Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

1 Samuelu 28:1-25

28  Ua faapotopoto faatasi e Filisitia a latou ʻautau e siitaua iā Isaraelu i na aso.+ Ona fai mai lea o Akisa iā Tavita: “Ua e iloa lava e ta te ō i le taua, o oe atoa ma ou tagata.”+  Ua fai atu Tavita iā Akisa: “Ua e iloa lelei le mea o le a fai e lau auauna.” Ona fai mai lea o Akisa iā Tavita: “O le mea lenei ua ou filifilia ai oe e puipuia aʻu i aso uma lava.”+  Ua maliu Samuelu, ma ua taufaitagituʻi Isaraelu uma ona o ia, ua latou tanu foʻi iā te ia i Rama i lona aai.+ A o Saulo, ua aveese e ia mai i le nuu o ē e saʻili i agaga, ma ē e vavalo i mea e tutupu.+  Ua faapotopoto faatasi Filisitia, ma ua ō atu ma tolauapi i Sunema.+ Ona faapotopotoina lea e Saulo o Isaraelu uma ma tolauapi i Kilepoa.+  Ina ua iloa e Saulo le ʻautau a Filisitia, ona fefe ai lea o ia ma ua matuā gatete lona loto.+  E ui lava sa fesili atu Saulo iā Ieova,+ ae e leʻi tali mai lava Ieova iā te ia+ e ala i se miti,+ po o le Urima,+ po o perofeta.+  Mulimuli ane, ua fai mai Saulo i ana auauna: “Ia saʻili mai mo aʻu se matai fafine o lē e saʻili i agaga,+ ou te alu atu iā te ia ma fesili atu iā te ia.” Ona fai atu lea o ana auauna iā te ia: “Faauta! O loo iai se matai fafine o lē e saʻili i agaga i Enetoro.”+  Ua faafoliga+ atu e Saulo o ia o se tagata ese, ua ofu i ofu ese, ma ua ō faatasi ma tagata e toʻalua; ua latou ō atu i le fafine i le pō.+ Ona ia fai atu lea: “Faamolemole, inā vavalo+ ia mo aʻu ma saʻili i agaga, ia e ave aʻe foʻi le tagata lea o le a ou fai atu ai iā te oe.”  Peitaʻi, ua fai mai le fafine iā te ia: “Ua e iloa lelei lava le mea na faia e Saulo, na ia aveesea mai i le nuu o ē e saʻili i agaga, ma ē e vavalo i mea e tutupu.+ Aiseā foʻi ua e taumafai ai e maileia aʻu ina ia ou oti ai?”+ 10  Ona tautō atu lea o Saulo iā te ia i le suafa o Ieova, ua faapea atu: “O loo soifua Ieova,+ e lē oo lava le faasalaga iā te oe ona o lenei mea!” 11  Ua fai mai le fafine: “O ai ou te ave aʻe mo oe?” Ona ia faapea atu lea: “Ia ave aʻe mo aʻu Samuelu.”+ 12  Ina ua vaai le fafine iā “Samuelu,”*+ ona ia alaga leotele lea ma faapea ane iā Saulo: “Aiseā ua e faaseeina ai aʻu, a o oe lava o Saulo?” 13  A ua fai atu le tupu iā te ia: “Aua e te fefe, o le ā le mea na e vaaia?” Ua fai mai le fafine iā Saulo: “Na ou vaaia se atua+ o alu aʻe mai i le eleele.” 14  Ua ia faapea atu i le fafine: “E faapeʻī ona foliga?” A ua tali mai o ia: “O se toeaina o loo alu aʻe, o loo fai lona ofu talaloa.”+ Ua iloa ai e Saulo o “Samuelu”+ lea, ona punou lea o ia i le eleele ma ifo. 15  Ua fai mai “Samuelu” iā Saulo: “Aiseā ua e faalavelave mai ai iā te aʻu i le ave aʻe o aʻu?”+ Ona fai atu lea o Saulo: “Ua ou matuā puapuagatia,+ ua siitaua mai Filisitia iā te aʻu, ma ua afio ese+ le Atua mai iā te aʻu, ua lē toe tali mai foʻi e ala i perofeta po o ni miti;+ o lea ua ou valaau atu ai iā te oe ina ia e faailoa mai le mea ou te faia.”+ 16  Ona fai mai lea o “Samuelu”: “Aiseā ua e fesili mai ai iā te aʻu, a ua afio ese Ieova mai iā te oe+ ma ua fai o ia ma ou fili?+ 17  E faia lava e Ieova mo ia e pei ona ia fetalai mai ai iā te aʻu, e saeeseina e Ieova le malo mai i ou lima,+ ma avatu i lou uso a tagata o Tavita.+ 18  Auā ua e lē usitaʻi i le siʻufofoga o Ieova,+ e te leʻi faaoo foʻi lona toʻasā iā Amaleka,+ o le mea lea ua faia ai e Ieova lenei mea iā te oe i le asō. 19  E tuuina atu foʻi e Ieova Isaraelu faapea ma oe i lima o Filisitia,+ a o taeao e tatou te faatasi ai, o oe+ ma ou atalii.+ E tuuina atu foʻi e Ieova le ʻautau a Isaraelu i lima o Filisitia.”+ 20  Ona faapaʻū ifo loa lea o Saulo ma taatia faasasaʻo i le eleele, ua matuā fefe lava ona o upu a “Samuelu.” Ua leai foʻi se malosi o iā te ia, auā ua alu le aso ma le pō atoa e leʻi ʻai o ia. 21  Ua sau le fafine iā Saulo ma ua vaaia o ia, ua matuā atuatuvale lava. Ona ia fai mai lea iā te ia: “Ua faalogo lau auauna fafine i lou siʻufofoga, na ou tuu foʻi loʻu ola i se tulaga lamatia+ ma usitaʻi i upu na e fetalai mai ai. 22  O lenei, inā faalogo mai ia i upu a lau auauna fafine; seʻi oʻu laulauina atu mo oe sina meataumafa e te taumafa ai, ina ia e malosi ai ma e maliu atu i lou ala.” 23  A ua musu o ia, ua faapea atu: “Ou te lē ʻai.” Peitaʻi, ua faatauanau atu pea iā te ia o ana auauna ma le fafine. Mulimuli ane, ona ia faalogo lea i a latou upu, ua tulaʻi mai i le eleele ma nofo i le nofoa. 24  Na iai le tamaʻi povi peti+ a le fafine i totonu o le fale. Ona ia fasi*+ faavave lea, ua ia ave le falaoamata ma palu, ma tao ai falaoa e lē faafefeteina. 25  Ua ia laulau atu iā Saulo ma ana auauna, ma ua latou aai ai. Mulimuli ane, ua tulaʻi i latou ma ō ese i lenā pō.+

Faamatalaga Pito i Lalo

O lenei tala o loo faaalia ai manatu o le faataulāitu, o lē na faasesēina e le temoni lea na faafoliga mai o ia o Samuelu.
I le gagana Eperu, “e fai ai le taulaga.”