Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

1 Samuelu 23:1-29

23  Ua latou taʻu atu iā Tavita e faapea: “O lea ua ō mai Filisitia e tau ma Kaila,+ ma ua latou faoa saito mai i le mea e soli ai saito.”+  Ona fesili+ atu lea o Tavita iā Ieova, ua faapea atu: “Po ou te alu atu ea e fasi i na Filisitia?” Ua tali mai Ieova iā Tavita: “Inā alu ia e fasi Filisitia, ma e faaola iā Kaila.”  Ua fai mai tagata o Tavita iā te ia: “Faauta! Ua tatou fefefe a o iai i nei i Iuta,+ ma e sili atu la ona tatou fefefe pe a tatou ō atu i Kaila, e tau ma itu taua a Filisitia!”+  Ua toe fesili atu foʻi Tavita iā Ieova.+ Ona tali mai lea o Ieova iā te ia e faapea: “Inā tulaʻi ia ma alu ifo i Kaila, auā ou te tuuina atu Filisitia i lou lima.”+  Ua ō atu Tavita ma ona tagata i Kaila, ua tau ma Filisitia, ua latou faoa foʻi a latou lafumanu, ma ua latou fasia i latou i le fasiga tele; ua avea Tavita ma faaola i ē o loo nonofo i Kaila.+  Ina ua sola atu Aviata+ le atalii o Aimeleka iā Tavita i Kaila, sa ia alu ifo ma se efota+ i lona lima.  I le taimi lea, na taʻu atu ai iā Saulo e faapea: “Ua alu atu Tavita i Kaila.”+ Ona faapea lea o Saulo: “Ua faatauina mai o ia e le Atua i loʻu lima,+ auā ua ia punitia o ia i lona alu atu i se aai e iai ona faitotoʻa ma faamaufaalava.”  Ona faapotopoto faatasi lea e Saulo o le nuu uma ina ia ō e tau, ia ō ifo i Kaila e osofaʻia Tavita ma ona tagata.  Ua iloa foʻi e Tavita ua faia e Saulo se togafiti leaga+ iā te ia. Ona ia fai atu lea iā Aviata le ositaulaga: “Seʻi aumai i inei le efota.”+ 10  Ona fai atu lea o Tavita: “Ieova e, le Atua o Isaraelu,+ ua faalogo lava lau auauna ua saʻili Saulo e sau i Kaila, e faaumatia le aai ona o aʻu.+ 11  Pe e tuuina atu ea aʻu e tagata o Kaila e ona fanua i lona lima? Pe e alu ifo ea Saulo e pei ona faalogo i ai lau auauna? Ieova e, le Atua o Isaraelu, ia taʻu mai i lau auauna faamolemole.” Ona fetalai mai lea o Ieova: “E alu ifo lava o ia.”+ 12  Ua fai atu Tavita: “Pe e tuuina atu ea aʻu ma oʻu tagata e tagata o Kaila e ona fanua i lima o Saulo?” Ona fetalai mai lea o Ieova: “E latou te tuuina atu lava outou.”+ 13  Ona tulaʻi loa lea o Tavita ma ona tagata e tusa ma le toʻaono selau tane,+ ma ō ese mai i Kaila, ua latou savavali pea po o fea lava e ō i ai. A ua taʻu atu iā Saulo ua sola ese Tavita mai i Kaila, ona ia lē toe alu atu ai lea. 14  Ua nofo Tavita i le toafa i nofoaga e faigatā ona sao i ai se tasi, ua nofo ai pea o ia i le vaega maugā i le toafa o Sifi.+ Ua faaauau+ ona saʻili Saulo iā te ia, ae e leʻi tuuina atu o ia e le Atua i lona lima.+ 15  Ua fefe pea Tavita auā ua saʻili Saulo e fasiotia o ia, a o iai Tavita i le toafa o Sifi i Horesa.+ 16  Ua tulaʻi Ionatana le atalii o Saulo ma alu atu iā Tavita i Horesa, ina ia faamalosia+ e ia lona faatuatua i le Atua.+ 17  Ua fai mai o ia iā te ia: “Aua e te fefe;+ auā e lē maua oe e le lima o Saulo loʻu tamā, e avea lava oe ma tupu+ o Isaraelu, o aʻu foʻi ou te pito atu iā te oe; ua iloa lava e Saulo loʻu tamā lenā mea.”+ 18  Ona la osia lea o le feagaiga+ i luma o Ieova; ua nofo pea Tavita i Horesa, a ua alu Ionatana i lona fale. 19  Mulimuli ane, ona ō aʻe ai lea o tagata o Sifi+ iā Saulo i Kipea,+ ua faapea atu: “Pe e lē o lafi+ ea Tavita e latalata ane iā i matou, i nofoaga e faigatā ona sao i ai se tasi i Horesa,+ i le aʻega o Hakila+ o loo i le itu taumatau o Iesimoni?+ 20  O lenei, le tupu e, pe a tusa ma lou finagalo,+ inā maliu ifo ia, maliu ifo e matou te tuuina atu ai o ia i le lima o le tupu.”+ 21  Ona fai mai lea o Saulo: “Ia faamanuia Ieova iā te outou,+ auā ua outou alolofa mutimutivale iā te aʻu. 22  Faamolemole, inā ō ia ma ia finafinau atili, ia faamautinoa ma iloa le mea e alu i ai o ia, o ai lava e vaai iā te ia i inā, auā ua faailoa mai iā te aʻu o ia o se tagata e faitogafiti poto.+ 23  Ia iloa ma faamautinoa nofoaga uma e lafi ai o ia; ona outou foʻi mai lea iā te aʻu ma le tonu, ona tatou ō faatasi lea; afai e iai o ia i le nuu, ou te matuā saʻili iā te ia i le faitau afe+ o tagata o Iuta.” 24  Ona latou tulaʻi lea ma ō atu i Sifi+ e muamua atu iā Saulo, a o Tavita ma ona tagata, o loo iai i le toafa o Meona+ i Arapa,+ i le itu i saute o Iesimoni. 25  Ua ō atu Saulo ma ona tagata e saʻili iā te ia.+ Ina ua latou taʻu atu iā Tavita, ona alu ifo vave ai lea o ia i le papa+ ma nofo ai pea i le toafa o Meona. Ina ua faalogo i ai Saulo, ona alu atu lea o ia e tuliloa+ iā Tavita i le toafa o Meona. 26  Ua alu atu Saulo i le tasi itu o le mauga, a o iai Tavita ma ona tagata i le isi itu o le mauga. Ona alu ese faavave+ lea o Tavita ona o Saulo; a o le taimi lenā ua siʻosiʻomia ai e Saulo ma ona tagata, ia Tavita ma ona tagata e puʻe iā i latou.+ 27  A ua sau se avefeʻau iā Saulo, ua faapea mai: “Ia vave ona e alu atu, auā ua osofaʻia e Filisitia le nuu!” 28  Ona toe foʻi lea o Saulo mai i le tuliloaina o Tavita,+ ua alu atu e faafetaiaʻi iā Filisitia. O le mea lea ua latou faaigoa ai lea nofoaga, o le Papa na Tuueseese ai. 29  Ua alu aʻe Tavita mai i inā, ma nofo i nofoaga e faigatā ona sao i ai se tasi, i Enokati.+

Faamatalaga Pito i Lalo