Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

LE OLOMATAMATA OKETOPA 2015

 MATAUPU AUTŪ | PE E AOGĀ LE TATALO?

Aiseā ua Valaaulia ai e le Atua i Tatou ia Tatalo Atu?

Aiseā ua Valaaulia ai e le Atua i Tatou ia Tatalo Atu?

E finagalo le Atua ia avea i tatou ma ana uō.

O so o se faigāuō lava, e masani ona fetalanoaaʻi ina ia atiaʻe ai se faauōga māfana. I se tulaga tutusa, ua valaaulia e le Atua i tatou ia talanoa atu iā te ia ma maua ai se faauōga māfana ma ia. Ua fetalai le Atua: “E tou te valaau mai lava iā te aʻu, ma ō mai ma tatalo mai iā te aʻu, ona ou faalogo atu ai lea iā te outou.” (Ieremia 29:12) A o e talanoa atu i le Atua, o le a e ʻmafuta vavalalata atu ai iā te ia, ona mafuta vavalalata mai lea o ia iā te oe.’ (Iakopo 4:8) Ua faamautinoa mai i le Salamo 145:18: “E latalata Ieova iā i latou uma e valaau atu iā te ia.” Pe a fai ma a tatou masani le tatalo atu i le Atua, o le a iʻu ina atili māfana ai la tatou faauōga ma ia.

“E latalata Ieova iā i latou uma e valaau atu iā te ia.”—Salamo 145:18

E finagalo le Atua e fesoasoani mai iā te oe.

Na fetalai Iesu: ʻPo o ai se isi o outou e avatu i lona atalii se maa pe a talosaga mai i se falaoa? Pe e avatu ea iā te ia se gata pe afai e ōle mai mo se iʻa? E mafai lava ona outou avatu meaalofa lelei i a outou fanau. E sili atu la ona foaʻi mai e lo outou Tamā o i le lagi mea lelei i ē e ōle atu iā te ia!’ (Mataio 7:9-11) O lea, ua valaaulia oe e le Atua ia tatalo atu iā te ia, auā ʻo loo manatu mamafa mai o ia iā te oe’ ma e finagalo e fesoasoani mai. (1 Peteru 5:7) E finagalo foʻi o ia ina ia e tuu atu iā te ia ou popolega. Ua taʻua i le Filipi 4:6: “Aua neʻi popole i se mea, ae ia faailoa atu o outou manaʻoga i mea uma lava i le Atua, i le tatalo ma le faatoga, atoa ma le faafetai.”

E iai manaʻoga faaleagaga o tagata.

Ua mātauina e tagata e atamamai i natura faaletagata, e faitau selau miliona tagata e lagona e tatau ona latou tatalo. E aofia ai i nei tagata nisi e talitonu e leai se Atua ma ē e masalosalo pe e iai se Atua. * O i inei ua faaalia mai ai le mea moni e faapea, na foafoaina le tagata ma se manaʻoga i mea faaleagaga. Na fetalai Iesu: “E fiafia o ē e naunau i mea faaleagaga.” (Mataio 5:3) O se tasi o auala e faamalie ai lenei manaʻoga, o le talanoa atu lea e lē aunoa i le Atua.

O ā aogā e tatou te faatalitalia pe afai e talia le valaaulia a le Atua ia tatalo atu iā te ia?

^ pala. 8 Na iloa mai i se suʻesuʻega na faia i le 2012 e le Pew Research Center, a itiiti mai e tasi le taimi e tatalo ai i le masina atoa, le 11 pasene o tagata Amerika e lē talitonu e iai se Atua ma ē e masalosalo pe e iai se Atua.