Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

LE OLOMATAMATA (LOMIGA MO SU‘ESU‘EGA) NOVEMA 2015

O Ieova o le Atua Alofa

O Ieova o le Atua Alofa

“O le Atua o le alofa lava ia.”—1 IOA. 4:8, 16.

PESE: 18, 91

1. O le ā le uiga autū o le Atua, ma o ā ni ou faalogona ona o le iloaina o lea mea?

UA FAAPEA mai le Tusi Paia “o le Atua o le alofa lava ia.” E lē o tau ina faapea mai o le alofa o se tasi o ona uiga matagofie, peitaʻi “o le Atua o le alofa lava ia.” (1 Ioa. 4:8) O le alofa o lona uiga autū lea, ma o ia o le faaaʻoaʻoga silisili o le alofa. Maʻeu le mataʻina o lo tatou iloaina, o se Atua alofa na foafoaina le vateatea aoao ma meafaiola uma! Ua taʻitaʻia ana gaoioiga uma e fai i lea uiga.

2. O le ā ua tatou mautinoa i ai ona o le alofa o le Atua? (Tagaʻi i le ata i luga aʻe o le matua.)

2 O faalogona māfana o le Atua i ana foafoaga, ua faamautinoa mai ai o le a faataunuuina i se auala silisili lona finagalo mo le fanau a tagata. O le a tatou maua uma ai aogā i lalo o lana pulega. O se faaaʻoaʻoga, ona o le alofa o Ieova, “ua ia tofia le aso e faamasinoina ai le lalolagi uma i le amiotonu, e le tagata ua ia tofia” o Iesu Keriso. (Galu. 17:31) E tatou te mautinoa o le a taunuu lenā faamasinoga. O tagata usiusitaʻi  uma, o le a latou maua se lumanaʻi lelei seʻia oo i le faavavau.

MEA UA FAAALIA MAI E LE TALAFAASOLOPITO

3. O le ā faapeʻī le olaga pe ana leai le alofa o le Atua?

3 Seʻi mafaufau i le leaga o le tulaga o le lalolagi pe ana lē alofa mai le Atua i le fanau a tagata! Ua tatou vāaitino i le malapagā o pulega faaletagata i lalo o le taʻitaʻiga a lo latou atua lē alofa ma lotoa o Satani le Tiapolo. (2 Kori. 4:4; 1 Ioa. 5:19; faitau le Faaaliga 12:9, 12.) Ua faaalia mai ai le tulaga leaga o le lumanaʻi, pe ana lē seanoa le alofa o le Atua.

4. Aiseā na faataga ai e le Atua ē na fouvale e tetee i lana pule?

4 I le taimi na fouvale ai le Tiapolo i le pule a le Atua, na ia taaʻina foʻi le uluaʻi ulugalii e faia faapea. Sa ia luʻia le aiā a le Atua e pule ai, ma le tonu o lana pule silisili ese. Na faapea mai Satani e sili atu lana pule nai lo o Lē na foafoaina mea. (Kene. 3:1-5) Na faataga e le Atua Satani e faamaonia lana tuuaʻiga mo se vaitaimi lē tumau. O le atamai o le Atua, ua ia faataga ai se taimi e faamaonia mai ai e sili atu lana pule. O le tulaga malapagā o le talafaasolopito o le tagata, ua faailoa mai ai e lē mafai e le tagata po o Satani ona saunia mai se pulega lelei.

5. O le ā ua faailoa manino mai e le talafaasolopito o tagata?

5 I le 100 tausaga ua mavae, ua silia i le 100 miliona tagata ua fasiotia i taua a atunuu. I aso nei, ua sili atu ona faateteleina le leaga o le lalolagi. O le mea lenā na faailoa mai e le Tusi Paia o le a tupu i “aso e gata ai” o lenei faiga o mea, “o tagata amioleaga ma ē taufaasesē, e faateteleina pea lo latou leaga.” (2 Timo. 3:1, 13) Ua faailoa manino mai e le talafaasolopito le moni o le faamatalaga lenei a le Tusi Paia: “Ieova e, ua ou iloa lelei, e lē o i le tagata lona ala. E lē o i le tagata foʻi e savali, ona faatonuina le mea e ui ai o ia.” (Iere. 10:23) Ioe, e leʻi foafoaina e Ieova le tagata ma le tomai po o le aiā e pulea ai lava i latou e aunoa ma Lana taʻitaʻiga.

6. Aiseā ua faataga ai e le Atua le amioleaga?

6 E ese mai i le faailoaina mai o le tulaga malapagā o pulega a tagata, e iai se isi fuafuaga ua faataga ai e le Atua le amioleaga mo se taimi lē tumau. Ua aumaia ai foʻi se faamaoniga mausalī, e na o le pule a le Atua e mafai ona taulau manuia. Pe a māeʻa ona faaumatia e le Atua ē amioleaga uma, ma pe a toe iai se tasi e tetee i le pulega alofa a Ieova, o le a lē toe manaʻomia ona faataga e le Atua na fouvalega. E mafai ona ia faaaogāina mea na tutupu i le talafaasolopito o tagata e avea ma māfuaaga e vave ona faaumatia ai so o se tasi e toe tetee, ma tafiesea ai le amioleaga.

UA FAAILOA MAI LE ALOFA O LE ATUA

7, 8. O ā nisi o auala ua faailoa mai ai le alofa silisili o Ieova?

7 Ua faailoa mai le alofa silisili o Ieova i le tele o auala. O se faaaʻoaʻoga, seʻi mafaufau i le ofoofogia o le vateatea. E faitau piliona aniva, ia e iai i totonu le faitau piliona o fetu ma paneta. I lo tatou aniva o le Milky Way, o se tasi o fetu o loo iai i totonu o le lā, lea e mafai ona maua ai e le anoanoaʻi o meafaiola i le lalolagi le ola. O nei foafoaga uma ua faamaonia ai o Ieova o Lē na foafoaina mea, ma ua faailoa mai ai ona uiga e pei o le atamai, alofa, ma lona mana. O lea, o “uiga lē  vaaia” o le Atua, “ua vaaia lava ia talu ona foafoaina le lalolagi, ona ua mafai ona vaaia i mea na faia, e oo foʻi i lona mana e faavavau ma lona tulaga o le Atua.”—Roma 1:20.

8 Na foafoaina e le Atua le lalolagi ina ia maua ai le ola, ma maua ai e meafaiola uma aogā. Na foafoaina e le Atua se parataiso matagofie mo tagata, ma foaʻiina mai i tagata ni mafaufau ma tino lelei atoatoa e mafai ona ola ai e faavavau. (Faitau le Faaaliga 4:11.) E lē gata i lea, ua ia “foaʻiina atu meaʻai i mea ola uma, auā e faavavau lava lona alofa faamaoni.”—Sala. 136:25.

9. O ā faalogona o Ieova e faatatau i le amioleaga?

9 Ua faailoa mai e Ieova o ia o se Atua alofa, ma e ʻinoʻino foʻi o ia i le leaga. O se faaaʻoaʻoga, ua faapea mai le Salamo 5:4-6: ʻE lē o oe o se Atua e fiafia i le amioleaga. Ua e ʻinoʻino foʻi iā i latou uma e faia mea e tigā ai.’ Ua faapea atili mai: “E inosia e Ieova le tagata e faamasaatoto ma taufaasesē.”

UA LATA MAI LE IʻUGA O Ē AMIOLEAGA

10, 11. (a) O le ā o le a tupu i ē amioleaga? (e) O le a faapefea ona tauia e Ieova tagata usiusitaʻi?

10 Talu ai o Ieova o se Atua alofa ma e ʻinoʻino i le amioleaga, o lea ua ia fuafua ai e tafiesea ē amioleaga mai i le lalolagi ma le vateatea aoao. Ua folafola mai i lana Afioga: ʻE faaumatia o ē e fai mea leaga, a o ē e faamoemoe iā Ieova, o i latou ia e fai mo i latou le lalolagi. Ua toeitiiti lava ona lē toe iai lea o le tagata amioleaga. E pei fili o Ieova o le matagofie o laufanua lafulemu, e mavae atu i latou. E mavae atu i latou i le asu.’—Sala. 37:9, 10, 20.

11 Ae i le isi itu, ua folafola mai foʻi i le Afioga a le Atua: “E fai lava le lalolagi mo ē e amiotonu, e nonofo ai pea i latou e oo i le faavavau.” (Sala. 37:29) O na tagata amiotonu o le a ʻmatuā faafiafiaina ona o le tele o le filemu.’ (Sala. 37:11) E faia e Ieova le mea e sili ona lelei mo ana auauna faamaoni. Ua faapea mai le Faaaliga 21:4: “E na te soloiesea foʻi loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā. Auā ua mavae atu mea muamua.” Maʻeu se lumanaʻi matagofie o le a maua e i latou e talisapaia le alofa o Ieova ma usiusitaʻi i lana pule!

12. O ai i latou “ua lē taʻuleagaina”?

12 Ua faapea mai le Tusi Paia: “Ia vaavaai i lē ua lē taʻuleagaina ma ia tulimataʻi pea lē ua amio saʻo, auā o le a filemu le lumanaʻi o lenā tagata. E faaumatia faatasi o ē e solitulafono, e leai foʻi se lumanaʻi o tagata amioleaga.” (Sala. 37:37, 38) O ē “ua lē taʻuleagaina” o le a latou iloaina Ieova ma lona Alo, ma usiusitaʻi i le finagalo o le Atua. (Faitau le Ioane 17:3.) O i latou na ua matuā faatāuaina le 1 Ioane 2:17: “E mavae atu foʻi le lalolagi faapea ma ona tuʻinanauga, a o lē e faia le finagalo o le Atua e tumau e faavavau.” A o lata mai le iʻuga o lenei lalolagi, e tāua tele iā i tatou ona “faamoemoe iā Ieova ma tausi i lona ala.”—Sala. 37:34.

FAAALIGA SILISILI O LE ALOFA O LE ATUA

13. O le ā le faaaliga silisili o le alofa o le Atua mo tagata agasala?

13 E ui e tatou te lē lelei atoatoa, ae e mafai lava ona tatou ʻtausi i ala o Ieova.’ E mafai foʻi ona tatou maua se faiā vavalalata ma Ieova ona o le faaaliga silisili o lona alofa. Ua ia saunia le taulaga togiola  a Iesu Keriso, lea ua maua ai e tagata usiusitaʻi le avanoa e saʻoloto ai mai i le agasala ma le oti tuufaasolo mai iā Atamu. (Faitau le Roma 5:12; 6:23.) Na maufaatuatuaina atoatoa e Ieova lona Alo pele e toʻatasi, o lē na faamaoni iā te ia mo le tele o tausaga i le lagi. I le avea ai o Ieova ma Tamā alofa, e mautinoa sa matuā tigā o ia i faiga lē tonu sa faia i lona Alo a o iai i le lalolagi. Peitaʻi, o le faamaoni o Iesu i le pule silisili ese a le Atua, ua faamaonia mai ai e mafai e le tagata lelei atoatoa ona faamaoni iā Ieova e ui i tulaga e sili ona faigatā.

Na auina mai e le Atua alofa lona Alo i le lalolagi (Tagaʻi i le palakalafa e 13)

14, 15. O le ā na faataunuuina i le maliu o Iesu?

14 Na tumau faamaoni Iesu ma faamaonia le tonu o le pule silisili ese a Ieova e ui i tofotofoga e sili ona faigatā, ma na maliu o ia o se auauna faamaoni a lona Tamā. Maʻeu lo tatou lotofaafetai i le maliu o Iesu, lea na faia ai foʻi le togiola e faasaʻoloto ai tagata ma maua ai le ola e faavavau i le lalolagi fou a le Atua! Na faamatala e Paulo le alofa lenei o Ieova ma Iesu ina ua faapea mai: “Na maliu Keriso i le taimi atofaina mo tagata lē amioatua, a o tatou vaivai pea. E toetoe ina a lē mafai ona oti o se tagata e sui aʻi se tasi e amiotonu, ae atonu e lototele se tasi e oti mo se tagata lelei. A ua faaali mai e le Atua lona lava alofa iā i tatou, auā na maliu Keriso mo i tatou a o tatou agasala  pea.” (Roma 5:6-8) Na tusi le aposetolo o Ioane: “O le mea lenei ua faaalia mai ai le alofa o le Atua iā i tatou, auā na auina mai e le Atua lona Atalii e toʻatasi i le lalolagi, ina ia tatou maua ai le ola e ala iā te ia. O le alofa lava lenei, e lē ona ua tatou alolofa i le Atua, ae ona ua alofa mai o ia iā i tatou ma auina mai lona Alo e fai ma taulaga o le leleiga ma le Atua mo a tatou agasala.”—1 Ioa. 4:9, 10.

15 Na fetalai Iesu e faatatau i le alofa o le Atua i le fanau a tagata: “O le alofa tele o le Atua i le lalolagi [fanau a tagata e mafai ona togiolaina], na ia foaʻi mai ai lona Atalii e toʻatasi, ina ia lē fano tagata uma e faatuatua iā te ia, a ia maua le ola e faavavau.” (Ioa. 3:16) O le alofa silisili o le Atua, na ia faia ai se gaoioiga lelei mo tagata, e ui na matuā tigā ai lava o ia. E faavavau le alofa o le Atua, ma e mafai ona tatou maufaatuatuaina. Na tusi Paulo: “Ua ou mautinoa, e lē mafai e le oti, po o le ola, po o agelu, po o malo, po o mea ua iai nei, po o mea e oo mai, po o ē e malolosi, po o le maualuga, po o le loloto, po o se isi lava foafoaga, ona faateʻaeseina i tatou mai i le alofa o le Atua ua iā Keriso Iesu, lo tatou Alii.”—Roma 8:38, 39.

UA PULE LE MALO O LE ATUA

16. O le ā le Malo faa-Mesia, ma o ai ua tuuina atu ai e Ieova le pulega o le Malo?

16 Ua faamaonia le alofa o le Atua mo le fanau a tagata e ala mai i le faatulagaga o le Malo faa-Mesia. Ua māeʻa ona tuuina atu e le Atua lenei pulega i lona Alo, o lē e alofa i tagata ma ua matuā agavaa e avea ma pule. (Faata. 8:31) I le taimi e toetutū ai le 144,000 o le a latou pule mai ma Iesu i le lagi, ma ua latou malamalama lelei i le olaga faaletagata. (Faaa. 14:1) O le Malo o le mataupu autū lea o aʻoaʻoga a Iesu, ma na ia aʻoaʻoina ona soo e tatalo: “Lo matou Tamā e o i le lagi, ia faapaiaina lou suafa. Ia oo mai lou malo. Ia faia lou finagalo i le lalolagi, e pei ona faia i le lagi.” (Mata. 6:9, 10) Maʻeu ni faamanuiaga o le a maua e tagata usiusitaʻi pe a faataunuuina na tatalo!

17. O le ā le eseesega o le pulega a Iesu ma pulega a tagata agasala?

17 E telē le eseesega o le pulega alofa a Iesu ma pulega faaletagata lea ua fasiotia ai le faitau miliona o tagata i taua. E manatu mamafa Iesu i ona tagatānuu, ma ua faaatagia mai ai uiga tautele o le Atua, aemaise lava le alofa. (Faaa. 7:10, 16, 17) Na fetalai Iesu: “Ia outou ō mai iā te aʻu o outou uma ua tigāina ma mafatia i avega, ona ou faafouina lea o outou. Ia outou amoina laʻu amo ma faaaʻoaʻo mai iā te aʻu, auā o aʻu o lē e agamalu ma lotomaulalo, ona faafouina ai lea o outou. Auā e avegofie laʻu amo, ma e māmā foʻi laʻu avega.” (Mata. 11:28-30) Maʻeu se faamautinoaga alofa mo i tatou!

18. (a) O le ā ua faia e le Malo o le Atua talu mai le taimi na faavaeina ai? (e) O le ā o le a iloiloina i le mataupu o loo sosoo mai?

18 Ua faailoa mai i valoaga a le Tusi Paia, na faavae le Malo o le Atua i le lagi ina ua amata le faatasi mai o Keriso i le 1914. Talu mai lenā taimi, ua aoaoina le vaega totoe o i latou o le a pule faatasi ma Iesu i le lagi, faapea le “motu o tagata e toʻatele,” o ē o le a faasaoina mai i le faaumatiaga o lenei faiga o mea, ma o le a ulu atu i le lalolagi fou. (Faaa. 7:9, 13, 14) O le ā se aofaʻiga o lenā motu o tagata e toʻatele i aso nei? O le ā o loo faatalitalia e le Atua mai iā i latou? O le a iloiloina na fesili i le mataupu o loo sosoo mai.