Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

1 Korinito 7:1-40

7  E tusa ai ma mea na outou tusi mai ai, e lelei pe a lē tago*+ se tamāloa i se fafine;  peitaʻi ona ua taatele le faitaaga,+ ia taʻitasi le tane ma lana avā,+ ma ia taʻitasi foʻi le fafine ma lana tane.  Ia avatu e le tane i le avā le mea e tatau ai;*+ ma ia faapena foʻi le avā i lana tane.+  E lē pule le avā i lona lava tino, ae e pule ai lana tane;+ e faapena foʻi ona lē pule le tane i lona lava tino, ae e pule ai lana avā.+  Aua le faafiti le tasi i le isi i lenei mea,+ seʻiloga e malilie faatasi i se taimi ua fuafuaina,+ ina ia mafai ai ona sema se taimi mo tatalo, ma ia toe faatasi ai ina neʻi faaosoosoina+ outou e Satani ona o le lē puleaina o outou faalogona.+  A ua ou fai atu lenei mea e fautua+ atu ai iā te outou, ae e lē o se poloaʻiga.+  Ou te loto ia pei tagata uma o aʻu.+ Ae e tofu lava le tagata ma lana meaalofa+ mai i le Atua, e faapena le tasi, ae faapenei le isi.  Ou te fai atu i tagata nofofua+ ma fafine ua oti a latou tane, e sili ona lelei mo i latou ona tumau e pei foʻi o aʻu.+  Ae afai e lē mafai ona pulea i latou lava,+ e tatau ona faaipoipo,+ auā e sili atu ona lelei le faaipoipo nai lo o le mū i le manaʻo.+ 10  Ou te fai atu i ē ua faaipoipo, e lē o aʻu a o le Alii,+ e lē tatau i se avā ona tuua lana tane;+ 11  ae afai e tuua e ia lana tane, ia nofofua pea o ia pe toe faalelei ma lana tane, ma e lē tatau i le tane ona tuua lana avā. 12  A o laʻu upu lenei e fai atu i isi, o aʻu ae lē o le Alii:+ Afai e iai se uso e iai sana avā e lē talitonu, ma ua lotomalie lana avā e nonofo pea ma ia, aua neʻi tuua e ia lana avā; 13  afai foʻi e iai se fafine e iai sana tane e lē talitonu, ma ua lotomalie lana tane e nonofo pea ma ia, aua neʻi tuua e ia lana tane. 14  Auā ua faapaiaina le tane lē talitonu ona o lana avā, ua faapaiaina foʻi le avā lē talitonu ona o le uso; auā a leai, ua lē mamā a outou fanau,+ a o lenei ua paia+ i latou. 15  Ae afai e alu ese+ lē e lē talitonu, ia alu ese pea o ia, e lē faapologaina se uso po o se tuafafine i tulaga faapena, a ua valaauina outou e le Atua ina ia filemu.+ 16  O oe le avā, e te lē iloa ea e mafai ona faaolaina lau tane ona o oe?+ O oe le tane, e te lē iloa ea e mafai ona faaolaina lau avā ona o oe?+ 17  Ia taʻitasi ma savali e pei ona valaauina ai o ia e le Atua, e pei lava ona faasoa+ atu e Ieova iā te ia.+ Ua faapea foʻi ona ou faatonu+ atu i faapotopotoga uma. 18  Pe na valaauina ea se tasi a ua peritomeina o ia?+ Aua neʻi faafoliga mai e leʻi peritomeina o ia. Pe na valaauina ea se tasi ae e leʻi peritomeina o ia?+ Aua neʻi peritomeina o ia.+ 19  E lē tāua le peritome,+ ma e lē tāua foʻi le lē peritome,+ peitaʻi o le mea e tāua, o le tausia lea o poloaʻiga a le Atua.+ 20  Po o le ā lava le tulaga o se tasi ina ua valaauina+ o ia, ia tumau ai pea.+ 21  Pe na valaauina oe a o fai ma pologa? Aua neʻi e popole ai i lenā mea;+ ae afai foʻi e mafai ona faasaʻolotoina oe, ia talia lea avanoa lelei. 22  Auā o lē ua valaauina i le Alii ina o fai ma pologa, o le tagata saʻoloto+ o ia a le Alii; e faapea foʻi lē ua valaauina a o saʻoloto,+ o le pologa+ o ia a Keriso. 23  E taugatā le tau+ na faatauina ai outou; o lea soia le faia o outou ma pologa+ a tagata. 24  Le ʻauuso e, po o le ā lava le tulaga+ o se tasi ina ua valaauina o ia, ia tumau ai o ia faatasi ma le Atua. 25  Ou te leʻi maua se poloaʻiga mai i le Alii e faatatau i taupou,* ae ou te faailoa atu loʻu manatu,+ o lē na faaalia i ai le alofa mutimutivale o le Alii,+ ina ia ou faamaoni.+ 26  O lea la, o loʻu manatu e sili ona lelei o lenei mea, ona o tulaga faigatā ua iai, e sili foʻi ona lelei mo se tamāloa ona tumau pea i le tulaga ua iai o ia.+ 27  Po o noanoatia oe i se avā?+ Aua e te saʻili ina ia tatalaina.+ Po ua tatalaina oe mai i le avā? Aua le toe saʻili i se avā. 28  Ae e tusa foʻi pe e te faaipoipo, e te lē agasala ai.+ Afai e faaipoipo se tama po o se teine muli, e lē agasala o ia. Peitaʻi, o i latou e faaipoipo, e oo puapuaga i o latou tino.+ Ae o loʻu manaʻo ia lē oo na mea iā te outou. 29  Ou te fai atu iā te outou le ʻauuso e, ua itiiti le taimi o totoe.+ O i latou o ē ua iai avā, ia peiseaʻī e leai ni a latou avā,+ 30  ma o i latou o fetagisi, ia peiseaʻī e lē o fetagisi, o i latou o olioli, ia peiseaʻī e lē o olioli, o i latou foʻi o faatau mai, ia peiseaʻī e leai ni mea, 31  ma o i latou o faaaogā mea a le lalolagi,+ ia peiseaʻī e lē o faaaogāina atoatoa; auā o loo suia+ le tulaga o mea* a lenei lalolagi. 32  Ou te manaʻo ina ia aua neʻi outou popole.+ E popole le alii e leʻi faaipoipo i mea a le Alii, i ni mea e na te faafiafia ai le Alii. 33  A o le tane ua faaipoipo, e popole+ o ia i mea a le lalolagi ina ia faafiafia ai lana avā,+ 34  ma e vaeluaina lona loto. O le tamaʻitaʻi e leʻi faaipoipo ma le teine muli, e popole o ia i mea a le Alii,+ ina ia paia o ia i lona tino ma lona agaga. Peitaʻi, o le fafine ua faaipoipo, e popole o ia i mea a le lalolagi ina ia faafiafia ai lana tane.+ 35  Ou te fai atu nei mea e mo lo outou lava lelei, e lē ina ia lafo atu se matāsele iā te outou, ae ia uunaʻia ai outou e faia le mea lelei,+ ma auauna e lē aunoa i le Alii, e leai se mea e faalavelavea ai.+ 36  Ae afai ua manatu se tasi ua lē talafeagai lana amio ma lona tulaga muli,+ pe afai ua teʻa le malaulau o lona talavou, ma e tatau ona faia faapea, ia faia e ia le mea e manaʻo i ai; e lē agasala ai o ia. Ia faaipoipo i laʻua.+ 37  Ae afai ua tonu i lona loto, ma e lē faigatā iā te ia, ae ua mafai ona ia pulea ona faalogona, ma ua fai lana lava filifiliga i lona loto ina ia tausia pea lona tulaga muli, e manuia ai o ia.+ 38  O lenei, o lē e tuuina atu lona tulaga muli pe a faaipoipo,+ e manuia o ia, a o lē e lē tuuina atu lona tulaga muli pe a faaipoipo, e sili atu lona manuia.+ 39  Ua noanoatia le avā i aso uma e ola ai lana tane.+ Ae afai ua oti lana tane,* ona saʻoloto lea o ia e faaipoipo i lē ua loto i ai, tau lava o lē ua i le Alii.+ 40  Ae o loʻu manatu, e sili atu lona fiafia pe a nofofua pea o ia.+ Ua ou manatu foʻi o loo iā te aʻu le agaga o le Atua.+

Faamatalaga Pito i Lalo

Atonu e faasino atu “i le lē faaipoipo ma le faia o feusuaʻiga.”
Pe “ia faamalieina e le tane lana avā i feusuaʻiga.”
Po o “teine muli ma tama muli.”
I le gagana Eleni, “o le vaaiga o lenei lalolagi.”
I le gagana Eleni, “ua moe lana tane (i le oti).”