Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

LE OLOMATAMATA (LOMIGA MO SU‘ESU‘EGA) NOVEMA 2015

Pe E te ‘Alofa i Lou Tuaoi e Pei o Oe Lava iā te Oe’?

Pe E te ‘Alofa i Lou Tuaoi e Pei o Oe Lava iā te Oe’?

“Ia e alofa atu i lou tuaoi e pei o oe lava iā te oe.”—MATA. 22:39.

PESE: 73, 36

1, 2. Ua faapefea ona faaalia i le Tusi Paia le tāua o le alofa?

O LE alofa o le uiga autū lea o Ieova le Atua. (1 Ioa. 4:16) O lana uluaʻi foafoaga o Iesu, lea sa laʻua faatasi mo le faitau piliona o tausaga i le lagi, ma iloa ai le alofa o le Atua. (Kolo. 1:15) I le soifuaga atoa o Iesu, e aofia ai lona soifuaga i le lalolagi, na faailoa mai ai lona malamalama atoatoa i le alofa o Ieova ma faaaʻoaʻo i ai. O lea, e tatou te mautinoa ai o le pulega a Ieova ma Iesu, o le a taʻitaʻia pea e le alofa.

2 Na fesiligia e se tasi tagata Iesu po o le ā le poloaʻiga silisili i le Tulafono, ma na ia tali: “ʻIa e alofa atu iā Ieova lou Atua ma lou lotoatoa, ma lou ola atoa, ma lou mafaufau atoa.’ O le poloaʻiga silisili ma le muamua lenā. E faapena foʻi le poloaʻiga lona lua, ʻIa e alofa atu i lou tuaoi e pei o oe lava iā te oe.’”—Mata. 22:37-39.

3. O ai lou “tuaoi”?

3 Na faamuamua e Iesu le alofa i le Atua ae faatulaga lua le alofa i tuaoi. E faailoa mai ai le tāua o le faaalia o le alofa i a tatou faiā ma isi. Ae o ai lou tuaoi? Pe afai ua e faaipoipo, o lou tuaoi la e sili ona e vavalalata i ai o lau paaga faaipoipo.  E lē gata i lea, e tatou te vavalalata atu i uso ma tuafāfine i le faapotopotoga. O isi o tatou tuaoi o ē e tatou te feiloaʻi ai i le faiva i le fanua. E faapefea ona faaalia e auauna a Ieova le alofa i tuaoi ma mulimuli i aʻoaʻoga a lona Alo?

ALOFA I LAU PAAGA FAAIPOIPO

4. E faapefea ona taulau manuia faaipoipoga e ui i le tulaga agasala?

4 Na faavae e Ieova le uluaʻi faaipoipoga, ina ua ia foafoaina Atamu ma Eva ma tuufaatasia i laʻua. Na finagalo o ia ina ia laʻua maua le fiafia, ia tumau la laʻua mafutaga ma faatumulia le lalolagi i a laʻua fanau. (Kene. 1:27, 28) Peitaʻi, o le fouvale i le pule a le Atua na faaleagaina ai le uluaʻi faaipoipoga, ma oo mai ai le agasala ma le oti i le fanau a tagata. (Roma 5:12) E ui i lea, ua faailoa mai e le Tusi Paia le auala e taulau manuia ai faaipoipoga. Ua iai fautuaga e sili ona lelei e faatatau i lenei mataupu mai iā Ieova, o Lē na faavaeina faaipoipoga.—Faitau le 2 Timoteo 3:16, 17.

5. O le ā le tāua o le alofa i le faaipoipoga?

5 Ua faailoa mai i le Afioga a le Atua e tāua faalogona māfana ma le alofa faapelepele i le mauaina o le olioli i faiā ma isi. E moni lenā manatu i le faaipoipoga. Na tusi atu Paulo i le faapotopotoga: “E faapalepale ma e agalelei le alofa. E lē lotoleaga le alofa, e lē gugutu, e lē faafefeteina, e lē amio valea, e lē saʻili mo lona lava lelei, e lē itaitagofie. E lē faitauina mea leaga e fai atu iā te ia. E lē fiafia i le amiolētonu, ae e fiafia i le mea moni. E onosaʻi i mea uma, e talitonu i mea uma, e faamoemoe i mea uma, e tumau i mea uma.” (1 Kori. 13:4-8) O le manatunatu i na upu faagaeeina ma taumafai e faatatau, o le a faatuputele ai lo tatou olioli i le faaipoipoga.

Ua faailoa mai i le Afioga a le Atua auala e taulau manuia ai se faaipoipoga (Tagaʻi i le palakalafa e 6, 7)

6, 7. (a) O le ā le faamatalaga a le Tusi Paia e faatatau i le tulaga ulu? (e) O le ā le auala e tatau ona feutagaʻi ai se tane ma lana avā?

6 E tusa ai ma faatulagaga a le Atua, e tāua le faaalia o le alofa i le faatinoina o le tulaga ulu. Ua faapea mai Paulo: “Ou te manaʻo ina ia outou iloa, o le ulu o tane taʻitoʻatasi uma o Keriso, o le ulu o le fafine o le tane, a o le ulu o Keriso o le Atua.” (1 Kori. 11:3) Peitaʻi, e lē tatau ona faatinoina i se uiga pulepuletutū le tulaga  ulu. O se faaaʻoaʻoga, e faatino e Ieova lona tulaga ulu iā Iesu i se auala agalelei ma lē manatu faapito. O le iʻuga, e faaaloalo ma talisapaia e Iesu le taʻitaʻiga alofa a le Atua, ma na ia faailoa mai: “Ou te alofa i le Tamā.” (Ioa. 14:31) E lē faapena faalogona o Iesu pe ana faapea e sauā pe pulepuletutū Ieova i a laʻua feutagaʻiga.

7 E ui o le tane o le ulu o le avā, ae ua faatonu e le Tusi Paia le tane ina “ia āva” i lana avā. (1 Pete. 3:7) O se tasi auala e faaalia ai e tane le āva i avā, o le manatu mamafa i o latou manaʻoga ma faamuamua mea e latou te fiafia ai i nisi mataupu. Ua faapea mai le Tusi Paia: “O outou tane, ia faaauau ona alolofa atu i a outou avā, e pei o le Keriso foʻi ona alofa i le faapotopotoga, ma foaʻi mai lona ola mo le faapotopotoga.” (Efe. 5:25) Na foaʻi e Iesu lona ola mo ona soo. Pe a faaaʻoaʻo tane i le auala alofa e faatino ai e Iesu lona tulaga ulu, o le a matuā faigofie ai i lana avā ona alofa, faaaloalo ma gauaʻi iā te ia.—Faitau le Tito 2:3-5.

IA ALOFA I USO TAPUAʻI

8. O le ā le auala e tatau ona tatou manatu ai i o tatou uso tapuaʻi?

8 I aso nei, ua faitau miliona tagata o loo tapuaʻi iā Ieova ma faalauiloa atu lona suafa ma lona finagalo. O le ā le auala e tatau ona tatou manatu ai i o tatou uso tapuaʻi? Ua faapea mai le Afioga a le Atua: “Seʻi o tatou faia mea lelei i tagata uma manū o talafeagai le taimi e fai ai, aemaise i ē tatou te aiga i le faatuatua.” (Kala. 6:10; faitau le Roma 12:10.) Na tusi le aposetolo o Peteru: “Talu ai ua faamamāina o outou olaga e ala i le usiusitaʻi i le upu moni, lea e iʻu ai i le alofa faamaoni o uso, ia matuā alofa le tasi i le isi mai i le loto.” Na faapea atili atu Peteru i ona uso talitonu: “Ae e sili i nei mea uma, ia tele le alofa o le tasi i le isi.”—1 Pete. 1:22; 4:8.

9, 10. Aiseā ua autasi ai tagata o le Atua?

9 Ua tutasi la tatou faalapotopotoga i le lalolagi aoao, ona o le loloto o lo tatou alofa mo uso tapuaʻi. E tatou te alolofa foʻi iā Ieova ma usiusitaʻi i ana tulafono, ua ia lagolagoina i tatou i le mana e sili ona malosi i le aoao o mea, o lona agaga paia po o lona mana galue. O lea, ua tatou olioli ai i le autasi ma o tatou uso i le lalolagi aoao.—Faitau le 1 Ioane 4:20, 21.

10 Na faamatilatila e Paulo le tāua o le faaalia o le alofa i le va o Kerisiano ina ua ia tusi: “Ia oofu outou i le alofa mutimutivale, le agalelei, lotomaulalo, agamalu ma le faapalepale. Ia faaauau ona onosaʻi le tasi i le isi, ma ia fefaamagaloaʻi ma le lotoatoa pe afai ua faia e se tasi se mea e tigā ai le isi. E pei ona finagalo malie Ieova e faamagalo iā te outou, ia faapea foʻi ona outou faia. Peitaʻi, e iai foʻi se isi mea e manaʻomia, ia oofu outou i le alofa, auā o le fusi lea e atoatoa ona autasi ai.” (Kolo. 3:12-14) Maʻeu lo tatou lotofaafetai ona o le alofa, o le “fusi lea e atoatoa ona autasi ai,” lea ua mafai ona tatou faaalia e ui i le eseese o o tatou talaaga ma atunuu!

11. O le ā ua mātaulia ai le faalapotopotoga a le Atua?

11 O le alofa moni ma le autasi ua mātaulia ai auauna a Ieova o ē o loo faatinoina le tapuaʻiga moni. Na fetalai Iesu: “O le mea lea e iloa ai e tagata uma o oʻu soo outou, pe afai ua outou alolofa o le tasi i le isi.” (Ioa. 13:34, 35) Na tusi le aposetolo o Ioane: “E iloa le fanau a le Atua ma le fanau a le Tiapolo i le mea moni lenei:  O lē ua lē faaauau ona faia le amiotonu e lē mai i le Atua o ia, e faapena foʻi le tagata ua lē alofa i lona uso. Auā o le feʻau lenei na outou faalogo ai mai i le amataga, e tatau ona tatou alolofa o le tasi i le isi.” (1 Ioa. 3:10, 11) O le alofa ua matuā autasi ai Molimau a Ieova ma mātaulia ai i latou o soo moni o Keriso, o ē ua faaaogāina e le Atua e faia lona finagalo o le talaʻi atu o le tala lelei o le Malo i le lalolagi atoa.—Mata. 24:14.

AOAOINA “SE MOTU O TAGATA E TOʻATELE”

12, 13. O le ā o loo faia nei e le “motu o tagata e toʻatele,” ma o le ā ua toe o se aga ona latou mauaina lea?

12 O le toʻatele o auauna a Ieova i aso nei o se vaega o le ʻmotu o tagata e toʻatele mai i atunuu uma, ma ituaiga, ma nuu, ma gagana.’ O loo latou “tutū i luma o le nofoālii [o le Atua] ma i luma o le Tamaʻi Mamoe [Iesu Keriso].” O ai i latou? “O i latou nei o ē ua sao mai i le puapuaga tele, ma ua tatā o latou ofu talaloa, ma faapaʻepaʻeina i le toto o le Tamaʻi Mamoe,” ona o lo latou faatuatua i le taulaga togiola a Iesu. E alolofa sui o le “motu o tagata e toʻatele” iā Ieova ma lona Alo, ma ʻua latou tuuina atu le auaunaga paia i le Atua i le malumalu i le ao ma le pō.’—Faaa. 7:9, 14, 15.

13 Ua toe o se aga ona faaumatia lea e le Atua lenei lalolagi leaga i le “puapuaga tele.” (Mata. 24:21; faitau le Ieremia 25:32, 33.) Peitaʻi, o lona alofa o le a ia faasaoina ai ona tagata o se vaega, ma taʻitaʻia atu i lana lalolagi fou. E pei ona valoia i le toetoe 2,000 tausaga ua mavae, ʻo le a soloiesea e le Atua loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā.’ Po o e moomoo e ola i le Parataiso pe a “mavae atu mea muamua”?—Faaa. 21:4.

14. O le ā se aofaʻiga ua iai nei le motu o tagata e toʻatele?

14 I le amataga o aso e gata ai i le 1914, e pe ā ma le 5,000 auauna a Ieova i le lalolagi aoao. O le alolofa i o latou tuaoi ma le fesoasoani a le agaga paia, na uunaʻia ai se vaega toʻaitiiti o le vaega totoe o le ʻaufaauuina e finafinau i le galuega talaʻi o le Malo. O le iʻuga, ua aoaoina nei le motu o tagata e toʻatele e faamoemoe e ola i le lalolagi. I aso nei, ua pe ā ma le 8,000,000 Molimau o loo auai i le silia i le 115,400 faapotopotoga i le lalolagi aoao. Ae o loo faatupulaʻia pea lenā fuainumera. O se faaaʻoaʻoga, e silia i le 275,500 Molimau fou na papatisoina i le tausaga faaleauaunaga e 2014. I se fuafaatatau, e pe ā ma le 5,300 i latou e papatiso i vaiaso taʻitasi.

15. Faamatala le mamao ua oo atu ai le galuega talaʻi o le Malo.

15 E mataʻina le mamao ua oo atu ai le galuega talaʻi. Ua lomia nei a tatou lomiga faale-Tusi Paia i le silia i le 700 gagana. O Le Olomatamata o le mekasini lea ua sili atu ona tufatufaina i le lalolagi aoao, lea e silia i le 52,000,000 kopi e lomia i masina taʻitasi i gagana e 247. Ua silia i le 200,000,000 kopi ua lomia o le tusi O ā Aʻoaʻoga Moni a le Tusi Paia? i le silia i le 250 gagana.

16. Aiseā ua faaauau ai ona faatupulaʻia le faalapotopotoga a Ieova?

16 O le faatelega mataʻina ua tatou vaaia i aso nei, ua māfua ona o lo tatou faatuatua i le Atua, ma taliaina o le Tusi Paia o le Afioga faagaeeina lea a le Atua. (1 Tesa. 2:13) Ua faaauau ona tatou olioli i faamanuiaga a Ieova, e ui i teteega ma le ʻinoʻino  mai o Satani, “le atua o lenei faiga o mea a le lalolagi.”—2 Kori. 4:4.

IA FAAALIA PEA LE ALOFA I ISI

17, 18. O ā uiga e tatau ona tatou faaalia atu i ē e lē talitonu?

17 O ā uiga e tatau ona faaalia e tagata o Ieova iā i latou e lē auauna i le Atua moni? O nisi e talilelei mai, ae o nisi e lē talilelei mai i la tatou talaʻiga. E tusa po o le ā le tali mai a tagata, ae e tatau ona tatou mulimuli i le fautuaga lenei a le Tusi Paia: “Ia lē aunoa ona outou tautatala atu i upu e logolelei, ia faamāi i le masima, ina ia outou iloa le auala e tali atu ai i tagata taʻitoʻatasi.” (Kolo. 4:6) Pe a tatou tali atu iā i latou e fesili mai i le māfuaaga o lo tatou faamoemoe, o lo tatou alolofa i tuaoi o le a tatou tali atu ai i se auala ʻagamalu ma matuā faaaloalo lava.’—1 Pete. 3:15.

18 Ia tatou faaalia le alofa e tusa pe e feita ma tetee mai tagata i la tatou feʻau. Ia tatou faaaʻoaʻo iā Iesu: “Ina ua upuleagaina o ia, e leʻi toe fai atu e ia ni upuleaga. Ina ua puapuagatia o ia, e leʻi faamataʻu atu, ae na ia tuuina atu pea o ia lava i lē [Ieova] e faamasinotonu.” (1 Pete. 2:23) Pe e tatou te faatasi ma uso talitonu po o isi tagata, ia tatou faaalia le lotomaulalo ma faatatau le fautuaga lenei: “Aua le taui atu le leaga i le leaga, po o le upuleaga atu i ē e upuleaga mai, a ia outou faamanuia atu.”—1 Pete. 3:8, 9.

19. O le ā le auala e tatau ona feutagaʻi ai ma o tatou fili?

19 O le faatumauina o le lotomaulalo, ua usiusitaʻi ai tagata o Ieova i le taʻiala tāua lea na faailoa mai e Iesu. I lana lauga i luga o le mauga, na ia fetalai ai: “Ua outou faalogo ua faapea mai le upu, ʻIa e alofa atu i lē lua te tuaoi ae ʻinoʻino i lou fili.’ Ae ou te fai atu iā te outou: Ia alolofa atu pea i o outou fili ma tatalo pea mo ē ua sauāina outou, ina ia avea ai outou ma atalii o lo outou Tamā o i le lagi, o lē na te faaoso lona lā i ē e amioleaga ma ē e amiolelei, ma faatotō mai le timu i ē e amiotonu ma ē e amiolētonu.” (Mata. 5:43-45) E tatau i auauna a Ieova ona ʻalolofa i o latou fili,’ e tusa po o ā o latou uiga e faaali mai.

20. Aiseā o le a taʻitaʻia ai e le alofa gaoioiga uma i le lalolagi fou? (Tagaʻi i le ata i luga aʻe o le matua.)

20 I so o se vala o le olaga, e tatau i tagata o Ieova ona latou faaalia le alolofa iā Ieova ma o latou tuaoi. E tusa foʻi pe e lē talilelei mai nisi i le feʻau o le Malo, ae e faaalia pea lo tatou alolofa i tuaoi pe a latou manaʻomia le fesoasoani. Na tusi le aposetolo o Paulo: “Aua neʻi o outou nofo aitalafu i se tagata ae e tau lava o le alofa o le tasi i le isi, auā o lē ua alofa i lona tuaoi, ua usiusitaʻi o ia i le tulafono. Auā ua faapea mai le tulafono, ʻAua e te mulilua, Aua e te fasioti tagata, Aua e te gaoi, Aua e te manaʻo tele,’ ma afai foʻi ua iai se isi poloaʻiga, ua taaofaʻi i upu nei, ʻIa e alofa atu i lou tuaoi e pei o oe lava iā te oe.’ E lē agaleaga le alofa i lona tuaoi; o lea, o le alofa o le taunuuga lea o le tulafono.” (Roma 13:8-10) I le avea ma Molimau a Ieova, e tatou te faaalia le alofa moni e ui o loo tatou ola i se lalolagi amioleaga, sauā ma fevaevaeaʻi, lea o loo pulea e Satani. (1 Ioa. 5:19) O le alofa o le a taʻitaʻia ai gaoioiga uma i le lalolagi fou, pe a māeʻa ona faaumatia Satani, o ana temoni, ma tagata fouvale uma. Maʻeu se faamanuiaga o le a maua e tagata i le lalolagi, a o latou faaalia le alofa i le Atua ma o latou tuaoi!