Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

LE OLOMATAMATA (LOMIGA MO SU‘ESU‘EGA) TESEMA 2015

O Ieova o le Atua o Fesootaʻiga

O Ieova o le Atua o Fesootaʻiga

“Faamolemole, ia faafofoga mai seʻi oʻu tautala atu.”—IOPU 42:4.

PESE: 113, 114

1-3. (a) Aiseā e sili atu ai le gagana ma le auala e fesootaʻi mai ai le Atua nai lo o tagata? (e) O le ā o le a iloiloina i lenei mataupu?

NA FOAFOAINA e le Atua agelu ma tagata ina ia mafai ona latou maua le ola ma le fiafia. (Sala. 36:9; 1 Timo. 1:11) Na faasino atu e le aposetolo o Ioane i le aumea muamua a le Atua, o ia o “le Upu” ma “o le amataga o foafoaga a le Atua.” (Ioa. 1:1; Faaa. 3:14) Sa faailoa atu e Ieova le Atua ona manatu ma faalogona i lona Alo ulumatua. (Ioa. 1:14, 17; Kolo. 1:15) Na taʻua e Paulo ʻgagana a agelu’ o se gagana e fesootaʻi ai i le lagi, lea e sili atu nai lo o gagana a tagata.—1 Kori. 13:1.

2 E matuā malamalama Ieova i le faitau piliona o ana foafoaga atamamai i le lagi ma le lalolagi. E tatalo atu iā te ia le toʻatele o tagata e ala i gagana eseese i so o se taimi. E lē gata e faafofoga mai o ia i na tatalo, ae e fesootaʻi atu foʻi o ia ma avatu le taʻitaʻiga i ana agelu i le taimi lava lenā. O lea, e tatau ona sili atu Ona manatu, le gagana, ma le auala e fesootaʻi ai nai lo o tagata. (Faitau le Isaia 55:8, 9.) E manino mai, e faafaigofie e Ieova ona manatu ina ia malamalama ai tagata pe a Ia fesootaʻi mai.

3 O le a tatou iloiloina auala ua faaaogā e le Atua atamai ina ia manino ai ana fesootaʻiga ma tagata a o faagasolo taimi. O le a tatou talanoaina le auala na fetuunaʻi ai fesootaʻiga a Ieova e fua i manaʻoga ma tulaga o tagata.

 AFIOGA A LE ATUA I TAGATA

4. (a) O le ā le gagana na fesootaʻi ai le Atua ma Mose, Samuelu ma Tavita? (e) O ā faamatalaga o loo iai i le Tusi Paia?

4 Na fesootaʻi Ieova ma Atamu i le faatoʻaga o Etena e ala i le gagana a tagata. Atonu na faaaogāina e le Atua le gagana Eperu anamua. Sa ia faailoa mulimuli ane foʻi ona manatu i tusitala o le Tusi Paia na tautatala i le gagana Eperu e pei o Mose, Samuelu ma Tavita, ae sa latou tusia na manatu i a latou lava upu ma auala. Na latou faamaumauina fetalaiga a le Atua, ma ana feutagaʻiga ma ona tagata. Na aofia ai foʻi tala e faatatau i lo latou alolofa, faatuatua, faapea o latou sesē ma mea na lē faamaoni ai. Ua matuā aogā nei faamatalaga uma i aso nei.—Roma 15:4.

5. Pe na tausisi Ieova e na o le gagana Eperu e tatau ona faaaogā e ona tagata? Faamatala.

5 E leʻi tausisi Ieova e na o le gagana Eperu e fesootaʻi ai ma tagata, ina ua suia tulaga o mea. Na tautatala nisi tagata o le Atua i le gagana Arama, ina ua faasaʻoloto mai i Papelonia. O le māfuaaga lea na faagaee ai e Ieova perofeta o Tanielu, Ieremia ma le faitaulaga o Esera e tusia mea na ia faailoa mai, e faaaogā ai le gagana Arama.—Tagaʻi i le faaopoopoga i le Tanielu 2:4; ma faaopoopoga i le Esera 4:8; 7:12 ma le Ieremia 10:11 i le toe teuteuga o le Faaliliuga a le Lalolagi Fou i le gagana Peretania.

6. Na faapefea ona maua le Afioga a le Atua i isi gagana e ese mai i le gagana Eperu?

6 Mulimuli ane, na faatoʻilalo e Alesana le Sili le tele o atunuu, ma na avea ai le gagana taatele a Eleni o le Koine ma gagana faavaomalo. Na amata ona tautatala tagata Iutaia i lenā gagana, lea na iʻu ai ina faaliliu Tusitusiga Eperu i le gagana Eleni. O lenei faaliliuga atonu na faia e tagata faaliliu e toʻa 72, lea na taʻua o le Septuagint. O le uluaʻi faaliliuga lea o le Tusi Paia ma o se tasi lea o faaliliuga e sili ona tāua. * O galuega a le toʻatele o tagata faaliliu ua maua ai auala eseese e faaliliu ai. O nisi na faaliliu i le upu i le upu, ae ese auala na faaliliu ai isi. E ui i lea, na vāai tagata Iutaia e tautatala i le gagana Eleni ma tagata Kerisiano i le Septuagint o le Afioga lea a le Atua.

7. O le ā le gagana atonu na aʻoaʻo ai e Iesu ona soo?

7 A o iai le Alo ulumatua o le Atua i le lalolagi, atonu na ia talanoa ma aʻoaʻo atu i le gagana Eperu. (Ioa. 19:20; 20:16; Galu. 26:14) I le uluaʻi senituri, na aafia le gagana Eperu i le gagana Arama, o lea atonu na faaaogā ai e Iesu nisi o faaupuga Arama. Peitaʻi, na silafia foʻi e Iesu tusitusiga a Mose ma isi perofeta i le gagana Eperu anamua, lea na faitauina i vaiaso taʻitasi i sunako. (Luka 4:17-19; 24:44, 45; Galu. 15:21) Sa tautatala foʻi tagata i le gagana Eleni ma le gagana Latina i Isaraelu. Ae e leai se faamatalaga i le Tusi Paia na tautala Iesu i na gagana.

8, 9. (a) Aiseā na tusia ai nisi tusi o le Tusi Paia i le gagana Eleni? (e) O le ā ua faailoa mai ai e faatatau iā Ieova?

8 Na tautatala uluaʻi soo o Iesu i le gagana Eperu, ae na amata ona latou tautatala i isi gagana ina ua mavae lona maliu. (Faitau le Galuega 6:1.) A o salalau atu le faa-Kerisiano, sa tele lava ina fesootaʻi Kerisiano i le gagana Eleni. O tusi a Evagelia o Mataio, Mareko, Luka ma Ioane, lea o loo faamaumauina ai aʻoaʻoga ma gaoioiga a  Iesu, sa tele ina tufatufaina i le gagana Eleni. O lea, sa tautatala le toʻatele o soo i le gagana Eleni nai lo o le gagana Eperu. * O tusi a le aposetolo o Paulo ma isi tusi faagaeeina, sa tufatufaina foʻi i le gagana Eleni.

9 O tusitala o Tusitusiga Paia Eleni, sa latou siiina mai vaega o Tusitusiga Eperu, ma e masani ona latou faaaogāina le Septuagint. O nei mau sii, e iai taimi e ese mai ai i upu saʻo i le gagana Eperu, ae ua avea nei ma vaega o Tusitusiga Paia. O lea, ua avea nei galuega a tagata faaliliu lē lelei atoatoa ma vaega o le Afioga faagaeeina a le Atua, o se Atua e lē faaituʻau i se aganuu po o se gagana se tasi.—Faitau le Galuega 10:34.

10. O le ā ua tatou iloaina e faatatau iā Ieova?

10 O se autaluga puupuu o fesootaʻiga a le Atua ma tagata, ua tatou iloa ai e fetuunaʻi e Ieova le auala e fesootaʻi mai ai e fua i manaʻoga ma tulaga o mea. E lē maumauaʻi o ia e tatou te aʻoaʻoina se gagana patino ina ia tatou iloaina ai o ia ma lona finagalo. (Faitau le Sakaria 8:23; Faaaliga 7:9, 10.) Na faagaeeina e Ieova tusitala o le Tusi Paia, ma na ia faatagaina i latou e tusia i auala eseese.

FAASAOINA LE FEʻAU A LE ATUA

11. Aiseā e leʻi faafaigatā ai fesootaʻiga a le Atua ma tagata ona o le eseese o gagana?

11 Po ua faafaigatā fesootaʻiga a le Atua ma tagata ona o le eseese o gagana ma faaliliuga? E leai. O se faaaʻoaʻoga, atonu e na o ni nai upu o le gagana sa tautala ai Iesu ua tatou malamalama i ai. (Mata. 27:46; Mare. 5:41; 7:34; 14:36) Peitaʻi, na faamautinoa e Ieova e faaliliuina le feʻau a Iesu i le gagana Eleni, faapea ma isi gagana. Mulimuli ane, na toe faia e tagata Iutaia ma Kerisiano kopi o manusikulipi o le Tusi Paia, ma faasaoina ai tusitusiga paia. Na faaliliuina foʻi i le tele o isi gagana. Na soifua John Chrysostom i le senituri lona fā/lima T.A., ma na ia faapea mai, e oo ane i ona aso ua faaliliuina aʻoaʻoga a Iesu i gagana a tagata Suria, Aikupito, Initia, Peresia, Aitiope ma isi ituaiga o tagata.

12. O ā taumafaiga na fai ina ia taofia ai le faaliliuina o le Tusi Paia?

12 O le lomiaina o le Tusi Paia i le tele o gagana, na faalēaogāina ai taumafaiga a tagata e pei o le Emeperoa Roma o Diocletian, lea na ia faatonuina le faatamaʻiaina o Tusitusiga Paia uma i le 303 T.A. Sa anoanoaʻi taumafaiga e taofia le faaliliuina ma le tufatufaina atu o le Afioga a le Atua. I le senituri lona 16, na fuafua ai Viliamu Tiniteli e faaliliuina le Tusi Paia mai i le gagana  Eperu ma le gagana Eleni agaʻi i le gagana Peretania, ma na ia faapea atu i se tagata atamai: “Pe a faasaoina e le Atua loʻu ola, o le a ou uunaʻia se tama o loo faaaogāina le suōtosina ina ia iloa mea e sili ona tele e uiga i le Tusi Paia nai lo o oe.” Na sola ese o ia mai i Egelani ma agaʻi atu i Europa ina ia faaliliu ma lomia lana faaliliuga. E ui i taumafaiga a taʻitaʻi lotu e susunu i luma o tagata Tusi Paia uma na latou maua, ae na matuā salalau atu lava kopi o lana faaliliuga. Mulimuli ane, na faalataina Tiniteli ma susunuolaina o ia. Peitaʻi, na faasaoina pea lana faaliliuga o le Tusi Paia, lea na matuā fesoasoani i le faaliliuina o le Tusi Paia o le King James Version.Faitau le 2 Timoteo 2:9.

13. O le ā ua faamaonia mai i le suʻesuʻeina o manusikulipi anamua?

13 E iai nisi kopi anamua o le Tusi Paia o loo iai ni mea sesē po o ni eseesega lāiti. Peitaʻi, e faitau afe vaega, manusikulipi ma faaliliuga anamua na suʻesuʻeina ma faatusatusa e faitofā o le Tusi Paia. O nei suʻesuʻega na faamaonia ai le saʻo o le tele o mau o le Tusi Paia. O nisi o nai fuaiupu e leʻi mautinoa lelei, ae e lē suia ai le feʻau atoa. O le suʻesuʻeina o manusikulipi anamua, ua mautinoa ai e tagata aʻoga faamaoni o le Tusi Paia ua latou mauaina afioga na faagaeeina e Ieova tusitala o le Tusi Paia e tusia i le amataga.—Isa. 40:8. *

14. O le ā le tele ua mafai ona maua ai le Tusi Paia?

14 E ui i osofaʻiga malolosi a tagata tetee, ae na faamautinoa e Ieova o le a avea lana Afioga ma tusi e sili atu ona tele lona faaliliuina i le talafaasolopito o tagata. E ui lava ina lē faatuatua le toʻatele i le Atua i nei aso, ae ua sili lava le tufatufaina o le Tusi Paia, lea ua mafai ona maua i le tusi atoa po o vaega foʻi i le silia ma le 2,800 gagana. E leai se isi tusi e latalata atu i le Tusi Paia i le tele o kopi ua tufatufaina ma maua e tagata. E iai isi faaliliuga o le Tusi Paia e sili atu ona manino ma maufaatuatuaina nai lo o isi faaliliuga. E ui i lea, e toetoe o faaliliuga uma e mafai ona aʻoaʻoina ai le feʻau faigofie i le Tusi Paia e faatatau i le faamoemoe ma le faaolataga.

MANAʻOMIA SE FAALILIUGA FOU

15. (a) Ua faapefea ona foʻia ni faafitauli i gagana i aso nei? (e) Ua faapefea ona faamaonia le aogā o le gagana Peretania mo le tufatufaina o meaʻai faaleagaga?

15 I le amataga o le senituri ua mavae, na tofia ai se vaega toʻaitiiti o tagata aʻoga filigā o le Tusi Paia e avea ma “pologa  faamaoni ma le faautauta,” ma na tele ina fesootaʻi ma le “ʻaufaigaluega” i le gagana Peretania. (Mata. 24:45) Ua taumafai malosi lenā “pologa” ina ia tufatufaina meaʻai faaleagaga i le tele o gagana, ma ua mafai ona maua nei i le silia i le 700 gagana. E pei o le gagana Eleni i le uluaʻi senituri, ua aogā le gagana Peretania mo le faaliliuga ona ua tele ina faaaogā i faiga faapisinisi ma aʻoaʻoga.

16, 17. (a) O le ā na manaʻomia e tagata o le Atua? (e) Na faapefea ona faamalieina lenā manaʻoga? (i) O le ā le fuafuaga o le Faaliliuga a le Lalolagi Fou na faailoa mai i le 1950?

16 O le Tusi Paia o le faavae mo meaʻai faaleagaga. I le ogatotonu o le senituri lona 20, o le lomiga i le 1611 o le King James Version i le faa-Peretania sa tele ina faaaogāina. Peitaʻi, sa matuā maotua le gagana sa faaliliu ai. E lē tele ni taimi na faaaogāina ai le suafa o le Atua, pe a faatusatusa i le faitau afe o taimi o loo iai le suafa o le Atua i manusikulipi anamua o le Tusi Paia. Sa iai ni mea sesē i le faaliliuga o le King James Version, ma sa iai foʻi ni fuaiupu e lē o iai i manusikulipi maufaatuatuaina mai anamua. E faapena foʻi faalētonu sa iai i nisi o faaliliuga o le Tusi Paia i le gagana Peretania.

17 Sa manaʻomia se Tusi Paia e saʻo lelei ona faaliliuina i le gagana faaonapōnei. Na faavaeina le Komiti o le Tusi Paia o le Lalolagi Fou, ma e mai i le 1950-1960 na tatalaina ai a latou faaliliuga i lomiga e ono. Iā Aokuso 2, 1950 ina ua tatala le uluaʻi lomiga i se tauaofiaga, na faapea atu ai le uso o N. H. Knorr i le aofia: “Ua matuā manaʻomia lava se faaliliuga i le gagana faaonapōnei, e ōgatusa ma upu moni ua faailoa mai, ma avea ma faavae o le aʻoaʻoina o isi upu moni e tusa ai ma le malamalamaga saʻo o uluaʻi tusitusiga; o se faaliliuga e malamalama ai le ʻaufaitau i aso nei, e pei lava o uluaʻi tusitusiga a soo o Keriso ia na faigofie ona malamalama ai tagata faatauvaa ma tagata lautele i na aso.” Na ia faailoa mai le fuafuaga o lenei faaliliuga, ina ia mafai ona maua ai e le faitau miliona o tagata le fesoasoani faaleagaga.

18. O ā filifiliga na fai ina ia faatelevave ai le faaliliuina o le Tusi Paia?

18 Na faataunuuina lenā fuafuaga i se auala mataʻina i le 1963, ina ua tatalaina le Tusi Paia o le Lalolagi Fou o Tusitusiga Eleni i le gagana Italia, Falani, Potukali, Sepania, Siamani, ma le gagana Holani. I le 1989 na faavae ai e le Vaega Pule se matagaluega i le ofisa ulu e gafa ma le faaliliuina o le Tusi Paia. Ae i le 2005, na ave ai le faamuamua i le faaliliuina o le Tusi Paia i gagana o loo lomia ai lenei mekasini. O le iʻuga, ua maua nei i le tusi atoa po o vaega le Faaliliuga a le Lalolagi Fou i le silia i le 130 gagana.

19. O le ā se mea mataʻina na tupu i le 2013, ma o le ā o le a iloiloina i le mataupu o loo mulimuli mai?

19 A o faagasolo taimi, na iloa ai le manaʻomia ona toe teuteu le Faaliliuga a le Lalolagi Fou i le gagana Peretania, ina ia ōgatusa ma le gagana Peretania i aso nei. I le faaiʻuga o le vaiaso o Oketopa 5 ma le 6 i le 2013, na auai ma faalogologo ai le aofia e 1,413,676 mai i atunuu e 31 i le fono faaletausaga lona 129 a le Watch Tower Bible and Tract Society of Pennsylvania. Na faagaeetia le toʻatele ina ua faasilasila mai e se sui o le Vaega Pule le tatalaina o le toe teuteuina o le Faaliliuga a le Lalolagi Fou i le gagana Peretania. Na maligi loimata o le toʻatele ina ua latou maua kopi o lenei faaliliuga. A o faitauina nisi o fuaiupu mai i lenei faaliliuga, na iloa ai e le aofia ua matuā sili ona manino le Afioga a le Atua i le gagana Peretania. O le mataupu o loo mulimuli mai o le a iloiloina ai nisi vala o lenei toe teuteuga, faapea lona faaliliuina i nisi o gagana.

^ pala. 6 O le Septuagint o lona uiga o le “Fitu Sefulu.” Na amata ona faia lenei faaliliuga i Aikupito i le senituri lona tolu T.L.M., ae atonu na faamāeʻaina i le 150 T.L.M. O loo tāua lava lenei faaliliuga, ona ua fesoasoani i faitofā ia malamalama i nisi upu ma faaupuga maotua i le gagana Eperu.

^ pala. 8 E manatu nisi na tusia e Mataio lana Evagelia i le gagana Eperu, ma atonu na ia toe faaliliuina i le gagana Eleni.

^ pala. 13 Tagaʻi i le Faaopoopoga A3 i le lomiga ua toe teuteuina o le Faaliliuga a le Lalolagi Fou i le gagana Peretania; ma le mataupu “Le Faasaoina Mataʻina o le Tusi Paia” i Le Olomatamata o Novema 1, 2009.