Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

1 Timoteo 6:1-21

6  O i latou uma o ē o avea ma pologa, ia latou manatu pea e tatau ona āva+ atoatoa i o latou lava matai, ina ia aua lava neʻi upuleagaina le suafa o le Atua ma le aʻoaʻoga.+  O ē e iai o latou matai+ e talitonu, aua le manatu faatauvaa iā i latou+ ona o i latou o uso.+ Ae ia pologa ma le lotomalie, auā o i latou e maua aogā mai i la latou auaunaga lelei, o ni tagata talitonu ma e alofagia. Ia faaauau ona aʻoaʻo atu nei mea+ ma tuuina atu nei apoapoaʻiga.  Afai e aʻoaʻo atu e se tagata se aʻoaʻoga ese,+ ma e lē gauaʻi i upu aogā*+ a lo tatou Alii o Iesu Keriso, po o aʻoaʻoga e faamaoni i le Atua,+  ua faafefeteina la o ia i le faamaualuga,+ e lē o malamalama i se mea,+ ae ua maʻi lona mafaufau+ i le suʻesuʻe ma finau i upu.+ O mea nei e tupu ai le matauʻa,+ le femisaaʻi, o upu masoā+ ma masalosaloga leaga,  o nai mea iti ua matuā finau ai tane ua lē sagatonu o latou mafaufau,+ ma ua ō ese ai mai le upu moni,+ auā ua latou manatu e maua ai a latou mea ona o le faamaoni i le Atua.+  E moni, e tele mea e maua+ mai le faamaoni i le Atua+ ma le lotomalie.+  Auā tatou te leʻi aumaia lava se mea i le lalolagi, ma e lē mafai foʻi ona tatou aveese ai o se mea.+  O lea, afai ua iai ni a tatou meaʻai, o mea e oofu ai, ma mea e nonofo ai, ia tatou lotomalilie i nei mea.+  O i latou o ē fia mauʻoa, e paʻuʻū i latou i le faaosoosoga+ ma le mailei, ma le tele o tuʻinanauga valea ma le tigā,+ ia e oo atu ai tagata i le faaumatiaga ma fano ai.+ 10  Auā o le manaʻo+ tele i tupe o le pogai+ lea o mea leaga eseese uma,+ ma o le manaʻo tele i ai, ua ō ese ai nisi mai le faatuatua, ma tuia ai i latou e i latou lava i le tele o tigā.+ 11  A o oe le tagata o le Atua, ia e sola ese mai i nei mea.+ Ae ia saʻili le amiotonu, le faamaoni i le Atua, le faatuatua, le alofa, le tumau ma le agamalu.+ 12  Ia tau le taua lelei o le faatuatua,+ ia taofimau i le ola e faavavau lea na valaauina ai oe, ma na e faailoa atu le faalauiloaga+ lelei i luma o le toʻatele o molimau. 13  I le silafaga a le Atua, o lē e faasaoina mea uma lava, ma Iesu Keriso, o ia o se molimau,+ na ia faia se faalauiloaga+ lelei i luma o Ponotio Pilato,+ ou te poloaʻi+ atu iā te oe 14  ina ia e tausi i le poloaʻiga ma le lē ponā, ma le lē taʻuleagaina, seʻia faaali+ mai lo tatou Alii o Iesu Keriso. 15  O lenei mea e faaali mai e le Pule+ fiafia e toʻatasi, i lona taimi atofaina,+ o ia o le Tupu+ o tupu ma le Alii+ o alii, 16  e na o ia lava e lē mafai ona oti,+ o lē e afio i le malamalama+ e lē mafai ona sao i ai se tasi, o lē e leʻi vaaia e se tagata ma e lē mafai lava ona vaai i ai.+ Ia iā te ia le viiga+ ma le mana e faavavau. Amene. 17  Ia fai atu faatonuga i ē e mauʻoa+ i lenei faiga o mea a le lalolagi, ia aua le faamaualuga,+ ma ia lē faamoemoe i ʻoa e lē tumau,+ ae i le Atua o lē e foaʻi maia le tele o mea iā i tatou ina ia tatou fiafia ai;+ 18  ia faia mea lelei,+ ia tamaoaiga i galuega lelei,+ ia mataalofa ma nofosauni e tufa atu mea i isi,+ 19  ia teua oloa+ mo i latou lava o le faavae+ lelei mo le lumanaʻi, ina ia latou taofimau i le ola moni.+ 20  Timoteo e, ia e leoleoina le mea ua tuuina atu iā te oe,+ ma ʻaloʻalo ese mai i upu lē aogā e faaleaga ai mea paia, ma feteenaʻiga i le mea ua taʻua ma le pepelo o le “poto.”+ 21  Ua liliuese nisi mai i le faatuatua ona o le faalialiavale o lenā poto.+ Tau ina ia iā te outou le agalelei faifua o le Atua.

Faamatalaga Pito i Lalo

Po o “upu e malosi ai.”