Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

LE OLOMATAMATA NU. 1 2017

 MATAUPU AUTŪ | FAITAUGA TUSI PAIA—AUALA E MAUA AI AOGĀ

E Faapefea Ona Faia i se Auala e Faaoso Naunau?

E Faapefea Ona Faia i se Auala e Faaoso Naunau?

O ā ni ou faalogona pe a e faitauina le Tusi Paia? Po o se mea e te lē fiafia e fai, po o se mea e te maua ai le faafouina? E faalagolago lava i le auala e te faia ai. Seʻi tatou vaai po o ā ni auala e faaoso naunau ma atili ai ona e maua le fiafia i le faitauga Tusi Paia.

Ia faaaogā se faaliliuga maufaatuatuaina e faaaogā ai le gagana o aso nei. Pe a e faitauina se tusi e tele ai ni upu maotua po o ni upu ua lē toe faaaogāina i aso nei, e mautinoa e te lē fiafia e faitau i ai. O lea, ia saʻili se Tusi Paia e faaaogā ai se gagana faigofie e mafai ona pāʻia ai lou loto. I le taimi e tasi, ia faaaogā se lomiga e faaliliuina saʻo ma le faaeteete. *

Faaaogā masini faaonapōnei. I aso nei ua maua le Tusi Paia i ni tuufaatasiga, kopi ua lomiaina, po o masini faaonapōnei. Ua mafai ona faitauina le Tusi Paia i le initaneti pe kopiina foʻi i komepiuta, telefoni, po o masini faaonapōnei. O nisi polokalame ua maua ai ni vala faaopoopo ua mafai ai ona e vave siakiina isi mau o le Tusi Paia e faatatau i se mataupu se tasi, pe faatusatusa foʻi i isi faaliliuga. Pe afai e te manaʻo e faalogologo nai lo o le faitau, ua māeʻa foʻi ona puʻeina le Tusi Paia i nisi gagana. O le toʻatele o tagata e fiafia e faalogo a o femalagaaʻi, faia tagamea, po o isi feʻau masani lea e mafai ona fai a o faalogologo i le faitauga Tusi Paia. Aiseā e lē faaaogā ai se auala e fetaui lelei ma oe?

Faaaogā meafaigaluega e suʻesuʻe ai le Tusi Paia. O meafaigaluega mo le suʻesuʻeina o le Tusi Paia, e mafai ona fesoasoani iā te oe e maua ai le tele o aogā mai i lau faitauga Tusi Paia. O loo iai faafanua  o laueleele i le taimi o le Tusi Paia, lea e fesoasoani iā te oe e iloa ai nofoaga ma malamalama ai i mea na tutupu i na nofoaga. E iai nisi mataupu o loo i lenei mekasini po o le vaega “Aʻoaʻoga a le Tusi Paia” i le Upega tafaʻilagi o le jw.org, lea e mafai ona e iloa ai le uiga o vaega eseese o le Tusi Paia.

Faaaogā auala eseese. Pe afai e foliga mai e faigatā ona faitau le Tusi Paia mai i le amataga seʻia oo i le faaiʻuga, aiseā e lē amata ai i le faitau o se vaega e te fiafia patino i ai? Pe afai e te fia iloa tagata taʻutaʻua o le Tusi Paia, e mafai la ona e faitau i tala e faatatau i na tagata. O loo maua i le pusa “ Suʻesuʻe le Tusi Paia Ina ia Malamalama i Ona Tagata,” se auala e mafai ona fesoasoani i lea vaega. Atonu e mafai foʻi ona e faitau i le Tusi Paia e fua i mataupu po o le faasologa o mea na tutupu. Aiseā e lē faataʻitaʻi ai loa se tasi o nei auala?

^ pala. 4 Ua iloa e le toʻatele le saʻo aʻiaʻi, maufaatuatuaina ma le faigofie O le Tusi Paia—O le Faaliliuga a le Lalolagi Fou. Ua lomia e Molimau a Ieova lenei Tusi Paia i le silia i le 130 gagana. E mafai ona e kopiina lenei Tusi Paia mai i le Upega tafaʻilagi o le jw.org, pe kopiina mai foʻi i le polokalame o le JW Library. Pe a e finagalo i ai, e mafai foʻi ona momoli atu e Molimau a Ieova i lou maota se kopi ua lomiaina.