Skip to content

Skip to secondary menu

Skip to table of contents

Molimau a Ieova

Faa-Samoa

LE OLOMATAMATA SETEMA 2015

 TALAAGA O LE SOIFUAGA

Maua se Mea e Sili Atu Nai lo o se Olaga Taʻutaʻua

Maua se Mea e Sili Atu Nai lo o se Olaga Taʻutaʻua

I se tasi o pō i le 1984, na suia atoa ai loʻu olaga mai i se talavou masani, ae avea o se tagata taʻutaʻua ina ua faapaleina aʻu e avea ma tausala o Hong Kong. Sa iai loʻu ata i le pito i luma o mekasini ma nusipepa, sa ou pese, siva, lauga i luma o tagata, faasalalau i le televise, ofu i ofu e sili ona mananaia, ma aufaatasi ma tagata tāua e pei o le kovana o Hong Kong.

I le tausaga na sosoo ai, na amata ai ona ou iai i ata tifaga, ma o le tele o taimi o aʻu o le teine autū i ata. Sa mananaʻo tagata faasalalau e fai saʻu faamatalaga, ma naunau ē e puʻe ata e puʻe oʻu ata. Sa mananaʻo foʻi tagata ia ou iai i le taimi e faatoʻā faaali ai saʻu ata tifaga, ia ou ʻotiina lipine o ni fale fou ma faiʻaiga ma i latou. Sa ou lauiloa i le toʻatele o tagata.

Se tasi o ata tau sa ou iai

Peitaʻi a o faagasolo taimi, na ou iloa ai e leai se manaia o lea ituaiga o olaga e pei ona sa ou mafaufau i ai. Sa tele ina ou iai i ata tau, ma sa lamatia ai loʻu ola. Sa ese le faiga o ata i Hong Kong mai i le faiga o ata i Hollywood. E seāseā ona faaaogā e Hong Kong se isi tagata e faatinoina vaega o le ata e lamatia ai le ola. Nai lo o lea, e faatino lava e tagata o loo iai i le ata tifaga. O lea sa ou faia ai nei vaega uma, e pei o le tiʻetiʻe i se pasika a o alu i luga o se taavale. O le tele o ata tifaga sa ou iai e iai faiga sauā, amioga lē mamā, ma faiga faatemoni.

I le 1995, sa ou faaipoipo ai i se tasi o tagata fai ata tifaga. E ui e foliga mai na ou maua mea uma e faafiafiaina ai aʻu, e pei o se olaga taʻutaʻua, maumea, ma se tane alofa, ae sa ou lagona pea le mafatia ma le faanoanoa. O lea, na ou filifili ai loa ou te lē toe iai i ata tifaga.

MANATUA MEA NA OU AʻOAʻOINA A O LAʻITIITI

Sa amata ona ou toe manatua mea na ou aʻoaʻoina a o laʻitiiti. I na aso, sa masani ona ma ō ma loʻu uso i Aso Toonaʻi e asiasi i se aiga Molimau a Ieova e māfana ma alolofa. O le igoa o le tamā o Joe McGrath, ma na ia suʻesuʻeina le Tusi Paia faatasi ma i maʻua ma lana fanau teine e toʻatolu. Sa feutagaʻi “Uncle Joe” ma lana avā ma lana fanau i se auala faaaloalo. Sa ou fiafia e ō faatasi ma i latou i a latou sauniga faa-Kerisiano, ma a latou fonotaga tetele i nisi taimi. E ese loʻu fiafia i na taimi, ma na ou lagona le saogalemu pe a faatasi ma Molimau a Ieova.

 Peitaʻi sa tele tulaga faanoanoa na ou vaaia i loʻu aiga. O le auala na ola ai loʻu tamā, sa iʻu ai ina matuā lotomafatia loʻu tinā. I le pe ā ma le 10 o oʻu tausaga, na lē toe aufaatasi ai loʻu tinā ma Molimau a Ieova. Na ou aufaatasi pea ma Molimau a Ieova, ae ou te leʻi alu ma loʻu lotoatoa, ma na ou papatiso i le 17 o oʻu tausaga. Peitaʻi, e leʻi umi ae ou faia ni amioga e lē faa-Kerisiano, ma lē toe avea ai loa aʻu ma vaega o le faapotopotoga.

FILIFILI E TOE FOʻI

E leʻi leva ona uma ona ou faaipoipo, ae asiasi mai ni toeaina se toʻalua mai i se faapotopotoga a Molimau a Ieova i loʻu vaipanoa. Sa laʻua faamatala mai le auala e mafai ai ona ou toe foʻi iā Ieova le Atua, ma faatulaga se misionare e igoa iā Cindy e fesoasoani mai iā te aʻu. O le taimi lea ua mou atu loʻu faatuatua, o lea na ou fai ai iā Cindy ia faamaonia mai iā te aʻu, o le Tusi Paia o le Afioga moni a le Atua. Sa ia faasino mai nisi o valoaga o le Tusi Paia ua uma ona faataunuuina. Na faasolo ina māfana le ma faigāuō, ma sa ou talia lana faalaeiauga ia ma suʻesuʻe i aʻoaʻoga faavae o le Tusi Paia. O le taimi muamua lea na faatoʻā ou talitonu atoatoa ai, o Ieova o le Atua o le alofa, ma e finagalo ia ou fiafia.

Ina ua ou toe alu i sauniga faa-Kerisiano, sa ou iloa ai e sili atu loʻu fiafia pe a faatasitasi ma Molimau nai lo o tagata fai ata tifaga. Peitaʻi o mea na tutupu a o oʻu laʻitiiti, na ou lē maufaatuatuaina ai se tasi ma ou te leʻi fiafia iā te aʻu lava. Sa faasino mai e se Molimau mai i le Tusi Paia le auala ou te feagai ai ma oʻu faalogona lē lelei, ma na ou aʻoaʻoina ai foʻi le auala e maua ai ni uō moni.

SE MEA E SILI ATU NAI LO O SE OLAGA TAʻUTAʻUA

I le 1997, na ma siitia ai ma loʻu toʻalua i Hollywood i Kalifonia i Amerika. O i inā na ou faaalu ai le tele o loʻu taimi e fesoasoani ai i isi ia maua le atamai mai i le Afioga a le Atua. O le aʻoaʻo atu o le Tusi Paia sa ou maua ai le faamalieina lea e leʻi maua mai i se olaga taʻutaʻua ma le iai i ata tifaga. O se faataʻitaʻiga, i le 2002, sa ma feiloaʻi ai ma saʻu uō mai i Hong Kong e igoa iā Cheri. E tele itu na tutusa ai o ma olaga. Sa avea Cheri ma tausala o Hong Kong i le tausaga e muamua atu iā te aʻu, ma o ia na faapaleina aʻu ina ua avea aʻu ma tausala. Sa iai foʻi o ia i ata tifaga ma mulimuli ane avea ma sē e fai ata tifaga, ma na galulue ma le toʻatele o faatonu taʻutaʻua i ata tifaga. Na siitia mai foʻi o ia i Hollywood.

Sa ou lagona le faanoanoa ina ua ou iloa na maliu le uō tama a Cheri na tuu e la te faaipoipo, ona o le maʻi fatu. Peitaʻi, e leʻi maua e Cheri se faamāfanafanaga mai i lana tapuaʻiga o le lotu Puta. I le pei o aʻu, sa ia maua se olaga taʻutaʻua lea e moomoo i ai le toʻatele, ae sa mafatia ma e leai se tasi na ia maufaatuatuaina. Na ou faasoa atu loa iā te ia mea na ou aʻoaʻoina mai i le Tusi Paia. Ae na faigatā ona ia talia nei mea ona o ona talitonuga i le lotu Puta.

Laʻu uō o Cheri a o iai i se ata tifaga

I se tasi aso i le 2003, na vili mai ai Cheri a o iai i Vancouver i Kanata i le faiga o sana ata tifaga. Sa ia faamatala mai ma le fiafia e faapea, a o tiʻetiʻe solo e matamata i laufanua matagofie, na faafuaseʻi ona ia tatalo leotele: “Ia taʻu mai iā te aʻu, O ai le Atua moni? O ai lou suafa?” O le taimi lea na ui atu ai o ia i tala ane o se Maota mo Sauniga a Molimau a Ieova, ma ia vaaia ai le suafa o Ieova. Na manatu o ia o le tali lea mai i  le Atua, ma na manaʻo e vave feiloaʻi ma Molimau a Ieova. O lea na ou faia ai ni fuafuaga, ma ina ua mavae ni nai aso, sa auai atu loa Cheri i sauniga i se faapotopotoga faa-Saina i Vancouver.

Na mulimuli ane faapea mai Cheri: “Sa naunau moni mai nei tagata iā te aʻu, ma na mafai ona faamatala atu i ai oʻu faalogona.” Sa ou matuā fiafia ina ua ou faalogo atu i lana faamatalaga, auā e leʻi iai ni ana uō a o iai i le faiga o ata tifaga. Peitaʻi i le 2005, na toe foʻi ai o ia i Hong Kong ina ia faia ni ata tifaga se lua i Saina. O se fiafiaga ona i le 2006, na tuuina atu ai e Cheri lona ola iā Ieova e ala i le papatiso i se fonotaga a Molimau a Ieova i Hong Kong. Na manaʻo Cheri e auauna atoatoa iā Ieova, ae na faigatā ona o lana galuega o sē e fai ata tifaga, ma na ia lagona le lē fiafia.

LE FIAFIA E MAUA ONA O LE FESOASOANI I ISI

I le 2009, na matuā suia ai le olaga o Cheri. Na filifili o ia e lē toe galue o sē e fai ata tifaga, ina ia mafai ona ia auauna atoatoa iā Ieova. Sa tele ana uō i totonu o le faapotopotoga Kerisiano. Sa avea o ia o se tagata talaʻi faataimi atoa o le tala lelei o le Malo, ma na fiafia tele e fesoasoani i tagata ia maua se olaga e sili ona lelei.—Mataio 24:14.

Na filifili foʻi Cheri e aʻoaʻoina le gagana Nepale ina ia lagolagosua atu ai i le vaega o Molimau a Ieova o loo i Hong Kong, e tautatala i le gagana Nepale. O le toʻatele o tagata Nepale i Hong Kong e inosia ma manatu faatauvaa i ai, ona e lē malamalama tele i le faa-Peretania ma le faa-Saina, ma e ese foʻi a latou tū ma aga. Sa faamatala e Cheri lona fiafia tele e fesoasoani i nei tagata ina ia malamalama i le Tusi Paia. O se faataʻitaʻiga, a o talaʻi mai i lea fale i lea fale, na feiloaʻi ai i se fafine Nepale e itiiti lona iloa e faatatau iā Iesu, ae e leʻi faalogo muamua lava e faatatau i le Atua moni o Ieova. Na faaaogā e Cheri le Tusi Paia e faailoa atu ai i le fafine na tatalo Iesu i lona Tamā i le lagi. Ina ua iloa e le fafine e mafai ona ia tatalo i le Atua moni o Ieova, sa ia talia loa le tala lelei. E leʻi umi ae suʻesuʻeina foʻi e lana tane ma le la tama teine le Tusi Paia.—Salamo 83:18; Luka 22:41, 42.

Cheri i aso nei

Ina ua ou vaaia le fiafia tele o Cheri e talaʻi faataimi atoa, na ou fesili ifo: ʻO le ā o loo taofia ai aʻu mai i le faia foʻi faapea?’ O le taimi lea ua ou toe foʻi i Hong Kong, ma na ou filifili loa e fetuunaʻi loʻu olaga, ina ia tele loʻu taimi e faaalu e aʻoaʻo atu ai i isi upu moni o le Tusi Paia. Ua ou iloa, o le faalogo atu i tagata ma fesoasoani iā i latou ia malamalama i le Afioga a le Atua, ou te maua ai le fiafia moni.

Ua ou iloa, o le fesoasoani i isi ia malamalama i le Afioga a le Atua, ou te maua ai le fiafia moni

O se faataʻitaʻiga, na ma mafai ona ma suʻesuʻeina le Tusi Paia ma se fafine mai i Vietnam, o sē sa faanoanoa ma tagi i le tele o taimi. Ua ia maua nei se olaga fiafia ma o loo olioli e auaufaatasi ma le faapotopotoga.

Ua ma maua uma ma Cheri se mea e sili mamao atu nai lo o se olaga taʻutaʻua. E ui lava sa manaia le galulue i le faia o ata tifaga ma lauiloa ai, ae e sili atu le faamalieina e maua mai i le aʻoaʻoina o isi e faatatau iā Ieova, auā e viia ai o Ia. Ua ma tofo i le moni o fetalaiga a Iesu: “E sili le fiafia e maua i le foaʻi atu i lo o le talia mai.”—Galuega 20:35.