Skip to content

Skip to secondary menu

Skip to table of contents

Molimau a Ieova

Faa-Samoa

Le Olomatamata  |  Oketopa 2015

 MATAUPU AUTŪ | PE E AOGĀ LE TATALO?

Po o Iai se Tasi o Faafofoga Mai?

Po o Iai se Tasi o Faafofoga Mai?

O nisi e manatu e maʻimau le taimi e tatalo ai ona e leai se tasi o faafofoga mai. O isi ua taumafai e tatalo ae e manatu e lē o taliina mai a latou tatalo. Na fafau aʻe e se tagata e talitonu e leai se Atua, se manatu e faamatala ai pe e faapeʻī le Atua, ma na tatalo e faapea: “Ia tau lava o lou musumusu mai.” Peitaʻi na taʻua e lenei tagata “e leʻi tali” mai le Atua.

E ui i lea, ua faamautinoa mai i le Tusi Paia e iai moni lava le Atua ma o loo faafofoga mai i a tatou tatalo. I aso ua mavae, na fai atu ai i se nuu le faamatalaga lenei o loo i le Tusi Paia: ʻO le a matuā agalelei mai lava le Atua iā te oe pe a e alaga atu; o le taimi lava e faafofoga mai ai o ia o le a tali mai o ia iā te oe.’ (Isaia 30:19) Ua taʻua foʻi i le Tusi Paia: “O le tatalo a ē e amio saʻo e fiafia i ai o ia.”—Faataoto 15:8.

Na tatalo Iesu i lona Tamā, “ma na faafofogaina ma le agalelei o ia.” —Eperu 5:7

O loo faamauina foʻi i le Tusi Paia nisi o faaaʻoaʻoga o tagata na faafofogaina a latou tatalo. Ua taʻua i le Eperu 5:7 ʻna ʻaiʻoi atu Iesu i Lē na mafai ona faaola iā te ia,’ ma na “faafofogaina ma le agalelei o ia.” O loo maua foʻi isi faaaʻoaʻoga i le Tanielu 9:21 ma le 2 Nofoaiga a Tupu 7:1.

Ae aiseā la e manatu ai nisi e lē o taliina a latou tatalo? Ina ia talia a tatou tatalo, e tatau ona tatou tatalo atu iā Ieova * le Atua lea o loo taʻua i le Tusi Paia, ae e lē i tuaʻā po o isi atua. E finagalo foʻi le Atua ia tatou ʻtalosaga atu e tusa ma lona finagalo,’ po o mea e fiafia i ai. Pe afai e tatou te faia faapea, ua faamautinoa mai e le Atua o le a “faafofoga mai lava o ia iā i tatou.” (1 Ioane 5:14) O lea, ina ia faafofogaina a tatou tatalo, e tatau ona tatou iloa le Atua o loo taʻua i le Tusi Paia ma suʻesuʻe po o le ā lona finagalo.

E toʻatele tagata e talitonu o le tatalo e lē na o se faiga faalelotu, ae o loo faafofoga mai le Atua i tatalo ma tali mai i ai. Ua taʻua e Isaako mai i Kenya: “Na ou tatalo mo se fesoasoani ina ia ou malamalama i le Tusi Paia. E leʻi umi ae asiasi mai se tasi ma ofo mai le fesoasoani na ou manaʻomia.” Na manaʻo Hilda mai i Filipaina e tuu lana ulaula tapaa. Peitaʻi o le tele o taimi sa lē taulau, ma na faapea atu i ai lana tane: “Aiseā e te lē tatalo ai i le Atua mo se fesoasoani?” Sa talia e Hilda le fautuaga ma na ia faapea mai: “Na ou maofa i le auala na fesoasoani mai ai [le Atua]. Na pei lava ua mou atu loʻu fia ulaula ma na mafai ona tuu.”

Po o naunau le Atua e fesoasoani mai i ou popolega ia e ōgatusa ma lona finagalo?

^ pala. 6 I le Tusi Paia, o Ieova o le suafa lea o le Atua.