Skip to content

Skip to secondary menu

Skip to table of contents

Molimau a Ieova

Faa-Samoa

Le Olomatamata (Lomiga mo Su‘esu‘ega)  |  Mati 2015

Po o Talafeagai Pea Ona Faaipoipo “Tau o Lē ua i le Alii”?

Po o Talafeagai Pea Ona Faaipoipo “Tau o Lē ua i le Alii”?

“Ua ou popole ua sau foʻi le matua ae e leʻi maua saʻu paaga i le faapotopotoga.”

“E ese le agalelei o isi tama o le lalolagi, e alolofa ma manatu mamafa. E lē tetee i laʻu tapuaʻiga, ma e sili atu nai lo o isi uso.”

E faapena foʻi faamatalaga a nisi o auauna a le Atua e uiga i le saʻilia o ni a latou paaga faaipoipo. Peitaʻi o loo latou iloa lelei le fautuaga a Paulo ia faaipoipo “tau o lē ua i le Alii,” o se fautuaga e tatau ona taʻitaʻia ai amioga a Kerisiano uma. (1 Kori. 7:39) Ae aiseā ua latou faia ai nei faamatalaga?

MĀFUAAGA UA MASALOSALO AI NISI

O i latou o loo faia na faamatalaga atonu latou te manatu e lē paleni le aofaʻiga o uso ma tuafāfine. O le mea lenā o loo tupu i le tele o atunuu. Seʻi iloilo ni faaaʻoaʻoga se lua: I Korea, o le fua faatatau o Molimau nofofua, o le 57 pasene o tuafāfine ma le 43 pasene o uso. Ae i Kolomupia o le 66 pasene o Molimau o tuafāfine ae o le 34 pasene o uso.

I nisi atunuu, atonu e telē se tupe e tāpā mai e mātua lē talitonu o se tuafafine, e ono faafaigatā ai mo se uso e vaivai lona tamaoaiga ona faaipoipo. O na luʻi atonu e manatu ai se tuafafine e faigatā ona faaipoipo “tau o lē ua i le Alii.” E ono fesili o ia, “Pe e mafai ona ou mauaina se paaga talafeagai i totonu o le faapotopotoga?” *

E TĀUA LE MAUFAATUATUAINA O IEOVA

Pe afai o loo iā te oe na faalogona, ia mautinoa e silafia e Ieova lou tulaga. E na te silafia ou faalogona e faatatau i se mataupu.​—2 No. 6:29, 30.

Ua faatulaga e Ieova i lana Afioga le taʻiala ina ia faaipoipo tau o lē ua i le Alii. Aiseā? Auā e na te silafia le mea e lelei mo ona tagata. E lē gata e finagalo o ia e leoleoina ana auauna mai āuga  tigā o le uia o se ala lē atamai, ae ia latou maua foʻi le fiafia. I aso o Neemia, ina ua faaipoipo le toʻatele o Iutaia i tagata o nuu ese e lē tapuaʻi iā Ieova, na ia faasino atu i latou i le faaaʻoaʻoga leaga a Solomona. E ui lava “sa alofagia o ia e lona Atua, . . . a ua agasala o ia ona o fafine ese.” (Nee. 13:23-26) Ua faatonuina e le Atua ana auauna ina ia faaipoipo tau o ona tagata tapuaʻi moni, mo lo latou lelei. (Sala. 19:7-10; Isa. 48:17, 18) E lotofaafetai Kerisiano moni mo le tausiga agalelei a le Atua, ma e latou te faalagolago foʻi i lana taʻitaʻiga. E latou te vāai iā te ia o Lē e Silisili Ese e ala i le gauaʻi atu iā te ia.​—Faata. 1:5.

E mautinoa e te manaʻo e ʻalofia le “amo faalēgatasi” ma se tasi e na te taʻitaʻiesea oe ma i le Atua. (2 Kori. 6:14) E toʻatele Kerisiano ua usitaʻia lenei taʻiala mai le Aua ua latou maua le puipuiga, ma e latou te mautinoa ua latou uia se ala atamai. Peitaʻi ua lē filifili nisi e faia faapea.

O LOO AOGĀ PEA

Ua faamatala mai e Maggy, * o se tuafafine Ausetalia le mea na tupu ina ua faia sa laʻua faigāuō ma se tagata lē talitonu: “Na tele ina ou misia sauniga ina ia ou alu e vaai o ia. Na matuā paʻū maulalo loʻu itu faaleagaga.” I Initia sa iai se faiā fetosinaaʻi a Ratana ma se alii na la vasega sa faia sana suʻesuʻega faale-Tusi Paia. Peitaʻi, a o faagasolo taimi na iloa ai e pau le faanaunauga o le tama ia amata sa laʻua faigāuō. Na iʻu ina tuua e Ratana le upu moni ae liliu atu i se isi lotu ina ia mafai ai ona faaipoipo.

O se isi faaaʻoaʻoga o Ndenguè i Cameroon. Na faaipoipo o ia ina ua 19 ona tausaga. Na folafola atu e lana uō o le a saʻoloto e auai pea i lana tapuaʻiga. Ina ua mavae le lua vaiaso o le faaipoipoga, ae faasā loa e lana tane o ia ona auai i sauniga. Ua ia faapea mai: “Na ou tagi ma lagona le tuua toʻatasi. Na ou iloa, ua lē mafai ona ou pulea loʻu olaga. Na ou faanoanoa ma salamō ona o le sesē o laʻu filifiliga.”

E lē o paaga lē talitonu uma e sauā ma lē fetuutuunaʻi. E tusa pe e te lē mafatia i na āuga ona o le faaipoipo i se tagata e lē talitonu, ae o le a faapefea ona aafia ai la oulua faiā ma lou tamā alofa o i le lagi? O le ā sou lagona i lou iloaina e te leʻi usiusitaʻi i le fautuaga ua ia saunia mai mo lou lelei? Ae sili atu i lenā, o ā ni faalogona o Ieova e faatatau i lau filifiliga?​—Faata. 1:33.

Ua faamaonia e uso ma tuafāfine i le lalolagi aoao, o le faaipoipo “tau o lē ua i le Alii” o se taʻiala e sili ona lelei. E maumauaʻi ē nofofua e faafiafia le finagalo o le Atua, e ala i le naunau e faaipoipo i se paaga talafeagai i le upu moni. A o nofofua se tuafafine mai i Iapani e igoa iā Michiko, na taumafai ona aiga e tauanau o ia e faaipoipo i se tasi e lē talitonu. E lē gata i lea, na ia iloa ua fai uma uō a lana tupulaga ma nisi e masani ai i le faapotopotoga. Ua ia faapea mai: “E masani ona ou faapea ifo o Ieova o le ʻAtua fiafia,’ e lē faalagolago la lo tatou fiafia i le faaipoipo pe leai. Ou te talitonu foʻi e na te faamalieina faanaunauga o o tatou loto. Pe afai e lē maua ni a tatou paaga e tusa lava pe tatou te mananaʻo e faaipoipo, ae e sili ai le tumau pea ona nofofua.” (1 Timo. 1:11) Mulimuli ane, na faaipoipo Michiko i se uso lelei, ma na ia fiafia ona sa ia faatalitali mo se paaga lelei.

Ua faapena ona faatalitali nisi uso mo ni paaga talafeagai. O se faaaʻoaʻoga, o Bill mai i Ausetalia. Ua ia taʻutino mai sa iai se taimi na tosina atu ai o ia i se fafine o le lalolagi. Peitaʻi e matuā maumauaʻi o ia e ʻalofia le māfana tele atu i ai. Aiseā? E leʻi manaʻo o ia e uia le uluaʻi laasaga e “amo faalēgatasi” ai ma sē e lē talitonu. A o faagasolo tausaga, na ou fia uō i nisi o tuafāfine, peitaʻi e leʻi mananaʻo iā te aʻu. Na faatalitali Bill mo le 30 tausaga ona faatoʻā feiloaʻi lea ma se tuafafine na tutusa lelei o laʻua sini. Ua faapea mai Bill: “Ou te leʻi salamō.” Ua ia faamatala mai: “Ua faamanuiaina aʻu auā e ma te ō faatasi i le talaʻiga, suʻesuʻe faatasi, ma fai faatasi la maʻua tapuaʻiga. Ou te fiafia e feiloaʻi ma faifaimea  faatasi ma uō a laʻu avā auā o i latou foʻi o ni tagata tapuaʻi iā Ieova. E ma te galulue e faaleleia la maʻua faaipoipoga e ala i mataupu silisili o le Tusi Paia.”

A O FAATALITALI IĀ IEOVA

O le ā e mafai ona e faia a o tuu atu mea i aao o Ieova? O se tasi o mea e manatunatu i ai, o le māfuaaga ua e lē faaipoipo ai. Afai o le māfuaaga autū ona o lou usitaʻia o le faatonuga a le Tusi Paia ia faaipoipo “tau lava o lē ua i le Alii,” e faamālō atu iā te oe ona o le usitaʻia o le faatonuga a le Atua. E mautinoa ua fiafia le finagalo o Ieova i lou maumauaʻi e usitaʻi i lana Afioga. (1 Samu. 15:22; Faata. 27:11) E mafai ona faaauau pea ona ʻsasaa atu lou loto’ i le Atua e ala i le tatalo. (Sala. 62:8) E mafai ona faaleleia au tatalo pe a e ōle atu iā te ia ma le naunau ma le filigā. O le a faamalosia lau faiā ma le Atua i aso taʻitasi pe afai e te maumauaʻi e ui i luʻi e te fesagaʻia. Ia mautinoa o loo naunau mai Lē e silisili ona maualuga i ana auauna uma ma e tautele oe i lana silafaga. E silasila alofa mai o ia i ou manaʻoga ma ou faanaunauga. E na te lē faatulagaina ni paaga mo ana auauna. Ae afai e te manaʻomia moni lava se paaga, e silafia e le Atua le auala sili e faamalieina ai ou manaʻoga.​—Sala. 145:16; Mata. 6:32.

I nisi taimi e te ono manatu e pei o Tavita o lē na faapea mai: “Ieova e, ia e tali vave mai iā te aʻu. Ua tauau ina mou atu loʻu malosi. Aua e te natia ou fofoga iā te aʻu.” (Sala. 143:5-7, 10) I taimi faapena, ia faataga se taimi e faailoa mai ai e lo tatou Tamā o i le lagi lona finagalo mo oe. E mafai ona e faia e ala i le faitau i lana Afioga ma manatunatu i mea ua e faitauina. O le a e iloa ai ana poloaʻiga ma vaai ai i le auala na ia gaoioi ai mo ona tagata i aso ua mavae. O le faalogo atu iā te ia, o le a atili ai ona e talitonu i le aogā o le usiusitaʻi iā te ia.

E masani ona fesoasoani ē nofofua i aiga ma talavou i faapotopotoga

O ā nisi mea e mafai ona avea ai taimi o lou nofofua o ni tausaga fiafia ma fua mai? Ia faaaogā lou nofofua e atiaʻe ai le faautaga loloto i mea faaleagaga, agaalofa, galue mamafa, toʻafilemu, tuutoina i le Atua, ma se talaaga lelei, lea e aogā mo se olaga faaleaiga fiafia. (Kene. 24:16-21; Ruta 1:16, 17; 2:6, 7, 11; Faata. 31:10-27) O le saʻili muamua le Malo e ala i le faia o se sao atoatoa i le galuega talaʻi ma isi gaoioiga faa-Kerisiano, o le a avea o se puipuiga. Na faapea mai Bill e faatatau i tausaga na ia manaʻo ai e faaipoipo: “Na vave le alu o le taimi! Na ou faaaogā lenā taimi i le auaunaga iā Ieova e avea ai o se paeonia.”

Ioe, o loo aogā pea le faaipoipo “tau o lē ua i le Alii.” O le usitaʻi i lenā faatonuga, e mafai ona fesoasoani iā te oe e faamamaluina Ieova ma maua ai le faamalieina tumau. Ua faapea mai le Tusi Paia: “E fiafia le tagata e mataʻu iā Ieova, o lē e matuā fiafia i ana poloaʻiga. E i lona fale oloa ma le tamaoaiga, e tumau e faavavau lana amiotonu.” (Sala. 112:1, 3) O lea ia maumauaʻi e usitaʻia le faatonuga a le Atua ia faaipoipo “tau o lē ua i le Alii.”

^ pala. 7 O le a tatou iloiloina le vaaiga a tuafāfine e faatatau i lenei mataupu ae e mafai foʻi ona faatatauina nei mataupu silisili i uso.

^ pala. 13 Ua suia nisi igoa.