Skip to content

Skip to secondary menu

Skip to table of contents

Molimau a Ieova

Faa-Samoa

Le Olomatamata  |  Novema 2015

 SUIA E LE TUSI PAIA OLAGA

Sa Ou Manatu na Ou Ola i se Olaga Faamalieina

Sa Ou Manatu na Ou Ola i se Olaga Faamalieina
  • TAUSAGA FANAU: 1982

  • ATUNUU: POLANI

  • TALAAGA: SAUĀ, FAAAOGĀ FUALAAU FAASĀINA MA SAʻILIA SE GALUEGA E SILI ONA LELEI

OLAGA SA IAI:

Na ou ola aʻe i se tamaʻi aai i Polani, e latalata i le tuaoi o Siamani. Sa filemu le siʻomaga o loʻu olaga auā na tele vaomatua ma faatoʻaga i lo matou vaipanoa. Sa faalaeiau aʻu e oʻu mātua alolofa ia ou tama lelei, ia fai lelei laʻu aʻoga ma saʻili se galuega e sili ona lelei.

Na amata ona leaga loʻu olaga ina ua ou alu e aʻoga i mataupu tau tulafono i se iunivesite i le aai o Wrocław. Ina ua ou tuua oʻu mātua, sa ou filifilia ni aumea leaga. Ou te fiafia i le soka, ma o le malolosi o taaʻiga a aʻu aumea, na avea ai aʻu ma sē e matuā lagolagosua i taaloga soka. E ese loʻu fiafia i le ʻau soka a Warsaw, ma po o fea lava e taaalo ai le ʻau i faaiʻuga o vaiaso, ou te alu ai lava. O na feoaʻiga na fai ai inuga pia, faaaogā ai fualaau faasāina, ma oo ai lava ina fai fusuaga ma ē sa lagolagoina isi ʻautaaalo. Sa ou mafaufau o le auala lea e faateʻa ai oʻu popolega o le aso, e ui lava na ou iloa e molia ai aʻu e leoleo, ma faaleagaina ai laʻu galuega i mataupu tau tulafono.

Sa matou fiafia tele ma aʻu uō e ō i fale kalapu ma falesiva. I taimi e matou te iai i inā, e masani ona matou faia ai ni fusuaga. E tele taimi na puʻe ai aʻu e leoleo, ae na ou faia ni auala e ʻalofia ai le molia i le tulafono, ma o nisi taimi e ala i ni faiga faatogafalea. Sa ou manatu na ou ola i se olaga faamalieina. Peitaʻi, na ou iloa lelei e sesē mea na ou faia. O lea na ou alu ai i le lotu i Aso Sa uma ma loʻu manatu ina ia faaleleia ai loʻu lotofuatiaifo.

SUIA E LE TUSI PAIA LOʻU OLAGA:

I le 2004, na asiasi mai ai ni Molimau a Ieova se toʻalua i loʻu fale, ma na ou ioe e suʻesuʻe le Tusi Paia ma i laʻua. A o oʻu aʻoaʻoina atili e faatatau i le uiga o le avea ma Kerisiano moni, na amata ai ona ōia loʻu lotofuatiaifo. Sa ou iloa e tatau ona tuu laʻu inu tele, le faaaogāina o fualaau faasāina, ma le aumea i tagata e lē ola i tapulaa a le Tusi Paia. Sa ou iloa foʻi e manaʻomia ona suia oʻu uiga sauā. E ui i lea, sa ou faaauau lava i oʻu ala leaga.

Peitaʻi, na suia le tulaga o mea i se tasi pō ina ua ou amataina se fusuaga ma ni tamāloloa se toʻavalu. Ou te manatua loʻu taatia i luga o le auala ae o loo tatuʻi ma kiki loʻu ulu. Na ou lagona na toetoe a ou oti, ma sa ou tatalo loa: “Ou te faamalie atu Ieova ona o loʻu lē tausia ma le faamaoni o lau Afioga. Ae afai ou te toe malosi, ou te tautō atu o le a ou suʻesuʻeina le Tusi Paia ma Molimau a Ieova  ma faaleleia loʻu olaga.” O le mea e ofo ai ona na ou toe malosi, ma sa faataunuu loa laʻu folafolaga e suʻesuʻe le Tusi Paia.

I le 2006, na ou siitia atu ai i Egelani. O loʻu sini ia maua ni tupe se tele ina ia toe foʻi mai i Polani ma maua ai se isi faailoga maualuga i le mataupu tau tulafono. Ae a o faaauau laʻu suʻesuʻega faale-Tusi Paia, sa iai se aafiaga malosi o le Filipi 3:8 iā te aʻu. Na tusi le aposetolo o Paulo: “E moni lava, ua ou lotomalie e lafoaʻi ia mea ona o le silisili ese o le poto o Keriso Iesu loʻu Alii. O ia foʻi, ua ou lafoaʻia ai nei mea uma ma ua ou manatu o otaota ia mea, ina ia ou maua Keriso.” I le pei o aʻu, sa maua foʻi e le aposetolo o Paulo aʻoaʻoga tau tulafono ma o ia o se tagata e sili ona sauā. (Galuega 8:3) Ae sa ia iloa e iai se isi auala e sili ona lelei e ola ai, o le auauna i le Atua ma fai le mea sili e faataʻitaʻi ai iā Iesu. Ina ua ou manatunatu i le faaaʻoaʻoga a Paulo, na ou iloa ai e lē maua se fiafia moni i se galuega e lelei le totogi ma amioga sauā. Na ou iloa ai afai sa suia le olaga o Paulo, e mafai foʻi ona ou faia. O lea na ou filifili ai loa e nofo i Egelani, ae faagalo le saʻilia o nisi faailoga maualuluga i mataupu tau tulafono.

O le tele o mea na ou aʻoaʻoina e faatatau iā Ieova, o le atili foʻi lenā ona ou vavalalata atu iā te ia. Sa pāʻia loʻu loto i lana folafolaga, e na te faamagalo i latou e mananaʻo moni e faia suiga i o latou olaga. (Galuega 2:38) Ina ua ou manatunatu loloto i le 1 Ioane 4:16, “o le Atua o le alofa lava ia,” na amata ai loa ona ou iloa le māfuaaga e inosia ai e Ieova faiga sauā.

Sa ou manaʻo e avea ma vaega o le ʻauuso fiafia o Molimau a Ieova

Sa ou maofa i amio a Molimau a Ieova. Sa manino mai o loo latou taumafai malosi e ola e tusa ai ma tapulaa maualuluga tau amio a le Tusi Paia. Sa ou manaʻo e avea ma vaega o lenei ʻauuso fiafia. Ina ua uma ona faia ni taumafaiga malolosi ma fetuunaʻiga i loʻu olaga, sa ou papatiso loa i le 2008 e avea ma Molimau a Ieova.

O loo ma fiafia ma Esther e aʻoaʻo le Tusi Paia i tagata e tautatala i le gagana Polani

AOGĀ IĀ TE AʻU:

Ua matuā suia e le Tusi Paia loʻu olaga mai i sē na moomoo ia tele le tamaoaiga, sauā, faaaogā fualaau faasāina, inu tele, ma matuā lagolagosua i taaloga soka, ae avea ma auauna a Ieova e fiafia e aʻoaʻo tagata i le Tusi Paia. O loo ou fiafia pea e matamata i taaloga soka, peitaʻi ua ou filifili ia aua neʻi alu uma ai loʻu taimi.

Ua ou faaipoipo iā Esther, o se aumea tapuaʻi lelei a Ieova. O loo fiafia la maʻua faaipoipoga. O loo ma fiafia e aʻoaʻo le Tusi Paia i tagata e tautatala i le gagana Polani o loo nonofo i inei i mātū i sisifo o Egelani. O le taimi muamua lenei ua ou maua ai se olaga faamalieina. Ua ou maua se lotofuatiaifo mamā faapea se olaga aogā.

Faitau Atili

TALA LELEI MAI I LE ATUA!

E Faapefea Ona Aogā iā i Tatou Mataupu Silisili o le Tusi Paia?

Na taʻua e Iesu le māfuaaga e tatou te manaʻomia ai taʻitaʻiga, faapea mataupu silisili e lua e sili ona tāua.