Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

1 Tupu 1:1-53

1  Ua toeaina le Tupu o Tavita,+ ma ua tele foʻi ona tausaga; ua latou faaafu o ia i ʻie, ae e lē māfanafana ai o ia.  Ona fai atu lea o ana auauna iā te ia: “Seʻi o latou saʻili mai se teine muli+ mo loʻu alii le tupu, e auauna+ o ia i le tupu ma tausi+ iā te ia; e taoto foʻi o ia i lou fatafata,+ ma māfanafana ai loʻu alii le tupu.”+  Ona latou ō atu lea e saʻili mai se teine lalelei i le nuu atoa o Isaraelu, ua latou mauaina Apiseka+ le Sunema,+ ma aumaia o ia i le tupu.  O le teine e matuā lalelei lava o ia;+ ua tausi foʻi e ia le tupu ma auauna iā te ia, ae e leʻi momoe le tupu ma ia.  Ua faasili+ e Atonia+ le tama a Akita+ o ia lava, ua faapea atu: “E fai aʻu ma tupu!”+ Na ia faatonuina tagata e faia mo ia se kariota, ma tagata tiʻetiʻe solofanua, ma tagata e toʻalima sefulu e taufetuli i ona luma.+  E leai se taimi na faatigā ai lona tamā i ona faalogona i lona faapea atu: “Aiseā ua e faia ai faapea?”+ E matuā aulelei lava o ia,+ ma na fanaua o ia e lona tinā ina ua uma ona fanau o Apisaloma.  Ua faifaimea faatasi o ia ma Ioapo le tama a Seruia ma Aviata+ le ositaulaga, ma ua la fesoasoani ma mulimuli atu iā Atonia.+  A o Satoka+ le ositaulaga, o Penaia+ le atalii o Ioiata, o Natano+ le perofeta, o Semi,+ o Rei, ma tagata totoa+ a Tavita, latou te leʻi ʻau+ atu iā Atonia.  Mulimuli ane, ona faia lea e Atonia o se taulaga+ i mamoe, ma povi, ma manu pepeti e latalata i le maa o Soelete, lea e i tafatafa o Enerokelu,+ ua ia valaaulia foʻi ona uso uma, o atalii o le tupu,+ ma tane uma o Iuta, o auauna a le tupu; 10  ae e na te leʻi valaaulia Natano le perofeta, ma Penaia, ma tagata totoa, ma Solomona lona uso. 11  Ona fai atu lea o Natano+ iā Patesepa+ le tinā o Solomona:+ “Pe e te leʻi faalogo ea ua avea Atonia le tama a Akita+ ma tupu, ae e lē o iloa e lo tatou alii o Tavita? 12  O lenei, seʻi oʻu matuā fautua atu iā te oe+ faamolemole, ina ia ou faasaoina oe ma lau tama o Solomona.+ 13  Inā alu ia ma ulufale atu i le Tupu o Tavita, ma e faapea atu iā te ia, ‘Loʻu alii e, le tupu, pe e te leʻi tautō mai ea i lau teine pologa, e faapea: “O lau tama o Solomona e fai o ia ma tupu pe a mavae atu aʻu, o ia foʻi e nofo i loʻu nofoālii”?+ Ae aiseā ua fai ai Atonia ma tupu?’ 14  Faauta! A o oulua talanoa ai i inā ma le tupu, ou te mulimuli atu iā te oe, ma ou faamaonia au upu.”+ 15  Ona alu atu ai lea o Patesepa i le tupu i le potumoe,+ ua toeaina lava le tupu,+ ma o loo auauna atu Apiseka+ le Sunema i le tupu. 16  Ona punou lea o Patesepa ma ifo+ atu i le tupu, ua fai mai le tupu: “O le ā se mea e te manaʻo i ai?”+ 17  Ua fai atu o ia iā te ia: “Loʻu alii e,+ na e tautō i lau teine pologa i le suafa o Ieova lou Atua, ‘O le a fai Solomona lau tama ma tupu pe a mavae atu aʻu, o ia foʻi o le a nofo i loʻu nofoālii.’+ 18  Ae silasila foʻi! ua avea nei Atonia+ ma tupu, ae e lē o silafia lava e loʻu alii le tupu.+ 19  Ua ia faia taulaga i povi poʻa, o manu pepeti, ma mamoe e matuā tele lava, ua ia valaaulia foʻi atalii uma o le tupu,+ o Aviata+ le ositaulaga, ma Ioapo+ le taʻitaʻiʻau; ae e na te leʻi valaaulia Solomona lau auauna.+ 20  A o oe loʻu alii e, le tupu, ua vaavaai+ atu iā te oe o Isaraelu uma, ina ia e taʻu mai iā i latou po o ai o le a nofo i le nofoālii o loʻu alii le tupu, pe a mavae atu o ia.+ 21  Auā pe a oo ina taoto faatasi loʻu alii le tupu ma ona augātamā,+ e mautinoa lava e avea i maʻua ma laʻu tama o Solomona, ma o latou fili.” 22  Faauta! a o la talanoa ma le tupu, ae ulufale mai loa Natano le perofeta.+ 23  Ua latou taʻu atu i le tupu e faapea: “O lea ua sau Natano le perofeta!” Ona ulufale atu lea o ia i luma o le tupu, ma ifo toʻele i le tupu.+ 24  Ona fai atu lea o Natano: “Loʻu alii e, le tupu, pe na e fetalai ea, ‘E avea Atonia ma tupu pe a mavae aʻu, o ia foʻi e nofo i loʻu nofoālii’?+ 25  Auā ua alu ifo o ia i le asō ina ia fai taulaga+ i povi poʻa, o manu pepeti, ma mamoe e matuā tele lava, ina ia valaaulia atalii o le tupu, o taʻitaʻiʻau ma Aviata le ositaulaga;+ o loo aai i latou ma feinu i ona luma, ua latou faapea ane, ‘Ia soifua le Tupu o Atonia!’+ 26  A o aʻu lau auauna, o i matou ma Satoka+ le ositaulaga, o Penaia+ le atalii o Ioiata, ma Solomona lau auauna, e na te leʻi valaauliaina.+ 27  Afai o loʻu alii le tupu ua māfua ai lenei mea, ua e lē faailoa+ mai la i lau auauna po o ai e nofo i le nofoālii o loʻu alii le tupu, pe a mavae atu o ia.” 28  Ona tali mai lea o le Tupu o Tavita, ua faapea mai: “Seʻi outou valaau atu iā Patesepa+ e sau iā te aʻu.” Ona sau lea o ia i luma o le tupu, ma tū mai i luma o le tupu. 29  Ona tautō+ lea o le tupu, ua faapea mai: “O loo soifua Ieova,+ o lē na laveaʻia+ aʻu+ mai i puapuaga uma,+ 30  e pei ona ou tautō atu iā te oe i le suafa o Ieova le Atua o Isaraelu e faapea, ‘E fai lava lau tama o Solomona ma tupu pe a mavae aʻu, e nofo lava o ia i loʻu nofoālii e sui iā te aʻu!’ e faapena lava ona ou faia i le asō.”+ 31  Ona punou lea o Patesepa i le eleele ma ifo+ atu i le tupu, ua faapea atu: “Ia faafualoa le soifua o loʻu alii le Tupu o Tavita!”+ 32  Ua fai mai le Tupu o Tavita: “Ia outou valaau atu iā Satoka+ le ositaulaga, o Natano le perofeta, ma Penaia+ le atalii o Ioiata.” Ona latou ō mai ai lea i luma o le tupu. 33  Ua fai atu le tupu iā i latou: “Ia outou ō ma ave auauna+ a lo outou alii, ma ia outou faatiʻetiʻe loʻu atalii o Solomona i luga o laʻu asini,*+ ma taʻitaʻi ifo o ia i Kiona.+ 34  Ia faauu+ o ia i inā e Satoka le ositaulaga, ma Natano le perofeta e fai ma tupu iā Isaraelu; ia outou ili foʻi le pū+ ma faapea ane, ‘Ia soifua le Tupu o Solomona!’+ 35  Ia outou ō aʻe e mulimuli atu iā te ia, e sau o ia ma nofo i loʻu nofoālii; e fai o ia ma tupu e sui iā te aʻu, ou te tofia foʻi o ia e avea ma taʻitaʻi o Isaraelu atoa ma Iuta.” 36  Ona tali atu lea o Penaia le atalii o Ioiata i le tupu, ua faapea atu: “Amene!+ Ia faia lava e Ieova le Atua o loʻu alii, e pei ona fetalai mai ai le tupu.+ 37  E pei ona faatasi Ieova ma loʻu alii le tupu,+ ia faapea foʻi ona faatasi o ia ma Solomona,+ ia faamamaluina foʻi e ia lona nofoālii, ia sili+ atu i le nofoālii o loʻu alii le Tupu o Tavita.” 38  Ua ō ifo Satoka+ le ositaulaga, o Natano+ le perofeta, o Penaia+ le atalii o Ioiata, o le ʻau Kereti,+ ma le ʻau Peleti,+ ua latou faatiʻetiʻe Solomona i luga o le asini a le Tupu o Tavita,+ ma aumai o ia i Kiona.+ 39  Ona ave lea e Satoka le ositaulaga o le fagu nifo o suāuu+ mai i le faleʻie,+ ma faauu+ iā Solomona; ua latou ili pū, ma ua alalaga atu le nuu uma e faapea: “Ia soifua le Tupu o Solomona!”+ 40  Mulimuli ane, ona ō aʻe lea o le nuu uma, ua mulimuli atu iā te ia, ua ili foʻi e le nuu o fagufagu,+ ma ua matuā olioli lava,+ ua māvaevae ai le eleele+ ona o la latou alaga. 41  Ua lagona e Atonia ma ē uma na valaaulia sa faatasi ma ia, ina ua uma ona latou aai.+ Ina ua lagona e Ioapo le leo o le pū, ona ia faapea atu lea: “O le ā ea le uiga o le vāvāō+ o le aai?” 42  A o tautala o ia, vaai! ua sau Ionatana+ le atalii o Aviata le ositaulaga. Ona fai atu lea o Atonia: “Sau ia, auā o oe o le toa, ua e aumaia tala lelei.”+ 43  A ua tali mai Ionatana iā Atonia: “E leai! Ua faia e lo tatou alii le Tupu o Tavita o Solomona ma tupu.+ 44  Ua aauina faatasi atu foʻi e le tupu o ia ma Satoka le ositaulaga, o Natano le perofeta, o Penaia le atalii o Ioiata, o le ʻau Kereti, ma le ʻau Peleti, ua latou faatiʻetiʻe foʻi iā te ia i le asini a le tupu.+ 45  Ona faauuina lea o ia e Satoka le ositaulaga, ma Natano le perofeta i Kiona e fai o ia ma tupu;+ ua latou ō aʻe mai i inā ma le olioli, ua vāvāō foʻi le aai. O le alaga lenā na outou faalogo atu i ai.+ 46  E lē gata i lea, ua nofo foʻi Solomona i le nofoālii o le tupu.+ 47  O le isi mea, ua ō atu auauna a le tupu e faamanuia lo tatou alii le Tupu o Tavita, e faapea, ‘Ia faasili e lou Atua le suafa o Solomona e sili atu i lou suafa, ia faamamaluina foʻi e ia lona nofoālii e sili atu i lou nofoālii!’+ Ona ifo lea o le tupu i luga o le moega.+ 48  Ua faapea mai foʻi le tupu, ‘Ia viia+ Ieova le Atua o Isaraelu, o lē ua na tofia se tasi e nofo i loʻu nofoālii, a o oʻu vaai atu i ai!’ ”+ 49  Ona gatete ai lea o i latou na valaaulia sa iai ma Atonia, ua tutū i luga, ua taʻitasi ma alu le tagata i lona lava ala.+ 50  Ua fefe foʻi Atonia ona o Solomona. Ona tulaʻi lea o ia, ua alu ese ma tago atu i nifo o le fata faitaulaga.+ 51  Mulimuli ane, ua taʻu mai iā Solomona e faapea: “Ua fefe Atonia i le Tupu o Solomona; o lenei ua tago atu o ia i nifo o le fata faitaulaga, ua faapea mai o ia, ‘Ia tautō mai muamua le Tupu o Solomona iā te aʻu, e na te lē fasiotia lana auauna i le pelu.’ ” 52  Ona fai atu lea o Solomona: “Afai o se tagata toa o ia, e lē paʻū sona lauulu+ se tasi i le eleele; ae afai e maua se leaga iā te ia,+ e oti lava o ia.”+ 53  Ona aauina atu lea o nisi e le Tupu o Solomona ma ua latou ave ifo o ia mai i le fata faitaulaga. Ua sau o ia, ma ifo i le Tupu o Solomona; ona faapea atu lea o Solomona iā te ia: “Inā alu ia i lou fale.”+

Faamatalaga Pito i Lalo

Po o le “miula,” lea e maua mai i le upu Eperu e faasino atu i le tama a le asini poʻa ma le solofanua fafine.