Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

LE OLOMATAMATA (LOMIGA MO SU‘ESU‘EGA) NOVEMA 2015

Fesili Mai le ʻAufaitau

Fesili Mai le ʻAufaitau

O ā faamaoniga e iloa ai e puupuu le taimi na osofaʻia ai Ieriko?

E tusa ai ma le Iosua 6:10-15, 20, na faatasi i le aso ona savavali faataamilo fitafita a Isaraelu i le aai o Ieriko mo aso e ono. Ae i le aso lona fitu, sa faafitu ona latou savavali faataamilo i le aai, ona soloia lea i lalo e le Atua pā malolosi o le aai o Ieriko ma osofaʻia ai loa e Isaraelu. Pe na maua e tagata suʻesuʻe ni faamaoniga e iloa ai e puupuu le taimi na osofaʻia ai le aai o Ieriko e pei ona faamatalaina e le Tusi Paia?

I aso anamua, e masani ona siʻomia e se ʻautau pā o se aai pe a sauni e osofaʻia. Pe afai e umi ona siʻosiʻomia le aai, ona faaaogā lea e tagata o le aai meaʻai sa teuina. Ae pe a osofaʻia e le ʻautau le aai, ona latou aveina lea o mea uma e mananaʻo i ai, e aofia ai ma meaʻai na totoe. O le māfuaaga lenā e leʻi tele ai ni meaʻai na maua e tagata suʻesuʻe i aai o Palesitina na osofaʻia. Peitaʻi, e ese mai ai Ieriko. Ua taʻua i le tusi Biblical Archaeology Review: “E ese mai i toega o ele, o mea sa tele ina maua o saito, ma e mataʻina le maua o le tele o saito.”

E tusa ai ma faamatalaga a le Tusi Paia, e leʻi aveesea e Isaraelu ni meaʻai mai i Ieriko, ona sa faasāina e Ieova. (Iosua 6:17, 18) E lē gata i lea, na osofaʻia e Isaraelu le aai o Ieriko i le tau e totogo ai mea, ina ua faatoʻa māeʻa le vaitau o le seleselega lea na tele ai saito e teuina i le aai. (Iosua 3:15-17; 5:10) Sa tele saito i le aai o Ieriko, ona sa puupuu le osofaʻiga e pei ona faamatalaina i le Tusi Paia.