Skip to content

Skip to secondary menu

Skip to table of contents

Molimau a Ieova

Faa-Samoa

Le Olomatamata  |  Nu. 1 2017

 SUIA E LE TUSI PAIA OLAGA

Ou te Leʻi Fia Oti!

Ou te Leʻi Fia Oti!
  • TAUSAGA FANAU: 1964

  • ATUNUU: EGELANI

  • TALAAGA: SE TINĀ TALAVOU FOUVALE

OLAGA SA IAI

Na ou fanau i Paddington, o se vaega o Lonetona i Egelani e toʻatele tagata e nonofo ai. Na matou nonofo faatasi ma loʻu tinā ma oʻu uso matutua e toʻatolu. E lē o taimi uma na matou mafuta ai ma loʻu tamā ona o lona faafitauli i le ʻava malosi.

Sa aʻoaʻo aʻu e loʻu tinā e tatalo i pō uma mai i loʻu laʻitiiti. Na iai saʻu tamaʻi Tusi Paia e na o tusi o Salamo na iai, ma na ou faia ni fati ina ia peseina ai na salamo. Na mau pea i loʻu mafaufau se fuaiupu mai i se tasi o aʻu tusi e faapea: “E iai le aso e leai ai se aso e sosoo ai.” O lenā faaupuga ou te ala ai i le pō ma mafaufau i le lumanaʻi. Na ou mafaufau ʻe tatau a ona tele atu nisi mea i le olaga. Aiseā ua ou iai i nei?’ Ou te leʻi fia oti.

Na ou fia iloa e faatatau i faiga faataulāitu. Na ou taumafai e talanoa i ē ua feoti, na matou ō ma aʻu uō i fanuatanu, ma matou matamata i ata aitu. Na matou manatu o se mea e manaia ae na matou fefefe ai foʻi.

Na avea aʻu o sē fouvale ina ua faatoʻā 10 oʻu tausaga. Na amata ona ou ulaula tapaa ma na vave lava ona lē mafai ona toe tuu. Mulimuli ane, na ou ulaula mariuana. E 11 ane oʻu tausaga ua amata ona ou inu ʻava malosi. E ui ou te leʻi fiafia i lona tofo ae na ou fiafia i āuga o le onā. Na ou fiafia foʻi i siva ma musika. Ou te alu i patī ma fale kalapu i so o se taimi pe a mafai. E masani ona ou sola i le pō, ae toe foʻi mai a o leʻi ao. Ou te lē alu i le aʻoga i le aso e sosoo ai ona ua lē lavā. Ae pe a ou alu i le aʻoga, e masani ona ou inu ʻava malosi i le va o piliota.

Na leaga oʻu togi i le tausaga faaiʻu o le aʻoga. O lea na iloa ai e loʻu tinā loʻu fouvale lea ua iai, ma matuā lē fiafia ma ita ai. Na ma misa ma ou sola ese mai i lo matou aiga. Na ma nonofo mo se taimi ma laʻu uō tama o Tony. Na aafia o ia i soligatulafono lāiti ma le faatauina o fualaau faasāina, ma sa lauiloa o ia o se tagata e matuā sauā. E leʻi umi ae ou tō i le faatoʻā 16 o oʻu tausaga ma fanau ai la ma tama tama.

 SUIA E LE TUSI PAIA LOʻU OLAGA

O le taimi muamua na ou fetaui ai i Molimau a Ieova, a o oʻu nofo i se fale mo tinā e leʻi faaipoipo ma a latou pepe. Na tuuina mai e se vaega mo auaunaga i le lautele se potu i inā e ma te nonofo ai. Sa iai ni fafine Molimau a Ieova se toʻalua e masani ona asiasi atu i nisi o tinā talavou i lea nofoaga. I se tasi aso, na ou auai i sa latou talanoaga. Na ou manaʻo e faailoa atu e sesē Molimau a Ieova. Peitaʻi, na la taliina uma le tele o aʻu fesili i se auala filemu ma le manino mai i le Tusi Paia. O lo la agalelei ma le agamalu na ou fiafia ai. O lea, na ou ioe ai e suʻesuʻe le Tusi Paia ma i laʻua.

E leʻi umi ae ou aʻoaʻoina se manatu mai i le Tusi Paia na suia ai loʻu olaga. Talu mai lava loʻu laʻitiiti na ou fefe i le oti. Peitaʻi, o lea ua ou iloa le aʻoaʻoga a Iesu e faatatau i le toetū. (Ioane 5:28, 29) Na ou iloa ai foʻi e alofa mai le Atua iā te aʻu. (1 Peteru 5:7) Na pāʻia loʻu loto i upu o le Ieremia 29:11 lea e faapea mai: “ʻAuā ua ou iloa lelei manatu ua ou manatu ai iā te outou,’ ua fetalai mai ai Ieova, ʻo manatu o le filemu ae e lē o le malaia, ma ia avatu iā te outou se lumanaʻi ma se faamoemoe.’” Na amata ona ou talitonu e mafai ona ou maua le faamoemoe o le ola e faavavau i le Parataiso i le lalolagi.—Salamo 37:29.

Na faaalia mai e Molimau a Ieova le alofa moni iā te aʻu. Ina ua ou faatoʻā auai i a latou sauniga, o uiga o tagata uma e faaleuō. (Ioane 13:34, 35) Sa matuā telē le eseesega mai i se lotu na ou auai i ai. Na talia ma le fiafia aʻu e Molimau a Ieova e ui i loʻu tulaga. Na latou faaavanoa mai o latou taimi, faaalia le alofa ma le naunau, ma aumaia fesoasoani aogā. Na ou lagona le avea o aʻu ma vaega o se aiga toʻatele ma alolofa.

Na ou iloa mai i aʻu suʻesuʻega o le Tusi Paia e tatau ona ou faia ni suiga i loʻu olaga, ina ia ōgatusa ma tapulaa maualuluga a le Atua. E leʻi faigofie ona tuu laʻu tapaa. Na ou iloaina foʻi e iai nisi pese e faaosofia ai loʻu fia ula mariuana, o lea na suia ai pese na ou faalogologo i ai. Na ou manaʻo ou te lē toe onā, o lea na ou lē toe alu ai i patī ma fale kalapu lea e iʻu ai ina ou toe onā. Na ou faauō atu i nisi uō fou e lelei a latou taaʻiga iā te aʻu ma loʻu olaga fou ua iai.Faataoto 13:20.

O le taimi lea o loo suʻesuʻe foʻi e Tony le Tusi Paia ma Molimau a Ieova. Na talitonu o ia o le upu moni lea ua ia aʻoaʻoina ina ua tali e Molimau a Ieova ana fesili mai i le Tusi Paia. Na ia faia ni suiga tetele i lona olaga: na lē toe aumea atu i ana uō sauā, lē toe faia soligatulafono lāiti, ma lē toe ulaula mariuana. Na ma iloa ina ia faafiafiaina atoatoa Ieova, e tatau ona suia o ma olaga lē mamā ma avatu i la ma tama se olaga lelei. Na ma faaipoipo i le 1982.

“Ua ou lē toe ala i le pō ma popole e faatatau i le lumanaʻi po o le oti”

Ou te manatua loʻu suʻeina o mataupu i Le Olomatamata ma le Ala Mai! * e faatatau i tagata na taulau manuia i le faia o suiga ia ou te manaʻo e fai. Na matuā faalaeiauina aʻu i a latou faaaʻoaʻoga! Na faamalosia ai aʻu e taumafai pea e fai suiga ae aua le faavaivai. Na ou tatalo pea iā Ieova e fesoasoani mai iā te aʻu. Na ma papatiso ma Tony o ni Molimau a Ieova iā Iulai i le 1982.

AOGĀ IĀ TE AʻU

Ua faasaoina loʻu ola ona o le atiaʻe o se faauōga ma Ieova le Atua. Ua ma tofo foʻi ma Tony i le fesoasoani a Ieova i taimi faigatā. Ua aʻoaʻoina ai i maʻua e faalagolago i le Atua i taimi faigatā, ma ua ma iloa lona fesoasoani mai pea ma faatumauina lo matou aiga.Salamo 55:22.

Ua ou maua le fiafia i le fesoasoani i la ma tama tama ma la ma tama teine e iloa Ieova e pei foʻi o aʻu. Ua ou olioli foʻi i le vaai atu i a la fanau o loo latou faaauau ona aʻoaʻo e faatatau i le Atua.

Ua ou lē toe ala i le pō ma popole e faatatau i le lumanaʻi po o le oti. O loo ma asiasi ma Tony i faapotopotoga eseese a Molimau a Ieova i vaiaso taʻitasi e faalaeiau i latou. E ma te auai faatasi ma i latou i le aʻoaʻoina o isi e faapea, o le a latou maua foʻi le ola e faavavau pe afai e latou te faatuatua iā Iesu.

^ pala. 17 Lomia foʻi e Molimau a Ieova.