Skip to content

Skip to secondary menu

Skip to table of contents

Molimau a Ieova

Faa-Samoa

Tusi Paia i le Initaneti | O LE TUSI PAIA–O LE FAALILIUGA A LE LALOLAGI FOU

1 Timoteo 1:1-20

1  O aʻu o Paulo, o le aposetolo+ a Keriso Iesu ona o le poloaʻiga a le Atua+ lo tatou Faaola,+ atoa ma Keriso Iesu, o lo tatou faamoemoe,+  o laʻu tusi iā Timoteo,+ o le atalii moni+ i le faatuatua: Tau ina ia iā te oe le agalelei faifua, o le alofa mutimutivale ma le filemu mai i le Atua le Tamā, ma Keriso Iesu lo tatou Alii.+  E pei ona ou faalaeiau atu iā te oe ina ia e nofo i Efeso, a o oʻu sauni ou te alu atu i Maketonia,+ ia faapea ona e faia, ina ia e poloaʻi+ atu i nisi e aua le aʻoaʻo i mataupu ese,+  aua foʻi le faalogo atu i tala sesē+ ma gafa e leai se uiga,+ e iʻu ai i le tele o fesili lē aogā, nai lo o le faailoa atu o se mea mai i le Atua e tusa ai ma le faatuatua.  O le mea moni, o le autū o lenei poloaʻiga, o le alofa+ lea mai i se lotomamā+ ma se lotofuatiaifo+ lelei, ma le faatuatua e lē faatagāfai.+  Ua liliuese nisi mai i nei mea, ma ua faasesēina+ ai i latou i talanoaga lē aogā,+  ua latou mananaʻo e avea ma faiaʻoga+ o le tulafono,+ ae e lē iloa mea o loo latou tautatala i ai po o mea foʻi o loo latou finau mauaʻi i ai.  Ua tatou iloa e lelei+ le Tulafono pe afai e saʻo ona faatatauina e se tasi+  i le iloaina o lenei mea moni na faavaeina ai le tulafono, e lē mo le tagata amiotonu, ae e mo ē e solitulafono+ ma ē e lē gauaʻi,+ o ē e faalēmataʻu, o tagata agasala, o ē e lē alolofa faamaoni,+ o ē e faaleaga mea paia, o ē e fasiotia tamā ma tinā, ma ē e fasioti tagata, 10  o ē e faitaaga,*+ o tane e momoe ma isi tane, o ē e ave faamalosia tagata, o ē e tala pepelo, o ē e tautō pepelo,+ ma mea uma lava e tetee+ atu i aʻoaʻoga aogā*+ 11  e tusa ai ma le tala lelei mamalu a le Atua fiafia,+ lea na tuuina mai iā te aʻu.+ 12  Ou te faafetai iā Keriso Iesu lo tatou Alii, o lē na tuuina mai iā te aʻu le mana, auā ua ia manatu ua ou faamaoni,+ e ala i lona tofiaina o aʻu i lenei faiva,+ 13  e ui lava sa ou upuleaga muamua ma faasauā,+ ma o se tagata fiasili.+ Ae peitaʻi, na faaalia le alofa mutimutivale+ iā te aʻu, auā na ou faia faapea i loʻu lē iloa+ ma loʻu lē faatuatua. 14  Ae na ou mauaina le tele o le agalelei faifua+ o lo tatou Alii, atoa ma le faatuatua ma le alofa, lea e tusa ma Keriso Iesu.+ 15  E moni lenei faamatalaga, ma e tatau lava ona matuā taliaina,+ na maliu mai Keriso Iesu i le lalolagi ina ia faaolaina o ē e agasala,+ ma na sili lava ona ou agasala i lo o i latou.+ 16  Ae peitaʻi, o le mea lava lea na faaalia ai le alofa mutimutivale+ iā te aʻu, auā o aʻu na sili lava ona agasala, a ua faaalia ai e Keriso Iesu lona faapalepale, ina ia avea aʻu ma faaaʻoaʻo iā i latou o ē e faatuatua+ iā te ia mo le ola e faavavau.+ 17  O lenei, ia iai i le Tupu o le vavau,+ o lē e soifua pea+ ma e lē vaaia,+ o le Atua e toʻatasi,+ ia iā te ia le viiga ma le mamalu e faavavau, faavavau lava.+ Amene. 18  Loʻu atalii e, Timoteo, ua ou tuuina atu iā te oe lenei poloaʻiga+ e tusa ma valoaga+ e faatatau tonu iā te oe, ina ia faaauau ai ona e tau le taua lelei;+ 19  ia taofimau i le faatuatua ma se lotofuatiaifo lelei+ ia na lafoaʻia+ e nisi, ma ua faavaatuʻia ai lo latou faatuatua.+ 20  E aofia ai Umenaio+ ma Alesana,+ o ē ua ou tuuina atu iā Satani,+ ina ia aʻoaʻia ai i laʻua e aua le fai upuleaga.+

Faamatalaga Pito i Lalo

Tagaʻi i le Faaopoopoga e 8.
Po o “aʻoaʻoga e malosi ai.”