Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

1 Samuelu 13:1-23

13  E [?]* tausaga o Saulo ina ua amata lana nofoaiga,+ ma e lua tausaga na fai ai o ia ma tupu i Isaraelu.  Na filifilia e Saulo o tane e toʻatolu afe o Isaraelu; e toʻalua afe na faatasi ma Saulo i Mekemase+ ma i le vaega maugā o Peteli, e toʻaafe na faatasi ma Ionatana+ i Kipea+ o Peniamina, a o tagata na totoe na ia aauina ese atu, e taʻitasi ma alu i lona faleʻie.  Ona fasia lea e Ionatana o le leoleoga+ a Filisitia+ na iai i Kepa;+ ma ua faalogo ai Filisitia. Ua ili e Saulo le pū+ i le nuu atoa, ma ua faapea ane o ia: “Ia faalogo i ai tagata Eperu!”  Ua faalogo i ai Isaraelu uma e faapea: “Ua fasia e Saulo le leoleoga a Filisitia, ma ua inosia+ ai Isaraelu e Filisitia.” Ona faapotopoto faatasi lea o le nuu ma mulimuli atu iā Saulo i Kilikala.+  Ua faapotopoto faatasi Filisitia e tau ma Isaraelu, e tolu sefulu afe o kariota o le taua,+ e toʻaono afe tagata tiʻetiʻe solofanua, ma tagata e toʻatele e pei o le oneone o le matafaga;+ ua latou ō aʻe ma tolauapi i Mekemase i le itu i sasaʻe o Petavene.+  Ua iloa foʻi e tagata Isaraelu ua pagatia i latou,+ auā ua puapuagatia le nuu; ona ō lea o le nuu ma lalafi i totonu o ana,+ o lua, o va i papa, o pū e lalafi ai i le eleele, ma vaieli.  Ua sopoʻia atu foʻi e tagata Eperu o Ioritana+ e agaʻi i le nuu o Kato+ ma Kiliata. A ua nofo pea Saulo i Kilikala, ma ua gatete le nuu uma a o mulimuli atu iā te ia.+  Ua ia faatali pea i aso e fitu i le taimi atofaina na fai atu ai Samuelu;+ ae e leʻi alu atu lava Samuelu i Kilikala, ma ua taapeape le nuu mai iā te ia.  Ua fai atu Saulo: “Inā aumai ia iā te aʻu o le taulaga mū ma taulaga faifaatasi.” Ona ia ofoina atu lea o le taulaga mū.+ 10  Ina ua faatoʻā uma lava ona ia ofoina atu le taulaga mū, ae alu atu loa Samuelu. Ona alu ane lea o Saulo i fafo e faafeiloaʻi ma faamanuia atu iā te ia.+ 11  Ona fai mai lea o Samuelu: “O le ā lau mea ua fai?”+ A ua fai atu Saulo: “Na ou iloa ua taapeape tagata mai iā te aʻu,+ a o oe foʻi e te leʻi sau i le aso atofaina,+ ma ua faapotopoto faatasi Filisitia i Mekemase,+ 12  ona ou faapea ifo lea,+ ‘O le a siitaua mai Filisitia iā te aʻu i Kilikala, a o lenei ou te leʻi faamalieina le finagalo o Ieova.’ O le mea lea, na ou+ faia ai loa le taulaga mū.” 13  Ona fai atu lea o Samuelu iā Saulo: “Ua e valea ina ua e faia o lenei mea.+ Ua e lē tausia le poloaʻiga+ a Ieova lou Atua na ia poloaʻi atu ai iā te oe,+ auā ana e faia faapea, semanū ua faatumauina e Ieova lou malo iā Isaraelu i aso uma lava. 14  A o lenei, e lē tumau lou malo.+ E saʻili e Ieova se tagata e malie i ai lona finagalo;+ e tofia foʻi e Ieova o ia e avea ma taʻitaʻi+ i lona nuu, auā ua e lē tausi i le mea na poloaʻi atu ai Ieova iā te oe.”+ 15  Ona tulaʻi lea o Samuelu ma alu aʻe mai i Kilikala i Kipea o Peniamina, ona faitauina lea e Saulo o le nuu, o ē na faatasi ma ia e tusa ma le toʻaono selau tane.+ 16  A ua nonofo Saulo, ma Ionatana lona atalii, ma tagata na faatasi ma i laʻua i Kepa+ o Peniamina. A ua tolauapi Filisitia i Mekemase.+ 17  Ua osofaʻi faavave atu le ʻaufaomea mai i le togālauapi a Filisitia i ʻautau e tolu.+ Ua faasaga atu le tasi ʻau i le auala e agaʻi i Ofira,+ i le nuu o Suala, 18  ua faasaga le isi ʻau i le auala o Peteorana,+ a ua faasaga le ʻau lona tolu i le auala e agaʻi i le tuaoi e feagai ma le vanu o Sepoima, e agaʻi i le toafa. 19  Ae e leʻi iai se tagata fai uʻamea i le nuu o Isaraelu uma, auā ua faapea ane Filisitia: “Ina neʻi faia e tagata Eperu se pelu po o se tao.”+ 20  Ua ō ifo Isaraelu uma i Filisitia ina ia taʻitasi ma faamata le uʻamea o lana suōtosina, o lana piki, o lana toʻi, ma lana selesaito.+ 21  O siliva e valu kalama,* o le totogi lenā o le faamataina o uʻamea o suōtosina, o piki, o tui mata tolu, o toʻi, ma tui povi.+ 22  I le aso o le taua, e leʻi iai se pelu+ po o se tao i se tasi o tagata sa faatasi ma Saulo ma Ionatana; ae e na o Saulo+ ma Ionatana lona atalii na iai a la auupega. 23  Ua osofaʻi vave atu le leoleoga+ a Filisitia i le ala e ui atu i le mafa o Mekemase.+

Faamatalaga Pito i Lalo

E lē o maua le numera i uluaʻi tusitusiga Eperu.
I le gagana Eperu, o le phim. A faa-Samoa, o le “pime,” o le fua lea o le mamafa o se mea i aso anamua.