Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

1 Samuelu 1:1-28

1  Sa iai se tasi tagata i Ramata-sofimo+ i le vaega maugā o Efaraima,+ o Elekana+ lona igoa, o le atalii o ia o Ieroama, le atalii o Eliu, le atalii o Toʻu, le atalii o Sufi,+ o le tagata Efaraima.  E toʻalua ana avā, o le igoa o le tasi o Hana, a o le igoa o le isi o Penina. Sa iai le fanau a Penina, ae e leai se fanau a Hana.+  Na alu aʻe lea tagata mai i lona aai i lea tausaga ma lea tausaga e tapuaʻi+ ma fai taulaga iā Ieova o ʻau i Sailo.+ O i inā na iai atalii e toʻalua o Eli, o Hofeni ma Fineaso,+ o ositaulaga a Ieova.+  Ua oo i le aso e fai ai e Elekana le taulaga, ona ia avatu lea o tufaaga+ iā Penina lana avā, o lana fanau tama uma ma lana fanau teine;  a ua ia avatu iā Hana le tufaaga e tasi. Ua sili atu lona alofa+ iā Hana, ae peitaʻi ua punitia e Ieova lona faaautama.+  A ua matuā faatigā+ atu lava iā te ia le isi avā ina ia atuatuvale ai o ia, auā ua punitia e Ieova lona faaautama.  O le mea lenā e masani ona ia faia i lea tausaga ma lea tausaga,+ pe a alu aʻe o ia i le fale o Ieova.+ E masani ona ia faalili iā te ia, ona tagi ai lea o ia ma lē ʻai ai.  Ona fai atu lea o Elekana lana tane iā te ia: “Hana e, aiseā ua e tagi ai, aiseā ua e lē ʻai ai, aiseā foʻi ua tigā ai lou loto?+ Po ua lē sili ea aʻu iā te oe i lo o fanau tama e toʻasefulu?”+  Ona tulaʻi lea o Hana ina ua uma ona latou aai ma feinu i Sailo, a o nofo Eli le ositaulaga i le nofoa i le pou o le faitotoʻa o le malumalu+ o Ieova. 10  Ua matuā tigā lona loto,+ ona ia tatalo ai lea iā Ieova+ ma ua matuā tagi lava.+ 11  Ua ia faia se tautoga+ ma faapea atu: “Ieova o ʻau e, afai lava e te silasila mai i le tigā o lau teine pologa,+ ma manatua mai aʻu,+ e te lē faagaloina foʻi lau teine pologa ma foaʻi mai i ai se tama tama, ou te foaʻi atu o ia iā Ieova i aso uma o lona ola, e lē oo foʻi se tafi i lona ulu.”+ 12  Ua umi ona tatalo+ atu o ia i luma o Ieova, a o le taimi lea ua vaavaai atu ai Eli i lona gutu. 13  A o Hana, ua tautala o ia i lona loto;+ ua na ona memu o ona laugutu, ae e lē lagona lona leo. Ua manatu Eli ua onā+ o ia. 14  Ona fai mai lea o Eli iā te ia: “O le ā le umi e te onā ai?+ Inā alu ese ia seʻia teʻa lou onā.” 15  A ua tali atu Hana e faapea: “E leai loʻu alii e! O aʻu o le fafine ua ootia le agaga; ou te leʻi inu i se uaina po o se ʻava malosi, ae o loo sasaa atu loʻu loto i luma o Ieova.+ 16  Aua e te faia lau teine pologa e pei o se fafine e lē aogā,+ auā o le tele o mea ua ou popole ai ma loʻu lototigā, ua ou tautala atu ai nei.”+ 17  Ona tali mai ai lea o Eli, ua faapea mai: “Inā alu ia oe ma le manuia,+ tau ina ia foaʻi mai e le Atua o Isaraelu le mea na e ōle atu ai iā te ia.”+ 18  Ua ia fai atu: “Ia e manatu mai i lau auauna fafine.”+ Ona alu lea o le fafine i lona ala ma ua ʻai+ o ia, ua lē toe foliga popole foʻi o ia.+ 19  Ua latou fealapō i le taeao ma tapuaʻi atu i luma o Ieova, ona latou toe foʻi atu ai lea i lo latou fale i Rama.+ Ona momoe+ lea o Elekana ma lana avā o Hana, ma ua manatua o ia e Ieova.+ 20  Ua mavae le tausaga, ona tō ai lea o Hana ma ua fanau mai se tama tama, ua faaigoa+ foʻi iā te ia o Samuelu, auā ua ia faapea mai, “auā na ou talosaga+ atu iā Ieova mo ia.” 21  Mulimuli ane, ua alu aʻe le tagata o Elekana ma lona aiga atoa ina ia fai taulaga iā Ieova, o le taulaga e fai i tausaga taʻitasi,+ ma ofoina atu lana tautoga.+ 22  Ae e leʻi alu aʻe+ Hana, auā na fai atu o ia i lana tane: “E teʻa loa le tama ma le susu,+ ona ou avatu lea o ia, e tatau ona iai o ia i luma o Ieova ma nofo ai pea i inā i aso uma.”+ 23  Ona fai mai lea o Elekana lana tane+ iā te ia: “Ia e faia le mea ua lelei iā te oe.+ Ia e nofo i le fale seʻia e faateʻa iā te ia mai i le susu. Ia faataunuuina e Ieova lana afioga.”+ Ona nofo lea o le fafine i le fale, ma tausi lana tama seʻia oo ina teʻa o ia ma le susu.+ 24  Ina ua ia faateʻa iā te ia mai i le susu, ona la ō aʻe ai loa lea, faatasi ai ma le povi poʻa e tolu tausaga, o le efa e tasi o falaoamata, ma le fagu uaina lapoʻa,+ ma ua ulu atu o ia i le fale o Ieova i Sailo.+ Sa la faatasi ma le tama. 25  Ona latou fasi lea o le povi poʻa ma avatu le tama iā Eli.+ 26  Ua ia faapea atu: “Faamolemole loʻu alii e! o loo soifua oe+ loʻu alii e, o aʻu o le fafine lea na ta tutū faatasi i inei e tatalo iā Ieova.+ 27  O le tama lenei na ou tatalo ai iā Ieova ina ia foaʻi mai le mea na ou ōle+ atu ai iā te ia.+ 28  O aʻu foʻi, ua ou tuuina atu o ia iā Ieova.+ Ua ou tuuina atu o ia iā Ieova i aso uma lava o lona ola.” Ona ifo lea o Elekana i inā i luma o Ieova.+

Faamatalaga Pito i Lalo