Skip to content

Skip to secondary menu

Skip to table of contents

Molimau a Ieova

Faa-Samoa

LE OLOMATAMATA (LOMIGA MO SU‘ESU‘EGA) SETEMA 2015

Pe e Maufaatuatuaina Lou Lotofuatiaifo?

Pe e Maufaatuatuaina Lou Lotofuatiaifo?

“O le autū o lenei poloaʻiga, o le alofa lea mai i se lotomamā ma se lotofuatiaifo lelei.”—1 TIMO. 1:5.

PESE: 57, 48

1, 2. O ai na foaʻiina mai le lotofuatiaifo, ma aiseā e tatou te lotofaafetai ai mo lenā meaalofa?

NA FOAFOAINA e Ieova le tagata ma le filifiliga saʻoloto, e mafai ona faia ai a latou lava filifiliga. Na tuuina e Ieova le lotofuatiaifo i le uluaʻi tamāloa ma le fafine, ma a laʻua fanau e iloa ai le lelei ma le leaga. Ua pei o tatou lotofuatiaifo o se tapasā e taʻitaʻia o tatou ala. Pe a faaaogā lelei o tatou lotofuatiaifo, e fesoasoani iā i tatou e faia mea lelei ae ʻalofia mea leaga. O o tatou lotofuatiaifo o se faamaoniga lenā o le alofa o le Atua iā i tatou, ma lona finagalo ia tatou taulau manuia.

2 I aso nei, o loo faaaogā lava e tagata o latou lotofuatiaifo. (Faitau le Roma 2:14, 15.) E ui lava ua sē ese amioga a le toʻatele ma tapulaa a le Tusi Paia, ae e iai lava i latou o loo latou faia mea lelei, ae ʻalofia mea leaga. O le lotofuatiaifo ua taofia ai le toʻatele mai le faia o amioga e matuā leaga. Seʻi faaāta i o tatou mafaufau le tulaga malapagā o le lalolagi pe ana leai se lotofuatiaifo! Atonu o le a sili atu ona leaga le lalolagi. Maʻeu lo tatou lotofaafetai i le Atua ona o lona foaʻiina mai o le lotofuatiaifo i tagata!

3. Aiseā e avea ai le lotofuatiaifo o se taaʻiga lelei i le faapotopotoga?

 3 E ese mai auauna a Ieova mai i isi tagata, ona e latou te mananaʻo e aʻoaʻoina o latou lotofuatiaifo. E latou te mananaʻo e ōgatusa o latou lotofuatiaifo ma tapulaa a le Tusi Paia i le mea saʻo ma le mea sesē, faapea le lelei ma le leaga. O se lotofuatiaifo e aʻoaʻoina lelei, e mafai ona avea o se taaʻiga lelei i le faapotopotoga. Peitaʻi, o le aʻoaʻoina ma le faaaogāina o o tatou lotofuatiaifo, e tele mea e aofia ai nai lo o le iloaina o le Tusi Paia. Ua faafesootaʻi e le Tusi Paia se lotofuatiaifo lelei agaʻi i le faatuatua ma le alofa. Na tusi Paulo: “O le autū o lenei poloaʻiga, o le alofa lea mai i se lotomamā ma se lotofuatiaifo lelei, ma le faatuatua e lē faatagāfai.” (1 Timo. 1:5) Pe a toleni o tatou lotofuatiaifo ma mulimuli i ai, o le a faalolotoina ai lo tatou alofa mo Ieova ma faamalosia ai lo tatou faatuatua. O le auala e faaaogā ai o tatou lotofuatiaifo, e iloa ai lo tatou malolosi faaleagaga, le tulaga o o tatou loto, ma le malosi o lo tatou faanaunauga e faafiafia Ieova. O o tatou lotofuatiaifo e iloa ai le tagata moni e iai i tatou.

4. E faapefea ona toleni o tatou lotofuatiaifo?

4 E faapefea ona toleni o tatou lotofuatiaifo? O auala autū o le tatalo ma suʻesuʻe le Tusi Paia ma ia faia e lē aunoa, manatunatu loloto i mea o loo faitauina, ona faatatauina lea. O lea, e tele mea e aofia ai nai lo o le aʻoaʻoina o mea moni ma tulafono. O lo tatou suʻesuʻeina o le Tusi Paia o le a faasolosolo ona tatou malamalama lelei ai iā Ieova ma ona uiga, faapea mea e fiafia ma lē fiafia ai. O le a amata ona ōgatusa ai o tatou lotofuatiaifo ma ala o Ieova. O le a pāʻia ai o tatou loto ma uunaʻia ai i tatou e faataʻitaʻi iā te ia.

5. O le ā o le a iloiloina i lenei mataupu?

5 Ae atonu e tatou te fesili ifo: E faapefea ona fesoasoani iā i tatou se lotofuatiaifo ua aʻoaʻoina lelei i le faia o filifiliga? E faapefea ona tatou faaaloalogia filifiliga a isi uso talitonu e tusa ma o latou lotofuatiaifo? E faapefea ona uunaʻia e o tatou lotofuatiaifo i tatou e maelega i galuega lelei? E tusa ai ma na fesili, seʻi o tatou iloiloina ni vala se tolu e mafai ona avea ai o tatou lotofuatiaifo ma fesoasoani aogā: (1) soifua mālōlōina, (2) faafiafiaga, ma le (3) le faiva.

IA MAGAFAGAFA

6. O ā filifiliga e tatou te faia mo lo tatou ola mālōlōina?

6 Ua faalaeiauina e le Tusi Paia i tatou e ʻalofia gaoioiga e faaleagaina ai, ma pulea lelei a tatou masaniga, e aofia ai meaʻai ma meainu. (Faata. 23:20; 2 Kori. 7:1) A o tatou faatatauina taʻiala o le Tusi Paia, o le a mafai ona tatou ola mālōlōina ai, e tusa pe e tatou te feagai ma maʻi ma le tulaga matua. I nisi atunuu, ua iai vailaau ma togafitiga faafomaʻi ua talia aloaʻia, faapea togafitiga e sui ai. E maua e lē aunoa e ofisa o le lālā tusi mai i uso ma tuafāfine e faatatau i le filifilia o togafitiga. Ua fesili mai le toʻatele, “Pe e tatau ona talia e auauna a Ieova na togafitiga?”

7. E faapefea ona tatou faia filifiliga i togafitiga faafomaʻi?

7 E lē faia e ofisa o lālā ma toeaina o le faapotopotoga filifiliga i togafitiga faafomaʻi mo se Molimau, e tusa pe talosagaina i latou e faia faapea. (Kala. 6:5) Peitaʻi, e latou te faailoa atu taʻiala a Ieova e fesootaʻi atu i le mataupu. O se faaaʻoaʻoga, e manaʻomia ona manatua e se Kerisiano le faatonuga a le Tusi Paia ina ʻia faaauau ona taumamao mai i le toto.’ (Galu. 15:29) O lenā faatonuga e matuā lē taliaina ai e se Kerisiano se togafitiga e tuiina ai le toto ma ona vaega autū e fā. O le iloaina o lenā vala  e mafai ona aafia ai le lotofuatiaifo o se Kerisiano, pe a ia faia se filifiliga e faatatau i vaega ninii mai i se tasi o vaega autū e fā o le toto. * Ae o ā nisi fautuaga a le Tusi Paia e mafai ona fesoasoani iā i tatou pe a filifilia togafitiga faafomaʻi?

8. E faapefea ona fesoasoani le Filipi 4:5 i filifiliga i le soifua mālōlōina?

8 Ua faapea mai le Faataoto 14:15: “E faatuatua le tagata ua leai se poto masani i upu uma, a o le tagata e iai le utaga mamao, e na te iloilo lelei ona laasaga.” E iai nisi maʻi e leʻi maua se vaifofō. O lea, o se gaoioiga atamai lo tatou faaeteete i tala feaveaʻi e faatatau i togafitiga lelei ae e leai ni faamaoniga. Na faagaeeina Paulo e tusi: “Ia iloa e tagata uma lo outou magafagafa.” (Fili. 4:5) O le magafagafa o le a lē faaalu ai le tele o o tatou taimi i le tausiaina o lo tatou ola mālōlōina ma faatalalē ai i mea faaleagaga. O le a lē avea ai lo tatou ola mālōlōina ma i tatou lava ma taulaʻiga autū o o tatou olaga. (Fili. 2:4) E sili atu ona tāua mea faaleagaga, ma e tatau ona tatou magafagafa i le tausiga o lo tatou ola mālōlōina.—Faitau le Filipi 1:10.

Pe e te taumafai e faamalosia isi e talia ou manatu? (Tagaʻi i le palakalafa e 9)

9. E faapefea i le Roma 14:13, 19 ona aafia ai a tatou filifiliga i le tausiga o le soifua mālōlōina, ma e ono aafia ai faapefea lo tatou autasi?

9 O se Kerisiano e magafagafa, e na te lē faamalosia isi e talia ona manatu. I se tasi atunuu i Europa, na faaauiluma ai e se ulugalii ni meaʻai patino, ma nisi o auala e tausia ai le soifua mālōlōina. Na laʻua faalaeiauina foʻi isi uso e mulimuli i lenā auala. Peitaʻi, e leʻi filifili isi e faia faapea. A o faagasolo taimi, sa leai ni iʻuga lelei o lenei faiga, ma na lē fiafia ai le toʻatele. Sa iai i le ulugalii le aiā e filifili ai lava i laʻua i le auala e tausia ai lo laʻua soifua mālōlōina. Ae po o se faiga atamai ea le faaauiluma o o laʻua manatu ma fevaevaeaʻi ai le faapotopotoga? I aso anamua, sa eseese manatu o nisi Kerisiano i Roma e faatatau i meaʻai ma nisi aso faamanatu. O le ā le fautuaga na avatu e Paulo? Na ia faapea atu: “E manatu le tasi tagata e tāua le isi aso i lo o isi aso; ae e manatu le isi tagata e tutusa aso uma; ia taʻitasi le tagata ma matuā mautinoa i lona lava mafaufau.” E tāua le aua le faia o se mea e tausuai ai isi.—Faitau le Roma 14:5, 13, 15, 19, 20.

10. Aiseā e tatau ai ona tatou faaaloalogia filifiliga a isi? (Tagaʻi i le ata i luga aʻe o le matua.)

10 Pe a tatou lē malamalama i le māfuaaga ua faia ai e se uso talitonu se filifiliga i se mataupu e fitoitonu iā te ia lava, e lē tatau ona tatou vave faamasinoina o ia, pe uunaʻia foʻi o ia e suia lana faaiʻuga. Atonu o loo “vaivai” lona lotofuatiaifo ma o loo manaʻomia pea ona toleniina, pe atonu foʻi e maʻaleʻale lona lotofuatiaifo i nisi vala. (1 Kori. 8:11, 12) Ae i le isi itu, atonu e manaʻomia  foʻi ona iloilo o tatou lotofuatiaifo, po o manaʻomia ona toleni ina ia ōgatusa ma taʻiala a le Atua. I mataupu e faatatau i le soifua mālōlōina, e tatau ona nofosauni le tagata lava ia e faia ana ia lava filifiliga ma talia ona aafiaga.

OLIOLI I FAAFIAFIAGA E ATIAʻE AI

11, 12. O le ā le fautuaga a le Tusi Paia e tatau ona tatou manatua pe a filifilia faafiafiaga?

11 Na foafoaina e Ieova tagata ina ia mafai ona olioli ma maua aogā mai i faafiafiaga. Na tusi Solomona e iai “le taimi e ʻataʻata ai” ma le “taimi e osooso ai ma le fiafia.” (Fai. 3:4) Peitaʻi, e lē o faafiafiaga uma e maua ai aogā ma faafouina ai, ma e lē lelei foʻi le faaalu o le tele o le taimi i faafiafiaga. E faapefea ona fesoasoani mai o tatou lotofuatiaifo e olioli ai i faafiafiaga e aogā ma atiaʻe ai?

12 Ua lapataʻia i tatou e le Tusi Paia e faatatau i “galuega a le tino.” O nei galuega e aofia ai le “faitaaga, o le amio lē mamā, o le amio matagā, o le ifo i tupua, o faiga faaagaga, o le feitagaʻi, o le femisaaʻi, o le lotoleaga, o le lotoa, o le finauvale, o fevaevaeaʻiga, o le mulimuli i aʻoaʻoga a tagata, o le matauʻa, o onāga, o patī lē taupulea, ma mea faapena.” Na tusi Paulo o “ē o loo faia mea faapena, e lē fai le malo o le Atua mo o latou tofi.” (Kala. 5:19-21) E mafai ona tatou fesili ifo: ʻPo o uunaʻia aʻu e loʻu lotofuatiaifo e teena taaloga e faatautavā, lotonuu pe sauā foʻi? Pe e lapataʻia aʻu e loʻu lotofuatiaifo pe a faaosoosoina aʻu e matamata i ata matagā tau feusuaʻiga, po o ata o amioga lē mamā, onā, po o faiga faataulāitu?

13. E faapefea ona fesoasoani mai le 1 Timoteo 4:8 ma le Faataoto 13:20 i le filifiliaina o a tatou faafiafiaga?

13 Ua aumaia foʻi i le Tusi Paia taʻiala e mafai ona toleni ai o tatou lotofuatiaifo e filifili ai faafiafiaga. O se faaaʻoaʻoga ua faapea mai le Tusi Paia, “e itiiti le aogā o le faamalositino.” (1 Timo. 4:8) Ua manatu le toʻatele o le faamalositino e lē aunoa e aogā mo le soifua mālōlōina ma faafouina ai le tino ma le mafaufau. Pe a tatou mananaʻo e faamalositino faatasi ma isi, pe e afāina lo tatou faia faapea ma so o se tasi lava? Ua faapea mai le Faataoto 13:20, “o lē e savali ma tagata atamamai, e atamai ai o ia, a o lē e faifaimea faatasi ma tagata vālea, e leaga ai lava o ia.” Pe e lē faalaeiauina ai i tatou e filifili lelei a tatou faafiafiaga, e ala i le faaaogāina o o tatou lotofuatiaifo ua aʻoaʻoina i le Tusi Paia?

14. Na faapefea ona gaoioi se tasi talavou e ōgatusa ma le Roma 14:2-4?

14 E toʻalua le fanau talavou a Christian ma Daniela. Ua faapea mai Christian: “E matou te talanoa i faafiafiaga i taimi o Tapuaʻiga a le Aiga. E matou te ioe e iai faafiafiaga e talafeagai ma faafiafiaga e lē talafeagai. Na matou talanoa foʻi, po o ai aumea lelei? Na faapea mai le isi oʻu afafine, e lē talafeagai i lona manatu amioga a nisi talavou Molimau i taimi o mālōlōga. Sa faaosoosoina ai foʻi o ia e faataʻitaʻi i ai. E ma te talanoa i ai e tofu i matou ma le lotofuatiaifo, ma e tatau ona taʻitaʻia ai a matou gaoioiga ma le filifilia o aumea.”—Faitau le Roma 14:2-4.

O lou lotofuatiaifo ua aʻoaʻoina lelei i le Tusi Paia e mafai ona fesoasoani iā te oe e ʻalofia lamatiaga (Tagaʻi i le palakalafa e 14)

15. E faapefea ona fesoasoani iā te oe le Mataio 6:33 pe a filifili au faafiafiaga?

15 Ua tulaʻi foʻi le fesili: ʻO le ā le taimi e tatau ona auai ai i faafiafiaga?’ Pe e te taumafai e faamuamua gaoioiga faaleagaga e pei o sauniga, talaʻiga, ma au lava suʻesuʻega nai lo o faafiafiaga? Pe e te taumafai e fetuunaʻi au gaoioiga faaleagaga ina ia fetaui ma au faafiafiaga? O ā mea e te faamuamuaina? Na fetalai Iesu: “O lea,  ia faaauau pea ona outou saʻili muamua le malo ma le amiotonu a le Atua, ona faaopoopoina ai lea o nei mea uma iā te outou.” (Mata. 6:33) Pe e uunaʻia oe e lou lotofuatiaifo e faatāua le fautuaga a Iesu?

FAALAEIAU E MAELEGA I GALUEGA LELEI

16. O le ā e uunaʻia e o tatou lotofuatiaifo i tatou e fai?

16 O se lotofuatiaifo lelei, e lē gata e lapataʻia i tatou e ʻalofia gaoioiga sesē, ae e uunaʻia foʻi i tatou e faia gaoioiga lelei. O galuega lelei e sili ona tāua, o le faia lea o se sao i le talaʻiga mai i lea fale i lea fale, ma faaaogā lelei avanoa e molimau lē fuafuaina atu ai. Na uunaʻia e le lotofuatiaifo o Paulo o ia e faia faapea. Na ia tusi: “O le mea lea e tatau ona ou faia. Oi talofa iā te aʻu pe a ou lē folafolaina atu le tala lelei!” (1 Kori. 9:16) Pe a tatou faataʻitaʻi iā te ia, o le a faailoa ma faamautinoa mai e o tatou lotofuatiaifo o loo tatou faia le mea saʻo. Pe a tatou talaʻi atu le tala lelei, o le a iai foʻi se aafiaga i lotofuatiaifo o i latou o loo tatou talaʻi atu ai. Na faapea mai Paulo: “Ua fai i matou ma faaaʻoaʻoga lelei i lotofuatiaifo o tagata uma i le silafaga a le Atua.”—2 Kori. 4:2.

17. Na faapefea ona gaoioi se tuafafine talavou e ōgatusa ma lona lotofuatiaifo?

17 Sa suʻesuʻeina e Jacqueline le mataupu o le Paiolo i le aʻoga, ina ua 16 ona tausaga. Sa auʻiliʻili ai le aʻoaʻoga o le evolusione. “E leʻi faatagaina aʻu e loʻu lotofuatiaifo e faia atoatoa ni oʻu sao i talanoaga a le vasega e pei ona masani ai. Ou te leʻi lagolagoina le aʻoaʻoga o le evolusione. Sa ou talanoa i loʻu faiaʻoga ma faamatala i ai loʻu tulaga. Sa faateʻia aʻu ina ua tali lelei mai le faiaʻoga, ma tuu mai le avanoa ou te talanoa ai i le vasega e faatatau i le foafoaga.” Sa matuā faamalieina Jacqueline i lona mulimuli ma gaoioi e ōgatusa ma lona lotofuatiaifo ua aʻoaʻoina i le Tusi Paia. Pe e faapena le auala e uunaʻia ai oe e lou lotofuatiaifo e faia le mea saʻo?

18. Aiseā e tatau ai ona lelei ma maufaatuatuaina o tatou lotofuatiaifo?

18 O lo tatou sini le ola e ōgatusa ma taʻiala ma tapulaa a Ieova. O lea, e mafai ona fesoasoani mai o tatou lotofuatiaifo iā i tatou. E toleniina o tatou lotofuatiaifo e ala i le suʻesuʻeina e lē aunoa o le Afioga a le Atua, manatunatu loloto i ai, ma taumafai e faatatau manatu ua tatou aʻoaʻoina. O le faia faapea, o le a mafai ona avea ai o tatou lotofuatiaifo o se vala tāua i o tatou olaga faa-Kerisiano.

^ pala. 7 Tagaʻi i le “Fesili Mai le ʻAufaitau” i Le Olomatamata o Iuni 15, 2004, itu. 29-31.