Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

LE OLOMATAMATA (LOMIGA MO SU‘ESU‘EGA) SETEMA 2015

E Faapefea Ona Faaalia e Tatou te Alolofa iā Ieova?

E Faapefea Ona Faaalia e Tatou te Alolofa iā Ieova?

“Ua tatou alolofa auā na muaʻi alofa mai le Atua iā i tatou.”—1 IOA. 4:19.

PESE: 56, 138

1, 2. Ua faapefea ona aʻoaʻo i tatou e Ieova e alolofa atu iā te ia?

O LE auala sili e aʻoaʻo ai e se tamā lana fanau o lana faaaʻoaʻoga. Na tusi le aposetolo o Ioane: “Ua tatou alolofa auā na muaʻi alofa mai le Atua iā i tatou.” (1 Ioa. 4:19) O lea, ua saunia mai e Ieova le faaaʻoaʻoga silisili o le alofa faatamā, e fesoasoani iā i tatou e alolofa ai iā te ia.

2 O le ā le auala na “muaʻi alofa mai” ai le Atua iā i tatou? Ua faapea mai le aposetolo o Paulo: “Ua faaali mai e le Atua lona lava alofa iā i tatou, auā na maliu Keriso mo i tatou a o tatou agasala pea.” (Roma 5:8) O le faia o lenā taulaga sili, o le ofoina mai lea o lona Alo e togiola ai tagata talitonu, ua faaalia mai ai e Ieova le alofa moni. E faaalia lea alofa e ala i le foaʻi atu, ma gaoioi i se auala faataulaga ma lē manatu faapito. O lenei gaoioiga alofa a le Atua, ua mafai ai ona tatou faalatalata atu iā te ia ma maua aogā mai i lona alofa. O le a uunaʻia ai i tatou e alolofa atu iā te ia.—1 Ioa. 4:10.

3, 4. E faapefea ona faaalia le alofa i le Atua?

3 O le alofa o le uiga autū lea o Ieova, ua tatou malamalama la i le māfuaaga na fetalai ai Iesu o le poloaʻiga muamua a le Atua: “Ia e alofa atu iā Ieova lou Atua ma lou lotoatoa, ma lou  ola atoa, ma lou mafaufau atoa, ma lou malosi atoa.” (Mare. 12:30) Ua tatou iloaina mai i fetalaiga a Iesu, o le alofa i le Atua e tatau ona sau mai i o tatou loto. E lē fiafia le finagalo o Ieova i le faalotolotolua. Ae ua tatou iloa e tatau ona tatou alolofa i le Atua ma o tatou ola, mafaufau ma le malosi atoa. O lona uiga, o le alofa moni i le Atua e lē na o faalogona e aofia ai. Ae e tatau ona aofia ai ma o tatou tomai faaleagaga ma le faaletino. E pei ona taʻua e le perofeta o Mika, o le mea lenā o loo finagalo ai Ieova mai iā i tatou.—Faitau le Mika 6:8.

4 E faapefea ona faaalia lo tatou alolofa moni i lo tatou Tamā o i le lagi? E tatau ona tatou alolofa atoatoa iā te ia. E pei ona fetalai Iesu e tatau ona aofia uma ai o tatou tomai faaleagaga, faalemafaufau ma le faaletino. I le mataupu ua mavae atu, na tatou iloiloina ai auala e fā ua faaalia ai e Ieova lona alofa silisili mo lana fanau. Seʻi o tatou tilofaʻia la auala e faaalia ma faaloloto ai lo tatou alolofa mo Ieova i auala e finagalo malie ai o ia.

LOTOFAAFETAI I SAUNIUNIGA A IEOVA

5. O le ā sa tatou tali atu i mea uma ua faia e Ieova mo i tatou?

5 O ā mea e te faia pe a e mauaina se meaalofa? E te faaalia le loto talisapaia. E lē gata i lea, e te faaaogāina lelei le meaalofa, ma e te lē manatu māmā i ai. Na tusi le soo o Iakopo: “O meaalofa lelei uma ma mea uma e atoatoa ona lelei, e mai i lugā, auā e sau mai i le Tamā o le malamalama, e lē fesuisuiaʻi pe liliu o ia.” (Iako. 1:17) Ua saunia e Ieova mea uma e tatou te manaʻomia ina ia ola ma fiafia ai. Pe e lē uunaʻia ai ea i tatou e alolofa atu iā te ia?

6. O le ā na tatau ona faia e Isaraelu ina ia latou mauaina ai pea faamanuiaga a Ieova?

6 Na maua e tagata Isaraelu le tausiga alofa a Ieova mo le faitau selau tausaga, ma faamanuiaina i latou i le itu faaleagaga ma le faaletino. (Teu. 4:7, 8) Ina ia faaauau ona latou mauaina na faamanuiaga, sa tatau ona latou usitaʻi i le Tulafono a le Atua, lea e aofia ai le ofoina atu e lē aunoa iā Ieova o “uluaʻi fua ua matutua e aupito lelei” o le laueleele. (Eso. 23:19) O le faia faapea, na faaalia ai e Isaraelu e latou te leʻi manatu māmā i le alofa o Ieova ma ana faamanuiaga.—Faitau le Teuteronome 8:7-11.

7. E faapefea ona faaaogā a tatou “ʻoa” e faaalia ai lo tatou alolofa iā Ieova?

7 Ae e faapefea i tatou? E ui e lē manaʻomia ona tatou ofoina atu taulaga faaletino i aso nei, ae e tatau ona tatou faaalia le alofa i le Atua e ala i le faamamaluina o ia i a tatou “ʻoa.” (Faata. 3:9) O ā ni auala e mafai ona tatou faia ai faapea? E mafai ona faaaogā a tatou meafaitino e lagolago ai le galuega o le Malo i o tatou vaipanoa ma le lalolagi aoao. E tusa pe e tele pe itiiti a tatou meafaitino ae o se auala lelei lea e faaalia ai le alofa mo Ieova. (2 Kori. 8:12) E iai foʻi isi auala e mafai ona faaalia ai lo tatou alolofa iā Ieova.

8, 9. E faapefea i le faatuatuaina o folafolaga a Ieova ona fesootaʻi atu i lo tatou alolofa iā te ia? Aumai se faataʻitaʻiga.

8 Na faamanatu atu e Iesu i ona soo e aua neʻi popole i meaʻai ma lavalava ae ia faaauau pea ona saʻili muamua le Malo. Na ia fetalai o loo silafia e le Tamā mea e tatou te manaʻomia. (Mata. 6:31-33) E iloa lo tatou alolofa iā Ieova i le faatuatuaina o lenā folafolaga, auā e vaavaalua le alofa ma le faatuatuaina o se tasi. E lē mafai ona tatou alolofa moni i se tasi e tatou  te lē faatuatuaina. (Sala. 143:8) O lea ia fesili ifo iā i tatou lava: ʻPo o atagia atu i sini o oʻu tuliloaina ma le auala o loo oʻu ola ai ou te alofa moni lava iā Ieova? Po o faaalia i aʻu gaoioiga i aso faisoo ou te faatuatuaina lana tausiga?’

9 Na faaalia e se Kerisiano e suafa iā Mika le alofa ma le faatuatuaina o Ieova. A o talavou o ia, na atiaʻe e Mika se faanaunauga malosi e auauna i le Atua i se isi atunuu. Na faaipoipo o ia ma fai lana fanau e toʻalua, peitaʻi e leʻi mou ese ai lenā faanaunauga. Na faalaeiauina o ia i le tele o mataupu ma lipoti e faatatau i le auauna i vaipanoa o loo telē ai le manaʻoga. O lea na filifili ai loa Mika ma lona aiga e faafaigofie o latou olaga. Na faatau atu lo latou fale ae siitia i se fale laʻitiiti. Na faaitiitia e Mika lana kamupani faamamā, ma aʻoaʻo le auala e faagaoioi ai lana pisinisi mai i se isi atunuu e ala i le Initaneti. Na siitia atu le aiga, ma ina ua mavae le lua tausaga o auauna ma le fiafia i se isi atunuu, na faapea mai Mika: “Ua matou tofo i le moni o fetalaiga a Iesu o loo i le Mataio 6:33.”

IA FAATĀUA UPU MONI MAI I LE ATUA

10. E pei o le tupu o Tavita, o le ā le iʻuga o le manatunatu loloto i upu moni e faatatau i le Atua?

10 I le pe tusa ma le 3,000 tausaga ua mavae, na faagaeetia ai le tupu o Tavita i mea na ia vaaia i le lagi. Na ia tusi: “Ua faalauiloa mai e le lagi le mamalu o le Atua; ma o loo taʻu atu foʻi e le vanimonimo galuega a ona aao.” Na pāʻia lona loto ona o le atamai o le Tulafono a le Atua, na ia faapea mai: “E lelei atoatoa le tulafono a Ieova, e faafoʻisia ai le ola. E maufaatuatuaina le faamanatuga a Ieova, e atamai ai le tagata e leai se poto masani.” O le ā le iʻuga o na manatunatuga lelei? Na faaauau mai Tavita: “Ia mālie iā te oe upu a loʻu gutu ma manatunatuga o loʻu loto. Ieova e, loʻu Papa ma Lē e togiolaina aʻu.” E manino mai, na iai se faiā māfana ma vavalalata a Tavita ma lona Atua.—Sala. 19:1, 7, 14.

11. O le ā e uunaʻia i tatou e fai e faatatau i le poto saʻo o le upu moni ona o le alofa iā Ieova? (Tagaʻi i le ata i luga aʻe o le matua.)

11 Ua faamanuiaina i tatou i aso nei i le tele o lo tatou malamalama i foafoaga a Ieova ma lona finagalo. Ua faaauiluma e le lalolagi aʻoaʻoga maualuluga. Ua faaalia i mea na tutupu i le toʻatele, o le tuliloaina o na mea e iʻu atu ai i le faavaivaia o le faatuatua ma le alofa i le Atua. Ua faalaeiau e le Tusi Paia i tatou e lē gata ia naunau i le poto ae ia maua foʻi le atamai ma le malamalama. O lona uiga ia faaaogā le poto mai le Atua, ina ia tatou maua ai ma isi tagata aogā. (Faata. 4:5-7) E finagalo le Atua “ina ia faaolaina ituaiga uma o tagata, ma ia maua le poto saʻo i le upu moni.” (1 Timo. 2:4) E faaalia lo tatou alolofa iā Ieova e ala i le maelega e taʻutaʻu atu i tagata le tala lelei o le Malo, ma fesoasoani iā i latou ia malamalama i le finagalo o le Atua mo tagata.—Faitau le Salamo 66:16, 17.

12. Na faapefea ona faaalia e se talavou le talisapaia o sauniuniga faaleagaga mai iā Ieova?

12 E oo foʻi i tamaiti e mafai ona faaalia le alolofa mo Ieova e ala i le talisapaia o ana sauniuniga faaleagaga. Ua faapea mai Shannon, ina ua 11 ona tausaga, na la auai ma lona uso e 10 tausaga ma o la mātua i le Tauaofiaga Itumalo ʻTuutoina i le Atua.’ A o faagasolo se tasi o vaega, na faatonuina ai talavou ia nonofo i se vaega faapitoa. Sa popole o ia ae na ia faia lava faapea. Na maofa o ia ina ua tufatufaina atu se meaalofa matagofie mo le ʻautalavou, na faaulutalaina Questions Young People  Ask—Answers That Work. Na faapefea ona aafia ai faalogona o Shannon e faatatau iā Ieova le Atua? Ua ia faapea mai: “O i inā na ou iloa ai, e moni lava Ieova ma e alofa tele o ia iā te aʻu.” Ua toe faapea mai Shannon: “Maʻeu lo matou fiafia ona ua foaʻi fua mai e Ieova le Atua lenei meaalofa matagofie ma silisili ona lelei!”

TALIA FAUTUAGA MA AʻOAʻIGA A LE ATUA

13, 14. O le ā la tatou tali atu pe a aʻoaʻia i tatou e Ieova, ma aiseā?

13 Ua faamanatu mai e le Tusi Paia: “E aʻoaʻia e Ieova o lē e alofa i ai, e pei foʻi ona faia e le tamā i lona atalii o lē ua ia alofa i ai.” (Faata. 3:12) O le ā la tatou tali atu i ai? Na tusia e le aposetolo o Paulo le mea moni lenei: “E foliga mai o aʻoaʻiga e lē o se mea e olioli ai i le taimi lenā, ae o se mea e faanoanoa ai.” Ae e leʻi faaitiitia e Paulo le tāua po o le aogā o aʻoaʻiga, auā na ia faaauau mai: “Peitaʻi, mulimuli ane e fua mai ai e i latou ua aʻoaʻoina fua o le filemu, o le amiotonu lea.” (Epe. 12:11) Pe afai tatou te alolofa iā Ieova, e lē tatau ona tatou manatu māmā pe faaseā i ana fautuaga. Ua avea lenā vala ma luʻi i nisi ae e mafai ona fesoasoani iā i tatou lo tatou alolofa i le Atua.

14 E toʻatele tagata Iutaia e leʻi talisapaia fautuaga a le Atua i aso o Malaki. Na latou iloa le Tulafono e faatatau i le ofoina o taulaga, ae na latou faatalalē i ai. O lea, na tuuina mai ai e Ieova ni fautuaga malolosi iā i latou. (Faitau le Malaki 1:12, 13.) Pagā le mataʻutia o le tulaga na oo i ai! Seʻi faalogo foʻi i fetalaiga a Ieova: “Ona ou faaooina atu lea o le malaia i o outou luga, ma ou faamalaia foʻi a outou faamanuiaga. Ioe, ua ou faamalaia i le faamanuiaga, auā ua outou lē teuina i o outou loto [laʻu poloaʻiga].” (Mala. 2:1, 2) O le teena ma le loto i ai o fautuaga alofa a Ieova e mafai ona iʻu ai i ni āuga mataʻutia.

Ia mulimuli i fautuaga a le Atua nai lo o tapulaa a le lalolagi (Tagaʻi i le palakalafa e 15)

15. I le lalolagi i aso nei, o le ā le uiga ua taatele e tatau ona tatou ʻalofia?

15 I lenei lalolagi manatu faapito, e lē faigofie  le avatu ma le taliaina o fautuaga ma aʻoaʻiga. E tusa foʻi pe e latou te talia aʻoaʻiga, ae e latou te faia ma le musuā. Ua fautuaina Kerisiano e aua le “mulimuli i lenei faiga o mea a le lalolagi.” E tatau ona tatou iloa ma mulimuli i le ʻfinagalo o le Atua lea e lelei atoatoa.’ (Roma 12:2) Ua aumaia e Ieova e ala mai i lana faalapotopotoga fautuaga i le taimi tatau e faatatau i le tele o vala o le olaga, e pei o a tatou amioga agaʻi i le isi itupā, o aumea ma a tatou faafiafiaga. O le lotomalie e talia ma faatatau na taʻiala, e faaalia ai lo tatou lotofaafetai ma le alofa moni iā Ieova.—Ioa. 14:31; Roma 6:17.

VAAI ATU IĀ IEOVA MO LE PUIPUIGA MA LE FAAOLATAGA

16, 17. (a) Aiseā e tāua ai le amanaʻia o le finagalo o Ieova pe a faia filifiliga? (e) Na faaalia faapefea e Isaraelu lo latou lē alolofa iā Ieova ma lē faatuatuaina o ia?

16 Pe a iloa e fanau lāiti le tulaga lamatia, e vave lava ona tapa atu i o latou mātua. A o tuputupu aʻe le fanau, e amata ona latou faalagolago i lo latou lava poto ma faia a latou lava filifiliga. O le faailoga lenā e iloa ai ua faasolo ina avea ma tagata matua. Peitaʻi o i latou e māfana atu i o latou mātua, e latou te saʻili atu pea i manatu ma fautuaga a o latou mātua a o leʻi faia se filifiliga. E talitutusa lelei ma le itu faaleagaga. Ua aumaia e Ieova iā i tatou lona agaga, ma uunaʻia i tatou e “lotomalilie ma galulue i ai.” E faaalia lo tatou lē alolofa iā Ieova ma lē faatuatuaina o ia, pe a tatou faia ni filifiliga e aunoa ma le amanaʻiaina o lona finagalo.—Fili. 2:13.

17 I aso o Samuelu, na matuā faatoʻilaloina ai Isaraelu e le ʻautau a Filisitia. Sa matuā manaʻomia e tagata o le Atua le fesoasoani ma le puipuiga. O le ā na latou faia? Na latou faapea ane: “Seʻi o tatou ō ma ave le atolaau o le feagaiga a Ieova mai i Sailo, ina ia aumai iā i tatou ma faaolaina ai i tatou mai i lima o o tatou fili.” O le ā le iʻuga? “Na matuā tele lava le fasi, lea na fasiotia ai tagata Isaraelu e toʻatolu sefulu afe o le ʻautau e savavali. Ua faoa ai le atolaau a le Atua.” (1 Samu. 4:2-4, 10, 11) O lo latou aveina o le Atolaau, na foliga mai ai na saʻili Isaraelu mo le fesoasoani a Ieova. Peitaʻi, e latou te leʻi saʻili i le taʻitaʻiga a Ieova, ae na latou mulimuli i o latou lava manatu. O le iʻuga, na faatoʻilaloina i latou.—Faitau le Faataoto 14:12.

18. O ā ni ou faalogona e faatatau i le liliu atu iā Ieova mo le fesoasoani?

18 Na faaalia e le faisalamo le lelei o faanaunauga o lona loto ina ua ia tusi: “Inā faatalitali ia i le Atua, auā ou te faaneenee atu pea iā te ia o lē e sili e na te faaolaina aʻu. Loʻu Atua e, ua atuatuvale loʻu loto i totonu iā te aʻu. O le mea lenā ua ou manatua ai oe.” (Sala. 42:5, 6) Maʻeu le loloto o lona alofa mo Ieova! Po ua e atiaʻe lenā alofa ma le faalagolago i lo tatou Tamā o i le lagi? E tusa lava pe e te tali mai ioe, ae e mafai pea ona e faalagolago atili iā te ia e tusa ai ma upu a le Tusi Paia: “Ia e faatuatua iā Ieova ma lou lotoatoa, ae aua le faalagolago i lou lava malamalama. Ia e manatua o ia i ou ala uma, ona ia faasaʻoina lea o ou ala.”—Faata. 3:5, 6.

19. O ā auala e te manaʻo e faaalia ai lou alofa mo Ieova?

19 Na muamua alofa mai Ieova iā i tatou, o lea ua ia faaalia mai ai auala e tatou te alolofa atu ai iā te ia. Seʻi o tatou manatua lana faaaʻoaʻoga mataʻina, ma faaalia pea le alofa iā te ia ma o ʻtatou lotoatoa, ola atoa, mafaufau atoa, ma le malosi atoa.’—Mare. 12:30.