Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

LE OLOMATAMATA OKETOPA 2015

 MATAUPU AUTŪ | PE E AOGĀ LE TATALO?

Tatalo—O Aogā mo Oe

Tatalo—O Aogā mo Oe

A o e leʻi faia se mea, e masani ona e fesili, ʻO le ā le aogā o lea mea iā te aʻu?’ Peitaʻi, po o se manatu faapito lou fesili po o ā aogā e te maua pe a e tatalo? E leai, auā o le tulaga masani e tatou te mananaʻo e iloa pe e iai se aogā o le tatalo. E oo lava i le tane faatuatua o Iopu na fesili: “Pe a ou valaau atu iā te ia, po o le a ia tali mai iā te aʻu?”—Iopu 9:16.

I mataupu ua mavae, na tatou iloiloina ai faamaoniga e iloa ai, o le tatalo e lē na o se faiga faalelotu po o se auala e maua ai le filemu. O loo faafofoga moni mai lava le Atua, aemaise pe afai e tatou te tatalo atu i le auala saʻo ma i mea e tusa ma lona finagalo. Ua ia apoapoaʻia i tatou ia mafuta vavalalata atu iā te ia. (Iakopo 4:8) O lea, o le ā e tatou te faatalitalia pe a fai ma a tatou masani le tatalo e lē aunoa? Seʻi o tatou iloilo nisi o aogā.

Filemu le mafaufau.

Pe e te lagona le lofitūina i le popole pe a feagai ma faafitauli ma luʻi i lou olaga? I taimi faapena, ua faalaeiau i tatou i le Tusi Paia “ia tatalo e lē aunoa” ma ʻia faailoa atu o tatou manaʻoga i le Atua.’ (1 Tesalonia 5:17; Filipi 4:6) Ua faamautinoa mai i le Tusi Paia pe afai e tatou te tatalo atu i le Atua, “ona leoleoina ai lea o o [tatou] loto ma mafaufau i le filemu mai i le Atua, e silisili i mea uma lava e manatu i ai.” (Filipi 4:7) E maua le toʻafilemu pe a sasaa atu o tatou popolega i lo tatou Tamā i le lagi, auā ua ia faalaeiau i tatou ia faia faapea. Ua faapea mai le Salamo 55:22: “Ia tuuina atu iā Ieova ou popolega uma, o ia lava e na te tausia oe.”

“Ia tuuina atu iā Ieova ou popolega uma, o ia lava e na te tausia oe.”—Salamo 55:22

E toʻatele tagata i le lalolagi atoa ua latou maua lea filemu. Ua taʻua e Hee Ran mai i Korea i Saute:  “Po o le ā le matuiā o soʻu faafitauli, ae o le taimi lava ou te tatalo ai, ou te lagona ua māmā laʻu avega ma ua ou maua le malosi e tumau ai.” Ua taʻua e Silia mai i Filipaina: “I le avea ai o se tinā, ou te popole tele i laʻu fanau teine faapea si oʻu tinā lea ua lē o toe iloa mai aʻu. Peitaʻi, o le tatalo ua mafai ai ona faatino aʻu galuega i le aso e aunoa ma le soona popole. Ou te mautinoa o le a fesoasoani mai Ieova i le tausiaina o laʻu fanau ma si oʻu tinā.”

Faamāfanafanaina ma faamalosia pe a feagai ma faigatā.

Po o e matuā mafatia ona atonu o se tulaga mataʻutia pe e lamatia ai le ola? E te maua le mapusaga pe afai e te tatalo i le “Atua o faamāfanafanaga uma.” Ua taʻua i le Tusi Paia o le a ia “faamāfanafanaina i  tatou i o tatou puapuaga uma.” (2 Korinito 1:3, 4) O se faataʻitaʻiga, i se tasi taimi ina ua matuā mafatia Iesu, na ʻtootuli o ia ma tatalo.’ O le iʻuga, ʻsa faaali mai le agelu mai le lagi ma faamalosi iā te ia.’ (Luka 22:41, 43) O Neemia o se isi tane faamaoni na mafatia ona o faamataʻuga mai i tagata leaga, na taumafai e taofia o ia mai i le faia o le galuega a le Atua. Na tatalo Neemia: “O lenei, le Atua e, ia e faamalosia oʻu lima.” O mea na tutupu ina ua uma le tatalo a Neemia, e iloa mai ai na fesoasoani le Atua e faamalosia o ia ma taulau ai i le faia o lana galuega. (Neemia 6:9-16) Na faamatala e Reginald mai i Ghana le aogā iā te ia o le tatalo: “Pe a ou tatalo, aemaise i taimi e lofitūina ai i faigatā, ou te lagona e pei ua ou taʻu atu loʻu faafitauli i se tasi e mafai ona fesoasoani mai, ma o sē e mafai ona faamautinoa mai e leai se māfuaaga ou te soona popole ai.” Ioe, e mafai e le Atua ona faamāfanafanaina i tatou pe a tatalo atu iā te ia.

Atamai mai i le Atua.

O nisi filifiliga e tatou te faia e iai ona aafiaga tumau iā i tatou ma ē e pele iā i tatou. E faapefea la ona tatou faia ni filifiliga atamai? Ua faapea mai le Iakopo 1:5: “Pe afai ua leai se atamai i se tasi o outou, inā ōle atu pea ia i le Atua [aemaise i le feagai ai ma tulaga faigatā], auā o ia na te foaʻi tele mai ma le lē toe taʻutaʻua, ona foaʻiina mai lea iā te ia.” Pe afai e tatou te tatalo i le Atua mo le atamai, e mafai ona ia faaaogā lona agaga paia e taʻitaʻia ai i tatou ina ia faia ni filifiliga atamai. E mafai ona tatou talosaga patino atu mo lona agaga paia, auā ua faamautinoa mai e Iesu o le a “foaʻi mai e le Tamā o i le lagi le agaga paia iā i latou o ē e ōle atu iā te ia!”—Luka 11:13.

“Na faaauau ona ou tatalo iā Ieova mo le taʻitaʻiga ina ia faia se filifiliga atamai.”—Kwabena, Ghana

E oo lava iā Iesu na ōle atu i le Tamā mo le fesoasoani ina ia faia ai ni filifiliga tāua. Ina ua manaʻo Iesu e filifilia ni tane e toʻa 12 e avea ma ona aposetolo, ua taʻua i le Luka 6:12 na “tatalo atu pea o ia i le Atua i le pō atoa.”

I le pei o Iesu, e toʻatele tagata i aso nei ua talitonu i le aogā o le tatalo, ona ua latou mātauina le auala e tali mai ai le Atua i a latou talosaga, mo se fesoasoani i le faia o filifiliga atamai. Na taʻua e Regina mai i Filipaina le tele o faafitauli na ia fesagaʻia, e pei o le tausia o ia lava ma lona aiga ina ua maliu lana tane, lē toe iai sana galuega, ma luʻi o le tausia aʻe o lana fanau. O le ā na fesoasoani iā te ia e faia ai filifiliga atamai? Na ia taʻua: “Na ou faalagolago i le fesoasoani a Ieova e ala i le tatalo.” Ua faamatala foʻi e Kwabena mai i Ghana le māfuaaga na tatalo ai mo se fesoasoani: “Na lē toe iai laʻu galuega kamuta e lelei le totogi.” Ina ua suʻe se isi ana galuega, na faapea mai o ia: “Na faaauau ona ou tatalo iā Ieova mo le taʻitaʻiga ina ia faia se filifiliga atamai. Ou te matuā mautinoa na fesoasoani mai Ieova ia ou filifilia se galuega e mafai ona tausia ai aʻu i le itu faaletino ma le faaleagaga.” E mafai foʻi ona e maua le taʻitaʻiga a le Atua, e ala i le tatalo atu iā te ia i tulaga e ono aafia ai lau faiā ma ia.

Ua uma ona tatou talanoa i nisi o aogā e te maua ona o le tatalo. (Mo nisi faaaʻoaʻoga, tagaʻi i le pusa “ O Aogā o le Tatalo.”) Peitaʻi ina ia e maua na aogā, e ao ona e iloa muamua le Atua ma lona finagalo. Pe afai e te manaʻo e faia faapea, e matou te faalaeiau oe e fesili atu i se Molimau a Ieova ina ia fesoasoani iā te oe e suʻesuʻeina le Tusi Paia. * O se tasi lenā o laasaga amata e mafai ona e faia ina ia vavalalata atu ai i le “Faafofoga tatalo.”—Salamo 65:2.

^ pala. 14 Mo nisi faamatalaga, faafesootaʻi Molimau a Ieova o loo i lou vaipanoa, pe tagaʻi i la matou upega tafaʻilagi o le www.jw.org/sm.

Faitau Atili

O le ā le Tala Lelei?

Ia suʻesuʻe po o le ā le tala lelei mai i le Atua, aiseā ua faanatinati ai, ma o le ā e tatau ona tatou faia.

O ā Ituaiga Tagata e Iai Molimau a Ieova?

E to‘afia ni Molimau a Ieova e te silafia? O le ā se mea o e iloa e faatatau iā i matou?