Skip to content

Skip to secondary menu

Skip to table of contents

Molimau a Ieova

Faa-Samoa

Le Olomatamata (Lomiga mo Su‘esu‘ega)  |  Mati 2015

Lesona Mai i le Talafaatusa i Taleni

Lesona Mai i le Talafaatusa i Taleni

“Na ia avatu taleni e lima i le tasi, ae lua i le tasi, ma le tasi i le isi.”​—MATA. 25:15.

1, 2. Aiseā na faia ai e Iesu le talafaatusa i taleni?

I LE talafaatusa i taleni, na faailoa manino mai ai e Iesu le tiute tauave o ona soo faauuina. E manaʻomia ona tatou malamalama i le uiga o lenā talafaatusa, auā e aafia ai Kerisiano uma, e tusa pe e faamoemoe e ola i le lagi po o le lalolagi.

2 O le talafaatusa lenei a Iesu i taleni o se vaega o lana tali i le fesili a ona soo e faatatau i “le faailoga o [lona] faatasi mai, ma le taufaaiʻuiʻuga o le faiga o mea a le lalolagi.” (Mata. 24:3) O lea, e faataunuuina lenei talafaatusa i o tatou aso, ma o se vaega o le faailoga o le faatasi mai o Iesu ma lona pule mai o se Tupu.

3. O ā lesona e tatou te aʻoaʻoina mai i talafaatusa o loo faamauina i le Mataio mataupu e 24 ma le 25?

3 O le talafaatusa i taleni o se tasi o talafaatusa mai i talafaatusa e fa o loo faamauina i le Mataio 24:45 i le 25:46. O isi talafaatusa e tolu e aofia ai le pologa faamaoni ma le faautauta, o taupou e toʻasefulu, ma le talafaatusa i mamoe ma ʻoti, o se vaega foʻi o le tali a Iesu i le fesili e faatatau i le faailoga o lona faatasi mai. I talafaatusa uma nei e fa, na faailoa mai ai e Iesu ni vala e faaesea mai ai ona soo moni i nei  aso e gata ai. O talafaatusa e faatatau i le pologa, o taupou, ma taleni, e faatatau atu i le ʻaufaauuina. O le talafaatusa e aofia ai le pologa faamaoni, na faamatilatila ai e Iesu le manaʻomia ona faaalia le faamaoni ma le faautauta e lenei vaega toʻaitiiti o le ʻaufaauuina, ua tuu atu i ai le fafagaina o lana ʻaufaigaluega a o faagasolo aso e gata ai. I le talafaatusa i taupou, na faamamafa mai ai e Iesu e tatau i ona soo faauuina uma ona nofosauni ma ia mataala, i le iloaina ua sau Iesu e ui e lē iloa le aso ma le itula e taunuu mai ai. I le talafaatusa i taleni, na faailoa mai ai e Iesu e manaʻomia e le ʻaufaauuina ona filigā i le faataunuuina o o latou tiute tauave faa-Kerisiano. Na taulaʻi atu le talafaatusa mulimuli i mamoe ma ʻoti, iā i latou e mauaina le faamoemoe i le lalolagi. Sa faamatilatila e Iesu e manaʻomia ona latou faamaoni ma lagolagoina atoatoa uso faauuina o Iesu i le lalolagi. * O lea, seʻi o tatou uaʻi atu i le talafaatusa i taleni.

UA TUUINA ATU E LE MATAI TALENI I ANA POLOGA

4, 5. O ai na faaāta mai e le tamāloa po o le matai, ma o le ā le telē o le tāua o se taleni?

4 Faitau le Mataio 25:14-30. Ua leva ona faamatala i a tatou lomiga o le tamāloa po o le matai i le talafaatusa e faasino atu iā Iesu, ma na faimalaga i se nuu mamao ina ua toe afio i le lagi i le 33 T.A. I se isi talafaatusa na muamua atu, na faailoa mai ai e Iesu o le fuafuaga o lana faigāmalaga “ina ia fai o ia ma tupu.” (Luka 19:12) E leʻi avea Iesu ma tupu o le Malo i le taimi lava na toe foʻi ai i le lagi. * Nai lo o lea, sa ia ʻnofo i le itu taumatau o le Atua, ma faatalitali ai seʻia faia ona fili ma mea e tū ai ona vae.’​—Epe. 10:12, 13.

5 I le talafaatusa, sa iai i le tamāloa taleni e valu, ma o se tupe telē i na aso. * A o leʻi alu lana faigāmalaga, na ia tufatufa atu taleni i ana pologa, ma na ia faatalitalia i latou e faia ai sa latou galuega a o faimalaga. E pei o lenā tamāloa, sa iai iā Iesu se mea e sili ona tāua a o leʻi afio i le lagi. O le ā lenā mea? E maua le tali i le galuega sa ia faia i lona olaga.

6, 7. O le ā ua faaāta mai e taleni?

6 Na matuā faatāua e Iesu le galuega talaʻi ma le aʻoaʻo atu. (Faitau le Luka 4:43.) O lenei galuega na ia galueaʻiina ai se fanua na mafai ona maua mai ai ni iʻuga lelei. I se taimi muamua atu na ia fetalai ai i ona soo: “Inā tetepa aʻe ia outou ma vāai atu i le faatoʻaga, ua matua mo le seleselega.” (Ioa. 4:35-38) Sa ia mafaufau i le aoaoina mai o le toʻatele o isi tagata lotofaamaoni e mafai ona avea ma ona soo. E pei o se faifaatoʻaga tomai, e leʻi tuua e Iesu se faatoʻaga ua matua e aunoa ma le seleseleina. O lea, ina ua mavae lona toetū mai ma a o leʻi toe afio i le lagi, na ia tuuina atu i ona soo se galuega telē: ʻO le mea lea, ia outou ō atu e fai tagata ma soo.’ (Mata. 28:18-20) Sa tuuina atu e Iesu iā i latou se ʻoa tautele, po o le faiva faa-Kerisiano.​—2 Kori. 4:7.

7 O lea, ina ua tuu atu e Iesu i ona soo le galuega o le faia o isi ma soo, sa ia tuu  atu iā i latou “ana mea” po o taleni. (Mata. 25:14) O lea, o taleni e faasino atu i le tiute tauave o le faia o le galuega talaʻi ma le faia o isi ma soo.

8. E ui e eseese aofaʻiga o taleni na maua e pologa taʻitasi, ae o le ā na faatalitalia e le matai mai iā i latou?

8 I le talafaatusa, na tuu atu e le matai taleni e lima i le tasi pologa, e lua le tasi ae tasi le isi. (Mata. 25:15) E ui e eseese le aofaʻiga o taleni na maua e pologa taʻitasi, ae na faatalitalia e le matai i latou uma e filigā i le faaaogāina o taleni, po o lo latou faia lea o le mea sili i le faiva. (Mata. 22:37; Kolo. 3:23) I le uluaʻi senituri, na amata mai i le Penetekoso 33 T.A., ona galulue soo o Iesu i le faaaogāina o taleni. O lo latou maelega i le galuega talaʻi ma le faia o isi ma soo, o loo faamaumauina lelei i le tusi o Galuega. *​—Galu. 6:7; 12:24; 19:20.

GALUEAʻIINA O TALENI I LE TAIMI O LE IʻUGA

9. (a) O le ā na faia e pologa faamaoni e toʻalua i taleni, ma o le ā ua faailoa mai ai? (e) O le ā le vaega a “isi mamoe” o loo fai?

9 I le taimi o le iʻuga aemaise lava talu mai le 1919, ua galulue pologa faauuina  faamaoni a Keriso i taleni a le Matai. E pei o pologa muamua e toʻalua, ua faia e uso ma tuafāfine faauuina le mea sili i mea ua latou maua. E leai se aogā o le taumafai e iloa po o ai na mauaina taleni e lima ma po o ai foʻi na mauaina taleni e lua. I le talafaatusa, na faaluaina e pologa nei e toʻalua taleni na tuu atu e le mataʻi iā i laʻua. O lea, sa tutusa lo laʻua maelega. O le ā le vaegafai a i latou e faamoemoe e ola i le lalolagi? E tāua la latou vaegafai. Na tatou aʻoaʻoina mai i le talafaatusa a Iesu i mamoe ma ʻoti, le mauaina e i latou e faamoemoe e ola i le lalolagi, le faaeaga o le lagolagoina atoatoa ma le faamaoni uso faauuina o Keriso i le galuega talaʻi ma le aʻoaʻo atu. A o faagasolo nei aso faigatā, ua galulue faatasi ma le maelega nei vaega e lua o se “lafu e tasi” i le faia o isi ma soo.​—Ioa. 10:16.

10. O le ā le vala mataʻina o le faailoga o le faatasi mai o Iesu?

10 E talafeagai le faatalitalia e le Matai o ni iʻuga lelei. E pei ona taʻua muamua, na faateleina e ona soo faamaoni ana mea i le uluaʻi senituri. Ae faapefea lenei taimi o le iʻuga lea e faataunuu ai le talafaatusa e faatatau i taleni? O le galulue malolosi o auauna faamaoni a Iesu, ua sili atu ai ona faatuputupulaʻia le galuega talaʻi ma le faia o isi ma soo i le taimi lenei nai lo o se isi lava taimi. O a latou taumafaiga ua maua ai le faitau selau afe o soo fou e faaopoopo atu i tagata talaʻi o le Malo i tausaga taʻitasi. Ua avea ai le talaʻiga ma le galuega o le aʻoaʻo atu, o se vala mataʻina o le faailoga o le faatasi mai o Iesu i le mana o le Malo. E mautinoa le faafiafiaina o le Matai!

Ua tuuina mai e Keriso i ana auauna le tiute tauave tāua o le galuega talaʻi (Tagaʻi i le palakalafa e 10)

O AFEA E SAU AI LE MATAI E TOE TOTOGI ATU ANA TUPE?

11. Aiseā e tatou te faapea atu ai o le a sau Iesu e toe totogi atu ana tupe a o faagasolo le puapuaga tele?

11 O le a afio mai Iesu e toe totogi atu tupe sa i ana pologa a o lata ina māeʻa le puapuaga tele. Aiseā ua tatou faapea atu ai? I le valoaga a Iesu o loo faamauina i le Mataio mataupu e 24 ma le 25, na tele ina taʻua ai e Iesu lona sau. E tusa ai ma le faamasinoga o le a faia a o faagasolo le puapuaga tele, na ia fetalai ai o le a “vaaia  foʻi le Atalii o le tagata ua sau i ao o le lagi.” Na ia uunaʻia ona soo o le a ola i aso e gata ai ina ia mataala e ala i le faapea atu: “Tou te lē iloa po o lē fea aso e sau ai lo outou Alii,” ma “o le itula tou te lē manatunatu ai, e sau ai le Atalii o le tagata.” (Mata. 24:30, 42, 44) O lea, ina ua faapea mai Iesu “ona sau ai lea o le matai o na pologa ina ia toe totogi atu ana tupe,” sa ia faasino atu i le taimi o le a ia sau ai e faaoo mai le sala faafaamasinoga i le iʻuga o lenei faiga o mea. *​—Mata. 25:19.

12, 13. (a) O le a faapefea ona tali atu le matai i pologa muamua e toʻalua, ma aiseā? (e) O afea o le a maua ai e le ʻaufaauuina lo latou faamaufaailoga faaiʻu? (Tagaʻi i le pusa “ Maua le Faamaufaailoga Faaiʻu pe a Maliliu.”) (i) O le ā le taui o le a maua e i latou o le a faamasinoina o ni mamoe?

12 E tusa ai ma le talafaatusa, pe a taunuu mai le matai, o le a ia maua mai pologa muamua e toʻalua​—le pologa na ave i ai taleni e lima ma le pologa na ave i ai taleni e lua​—o loo faamaoni ma faaluaina ana taleni. O le a ia faapea atu i pologa nei e toʻalua: “Malo lava le pologa lelei ma le faamaoni! Na e faamaoni i mea iti, ou te tofia oe e vaaia mea e tele.” (Mata. 25:21, 23) O le ā e tatou te faatalitalia pe a sau le Matai, po o Iesu e faaoo mai le sala faafaamasinoga i le lumanaʻi?

13 O pologa muamua e toʻalua ua faaāta mai ai soo faauuina galulue mamafa, o ē e mauaina le faamaufaailoga faaiʻu a o leʻi gāpā le puapuaga tele. (Faaa. 7:1-3) A o leʻi amataina Amaketo, o le a tuuina atu e Iesu iā i latou lo latou taui faalelagi. O ē e faamoemoe e ola i le lalolagi o loo lagolagoina uso o Keriso i le galuega talaʻi, o le a faamasinoina o ni mamoe ma o le a latou maua le faaeaga o le ola i le lalolagi i lalo o le pulega a le Malo.​—Mata. 25:34.

LE POLOGA LEAGA MA LE PAIĒ

14, 15. Pe na faailoa mai e Iesu o le a iai se vaega toʻatele o le ʻaufaauuina o le a avea o ni ē leaga ma paiē? Faamatala.

14 I le talafaatusa, na tanu e le pologa mulimuli lana taleni nai lo o le faia i ai o se galuega po o le teuina foʻi i le ʻau teutupe. Na faaalia e lenei pologa le agaga leaga, na ia teena ma le iloa le manaʻo o lona matai. Na talafeagai ai ona taʻua o ia o le “pologa leaga ma le paiē.” Na aveese e le matai le taleni mai iā te ia ma avatu i le pologa na iai taleni e sefulu. Na lafoina lenei pologa i fafo i “le pogisa.” “O i inā e tagiauē ma lilivau ai ona nifo.”​—Mata. 25:24-30; Luka 19:22, 23.

15 Na natia e se tasi o pologa a le matai lana taleni, po o lona uiga la na faailoa mai e Iesu o le tasi vaetolu o le  ʻaufaauuina o le a avea o ni ē leaga ma paiē? E leai. Seʻi mafaufau i le siʻomaga o lenā manatu. I le talafaatusa i le pologa faamaoni ma le faautauta, na taʻua ai e Iesu se pologa leaga o le a ia sauāina isi pologa. E leʻi uiga le fetalaiga a Iesu o le a iai se vaega e faia aʻe ai le pologa leaga. Nai lo o lea, na ia lapataʻia le pologa faamaoni ma le faautauta, ina ia aua neʻi faaalia uiga o se pologa leaga. E faapena foʻi le talafaatusa i taupou e toʻasefulu, e leʻi faailoa mai e Iesu o le afa o le ʻaufaauuina o le a pei o taupou vālea. Nai lo o lea, na ia lapataʻia ona uso faaleagaga i le mea e tupu pe a latou lē mataala ma lē nofosauni. * O lea, e tusa ai ma le talafaatusa i taleni, e mafai ona tatou faapea atu e leʻi fetalai Iesu o le a iai se vaega toʻatele o le ʻaufaauuina o le a avea o ni ē leaga ma paiē, a o faagasolo aso e gata ai. Nai lo o lea, na ia lapataʻia ona soo faauuina ina ia maelega pea, po o le ʻfaaaogāina i se pisinisi’ o a latou taleni, ma ʻalofia uiga ma gaoioiga a se pologa leaga.​—Mata. 25:16.

16. (a) O ā lesona e tatou te aʻoaʻoina mai i le talafaatusa i taleni? (e) Ua faapefea i lenei mataupu ona toe fetuunaʻi ai lo tatou malamalamaga i le talafaatusa i taleni? (Tagaʻi i le pusa “ Malamalamaga i le Talafaatusa i Taleni.”)

16 O ā lesona e lua e tatou te aʻoaʻoina mai i le talafaatusa i taleni? Muamua, ua tuuina mai e le Matai o Keriso i le ʻaufaauuina se mea e tāua iā te ia, o le galuega talaʻi ma le faia o isi ma soo. Lona lua, ua faatalitalia e Keriso i tatou uma e filigā i le galuega talaʻi. O le faia faapea, e mautinoa ai o le a tauia e lo tatou Matai lo tatou faatuatua, mataala ma le faamaoni.​—Mata. 25:21, 23, 34.

^ pala. 3 O loo faamatalaina i Le Olomatamata o Iulai 15, 2013, itulau 21-22, palakalafa 8-10, po o ai e faasino atu i ai le pologa faamaoni ma le faautauta. Ae i le suʻesuʻega ua mavae atu o lenei mekasini, na tatou iloa ai po o ai e faasino atu i ai taupou. Ae o le talafaatusa i mamoe ma ʻoti o loo faamatalaina i Le Olomatamata o Oketopa 15, 1995, itulau e 23-28, ma le suʻesuʻega mulimuli i lenei mekasini.

^ pala. 5 I aso o Iesu, e tutusa le taleni e tasi ma le 6,000 tenari. E tasi le tenari le totogi o se tagata faigaluega i le aso e tasi, ma e tatau ona ia faigaluega mo tausaga e 20 ina ia maua ai se taleni se tasi.

^ pala. 8 Ina ua mavae le maliliu o le ʻauaposetolo, na faapogaia ai e Satani le liliuese o tagata mai i le upu moni, lea na matuā taatele i le tele o senituri. A o faagasolo lenā vaitaimi, e leʻi iai ni taumafaiga mautū e faataunuu le galuega o le faia o ni soo moni o Keriso. Peitaʻi, e suia lenā tulaga a o faagasolo “le seleselega,” po o aso e gata ai. (Mata. 13:24-30, 36-43) Tagaʻi i Le Olomatamata o Iulai 15, 2013, itulau 9-12.

^ pala. 11 Tagaʻi i Le Olomatamata o Iulai 15, 2013, itulau e 7-8, palakalafa 14-18.

^ pala. 15 Tagaʻi i le palakalafa e 13 o le mataupu, “Po o le a ʻFaaauau Ona Outou Mataala’?” o loo i lenei lomiga.