Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

1 Samuelu 17:1-58

17  Ua faapotopoto faatasi e Filisitia+ a latou ʻautau mo le taua. Ina ua latou faapotopoto faatasi i Suka+ o i Iuta, ona latou tolauapi lea i le va o Suka ma Aseka,+ i Efesetame.+  Ua faapotopoto faatasi Saulo ma tagata Isaraelu, ua latou tolauapi i le fanua laugatasi o Ele,+ ua latou faapotopoto faatasi e tau ma Filisitia.  Ua tutū Filisitia i le mauga i le tasi itu, ae tutū Isaraelu i le mauga i le isi itu, e iai le vanu e va ai i latou.  Ona alu ane ai lea o le toa mai i ʻautau a Filisitia, o Koliata+ lona igoa, e mai i Kata,+ ma o lona maualuga foʻi e ono kupita* ma le aga* e tasi.+  Sa i lona ulu le pulou ʻapamemea, na fai foʻi lona ofutau uʻamea e iai una o iʻa, o le mamafa o le ofutau uʻamea+ e lima afe sekeli o ʻapamemea.  Sa iai ufivae ʻapamemea i ona vae, ma le tao+ ʻapamemea i lona va i tauʻau.  O le fuata o lona tao e telē e pei o le laau faalava a ē e lalaga ʻie,+ o le matatao o lona tao e ono selau sekeli uʻamea; o loo muamua atu iā te ia lē e aveina lona talipupuni telē.  Ona ia tū lea ma valaau mai i le itu taua a Isaraelu,+ ua faapea mai iā i latou: “Aiseā ua outou faapotopoto faatasi ai e ō mai e tau? Pe e lē o aʻu ea o le Filisitia, a o outou o auauna+ a Saulo? Inā filifili ia so outou tagata, ma tuu e alu ifo iā te aʻu.  Afai e mafai ona ia tau ma aʻu ma e na te fasiotia aʻu, ona fai lea o i matou ma a outou auauna. Ae afai ou te manumalo iā te ia, ma ou fasiotia o ia, ona fai lea o outou ma a matou auauna, e auauna mai iā i matou.”+ 10  Ona fai mai lea o le Filisitia: “Ou te luʻia+ le itu taua a Isaraelu i le asō. Inā tuu mai ia iā te aʻu o se tagata ma te tau!”+ 11  Ina ua faalogo Saulo+ ma Isaraelu uma i upu a le Filisitia, ona palaaai ai lea ma ua matuā fefefe.+ 12  O Tavita o le atalii o le tagata Efarata+ mai i Peteleema o Iuta, o lona igoa o Iese. E toʻavalu ona atalii.+ Na avea foʻi o ia ma toeaina i aso o Saulo. 13  Ma na ō ai atalii matutua e toʻatolu o Iese. Ua latou mulimuli iā Saulo i le taua,+ ma o igoa o ona atalii e toʻatolu na ō i le taua, o Eliapo+ le ulumatua, o Apinatapa+ le atalii lona lua, a o Saama+ o le lona tolu lea. 14  O Tavita o le uii,+ ma ua mulimuli atu foʻi atalii matutua e toʻatolu iā Saulo. 15  Ua alu pea Tavita e leoleo mamoe+ a lona tamā i Peteleema, ma toe foʻi mai iā Saulo. 16  Ua faaauau pea ona sau le Filisitia i le taeaopō ma le afiafi, ma tū mai i aso e fā sefulu. 17  Ua fai mai Iese i lona atalii o Tavita: “Ia avatu i ou uso lenei efa o saito tunu,+ ma falaoa e sefulu, ma ave faavave i le togālauapi i ou uso. 18  Ia e ave tufaaga e sefulu o le suāsusu i le taʻitaʻiʻau o le taʻitoʻaafe;+ ia e vaai foʻi po o manuia+ ou uso, ma ia e taʻu mai se tala mai iā i latou.” 19  O le taimi lenā o loo tau ai Saulo, o i latou ma tagata Isaraelu uma i le fanua laugatasi o Ele,+ o loo tau ma Filisitia.+ 20  Ua tulaʻi Tavita i le taeaopō, ua ia tuuina atu mamoe e vaai e le leoleo mamoe, ua ia ave foʻi mea ma alu e pei ona poloaʻia ai o ia e Iese.+ Ina ua oo o ia i le mea e tolauapi ai fitafita,+ o loo sauni le ʻautau e tau,+ ua latou alalaga foʻi mo le taua. 21  Ua sauni Isaraelu ma Filisitia e tau, ma ua faafesagaʻi itu taua. 22  Ona tuu faavave atu lea e Tavita o le ato+ i lē e leoleoina ato,+ ma tamoʻe atu i le itu taua. Ina ua alu atu, ona ia fesili lea po o ā mai ona uso.+ 23  A o tautala atu o ia iā i latou, vaai! ua alu aʻe le toa o Koliata+ lona igoa, o le Filisitia mai i Kata,+ ua alu aʻe o ia mai i le itu taua a Filisitia, ma ua tautala atu o ia e pei o ana upu muamua,+ ua faalogo foʻi i ai Tavita. 24  Ina ua vāai tagata uma o Isaraelu i le tagata, ona latou sosola ai lea i ona luma, ua matuā fefefe foʻi.+ 25  Ua fai ane tagata o Isaraelu: “Po ua outou vāai ea i le tagata ua alu aʻe? Auā ua alu aʻe o ia e faifai+ iā Isaraelu. O le tagata e na te fasiotia o ia, e faatamaoaigaina o ia e le tupu i ʻoa e tele, e foaʻi atu e le tupu lona afafine mo ia,+ e faasaʻoloto foʻi le aiga o lona tamā i Isaraelu.”+ 26  Ua fai atu Tavita i tagata na tutū e latalata ane iā te ia: “O le ā se mea e faia i le tagata e na te fasiotia lenā Filisitia,+ ma aveesea ai le faalumaina o Isaraelu?+ O ai lenei Filisitia lē peritomeina+ ua ia faifai+ le itu taua a le Atua soifua?”+ 27  Ona fai mai lea o tagata o upu lava na iā te ia: “E faapea lava ona faia i le tagata e na te fasiotia o ia.” 28  Ua faalogo Eliapo+ lona uso ulumatua a o ia tautala atu i tagata, ona matuā ita ai lea o Eliapo iā Tavita,+ ua ia fai mai: “Aiseā ua e sau ai? O ai foʻi ua e tuua e vaaia mamoe i le toafa?+ Ua ou iloa lelei lou faamaualuga ma le leaga o lou loto,+ auā ua e sau lava e fia matamata i le taua.”+ 29  Ona fai atu lea o Tavita: “O le ā laʻu mea ua fai? E na o loʻu fesili atu lava.”+ 30  Ua ia liliuese mai iā te ia, ae faasaga atu i le isi ma fai atu upu lava ia na ia faia muamua,+ na tali mai foʻi tagata i le tali lava lea e tasi.+ 31  Ua faalogo tagata i upu a Tavita, ma ua latou ō ma taʻu atu iā Saulo. Ona ia aami lea o ia. 32  Ua fai atu Tavita iā Saulo: “Aua neʻi vaivai le loto o se tasi.+ O le a alu atu lau auauna e tau ma lenei Filisitia.”+ 33  A ua fai mai Saulo iā Tavita: “E lē mafai ona e alu e te tau ma lenei Filisitia,+ auā o oe o le tamaitiiti,+ a o ia o le tagata tau mai lava a o laʻitiiti.” 34  Ua tali atu Tavita iā Saulo: “Sa avea lau auauna ma leoleo mamoe o le lafu a lona tamā, sa iai foʻi le leona+ ma le pea, na taʻitasi ma ave se mamoe mai i le lafu. 35  Ona ou tuliloa lea i ai, ma fasi+ i ai, ma laveaʻi le mamoe mai i lona gutu. Ina ua oso mai iā te aʻu, ona ou tago atu lea i lana ʻava, ma fasimate. 36  Na fasimate e lau auauna le leona ma le pea; ma e avea foʻi lenei Filisitia+ lē peritomeina e pei o se tasi o i laʻua, auā ua ia faifai+ i le itu taua+ a le Atua soifua.”+ 37  Ua toe faapea atu Tavita: “O Ieova na laveaʻia aʻu mai i lima o le leona ma lima o le pea, o ia foʻi e na te laveaʻia aʻu mai i lima o lenei Filisitia.”+ Ona fai mai lea o Saulo iā Tavita: “Inā alu ia, tau ina ia faatasi Ieova iā te oe.”+ 38  Ua faaofu e Saulo Tavita i lona ofu, ua ia tuu foʻi le pulou ʻapamemea i lona ulu, ma tuu iā te ia le ofutau uʻamea. 39  Ua fusi e Tavita lana pelu i luga o lona ofu, ma taumafai e alu ae e leʻi mafai, ona e leʻi masani ai o ia. Ona fai atu lea o Tavita iā Saulo: “E lē mafai ona ou alu ma nei mea, auā ou te lē masani ai.” Ona aveese lea e Tavita o nei mea mai iā te ia.+ 40  Ua ia ave i lona lima o lona tootoo, ma filifili mo ia lava o maa e sili ona lamolemole e lima mai i le ālia, ma tuu i le ato a le leoleo mamoe sa iā te ia, sa i lona lima foʻi lana maatā.+ Ona ia faalatalata atu lea i le Filisitia. 41  Ua sau le Filisitia, ua latalata mai iā Tavita, ma o loo muamua mai iā te ia o le tagata e aveina le talipupuni telē. 42  Ina ua vaai mai le Filisitia ma iloa ai Tavita, ona ia ʻinoʻino+ ai lea iā te ia, auā o ia o se tamaitiiti+ ma e lanu enaena lona paʻu,+ e aulelei+ foʻi o ia. 43  Ua faapea mai le Filisitia iā Tavita: “Po o aʻu ea o se taʻifau+ ua e sau ai ma le tootoo?” Ona fetuu lea e le Filisitia o Tavita i ona atua.+ 44  Ua fai mai le Filisitia iā Tavita: “Sau ia iā te aʻu, ou te tuuina atu lou tino i manufelelei o le lagi ma manu o le fanua.”+ 45  Ona fai atu lea o Tavita i le Filisitia: “E te sau iā te aʻu ma le pelu, ma tao+ e lua, ae ou te alu atu iā te oe i le suafa o Ieova o ʻau,+ o le Atua o itu taua a Isaraelu, o lē ua e faifai i ai.+ 46  O le asō e tuuina mai ai oe e Ieova i loʻu lima,+ ou te fasia oe ma vavaeese lou ulu; ou te foaʻi atu foʻi i le asō o tino oti o le ʻautau a Filisitia i manufelelei o le lagi ma manufeʻai o le laueleele;+ e iloa ai e tagata uma o le lalolagi e iai le Atua o Isaraelu.+ 47  E iloa ai foʻi e lenei faapotopotoga atoa, e lē faaolaina e Ieova tagata i le pelu po o le tao,+ auā e iā Ieova le taua,+ e na te tuuina mai lava outou i o matou lima.”+ 48  Ua tulaʻi le Filisitia ma alu ane, ua faalatalata e faafetaiaʻi iā Tavita, a ua faavave atu Tavita ma tamoʻe agaʻi i le itu taua e faafetaiaʻi le Filisitia.+ 49  Ona tago atu lea o Tavita i lana ato, ua ave aʻe ai le maa, ma ia sasau atu le maatā, ua lavea+ ai le Filisitia i lona muāulu ma ua goto le maa i lona muāulu, ona paʻū faō ai lea o ia i le eleele.+ 50  Ua sili atu le malosi o Tavita nai lo o le Filisitia i le maatā ma le maa, ua ia fasia le Filisitia ma fasiotia o ia; e leai foʻi se pelu i le lima o Tavita.+ 51  Ua tamoʻe atu pea Tavita ma tū i tafatafa o le Filisitia. Ua ia tago i lana pelu+ ma seʻi mai i lona faamoega, ua ia fasiotia o ia ina ua ia vavaeeseina lona ulu.+ Ua vāai mai Filisitia ua oti lo latou toa, ona sosola ese ai lea o i latou.+ 52  Ona tutulaʻi lea o tagata o Isaraelu ma Iuta, ua alalaga ma tuliloa+ iā Filisitia e oo atu i le vanu,+ e oo atu foʻi i faitotoʻa o Ekerona,+ ua paʻuʻū ma feoti ē na manunuʻa o Filisitia i le ala e amata mai i Saraima,+ e oo atu i Kata, e oo atu foʻi i Ekerona. 53  Ona foʻi atu lea o le fanauga a Isaraelu mai i le tuliloaina o Filisitia, ua latou faoa+ foʻi mea mai i o latou togālauapi. 54  Ona ave lea e Tavita o le ulu+ o le Filisitia ma aumai i Ierusalema, ua ia tuu foʻi ana auupega i lona faleʻie.+ 55  Ina ua vaai atu Saulo o alu atu Tavita e faafetaiaʻi le Filisitia, ona ia fai atu lea iā Apineru+ le taʻitaʻiʻau: “Apineru e, o le atalii o ai+ lenei tamaitiiti?”+ Ua tali mai Apineru: “Ua e soifua le tupu e, ou te lē iloa lava!” 56  Ona fai atu lea o le tupu: “Ia e fesili atu po o se atalii o ai lenei tauleʻaleʻa.” 57  Ina ua foʻi mai Tavita mai i le fasiotia o le Filisitia, ona ave lea o ia e Apineru ma avatu i luma o Saulo, faatasi ai ma le ulu+ o le Filisitia o loo i lona lima. 58  Ona fai mai lea o Saulo iā te ia: “O se atalii o ai ea oe?” Ua tali atu Tavita: “O le atalii o lau auauna o Iese+ le Peteleema.”+

Faamatalaga Pito i Lalo

E tusa le kupita e tasi ma le 44.5 senitimita (17.5 inisi).
Po o le 2.9 mita (9 futu 5.75 inisi).