Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

LE OLOMATAMATA (LOMIGA MO SU‘ESU‘EGA) TESEMA 2015

 TALAAGA O LE SOIFUAGA

Ua Ou Maua se Faiā Lelei ma le Atua ma Loʻu Tinā

Ua Ou Maua se Faiā Lelei ma le Atua ma Loʻu Tinā

NA FESILI mai loʻu tinā: “Aiseā ua e lē toe tapuaʻi ai i ou tuaa? E te lē iloa ana leai i latou e te lē maua le ola na e te ola ai? Pe e te lē talisapaia i latou? E faapefea ona e lafoaʻia tū ma aga ua tatou masani ai? O lou musu e faamamaluina o tatou tuaa ua e faapea mai ai e sesē la tatou tapuaʻiga.” Na uma loa tagi masūsū ma loʻu tinā.

E lē masani ona talanoa faapea loʻu tinā. E leʻi fia suʻesuʻe o ia i le Tusi Paia, ae na ia faatulaga le faia o laʻu suʻesuʻega. Ou te usitaʻi lava iā te ia, ae ua faigatā nei ona ou mulimuli i lana taʻitaʻiga. Ae o le taimi lenei e tatau ona ou faafiafiaina le finagalo o Ieova. E leʻi faigofie, ae na aumaia e Ieova iā te aʻu le malosi e faia ai faapea.

AVEA MA KERISIANO

E matou te lolotu Puta e pei o le toʻatele o isi tagata Iapani. E na o le lua masina sa matou suʻesuʻe ai ma Molimau a Ieova, ae faatalitonuina aʻu i le moni o le Tusi Paia. O le iloaina e iai loʻu Tamā o i le lagi, na ou naunau ai e iloa o ia. Na ma fiafia ma loʻu tinā e talanoaina mea ua ou aʻoaʻoina. Na amata ona ou auai i sauniga i Aso Sa i le Maota o le Malo. A o faatuputeleina loʻu poto i le upu moni, na ou fai i loʻu tinā ou te lē toe auai i le lotu Puta. Na suia faafuaseʻi lava ona uiga. Na ia faapea mai: “O le luma o se aiga le iai o se tasi e lē alofa i tuaa.” Na faatonuina aʻu e aua neʻi toe faia laʻu suʻesuʻega ma auai i sauniga! Ou te leʻi mafaufauina e fai mai faapea loʻu tinā iā te aʻu! Na matuā sui lava o ia.

Na ou aʻoaʻoina mai i le Efeso mataupu e 6, e finagalo Ieova ou te usiusitaʻi i oʻu mātua. Na ʻau loʻu tamā i loʻu tinā. I le taimi muamua, na ou manatu ai afai ou te usiusitaʻi iā i laʻua, o le a la faalogo mai iā te aʻu ma o le a toe filemu ai lo matou aiga. I lenā taimi, sa tatau ona ou sauni mo suʻega a le aʻoga. Na ou ioe e fai le mea o loo la mananaʻo ai mo le tolu masina, ae na ou folafola atu iā Ieova ou te toe auai i sauniga pe a uma lenā taimi.

E lua itu na lē lelei ai laʻu filifiliga. Muamua, na ou manatu e lē suia oʻu lagona i le tolu masina. Ae na vave lava ona ou matelāina faaleagaga, ma amata ai ona ou tau mamao ese ma Ieova. Lona lua, na atili ai ona faasāsā aʻu e oʻu mātua mai i le auai i le tapuaʻiga moni.

 FESOASONI MA TETEEGA

Na ou feiloaʻi i le toʻatele i le Maota o le Malo o ē na oo iai teteega mai i aiga. Na latou faamautinoa mai iā te aʻu o le a faamalosia aʻu e Ieova. (Mata. 10:34-37) Na latou faamatala mai iā te aʻu, afai ou te tumau faamaoni iā Ieova, o le a mafai ai ona aʻoaʻoina loʻu aiga e uiga iā te ia. O lea, na ou tatalo faatauanau ai, ma ou manaʻo ai e faalagolago iā Ieova.

Na auala eseese mai omiga i loʻu aiga. Na ʻaiʻoi mai loʻu tinā e taofi laʻu suʻesuʻega ma taumafai e sui loʻu mafaufau. E masani lava ona ou lē tautala. Ae pe a ou talanoa atu, e masani lava ona ma finau, talu ai e ma te taumafai uma e faamaonia atu e ma te saʻo. Pe ana fai ou te faaaloalo i faalogona ma talitonuga a loʻu tinā semanū o le a toʻafilemu ai mea. Na tuu mai e oʻu mātua le tele o feʻau ou te faia ina ia ou lē alu ese ai ma le fale. Ae i nisi taimi, e loka ai aʻu i fafo o le fale po o le lē tuua foʻi o saʻu meaʻai.

Na talosaga atu loʻu tinā i isi mo se fesoasoani. Na talanoa atu o ia i loʻu faiaʻoga ae e leʻi taulau manuia. Na ave aʻu e loʻu tinā i le pule o lana galuega, ina ia faatalitonu aʻu e lē aogā uma tapuaʻiga. Na telefoni atu foʻi o ia i o matou aiga ma tagi ma ʻaiʻoi i ai mo se fesoasoani. Na ou matuā lē fiafia ai lava. Peitaʻi i sauniga na faalaeiau ai aʻu e toeaina e mafaufau o tagata uma na loo talaʻi atu i ai loʻu tinā.

O le isi luʻi na ou fesagaʻia o le aʻoga lea i le iunivesite. Na mananaʻo oʻu mātua ina ia ou maua se olaga sili ona lelei. Sa la faamoemoe e maua saʻu galuega lelei. E faigatā tele ona lelei sa matou talanoaga e faatatau i lea  mataupu, o lea na ou tusia ai ni tusi i oʻu mātua e faamatala i ai oʻu sini. Na matuā ita loʻu tamā ma taufaamataʻu mai: “Afai e te manatu e maua sau galuega, ia oo atu taeao ua maua, a leai alu ese ma le aiga lenei.” Na ou tuu atu le mataupu iā Ieova e ala i le tatalo. I le aso na sosoo ai i le faiva, na ofo mai e ni tuafāfine se toʻalua ni galuega o le faia lea o aʻoga a la fanau. Peitaʻi, e leʻi fiafia ai loʻu tamā ma lē toe tautala mai ai, ma amata ona ia ʻalofia aʻu. Na faapea mai loʻu tinā e sili iā te ia le avea o aʻu ma se tagata solitulafono, nai lo le avea ma se Molimau a Ieova.

Na fesoasoani mai Ieova iā te aʻu e faasaʻo oʻu manatu ma iloa le mea e tatau ona fai

O nisi taimi, ou te tau tomānatu ai pe finagalo Ieova iā te aʻu e teena le manaʻo o oʻu mātua. O lea, na ou tatalo ai iā Ieova ma mafaufau loloto i mea ua fai mai ai le Tusi Paia e faatatau i lona alofa. Na fesoasoani lea iā te aʻu ina ia saʻo ai pea le vaai ma malamalama ai i le māfuaaga e tetee mai ai oʻu mātua, ona e la te alolofa iā te aʻu. Na fesoasoani mai Ieova iā te aʻu e faasaʻo oʻu manatu ma iloa le mea e tatau ona fai. O le tele o loʻu auai i le faiva, o le tele foʻi lenā o loʻu olioli. Na avea le paeonia ma oʻu sini.

AVEA MA PAEONIA

Na iloa e nisi tuafāfine ou te fia paeonia, o lea na latou fautua mai ai, e lelei ona faatali seʻi sologa lelei mea ma oʻu mātua. Na ou tatalo mo le poto, faia ni saʻiliʻiliga, iloilo māfuaaga ou te fia paeonia ai, ma ou talanoa atu i uso ma tuafāfine taʻumatuaina. Na fai laʻu filifiliga ou te manaʻo e faafiafia Ieova. Afai e tolopō laʻu paeonia, e lē faapea ai o le a suia ai mafaufau o oʻu mātua.

Na amata laʻu paeonia a o faagasolo loʻu tausaga mulimuli i le aʻoga maualuga. Ina ua mavae sina taimi o oʻu paeonia, na ou manaʻo ai ou te auauna i le mea o loo telē ai le manaʻoga. Peitaʻi e leʻi mananaʻo oʻu mātua ou te tuua lo matou aiga. Na ou faatali seʻi atoa le 20 o oʻu tausaga. Na ou talosaga atu i le ofisa o le lālā mo se tofiga i Iapani i saute i le mea o loo iai o matou aiga, ina ia aua ai neʻi popole loʻu tinā.

A o oʻu iai i lenā tofiga, na faamanuiaina aʻu e vaai atu ua papatiso le toʻatele na matou suʻesuʻe. Na amata ona ou aʻoaʻoina le gagana Peretania ona ou te manaʻo e faalautele atu laʻu auaunaga. E toʻalua uso paeonia faapito sa iai i le faapotopotoga lenā. Na ou mātauina lo laʻua maelega ma le auala na la fesoasoani ai i isi. O lea, na avea ai le paeonia faapito ma oʻu sini. A o faagasolo na taimi, e faalua ona maʻi tigāina loʻu tinā. Na ou toe foʻi i lo matou aiga ina ia tausia o ia. Na faateʻia o ia ma amata ona fai ifo ona uiga tetee sa iai.

SOSOO MAI FAAMANUIAGA

Ina ua mavae le fitu tausaga, na ou maua se tusi mai iā Atsushi, o se tasi o uso paeonia faapito ia na ou taʻua muamua. Na fia faaipoipo o ia ma sa ia taumānatu po ou te fiafia iā te ia. E leʻi iai lava ni oʻu faalogona fetosinaaʻi iā Atsushi, ma ou te manatu e faapena foʻi o ia. Ina ua mavae le masina, na ou tali atu i ai ou te manaʻo e fia faamasani atili iā te ia. Na ma iloaina e tele mea e ma te fiafia faatasi ai, e ma te mananaʻo uma e auai i le faiva faataimi atoa ma lotomalilie e talia so o se tofiga. Na ma faaipoipo mulimuli ane. Maʻeu loʻu fiafia ona sa iai oʻu mātua ma isi o lo matou aiga i la maʻua faaipoipoga!

Nepale

E leʻi umi talu ona ma auauna o ni paeonia sauatoa, ae tofia loa Atsushi o se ovasia suitulaga o le matagaluega. E leʻi uma foʻi ae toe maua isi faamanuiaga. Na tofia i maʻua o ni paeonia faapito, ona sosoo ai lea ma le galuega  femalagaaʻi. Ina ua uma ona ma asia faapotopotoga uma o la maʻua matagaluega mo le taimi muamua, na vili mai le ofisa o le lālā iā i maʻua. Na latou fesili mai, ʻPe e te lua taliaina le tofiga o le galuega femalagaaʻi i Nepale?’

O le auauna i isi atunuu ua tele mea ua ou aʻoaʻoina ai e faatatau iā Ieova

Na ou popole po o le ā se manatu o oʻu mātua e faatatau i loʻu alu ese mamao. O lea, na ou telefoni atu ai iā i laʻua. Na tali mai e loʻu tamā le telefoni, ma na ia faapea mai: “O le a lua ō i se nofoaga matagofie.” O le vaiaso na muamua atu, na avatu ai e sana uō iā te ia se tusi e faatatau iā Nepale, ma na mafaufau Tamā atonu o se nofoaga manaia lea e asiasi i ai.

A o ma auauna ma le fiafia faatasi ma uso i Nepale, ae toe maua mai foʻi se isi faamanuiaga. O le a aofia i la maʻua matagaluega ia Bangladesh, o se nofoaga e latalata i Nepale, ae e tele vala e eseese ai. E eseese ituaiga tagata matou te feiloaʻi i ai i le faiva i le fanua. Ina ua mavae le lima tausaga, na toe tofia i maʻua i Iapani, ma o loo ma olioli ai nei i le galuega femalagaaʻi.

O le auauna ai i Iapani, Nepale ma Bangladesh, ua tele mea ua ou aʻoaʻoina ai e faatatau iā Ieova. E eseese uma tū ma aga a nei atunuu, ma e eseese uma foʻi tagata ma o latou uiga ma talaaga. Ae na ou iloa le auala ua tausia ma faamanuia ai e Ieova tagata taʻitoʻatasi.

Na faamanuia Ieova iā te aʻu e ala i le mauaina o le poto e faatatau iā te ia, o se galuega faamalieloto, ma se tane lelei. Na taʻitaʻia aʻu e le Atua e faia filifiliga saʻo, ma o lea ua ou maua se faiā lelei ma ia ma loʻu aiga. Ou te faafetai iā Ieova ona ua toe māfana la maʻua faiā ma loʻu tinā. Ou te matuā talisapaia le mauaina o se faiā lelei ma le Atua faapea ma loʻu tinā.

O loo ma olioli nei i le galuega femalagaaʻi