Skip to content

Skip to secondary menu

Skip to table of contents

Molimau a Ieova

Faa-Samoa

Tusi Paia i le Initaneti | O LE TUSI PAIA–O LE FAALILIUGA A LE LALOLAGI FOU

1 Samuelu 11:1-15

11  Ua alu aʻe Naasa le tagata Amoni+ e siitaua atu iā Iapese+ i Kiliata. Ona fai mai lea o tagata uma o Iapese iā Naasa: “Ia e osia se feagaiga ma i matou ina ia matou auauna atu iā te oe.”+  Ona fai atu lea o Naasa le tagata Amoni iā i latou: “Ou te osia se feagaiga ma outou, pe afai ou te saliesea+ o outou mata taumatau, ma ou faalumaina ai Isaraelu uma.”+  Ua fai mai toeaina o Iapese iā te ia: “Ia tuu mai iā i matou ni aso se fitu, e matou te aauina atu ai ni avefeʻau i le nuu uma o Isaraelu, afai e leai sē e faaola+ iā i matou, ona matou ō atu lea iā te oe.”  Ua ō atu avefeʻau i Kipea+ le nuu o Saulo, ma faamatala atu ia upu i tagata o le nuu, ona fetagisi leotetele ai lea o le nuu uma.+  Ua sau Saulo mai i le fanua o loo mulimuli mai i le lafu povi, ua faapea atu Saulo: “O le ā ea le mea ua tupu i le nuu ua fetagisi ai?” Ona latou faamatala mai lea iā te ia o upu a tagata Iapese.  Ina ua faalogo Saulo i nei upu, ona osofia lea o ia e le agaga+ o le Atua, ma ua matuā ita+ lava o ia.  Ona ave lea e ia o povi poʻa e lua, ma vaevae i vaega ma aauina atu i le nuu uma o Isaraelu+ i lima o ē e avefeʻau, ma faapea atu: “O se tasi o i tatou e lē mulimuli atu iā Saulo ma Samuelu, o le a faapenei ona faia i ana povi!”+ Ona matataʻu+ ai lea o le nuu ona o Ieova,+ ma latou ō atu ai e pei o se tagata e toʻatasi.+  Ua ia faitauina+ i latou i Piseka, ma o le aofaʻi o le fanauga a Isaraelu e toʻatolu selau afe, a o tagata o Iuta e toʻatolu sefulu afe.  Ona latou fai atu lea i avefeʻau na ō mai: “O le mea lenei e tou te fai atu ai i tagata o Iapese i Kiliata, ‘O a taeao e tou te maua ai le faaolataga, pe a oo ina vevela le lā.’”+ Ona ō lea o avefeʻau ma taʻu atu i tagata o Iapese, ua latou olioli ai. 10  Ua faapea mai tagata Iapese: “O a taeao e matou te ō atu ai iā te outou, ona outou faia lea iā i matou e tusa ma mea uma ua outou manatu i ai.”+ 11  I le aso na sosoo ai, na tofia ai e Saulo+ tagata i ni ʻautau se tolu;+ ua latou ō atu i le ogatotonu o le togālauapi i le leoleoga o le taeao,+ ma fasia tagata Amoni+ seʻia oo ina ua vevela le aso. Ina ua iai tagata na totoe, ua latou faataapeapeina i latou, ma ua lē toe faatasi se toʻalua o i latou.+ 12  Ua fai mai le nuu iā Samuelu: “O ai ea ua faapea ane, ‘Pe e fai Saulo ma tupu iā i matou?’+ Inā tuu mai ia o ia tagata seʻi o matou fasiotia i latou.”+ 13  A ua fai atu Saulo: “E lē tatau ona fasiotia se tagata i le asō,+ auā o le aso nei ua faia ai e Ieova le faaolataga iā Isaraelu.”+ 14  Mulimuli ane, ona fai atu lea o Samuelu i le nuu: “Ō mai ia seʻi o tatou ō i Kilikala,+ ina ia toe faafou le tofi o le tupu.”+ 15  Ona ō lea o le nuu uma i Kilikala, ua latou faia foʻi Saulo ma tupu i luma o Ieova i Kilikala. Ua latou faia taulaga faifaatasi i inā i luma o Ieova,+ ma ua matuā olioli ai Saulo ma tagata uma o Isaraelu.+

Faamatalaga Pito i Lalo