Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

LE OLOMATAMATA TESEMA 2015

 MATAUPU AUTŪ | E MAFAI ONA E MALAMALAMA I LE TUSI PAIA

Saʻili se Fesoasoani Ina ia Malamalama i le Tusi Paia

Saʻili se Fesoasoani Ina ia Malamalama i le Tusi Paia

Seʻi faapea ua e asiasi atu i se isi atunuu mo le taimi muamua. E te lē masani i tagata, o a latou tū, o meaʻai ma tupe. E lē taumatea e te lagona le lē fiafia.

E ono faapena foʻi ou lagona pe a e faatoʻā faitau i le Tusi Paia. Ua e toe foʻi i tua i se lalolagi anamua e foliga mai e te lē masani ai. Ua tau lau faitau i tagata e taʻua o Filisitia, o tū e te lē masani ai e pei o le ʻsaeia o ofu,’ o meaʻai e taʻua o le manai, ma tupe siliva e taʻua o tarakama. (Esoto 16:31; Iosua 13:2; 2 Samuelu 3:31; Luka 15:8, fpl) E faigatā ona e malamalama i nei mea uma. E pei lava ona e faia pe a asiasi i se isi atunuu, e mautinoa la e te talisapaia le fesoasoani mai i se tasi e faamatala atu nei mea iā te oe.

FESOASOANI I ASO UA MAVAE

E amata mai lava i le taimi na muaʻi tusia ai tusitusiga paia i le senituri lona 16 T.L.M., sa saunia le fesoasoani mo tagata ina ia malamalama i nei tusitusiga. O se faataʻitaʻiga, sa “faamatala atu” e le uluaʻi taʻitaʻi o le nuu o Isaraelu, o Mose, mea na tusia.—Teuteronome 1:5.

Sa faaauau ona iai faiaʻoga agavaa o Tusitusiga Paia i le pe ā ma le sefulu senituri mulimuli ane. I le 455 T.L.M., na faapotopoto ai se vaega toʻatele o tagata Iutaia, e aofia le toʻatele o tamaiti, i se nofoaga faitele i le aai o Ierusalema. Sa iai i inā faiaʻoga o le Tusi Paia, na latou ʻfaitau leotele atu’ tusitusiga paia, ma “latou faamalamalama atu pea foʻi mea ua faitauina.”—Neemia 8:1-8.

I le lima senituri mulimuli ane, na aofia ai Iesu Keriso i se galuega tauaʻoaʻoga foʻi faapena. Sa lauiloa o ia o se faiaʻoga. (Ioane 13:13) Sa ia aʻoaʻo atu i motu o tagata e toʻatele faapea tagata taʻitoʻatasi. I se tasi taimi, sa talanoa atu o ia i se motu o tagata e toʻatele, ma fai ai lana Lauga taʻutaʻua i le Mauga, ma na ʻmatuā ofo le motu o tagata i lana aʻoaʻo atu.’ (Mataio 5:1, 2; 7:28) I le tau e totogo ai mea i le 33 T.A., na talanoa atu ai Iesu i nisi o ona soo e toʻalua, a o latou savavali faatasi i le ala e agaʻi atu i se nuu e latalata ane i Ierusalema, ma na ia “faamatala [atu ma le manino] Tusitusiga Paia” iā i laʻua.—Luka 24:13-15, 27, 32.

Sa avea foʻi soo o Iesu ma faiaʻoga o le Afioga a le Atua. I se tasi taimi, na faitau ai e se tagata taualoa mai i Aitiope, se vaega o le Tusitusiga Paia. Na faalatalata atu i ai se soo e igoa iā Filipo ma fesili atu: “Po ua e malamalama i mea ua e faitauina?” Na tali mai le Aitiope: “E faapefea ona ou malamalama pe a lē faasino mai e se tasi iā te aʻu?” Sa faamatala atu ai loa e Filipo i le Aitiope le uiga o mea na faitau i ai.—Galuega 8:27-35.

FESOASOANI I ASO NEI

I le pei o tagata na faiaʻoga ma aʻoaʻo atu le Tusi Paia i aso ua mavae, o loo auai foʻi Molimau a Ieova i aso nei i se galuega tauaʻoaʻoga faale-Tusi Paia o loo faia i le lalolagi aoao i atunuu e silia i le 239. (Mataio 28:19, 20) E silia i le iva miliona tagata o loo latou fesoasoani i ai i vaiaso taʻitasi ina ia malamalama i le Tusi Paia. O le toʻatele o nei tagata o loo aʻoaʻoina le Tusi Paia e mai i atunuu e lē o ni Kerisiano. O nei talanoaga faale-Tusi Paia e lē totogiina, ma e mafai ona fai i le fale o le tagata po o se isi nofoaga e fetaui ma le tagata. O nisi e fai a latou talanoaga faale-Tusi Paia e ala i le telefoni, komepiuta po o isi masini faaonapōnei.

Faamolemole faafesootaʻi se Molimau a Ieova mo nisi faamatalaga i le auala e te maua ai aogā mai i lenei faatulagaga. O le a e iloa ai o le Tusi Paia, o se tusi e mafai ona malamalama i ai, ma “e aogā e aʻoaʻo ai, e aʻoaʻi ai, e faasaʻo ai mea, e faatonu ai i le amiotonu,” ma mafai ai ona e ʻmatuā agavaa e lava saunia mo galuega lelei uma.’—2 Timoteo 3:16, 17.

 

Faitau Atili

Aiseā e Su‘esu‘e ai le Tusi Paia?

Ua fesoasoani le Tusi Paia i le faitau miliona o tagata i le lalolagi aoao, ina ia maua tali o fesili tāua e faatatau i le olaga. Pe e te fia iloa tali o na fesili?

O le ā e Faia i se Su‘esu‘ega Faale-Tusi Paia?

I le lalolagi aoao, ua lauiloa Molimau a Ieova i a latou polokalame o su‘esu‘ega faale-Tusi Paia e leai se totogi. Taga‘i i le auala e faia ai.