Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

LE OLOMATAMATA SETEMA 2015

 MATAUPU AUTŪ | O AI MOLIMAU A IEOVA?

O ā Talitonuga o Molimau a Ieova?

O ā Talitonuga o Molimau a Ieova?

E talitonu Molimau a Ieova “o Tusitusiga Paia uma e mai i le agaga o le Atua, ma e aogā.” (2 Timoteo 3:16) E matou te faaaogā le Tusi Paia o se taʻiala aogā ina ia aʻoaʻo ai e faatatau i Lē na foafoaina mea, ma ola ai i ni olaga e aogā.

Ua taʻua i le Salamo 83:18: “Ina ia iloa ai e tagata o oe e ou le suafa o Ieova, e na o oe lava o Lē e Silisili Ese i le lalolagi uma.” O lea, e matou te tapuaʻi tau lava o Ieova le Atua, ma i le avea ai ma ana molimau, e matou te filigā e faailoa atu lona suafa.—Isaia 43:10-12.

I le avea ai ma Kerisiano, e matou te talitonu o Iesu “o le Alo o le Atua,” * na afio mai i le lalolagi ma avea ma Mesia. (Ioane 1:34, 41; 4:25, 26) Ina ua maliu, sa toetū o ia ma alu aʻe i le lagi. (1 Korinito 15:3, 4) Mulimuli ane, na avea o ia ma Tupu o le Malo o le Atua. (Faaaliga 11:15) O lenā Malo o se pulega moni lava o le a toe faafoʻisia le lalolagi e avea ma Parataiso. (Tanielu 2:44) Ua faapea mai le Salamo 37:11, 29: “O ē e agamalu, e fai mo i latou le lalolagi, e matuā faafiafiaina foʻi i latou ona o le tele o le filemu.”

ʻPe a faitau Molimau a Ieova i le Tusi Paia, e latou te talitonu o loo talanoa mai le Atua iā i latou. Pe a aliaʻe mai ni faafitauli i o latou olaga, e latou te faitau ma saʻili i le Afioga a le Atua mo se vaifofō. E latou te ioe o loo ola le Afioga a le Atua.’—Faifeʻau Katoliko o Benjamin Cherayath, nusipepa i Siamani o le Münsterländische Volkszeitung

E talitonu Molimau a Ieova e mafai foʻi e tagata i aso nei ona maua aogā mai i mataupu silisili o le Tusi Paia. O lea e matou te matuā mulimuli ai i na mataupu silisili. (Isaia 48:17, 18) O se faaaʻoaʻoga, talu ai ua lapataʻi mai le Tusi Paia ia ʻalofia masaniga e faaleagaina ai o tatou mafaufau ma tino, o lea e matou te lē ulaula tapaa ai pe faaaogā sesē fualaau ma vailaau faasāina. (2 Korinito 7:1) E matou te ʻalofia foʻi faiga o loo faasā mai i le Tusi Paia, e pei o le onā, feusuaʻiga e lē mamā ma le gaoi.—1 Korinito 6:9-11.

^ pala. 5 O loo faasino atu foʻi le Tusi Paia iā Iesu “o le Atalii e toʻatasi o le Atua,” auā o ia o le uluaʻi foafoaga ma na faia toʻatasi e Ieova.—Ioane 3:18; Kolose 1:13-15.