Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

LE OLOMATAMATA NOVEMA 2015

 MATAUPU AUTŪ | O LE Ā LE SILAFAGA A LE ATUA I TAUA?

O le Silafaga a le Atua i Taua i Aso Anamua

O le Silafaga a le Atua i Taua i Aso Anamua

Sa mafatia tagata ma faaauau ona tatalo i le Atua mo se mapusaga. Peitaʻi e leʻi vave ona latou maua se mapusaga. O i latou nei o tagata Isaraelu, po o tagata o le Atua i aso anamua. O ē sa faasauā ane o le nuu malosi o Aikupito. (Esoto 1:13, 14) Sa faatalitali tagata Isaraelu i le Atua mo le tele o tausaga, ina ia faamutaina pulega sauā a Aikupito. Mulimuli ane, na oo mai le taimi e laveaʻi ai e le Atua i latou. (Esoto 3:7-10) Ua taʻua i le Tusi Paia sa tauina e le Atua se taua faasaga i tagata Aikupito. Sa ia taia i latou i se faasologa o mala mataʻutia, ma mulimuli ane faaumatia lo latou tupu ma lana ʻautau i le Sami Ulaula. (Salamo 136:15) Sa avea Ieova le Atua ma “toa malosi o le taua” mo ona tagata.—Esoto 15:3, 4.

Talu ai sa tau e le Atua se taua faasaga i tagata Aikupito, ua faaalia mai ai la e lē o taua uma e na te teena. O nisi taimi sa ia faatonuina ona tagata Isaraelu ina ia tauina ni taua. O se faaaʻoaʻoga, sa ia poloaʻia i latou ia tau faasaga i tagata Kanana, o ē sa faia le tele o mea leaga. (Teuteronome 9:5; 20:17, 18) Sa ia faatonuina Tavita le tupu o Isaraelu, ina ia tau faasaga i tagata Filisitia sa faasauā ane. Sa tuuina atu foʻi e le Atua faatonuga iā Tavita i le auala e tau ai le taua, ina ia mautinoa ai e manumalo.—2 Samuelu 5:17-25.

Ua faaalia mai i nei tala i le Tusi Paia, pe afai na lamatia tagata Isaraelu i ni faiga leaga ma faasauā, sa poloaʻia e le Atua le tauina o ni taua ina ia puipuia ai ona tagata ma faatumauina ai le tapuaʻiga moni. Peitaʻi, seʻi mātau vala e tolu o loo mulimuli mai e faatatau i na taua na poloaʻia e le Atua:

  1. O LE ATUA LAVA IA NA FILIFILIA PO O AI E TAUINA TAUA. I se tasi taimi, na fetalai atu ai le Atua i tagata Isaraelu: “E tou te lē tau i lenei taua.” O le māfuaaga ona o le a tau le Atua mo i latou. (2 Nofoaiga a Tupu 20:17; 32:7, 8) E tele taimi sa faia ai faapea e le Atua, e pei o le mea na tupu o loo taʻua i le amataga o lenei mataupu. O isi taimi sa poloaʻia e le Atua ona tagata i Isaraelu anamua ina ia tau i taua na ia faatagaina, aemaise i latou na tauina na taua ina ia faamautinoa ai lo latou ulu atu i le Nuu Folafolaina.—Teuteronome 7:1, 2; Iosua 10:40.

  2. O LE ATUA LAVA IA NA FILIFILIA LE TAIMI E TAU AI NA TAUA. Sa tatau i auauna a le Atua ona faatalitali ma le onosaʻi i le taimi atofaina a le Atua, e tau faasaga ai i tagata sauā ma amioleaga na siʻomia ai i latou. Sa lē tatau ona tauina e i latou lava  ni taua seʻi vaganā ua oo i le taimi atofaina a le Atua. E latou te leʻi maua le finagalo malie o le Atua ina ua latou lē faia faapea. Ua taʻua i le Tusi Paia, ina ua filifili tagata Isaraelu e tau i taua e leʻi poloaʻia e le Atua, sa masani ona iʻu i ni iʻuga mafatia. *

  3. E ui lava sa tau le Atua faasaga i tagata Kanana, ae sa ia faasaoina nisi e pei o Raava ma lona aiga

    E LĒ FIAFIA LE ATUA PE A FEOTI TAGATA, E AOFIA AI MA Ē AMIOLEAGA. O Ieova le Atua o le Puna o le ola ma o Lē na faia le tagata. (Salamo 36:9) O lea, e lē fia silasila mai o ia o feoti tagata. Peitaʻi, e faanoanoa ona e iai tagata ua taupulepule e sauāina ma fasiotia isi. (Salamo 37:12, 14) Ina ia taofia na faiga, na poloaʻia ai e le Atua i nisi taimi ni taua e faasaga i tagata amioleaga. Ae e ui na ia faataga tagata Isaraelu e tau na taua, sa “alofa mutimutivale” pea o ia ma ʻtelegese lona toʻasā’ i ē na faasauā i tagata Isaraelu. (Salamo 86:15) O se faaaʻoaʻoga, a o leʻi tau tagata Isaraelu faasaga i se aai, sa poloaʻia e le Atua i latou ia “faailoa atu maliega o le filemu,” ina ia tuu atu ai se avanoa i tagata o lenā aai e suia o latou ala ma ʻalofia ai se taua. (Teuteronome 20:10-13) O lenei auala na faaalia ai e lē fiafia le Atua ʻi le oti o le tagata amioleaga, a ia liliuese le tagata amioleaga mai i lona ala, ma ola ai pea o ia.’—Esekielu 33:11, 14-16. *

Ua tatou iloa mai i manatu na taʻua muamua, i aso anamua sa silasila le Atua i taua o se auala talafeagai e faamuta ai so o se faiga sauā ma amioleaga. Peitaʻi, e na o le Atua na iai le aiā e filifilia ai le taimi e tatau ona tau ai na taua, ma po o ai foʻi e tatau ona tauina. Pe sa tau e le Atua taua i se auala ina ia faamasaa ai le toto? E leai, auā e matuā inosia e ia le faasauā. (Salamo 11:5) Pe na suia le silafaga a le Atua i taua ina ua amata le faiva a lona Alo o Iesu i le uluaʻi senituri?

^ pala. 7 O se faaaʻoaʻoga, sa faatoʻilaloina tagata Isaraelu i se tasi taimi, ina ua latou tauina se taua ma tagata Amaleka ma tagata Kanana, e ui na faatonu e le Atua i latou ia aua neʻi faia faapea. (Numera 14:41-45) Ina ua mavae le tele o tausaga, sa tau e le tupu faamaoni o Iosia se taua e aunoa ma le faatagaga a le Atua, ma iʻu ai ina fasiotia o ia ona o lenā gaoioiga lē atamai.—2 Nofoaiga a Tupu 35:20-24.

^ pala. 8 E leʻi faailoa atu e tagata Isaraelu maliega o le filemu a o leʻi tau faasaga i tagata Kanana. Aiseā? Talu ai e 400 tausaga na tuu atu i tagata Kanana e suia ai o latou ala leaga. Peitaʻi, e oo ane i le taimi na siitaua atu ai tagata Isaraelu, ua matuā leaga amio a tagata Kanana. (Kenese 15:13-16) O lea na tatau ai ona matuā faaumatia i latou. E ui i lea, sa faasaoina ē na suia o latou ala.—Iosua 6:25; 9:3-27.