Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

LE OLOMATAMATA NOVEMA 2015

 MATAUPU AUTŪ | O LE Ā LE SILAFAGA A LE ATUA I TAUA?

Le Silafaga a le Atua i Taua i Aso Nei

Le Silafaga a le Atua i Taua i Aso Nei

O loo matuā mafatia tagata i aso nei. O loo faaauau ona tatalo le toʻatele i le Atua mo se mapusaga, ma taumānatu po o le a iai ea se mapusaga. Po o faafofoga mai le Atua i a latou talosaga? Ae faapefea i latou o loo faaaogā taua ina ia faamuta ai o latou mafatiaga? Pe e lagolagoina e le Atua a latou taumafaiga, ma silasila i ai e talafeagai ona tauina na taua?

O Amaketo o le taua lea o le a faaiʻuina ai taua uma

Muamua, o se faamāfanafanaga le mea moni lenei: O loo silafia e le Atua mafatiaga i le lalolagi i aso nei, ma e iai se mea o loo finagalo o ia e faia e faatatau i nei mafatiaga. (Salamo 72:13, 14) Ua folafola mai e le Atua i lana Afioga le Tusi Paia, o i latou “ua mafatia i puapuaga, e maua le mapusaga.” I le ā le taimi? “I le faaaliga o le Alii o Iesu mai le lagi faatasi ma ana agelu malolosi . . . a o ia faaoo mai le tauimasui i ē e lē iloa le Atua, ma ē e lē usiusitaʻi i le tala lelei a lo tatou Alii o Iesu.” (2 Tesalonia 1:7, 8) O lenei faaaliga mai o Iesu o le a tupu i le lumanaʻi, i le “taua o le aso tele o le Atua o Lē e ona le malosi uma lava,” po o Amaketo, lea e taʻua i le Tusi Paia.—Faaaliga 16:14, 16.

I lenā taua i le lumanaʻi, e lē faaaogāina e le Atua tagata, a o lona Alo o Iesu Keriso faatasi ma isi foafoaga agaga malolosi, ina ia tau le taua faasaga i ē amioleaga. O le a faaiʻuina e ʻautau malolosi i le lagi faiga sauā uma lava.—Isaia 11:4; Faaaliga 19:11-16.

E lē o suia lava le silafaga a le Atua i taua seʻia oo mai i aso nei. O loo tumau ona silasila o ia i taua o se auala talafeagai e faaiʻuina ai faiga sauā ma le amioleaga. Peitaʻi, e pei ona iai mai lava i le faagasologa o le talafaasolopito, o le Atua lava ia e iai le aiā e filifilia ai le taimi e tatau ona tau ai na taua,  ma po o ai e tatau ona tauina. Ua tatou iloa ua uma ona filifili le Atua, o le taua lea e faaiʻuina ai le amioleaga ma faia ai le tauimasui mo ē o loo mafatia, o le a faia i le lumanaʻi, ma o le a tauina e lona Alo o Iesu Keriso. O lea la, e lē o lagolagoina e le Atua taua i aso nei, e tusa lava pe e foliga mai e saʻo māfuaaga e tau ai na taua.

O se faataʻitaʻiga, seʻi faapea ua tauaʻimisa se ʻauso ae e lē o iai lo laʻua tamā. Ua lē toe misa i laʻua mo sina taimi ae vili atu i lo la tamā. Ua fai atu le isi tama o le isi na amataina le misa, ae ua faapea atu foʻi le isi sa faileagaina o ia. Ua taʻitasi i laʻua ma faamoemoe o le a lagolago e le tamā a laʻua itu. Peitaʻi, ina ua uma ona latou talanoa, ua faapea mai le tamā e aua neʻi toe tauaʻimisa, ae faatali seʻi taunuu atu i le fale ona foʻia lea o le faafitauli. Sa faatalitali i laʻua mo sina taimi. Peitaʻi, e leʻi umi ae toe tauaʻimisa foʻi. Ina ua taunuu le tamā, ua lē fiafia o ia ma faasala i laʻua uma ona ua la lē usiusitaʻi.

I aso nei, e masani ona tatalo atunuu o loo tauina taua i le Atua mo se fesoasoani. Peitaʻi, e leai se itu taua i aso nei e lagolagoina e le Atua. Ua ia taʻua ma le manino i lana Afioga le Tusi Paia, ia “aua le taui atu le leaga i le leaga i se tasi,” ma “aua tou te tauimasui.” (Roma 12:17, 19) Ua fetalai foʻi o ia, e tatau i tagata ona “matuā faatalitali atu iā te ia” i le taimi e gaoioi ai, lea o le a ia faia iā Amaketo. (Salamo 37:7) Pe afai e tau e atunuu taua e aunoa ma le faatalitali i le Atua, e silasila o ia i na taua o ni gaoioiga faamaualuga ona o le ita, ma e lē fiafia i ai lona finagalo. O lea, iā Amaketo, o le a faaalia mai ai e le Atua lona toʻasā ma faamuta atoatoa femisaʻiga a atunuu, e ala i le ʻfaaiʻuina o taua i tuluʻiga o le lalolagi.’ (Salamo 46:9; Isaia 34:2) Ioe, o Amaketo o le taua lea o le a faaiʻuina ai taua uma.

O le faaiʻuina o taua o se tasi lea o faamanuiaga mai i le tele o faamanuiaga o le Malo o le Atua. O le malo lenā sa faasino i ai Iesu ina ua tatalo: “Ia oo mai lou malo. Ia faia lou finagalo i le lalolagi, e pei ona faia i le lagi.” (Mataio 6:10) O le a tafiesea e le Malo o le Atua taua uma, faapea le amioleaga lea ua avea ma pogai autū o taua. * (Salamo 37:9, 10, 14, 15) O le māfuaaga lea o loo taulaʻi atu ai ma le naunau soo o Iesu i faamanuiaga o le Malo o le Atua.—2 Peteru 3:13.

Ae o le ā le umi e tatau ona tatou faatalitali ai i le Malo o le Atua ina ia faaiʻuina mafatiaga uma, le amioleaga ma faiga sauā? O le faataunuuina o valoaga o le Tusi Paia, ua faaalia mai ai ua tatou ola i “aso e gata ai” o lenei faiga o mea. (2 Timoteo 3:1-5) * Ua lē o toe umi ona faaiʻuina lea e le Malo o le Atua, o nei aso e gata ai, e ala i le taua iā Amaketo.

E pei ona muaʻi taʻua, o ē o le a faaumatia i lenei taua faaiʻu, o i latou ia “e lē usiusitaʻi i le tala lelei a lo tatou Alii o Iesu.” (2 Tesalonia 1:8) Ae ia manatua, e lē fiafia le Atua i le oti o se tasi, e aofia ai ma ē e amioleaga. (Esekielu 33:11) Talu ai “e lē finagalo o ia e faaumatia se tasi” i lenei taua faaiʻu, o lea ua ia faamautinoa ai e talaʻiina atu le tala lelei e faatatau i lo tatou Alii o Iesu, “i le lalolagi atoa e fai ma molimau i atunuu uma,” a o leʻi oo mai le iʻuga. (2 Peteru 3:8, 9; Mataio 24:14; 1 Timoteo 2:3, 4) Ioe, e ala i le talaʻiga o loo faia e Molimau a Ieova i le lalolagi aoao, ua maua ai e tagata i aso nei le avanoa e iloa ai le Atua, usiusitaʻi i le tala lelei e faatatau iā Iesu, ma ola seʻia oo atu i le aso e lē toe iai ni taua.

^ pala. 9 O le a aveesea foʻi e le Malo o le Atua le fili o tagata, o le oti. E pei ona taʻua i le mataupu i le itulau e 16 o lenei lomiga, o le a toe faatutūina mai e le Atua le anoanoaʻi o tagata, e aofia ai ma le toʻatele o ē na maliliu ona o taua.

^ pala. 10 Mo nisi faamatalaga e faatatau i aso e gata ai, tagaʻi i le mataupu e 9 o le tusi O ā Aʻoaʻoga Moni a le Tusi Paia? lomia e Molimau a Ieova.