Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

1 Samuelu 14:1-52

14  Ua oo i le tasi aso, ona fai atu lea o Ionatana+ le atalii o Saulo i le auauna e aveina ana auupega: “Sau ta ō ma sopo atu i le leoleoga a Filisitia o loo i le isi itu.” Ae e na te leʻi taʻuina atu i lona tamā.+  Sa nofo Saulo i le faatausiʻusiʻuga o Kipea+ i lalo o le laau o le rimoni, lea na i Mekerona; ua faatasi foʻi ma ia o tagata pe tusa ma le toʻaono selau.+  (O Akia le atalii o Akitopo,+ o le uso o Ikapoti,+ le atalii o Fineaso,+ o le atalii lea o Eli+ le ositaulaga a Ieova i Sailo,+ sa iā te ia le efota.)+ E leʻi iloa e le nuu ua alu Ionatana.  Ona saʻili lea e Ionatana i le va o auala se mea e sopo atu ai i le leoleoga+ a Filisitia, sa iai se papa maʻai e pei o se nifo i le isi itu, ma le papa maʻai e pei o se nifo i le isi foʻi itu, o le igoa o le tasi papa o Posese, a o le igoa o le isi o Sene.  Ua faasaga le tasi pito papa i le itu i mātū e feagai ma Mekemase,+ a ua faasaga le isi i le itu i saute e feagai ma Kepa.+   Ua fai atu Ionatana i le auauna na aveina ana meatau: “Sau seʻi o ta sopo atu i le leoleoga a lenei nuu lē peritomeina.+ Atonu e fesoasoani mai Ieova iā i taʻua, auā e lē faigatā iā Ieova ona faaolaina, e ala i ni tagata e toʻatele pe toʻaitiiti.”+  Ona fai mai lea o lē e aveina ana meatau iā te ia: “Ia faia le mea e te loto i ai. Inā alu ia i le mea e te manaʻo i ai. O aʻu lenei, ou te faatasi ma oe i mea uma e te finagalo i ai.”+  Ua fai atu Ionatana: “Ua ta ō atu nei i le nuu, seʻi o ta faailoa atu i taʻua iā i latou.  Afai latou te fai mai iā i taʻua, ‘Ia tutū i inā seʻia matou ō atu iā te oulua!’ ona ta tutū ai lea, aua neʻi o ta ō aʻe iā i latou. 10  Ae afai e latou te faapea mai, ‘Ō aʻe ia tatou te tau!’ ona ta ō aʻe ai lea auā e tuuina mai lava i latou e Ieova i o ta lima, ma o le faailoga lenei mo i taʻua.”+ 11  Ua la faailoa atu i laʻua i le leoleoga a Filisitia. Ona fai ane lea o Filisitia: “O tagata Eperu nei ua ō mai i fafo mai i lua na latou lalafi ai.”+ 12  Ona tali atu lea o tagata o le leoleoga iā Ionatana ma lē e aveina ana meatau: “Ia ō aʻe i luga iā i matou, lua te vāai i le mea e matou te faia iā te oulua!”+ Ona fai atu lea o Ionatana i lē e aveina ana meatau: “Ia e mulimuli mai iā te aʻu, auā e tuuina mai lava i latou e Ieova i lima o Isaraelu.”+ 13  Ona aʻe lea o Ionatana i ona lima+ ma ona vae, ae mulimuli atu ai iā te ia o lē e aveina ana meatau; ona latou paʻuʻū ai lea i luma o Ionatana,+ ae e mulimuli atu iā te ia o lē e aveina ana meatau ma fasiotia i latou.+ 14  O le fasiga muamua na fasia ai i latou e Ionatana ma lē e aveina ana meatau, pe tusa e toʻalua sefulu tagata e i totonu o se fasi fanua ua suatia, e ʻafa eka lona umi. 15  Ua gatete+ le ʻautau o loo i le fanua ma tagata uma o le leoleoga; ua gatete foʻi ʻautau o ē e faomea,+ ma ua lūlūina le eleele,+ ua tupu ai le gatete mai i le Atua.+ 16  Ua iloa lenei mea e tagata vāai a Saulo i Kipea+ o Peniamina, faauta! ua vāvāō itu uma.+ 17  Ona fai atu lea o Saulo i tagata na latou faatasi: “Faamolemole, ia faitau ina ia iloa po o ai ua alu ese mai iā i tatou.” Ina ua latou faitauina, faauta! e lē o iai i inā Ionatana ma lē e aveina ana meatau. 18  Ua fai atu Saulo iā Akia:+ “Ia aumai i inei le atolaau a le Atua moni!”+ (Auā sa iai le atolaau a le Atua moni i le fanauga a Isaraelu i lenā aso.)+ 19  A o tautala atu Saulo i le ositaulaga,+ a ua atili ai ona faateteleina le vāvāō o le ʻautau a Filisitia. Ona fai atu lea o Saulo i le ositaulaga: “Ia tuu ese lou lima.” 20  Ua faapotopoto faatasi Saulo ma le nuu uma sa iā te ia.+ Ona latou ō ai lea i le taua, ua taʻitasi ma faaoo le pelu i lona uso i inā;+ ua matuā tele foʻi le faanunununu. 21  E oo lava i tagata Eperu o ē na ʻau muamua iā Filisitia,+ ma ō aʻe ma i latou i le togālauapi mai i itu uma, ua latou liliu mai e ʻau ma Isaraelu o ē na faatasi ma Saulo ma Ionatana. 22  Ua faalogo foʻi tagata uma o Isaraelu na lalafi+ i le vaega maugā o Efaraima, ua sosola Filisitia, ona latou tuliloa lea o i latou i le taua. 23  Ua faaola+ e Ieova Isaraelu i lea aso, ma ua oo ane le taua i Petavene.+ 24  Ua matuā tigāina tagata o Isaraelu i lenā aso, ma ua fai atu Saulo i le nuu ia tautō+ e faapea: “Ia malaia le tagata e ʻaina se meaʻai a o leʻi oo i le afiafi, seʻia ou tauimasui+ atu i oʻu fili!” E leai se tasi o le nuu na ʻaina se meaʻai.+ 25  Ua ō mai le nuu uma i le vaomatua, ma o loo iai le meli+ i luga o le eleele. 26  Ina ua ō mai le nuu i le vaomatua, faauta! o loo tafe ai le meli,+ ae e leai se tasi o tuu lona lima i lona gutu, auā ua fefefe le nuu i le tautoga.+ 27  Ae e leʻi faalogo Ionatana ina ua faatautō+ e lona tamā le nuu, ua ia tuu atu le tumutumu o lona tootoo sa i lona lima, ua loloi i le meli ma toe faafoʻi mai lona lima i lona gutu, ma ua pupula ai ona mata.+ 28  Ona tali mai lea o le tasi tagata e faapea: “Ua faatautō e lou tamā le nuu e faapea, ‘Ia malaia le tagata e ʻaina se meaʻai i le asō!’ ”+ (Ua vaivai le nuu.)+ 29  A ua fai atu Ionatana: “Ua faalumaina+ e loʻu tamā le nuu. Vaai i le pupula o oʻu mata ina ua ou ʻai i sina meli itiiti.+ 30  Pe ana ʻaina+ e le nuu i le asō mea na vetea a o latou fili,+ semanū e sili atu lo tatou manumalo! A o lenei, ua lē tele le fasiga o Filisitia.”+ 31  Ua faaauau ona latou fasia Filisitia i lenā aso e amata mai i Mekemase+ e oo i Ailona,+ ma ua matuā vaivai le nuu.+ 32  Ua feosofi faavave atu le nuu i mea na faoa,+ ma ave mamoe, o povi, o tamaʻi povi poʻa, ma fafasi i latou i luga o le eleele, ona aai ai lea o le nuu ma le toto.+ 33  Ona latou fai atu lea iā Saulo: “Faauta! Ua agasala le nuu iā Ieova auā ua latou aai ma le toto.”+ Ona ia fai mai lea: “Pagā lo outou lē faamaoni. Ia fuli muamua mai iā te aʻu se maa tele.” 34  Mulimuli ane, ona fai mai lea o Saulo: “Ia outou feoaʻi solo i le nuu ma faapea atu iā i latou, ‘Ia taʻitasi ma aumai iā te aʻu lana povi poʻa ma lana mamoe, ia outou fasi foʻi i inei ma aai ai, ae aua neʻi outou agasala ai iā Ieova i le ʻaina ma le toto.’ ”+ Ona taʻitasi lea o le nuu ma aumai lana povi poʻa i lenā pō, ma fasia ai i inā. 35  Ua faia foʻi e Saulo se fata faitaulaga+ iā Ieova. O lea, na amata ai ona ia fausia fata faitaulaga iā Ieova.+ 36  Mulimuli ane, ua fai mai Saulo: “Seʻi o tatou ō ifo e tuliloa Filisitia i le pō, ma faaumatia i latou seʻia oo ina malama le taeao,+ aua foʻi neʻi o tatou faatotoeina se tasi o i latou.”+ Ona latou fai atu lea: “Ia faia mea uma e lelei i lou finagalo.” Ua fai ane le ositaulaga: “Seʻi o tatou faalatalata atu i le Atua moni i inei.”+ 37  Ona fesili atu lea o Saulo i le Atua: “Po ou te alu ifo ea e tuliloa Filisitia?+ Po o le a e tuuina mai ea i latou i lima o Isaraelu?”+ E leʻi tali mai foʻi o ia i lenā aso.+ 38  Ona fai mai lea o Saulo: “Ō mai ia i inei+ outou uma o alii sili o le nuu,+ ia faamautinoa ma vaai pe aiseā ua tupu ai lenei agasala i le asō. 39  Auā o loo soifua Ieova, o Lē e laveaʻiina Isaraelu, e tusa lava pe na māfua i loʻu atalii o Ionatana, ae o le a oti lava o ia.”+ E leʻi tali atu foʻi le nuu uma iā te ia. 40  Ona ia fai mai lea iā Isaraelu uma: “E tou te iai i le tasi itu, a o i maʻua ma loʻu atalii o Ionatana, e ma te iai i le isi itu.” Ona fai atu lea o le nuu iā Saulo: “Inā fai ia le mea e te finagalo i ai.”+ 41  Ua fai atu Saulo iā Ieova: “Le Atua e, o Isaraelu, inā tali mai ia e ala i le Tumema!”+ Ona maua lea o Ionatana ma Saulo, a ua ō ese le nuu.+ 42  Ua fai mai Saulo: “Ia outou faia le vili+ e filifili ai po o aʻu, po o loʻu atalii o Ionatana.” Ona maua lea o Ionatana. 43  Ua fai mai Saulo iā Ionatana: “Seʻi taʻu mai iā te aʻu, O le ā lau mea ua fai?”+ Ona taʻu atu lea e Ionatana iā te ia e faapea: “Na ou ʻaina sina meli itiiti i le tumutumu o le tootoo sa i loʻu lima.+ O aʻu lenei! Ia ou oti!” 44  Ona fai mai lea o Saulo: “Tau ina faia e le Atua ma ia faaopoopo foʻi i ai,+ pe afai e te lē oti lava+ Ionatana.” 45  A ua fai atu le nuu iā Saulo: “Po o le a oti ea Ionatana, o lē na faia lenei faaolataga+ tele i Isaraelu? Ia mamao lava lea mea!+ O loo soifua Ieova,+ e lē paʻū i le eleele se lauulu+ e tasi o lona ulu; auā sa galulue o ia ma le Atua i lenei aso.”+ Ona laveaʻiina+ lea e le nuu o Ionatana, e leʻi oti foʻi o ia. 46  Ua lē toe tuliloaina Filisitia e Saulo, ma ua ō Filisitia i lo latou nuu.+ 47  Ua faamausalī e Saulo lona tofi o se tupu i Isaraelu,+ ma siitaua i ona fili i itu uma, o Moapi,+ o le fanauga a Amoni,+ o Etoma,+ o tupu o Sopa,+ ma Filisitia;+ na ia taʻusalaina foʻi nuu uma na ia alu i ai.+ 48  Ua gaoioi o ia o se toa+ ma ua ia fasia Amaleka,+ ma laveaʻi Isaraelu mai i lima o ē na faoa a latou mea. 49  O atalii nei o Saulo, o Ionatana,+ o Iesivi, ma Makisua,+ o igoa foʻi o ona afafine e toʻalua, o le ulumatua o Merapa,+ a o le itiiti o Mekala.+ 50  O le igoa o le avā a Saulo o Ainoama, o le afafine o Aimaasu, o le igoa o lana taʻitaʻiʻau o Apineru+ le atalii o Neru, o le uso o le tamā o Saulo. 51  O Kiso+ o le tamā lea o Saulo, a o Neru+ o le tamā o Apineru, o le atalii lea o Apielu. 52  Ua faaauau ona vevela le taua ma Filisitia i aso uma o Saulo.+ Pe a iloa e Saulo se tagata malosi po o se tagata toa, e na te faaopoopoina mai o ia iā te ia.+

Faamatalaga Pito i Lalo