ona faapea lea ona faia e le avā a Ierepoamo. Ua tulaʻi o ia ma alu atu i Sailo,+ ua oo atu i le fale o Akia. A ua lē mafai ona vaai o Akia, auā ua pō lana vaai ina ua matua o ia.+  Ua fetalai mai Ieova iā Akia: “Vaai! O loo sau le avā a Ierepoamo e fesili atu iā te oe e faatatau i lana tama; auā o loo maʻi o ia. Ia faapea ona e fai atu iā te ia. Pe a taunuu mai o ia, o le a faatagā faafoliga o ia o se tagata ese.”+  Ina ua faalogo Akia i le paʻō o lana savali a o ulufale mai, ona faapea atu lea: “Inā ulufale mai ia oe le avā a Ierepoamo.+ Aiseā ua e faatagā faafoliga ai o oe o se tagata ese, a ua auina atu aʻu iā te oe ma se feʻau mamafa?  Inā alu ia, ia fai atu iā Ierepoamo, ‘O le mea lenei ua fetalai mai ai Ieova le Atua o Isaraelu: “Talu ai na ou faatūina oe mai i lou nuu, ina ia ou faia oe ma taʻitaʻi o loʻu nuu o Isaraelu,+  na ou sasae+ ese foʻi le malo mai i le aiga o Tavita ma foaʻi atu iā te oe, a ua e lē pei o Tavita laʻu auauna, o lē na tausia aʻu poloaʻiga ma mulimuli mai iā te aʻu ma lona lotoatoa, i le faia o mea ua tonu i oʻu luma,+  a ua sili atu lou leaga nai lo o ē uma na muamua atu iā te oe, ua e faia foʻi mo oe se isi atua+ ma faatusa uʻamea+ ina ia faatigā+ ai iā te aʻu, ua e tuulafoaʻia aʻu i ou tua;+ 10  o le mea lea ou te faaoo atu ai puapuaga i le aiga o Ierepoamo, ou te matuā faaumatia foʻi mai i le aiga o Ierepoamo se tasi e tulaʻi atu e fai sana feʻaulata i le pā,+ o sē e leai se fesoasoani ma faatauvaa i Isaraelu;+ ou te matuā tafiesea foʻi le aiga o Ierepoamo,+ e pei ona tafiesea e se tasi o otaota ma lafoaʻi.+ 11  O lē e oti o le aiga o Ierepoamo i le aai, e ʻaina e taʻifau;+ a o lē e oti i le fanua, e ʻaina e manufelelei o le lagi,+ auā ua fetalai mai ai Ieova.” ’ 12  “Ia e tulaʻi ma e alu i lou fale. Pe a e oo i le aai, ona oti loa lea o le tama. 13  E tagituʻi+ foʻi Isaraelu uma ona o ia ma tanu iā te ia, auā e na o ia o le aiga o Ierepoamo e tanu i se tuugamau; talu ai ua maua e Ieova le Atua o Isaraelu se mea lelei iā te ia i le aiga o Ierepoamo.+ 14  E faatūina lava e Ieova mo ia se tupu+ o Isaraelu o lē e na te faaumatia le aiga o Ierepoamo i lenā aso, ma afai e finagalo i ai o ia, e na te faia lava i le taimi nei.+ 15  E faaumatia lava e Ieova Isaraelu, e pei ona felafoaʻiina o le ū i le vai;+ e na te liaʻiina+ foʻi Isaraelu mai i le eleele lelei+ na ia foaʻi atu i o latou augātamā, e na te faataapeapeina+ foʻi i latou i talaatu o le Vaitafe,+ auā ua latou faia pou paia,+ ma faatigā+ ai iā Ieova. 16  E na te lafoaʻi+ foʻi iā Isaraelu ona o agasala a Ierepoamo ua ia agasala ai, ma ia faapogaia ai ona agasala Isaraelu.”+ 17  Ona tulaʻi lea o le avā a Ierepoamo, ua alu i lona ala ma ua oo atu i Tiresa.+ E taunuu atu loa o ia i le faitotoʻa o lo latou fale, ae oti loa le tama. 18  Ua latou tanu iā te ia, ma ua tagiauē Isaraelu uma iā te ia e tusa ai ma le afioga a Ieova na ia fetalai mai ai e ala i lana auauna, o le perofeta o Akia. 19  O le olaga uma foʻi o Ierepoamo, o taua+ na ia tauina ma lana pulega, ua tusia i le tusi+ e faatatau i olaga o tupu o Isaraelu. 20  O aso foʻi na pule ai Ierepoamo e lua sefulu lua tausaga, mulimuli ane ua taoto o ia faatasi ma ona augātamā;+ a ua pule Natapu+ lona atalii e sui iā te ia. 21  Ua avea Reopoamo+ le atalii o Solomona e fai ma tupu i Iuta. E fā sefulu tasi tausaga o Reopoamo ina ua fai o ia ma tupu, ma e sefulu fitu tausaga na pule ai o ia i Ierusalema, i le aai+ na filifilia e Ieova mai i ituaiga+ uma o Isaraelu e tuu ai lona suafa.+ O le igoa o lona tinā o Naana, o le fafine Amoni.+ 22  Ua faia pea e Iuta mea leaga i le silafaga a Ieova,+ o lea ua latou faatupu+ ai lona fuā e sili atu i lo o agasala uma na faia e o latou augātamā, ma ua latou agasala ai.+ 23  Ua latou faia foʻi mo i latou o mea maualuluga,+ o poutū paia+ ma pou paia+ i luga o aʻega maualuluga+ uma ma lalo ifo o laau lauolaola uma.+ 24  Na iai foʻi i le nuu o tamāloloa talitane i le malumalu.+ Ua latou faia mea inosia uma a nuu ese na tuliesea e Ieova mai i luma o le fanauga a Isaraelu.+ 25  O le tausaga lona lima o le nofoaiga a le Tupu o Reopoamo, na alu aʻe ai Sesaka+ le tupu o Aikupito e faasagatau iā Ierusalema. 26  Ua ia ave ʻoa o le fale o Ieova ma ʻoa o le fale o le tupu;+ ua ia ave mea uma lava.+ Ua ia ave foʻi o talipupuni auro uma na faia e Solomona.+ 27  Ona faia lea e le Tupu o Reopoamo o talipupuni ʻapamemea e sui aʻi na mea, ma ua ia tuuina atu e pule ai alii sili o le ʻaufaafeao,+ o leoleo faitotoʻa o le fale o le tupu.+ 28  O taimi uma e alu atu ai le tupu i le fale o Ieova, e ave ai e le ʻaufaafeao na mea, ma latou toe faafoʻi mai na mea i le potu o le ʻaufaafeao.+ 29  O le olaga uma foʻi o Reopoamo ma mea uma na ia faia, po ua lē o tusia ea i le tusi+ e faatatau i olaga i taimi o tupu o Iuta? 30  Ua iai pea le taua i le va o Reopoamo ma Ierepoamo.+ 31  Mulimuli ane, ua taoto Reopoamo faatasi ma ona augātamā, ma ua tanu faatasi ma ona augātamā i le Aai a Tavita.+ O le igoa o lona tinā o Naana le fafine Amoni.+ Ona pule lea o Aviama+ lona atalii e sui iā te ia.

Faamatalaga Pito i Lalo