Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

1 Korinito 14:1-40

14  Ia tausisi i le alofa, a ia maelega e saʻili i meaalofa faaleagaga,+ e sili ai pe a outou faamatala atu valoaga.+  Auā o lē e tautala i gagana eseese, ua lē tautala o ia i tagata a o le Atua, auā e leai se tasi e malamalama+ e ui lava ua tautala o ia i mea lilo paia+ e ala i le agaga.  A o lē e faamatalaina valoaga, e na te atiaʻe,+ ma faalaeiau, ma faamāfanafana i tagata e ala i ana upu.  O lē e tautala i gagana eseese e atiaʻe ai o ia lava, a o lē e faamatala atu valoaga e atiaʻe ai le faapotopotoga.  Ou te manaʻo iā te outou uma ina ia tautatala i gagana eseese,+ ae e sili iā te aʻu lo outou faamatalaina o valoaga.+ O le mea moni, e sili lē na te faamatalaina valoaga i lē e tautala i gagana eseese,+ auā afai na te lē faaliliuina ana upu, e lē atiaʻe ai le faapotopotoga.  Uso e, afai ou te alu atu iā te outou i le taimi nei ma tautala atu iā te outou i gagana eseese, o le ā se aogā iā te outou seʻi vaganā ai ou te tautala atu i se faaaliga,+ po o le poto,+ po o se valoaga, po o se aʻoaʻoga?  O le mea moni, e taalili mai le leo o mea e leai ni ola,+ po o le fagufagu, po o le kitara;* afai e lē fesuisuiaʻi leo o na mea, e faapefea la ona iloa le fati o loo ilia i le fagufagu ma tāina i le kitara?  Afai e faalētonu le leo o le pū, o ai se tasi e sauni e tau?+  E faapena foʻi pe afai tou te lē sauniuni i o outou laulaufaiva ni upu e malamalamagofie,+ pe faapefea la ona malamalama i upu ua fai atu? O le mea moni, ua outou tautala atu ae e leai se uiga.+ 10  E foliga mai e tele ituaiga o gagana eseese i le lalolagi, ae e tofu le gagana ma lona uiga. 11  Afai ou te lē malamalama i le uiga o le gagana, o aʻu la o le tagata e ese laʻu gagana+ i lē o loo tautala, ma o lē o loo tautala, o ia o le tagata e ese lana gagana iā te aʻu. 12  O outou foʻi, ona ua outou matuā naunau atu i meaalofa o le agaga,+ ia outou saʻili la e faatele na meaalofa ina ia atiaʻe ai le faapotopotoga.+ 13  O lenei, o lē e tautala i gagana eseese, ia tatalo o ia ina ia mafai ona ia faaliliuina ana upu.+ 14  Afai ou te tatalo i gagana eseese, o laʻu meaalofa mai i le agaga o loo oʻu tatalo ai,+ ae peitaʻi e lē malamalama ai loʻu mafaufau. 15  O le ā la le mea e fai? Ou te tatalo ma le meaalofa mai i le agaga, ae ou te tatalo foʻi ma loʻu mafaufau. Ou te pese i viiga+ ma le meaalofa mai i le agaga, ae ou te pese foʻi i viiga ma loʻu mafaufau.+ 16  A lē faia faapea, afai e te ofo atu viiga ma le meaalofa o le agaga, e faapefea i le tagata lautele o loo nofo mai ona faapea atu “Amene,”+ i le faafetai ua e faia, talu ai e lē malamalama o ia i upu ua e fai atu ai? 17  E moni ua e avatu le faafetai i se auala lelei, ae peitaʻi ua lē atiaʻe ai le isi tagata.+ 18  Ou te faafetai i le Atua auā e tele atu gagana ua ou tautala ai i lo o outou uma.+ 19  Ae peitaʻi, e sili atu pe a ou tautala i ni upu se lima e mafai ona malamalama i ai le faapotopotoga, ina ia mafai ai foʻi ona ou aʻoaʻo atu i isi, nai lo o le sefulu afe o upu i gagana eseese.+ 20  Le ʻauuso e, aua neʻi faatamaiti i le mafaufau.+ Ia faatamameamea i le leaga;+ ae ia faatagatamatua i le mafaufau.+ 21  Ua tusia i le Tulafono: “Ua fetalai mai Ieova:+ ‘Ou te tautala atu i lenei nuu+ i laulaufaiva o tagata e ese a latou gagana ma laugutu o tagata ese,+ ae e latou te lē uaʻi mai lava iā te aʻu.’ ” 22  O lea la, o le tautala i gagana eseese o se faailoga+ lea e lē i tagata talitonu, ae i ē e lē talitonu,+ a o le faamatalaina o valoaga e lē mo tagata e lē talitonu, a o tagata e talitonu.+ 23  Afai e potopoto le faapotopotoga i se nofoaga e tasi ma latou tautatala i gagana eseese,+ ae ulufale mai ni tagata lautele po o ē e lē talitonu, pe latou te lē fai atu ea o outou e vālea? 24  Ae afai tou te faamatalaina valoaga ma ua ulufale mai se tagata e lē talitonu po o se tagata lautele, o a outou upu e aʻoaʻia+ ma uunaʻia ai o ia e suʻesuʻe ifo iā te ia lava; 25  ma faaalia+ ai mea lilo o lona loto, ona faapaʻū faō ai lea o ia ma tapuaʻi atu i le Atua, ma faapea atu: “E moni, ua iā te outou le Atua.”+ 26  Le ʻauuso e, o le ā se mea e ao ona fai? Pe a outou potopoto faatasi, ua iai i le tasi le salamo, o le isi ua aʻoaʻo atu, ua iai i le isi le faaaliga, ua tautala le tasi i gagana eseese, a o le isi ua mafai ona faamatala upu.+ Ia faia mea uma e atiaʻe ai.+ 27  Afai foʻi e tautala se tasi i se gagana ese, ia lava ni tagata se toʻalua pe e toʻatolu ma ia auauaʻi; ma ia iai foʻi sē e faaliliu upu.+ 28  Ae afai e leai se tasi e faaliliu upu, ia aua le tautala o ia i le faapotopotoga, ae ia tautala o ia iā te ia lava+ ma i le Atua. 29  Ia tautatala foʻi perofeta+ e toʻalua pe toʻatolu, ma ia iloa e isi tagata uma le uiga o na upu.+ 30  Ae afai ua maua e le isi o loo nofo i inā se faaaliga,+ aua neʻi tautala lē na muamua. 31  Auā e mafai e outou uma ona feauauaʻi e faamatala atu valoaga,+ ina ia aʻoaʻoina ma faalaeiauina+ ai tagata uma. 32  E tatau foʻi ona pulea e perofeta meaalofa a le agaga i perofeta. 33  Auā o le Atua, o ia o le Atua o le filemu+ ma e fai mea maopoopo.+ E pei ona iai i faapotopotoga uma o le ʻaupaia, 34  ia aua neʻi tautatala+ fafine i faapotopotoga auā e lē faatagaina i latou e tautatala, a ia gauaʻi+ i latou e pei ona fai mai ai le Tulafono.+ 35  Afai latou te mananaʻo e fia iloa se mea, ia fesili atu i a latou lava tane i le fale, auā o se mea e māsiasi+ ai pe a tautala le fafine i le faapotopotoga. 36  Auā pe e na o outou ea na alu atu ai le afioga a le Atua,+ pe e na o outou na oo atu i ai? 37  Afai e manatu se tasi o ia o le perofeta po ua ia maua le meaalofa o le agaga, ia faailoa atu e ia mea ua ou tusi atu ai iā te outou, auā o poloaʻiga+ na a le Alii. 38  Afai e lē fia amanaʻia e se tasi, ia lē amanaʻia pea e ia. 39  O le mea lea oʻu uso e, ia saʻili pea ma le maelega le meaalofa e faamatala atu ai valoaga,+ ae aua le taofia le tautala i gagana eseese.+ 40  A ia faia mea uma i se tulaga talafeagai ma le maopoopo.+

Faamatalaga Pito i Lalo

O se meafaifaaili anamua e ese mai i le kitara i aso nei. O le upu Peretania, o le harp.