Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

1 Samuelu 20:1-42

20  Ona sola ese+ ai lea o Tavita mai i Naiota i Rama. A ua sau o ia ma fai atu i luma o Ionatana: “O le ā se mea ua ou faia?+ O le ā soʻu sesē, ma o le ā foʻi se agasala ua ou faia i luma o lou tamā, ua saʻili ai o ia e fasiotia aʻu?”  Ua fai mai o ia iā te ia: “Ia mamao lenei mea!+ E te lē oti. Faauta! E lē faia e loʻu tamā se mea telē po o se mea itiiti ae e lē taʻu maia i oʻu taliga;+ aiseā foʻi e nanā ai e loʻu tamā lenei mea mai iā te aʻu?+ E lē tupu lenei mea.”  A ua toe tautō+ Tavita ma faapea atu: “Ua iloa lelei e lou tamā e te fiafia iā te aʻu,+ ma ua faapea ifo iā te ia lava, ‘Aua le faailoaina atu iā Ionatana lenei mea ina neʻi tigā ai lona loto.’ Ae o le mea moni, o loo soifua Ieova,+ ua e soifua foʻi,+ e moni lava e lē o toe mamao ona ou oti lea!”+  Ona fai mai lea o Ionatana iā Tavita: “O so o se mea lava e te fai mai ai, ou te faia lava mo oe.”  A ua fai atu Tavita iā Ionatana: “Faauta! O a taeao o le masina faatoʻā vaaia,+ e ma te nonofo faatasi ai ma le tupu e ma te aai; ia e auina ese atu aʻu ou te lafi+ i le fanua seʻia oo i le afiafi o le aso lona tolu.  Afai e misia e lou tamā aʻu, ona e fai atu lea, ‘Na faanoi mai Tavita iā te aʻu seʻi tamoʻe atu i Peteleema+ lona aai, auā o loo fai ai se taulaga i tausaga taʻitasi mo le aiga uma.’+  Afai e faapea mai o ia, ‘Ua lelei!’ o lona uiga o le filemu mo lau auauna. Ae afai e ita o ia, ona iloa lea e iai se mea leaga ua manatu i ai o ia.+  Ia e alofa faamaoni foʻi i lau auauna,+ auā na e osia ma lau auauna se feagaiga+ i luma o Ieova. Ae afai ua iai se mea ua ou sesē ai,+ ia e fasiotia aʻu, aiseā foʻi e te avatu ai aʻu i lou tamā?”  Ona fai mai lea o Ionatana: “Ia mamao lenā mea mai iā te oe! Ae afai ou te iloa e iai se mea leaga ua manatu i ai loʻu tamā e faia iā te oe, po ou te lē taʻu atu ea lenā mea iā te oe?”+ 10  Ua fai atu Tavita iā Ionatana: “O ai na te taʻuina mai iā te aʻu pe na tali ma le ita mai lou tamā iā te oe?” 11  A ua fai mai Ionatana iā Tavita: “Sau ia ta ō atu i le fanua.” Ona la ō ai lea i le fanua. 12  Ua fai mai Ionatana iā Tavita: “Ia fai Ieova le Atua o Isaraelu+ ma molimau,+ o a taeao ou te tofotofo ai i loʻu tamā i le taimi faapenei, po o le aso lona tolu, afai e fiafia o ia iā Tavita, po ou te lē auina atu ea se tasi iā te oe ma taʻu atu iā te oe? 13  Ia faia e Ieova iā Ionatana ma ia faaopoopo i ai,+ pe afai ua manatu loʻu tamā e fai se mea leaga iā te oe, ae ou te lē faailoaina atu iā te oe ma auina ese atu oe, ma e te lē alu ma le filemu. Tau ina ia faatasi Ieova ma oe,+ e pei ona ia faatasi ma loʻu tamā.+ 14  Ae afai ou te ola pea,+ pe e te lē faaalia ea le alofa faamaoni o Ieova iā te aʻu, ina ia ou lē oti ai?+ 15  E te lē tuua foʻi lou alofa faamaoni i loʻu aiga i aso uma lava.+ Afai e tafiesea e Ieova fili o Tavita, o tagata taʻitoʻatasi mai i le laueleele, 16  e lē tineia lava le igoa o Ionatana mai i le aiga o Tavita.+ Ia tauia e Ieova fili o Tavita.” 17  Ona toe tautō lea o Ionatana iā Tavita ona o lona alofa iā te ia; auā ua ia alofa iā te ia e pei o ia lava.+ 18  Ua fai mai Ionatana iā te ia: “O a taeao o le masina faatoʻā vaaia,+ e misia lava oe auā o le a lē nofoia lou nofoa. 19  O le mea moni, o le a misia lava oe i le aso lona tolu; a ia e sau i le mea na e lafi+ ai i le aso e fai ai galuega, ma e nofo ai i tafatafa o le maa lenei. 20  A o aʻu, ou te fanaina atu ni aū se tolu i le isi itu o le maa, e peiseaʻī o loo oʻu fana atu i se manulauti. 21  Faauta! Ou te auina atu le auauna ma faapea atu, ‘Alu e saʻili aū.’ Afai ou te faapea atu i le auauna, ‘Faauta! O loo i ou tala mai aū, ia e tago i ai,’ ona e sau lea auā ua e maua le filemu, o loo soifua Ieova, e leai se mea e tupu.+ 22  Ae afai ou te fai atu i le tauleʻaleʻa, ‘Faauta! O loo mamao aū mai iā te oe,’ ona e alu lea auā ua auina ese atu oe e Ieova. 23  O upu foʻi ua ta tautatala ai,+ vaai! tau ina ia iai Ieova i lo ta va i aso uma lava.”+ 24  Ua lafi Tavita i le fanua.+ Ua oo i le masina faatoʻā vaaia, ona nofo lea o le tupu e fai lana taumafataga.+ 25  Ua nofo le tupu i lona nofoa e pei o isi aso, i le nofoa i tafatafa o le puipui; ma o loo faafesagaʻi ma Ionatana, a o Apineru+ o loo nofo i tafatafa o Saulo; a ua lē nofoia le nofoa o Tavita. 26  E leʻi fai mai e Saulo se upu i lenā aso, auā ua ia faapea ifo iā te ia: “Ai ua tupu se mea ua lē mamā ai o ia,+ auā e leʻi faamamāina o ia.” 27  Ua aulia le isi aso o le masina faatoʻā vaaia, o le aso lona lua lea, a ua lē nofoia lava le nofoa o Tavita. Ona fai mai lea o Saulo i lona atalii o Ionatana: “Aiseā ua lē sau ai le atalii o Iese+ ananafi ma le asō i le taumafataga?” 28  Ua tali atu Ionatana iā Saulo: “Na faanoi mai lava Tavita iā te aʻu seʻi alu atu i Peteleema.+ 29  Ua ia fai mai, ‘Faamolemole, seʻi tuu mai aʻu ou te alu auā ua fai le taulaga a lo matou aiga i le aai, na poloaʻi mai ai foʻi loʻu uso iā te aʻu. O lenei, afai e lelei iā te oe, faamolemole ia e tuu mai aʻu seʻi oʻu alu e vaai oʻu uso.’ O le mea lea, ua lē sau ai o ia i le laoai a le tupu.” 30  Ona matuā ita+ ai lea o Saulo iā Ionatana ma faapea atu iā te ia: “O oe le tama a le fafine fouvale,+ po ou te lē iloa lelei ea o lou filifili e ʻau ma le atalii o Iese ua faalumaina ai oe, ma ua faalumaina ai foʻi le lē lavalavā o lou tinā?+ 31  Auā o aso uma e ola ai le atalii o Iese i le fogāeleele, e lē faatumauina ai oe ma lou malo.+ O lenei, ia aami o ia ma aumai iā te aʻu, auā e tatau ona oti o ia.”+ 32  Peitaʻi, ua tali atu Ionatana iā Saulo lona tamā, ua faapea atu iā te ia: “Aiseā e fasiotia ai o ia?+ O le ā lana mea ua fai?”+ 33  Ona velo ai lea e Saulo o le tao ina ia lavea ai o ia;+ ua iloa foʻi e Ionatana ua uma ona fai le faaiʻuga a lona tamā ina ia fasiotia Tavita.+ 34  Ona alu ese ai lea o Ionatana mai i le laulau, ua matuā ita lava,+ e leʻi ʻai foʻi e ia se meaʻai i le aso lona lua ina ua mavae le masina faatoʻā vaaia, talu ai ua tigā o ia ona o Tavita,+ auā ua faalumaina o ia e lona lava tamā.+ 35  Ua oo i le taeao, ona alu lea o Ionatana i lona ala i le fanua i le mea na tuutala ai ma Tavita,+ sa faatasi foʻi ma ia se auauna talavou. 36  Ua ia fai atu i lana auauna: “Faamolemole, ia momoʻe e saʻili ū ou te fanaina atu.”+ Ua tamoʻe le auauna, ona ia fana atu lea o ū i ona tala atu. 37  Ina ua oo atu le auauna i le mea na fana atu i ai e Ionatana le aū, ona valaau atu lea o Ionatana mai i tua o le auauna, ua faapea atu: “Pe e lē o mamao ea le aū mai iā te oe?”+ 38  Ua valaau atu pea Ionatana mai i tua o le auauna: “Faatopetope! Ia vave lau gaoioi! Aua e te tū!” Ona alu lea o le auauna a Ionatana, ua ao aū ma toe sau i lona matai. 39  E lē o iloa lava e le auauna le mea o loo tupu; e na o Ionatana ma Tavita ua la iloa le mea o loo tupu. 40  Ua mavae lea mea, ona tuu atu lea e Ionatana o ana auupega i le auauna, ma faapea atu iā te ia: “Inā alu ia, ma ave mea na i le aai.” 41  Ua alu le auauna. A ua tulaʻi Tavita mai i le mea e latalata ane i le itu i saute. Ona ia faapaʻū faō lea i le eleele+ ma ifo faatolu; ua la feasogi+ ma fetagisi, ua sili atu foʻi ona tagi Tavita.+ 42  Ona fai mai lea o Ionatana iā Tavita: “Alu ia ma le filemu+ auā ua uma ona ta tautō+ i le suafa o Ieova e faapea, ‘Ia iai Ieova i lo ta va, atoa foʻi ma laʻu fanau ma lau fanau i aso uma lava.’ ”+ Ona tulaʻi lea o Tavita ma alu i lona ala, a ua alu atu Ionatana i le aai.

Faamatalaga Pito i Lalo