Skip to content

Skip to secondary menu

Skip to table of contents

Molimau a Ieova

Faa-Samoa

Le Olomatamata (Lomiga mo Su‘esu‘ega)  |  Mati 2015

Po o le a ‘Faaauau Ona Outou Mataala’?

Po o le a ‘Faaauau Ona Outou Mataala’?

“O le mea lea, ia faaauau ai ona outou mataala, auā tou te lē iloa le aso po o le itula.”​—MATA. 25:13.

1, 2. (a) O le ā na faailoa mai e Iesu e faatatau i aso e gata ai? (e) O ā fesili o le a tatou iloiloina?

A O NOFONOFO Iesu i le mauga o Olive, ma vaavaai ifo i le malumalu i Ierusalema, na ia faamatala ai se tasi o ana valoaga mataʻina. Na matuā uaʻi atu Peteru, Aneterea ma Ioane a o faamatala e Iesu lenā valoaga e faatatau i le lumanaʻi. Na faamatala e Iesu iā i latou aso e gata ai o lenei faiga o mea, o le taimi o le a ia pule ai i le Malo o le Atua. Na ia faailoa atu iā i latou a o faagasolo lenā vaitaimi, o le a avea le “pologa faamaoni ma le faautauta” ma ona sui i le lalolagi, ma o le a latou avatu meaʻai faaleagaga mo ana auauna i le taimi tatau.​—Mata. 24:45-47.

2 Na sosoo ai ma le faamatalaina e Iesu i lenā lava valoaga o le talafaatusa e faatatau i taupou e toʻasefulu. (Faitau le Mataio 25:1-13.) O lea, o le a tatou iloiloina fesili nei: (1) O le ā le feʻau autū o lenei talafaatusa? (2) Ua faapefea ona faatatau e le ʻaufaauuina faamaoni lenei fautuaga, ma o ā iʻuga ua maua ai?  (3) E faapefea e i tatou taʻitoʻatasi ona maua aogā mai i le talafaatusa a Iesu?

O LE Ā LE FEʻAU O LENEI TALAFAATUSA?

3. I le taimi ua teʻa, o le ā le auala na faamatala ai i a tatou lomiga le talafaatusa i taupou e toʻasefulu, ma o le ā na mafai ona iʻu atu i ai?

3 E pei ona taʻua i le mataupu ua mavae, a o faagasolo tausaga na faasolosolo ona lē toe faamatilatilaina e le pologa faamaoni faaataga faavaloaga pe a faamatalaina le Tusi Paia. Peitaʻi, ua sili ona uaʻi atu i faatatauga aogā. I le taimi ua teʻa, e iai taimi sa faamatala ai i a tatou lomiga uiga o vala eseese o le talafaatusa a Iesu i taupou e toʻasefulu, e oo lava i vala lāiti e pei o molī, suāuu, fagu suāuu ma isi lava mea. O lenā auala, atonu na tataʻieseina ai manatu mai le feʻau faigofie ma faanatinati o loo i lenā talafaatusa.

4. I le talafaatusa, e faapefea ona tatou iloa po o ai o loo faasino atu i ai (a) le alii faaipoipo? (e) taupou?

4 O le ā le feʻau autū o le talafaatusa a Iesu? Muamua, seʻi o tatou iloiloina tagata autū o le talafaatusa. O ai le alii faaipoipo? E mautinoa sa talanoa Iesu e faatatau iā te ia. E iai foʻi se isi talafaatusa na ia faasino atu ai o ia lava i le alii faaipoipo. (Luka 5:34, 35) Ae faapefea taupou? I le talafaatusa, na taʻua ai e Iesu o loo iai i taupou le tiute tauave o le nofosauni ma a latou molī o loo mumū i le taimi e taunuu mai ai le alii faaipoipo. Seʻi mātau le faatonuga na avatu e Iesu i lana “lafu mamoe itiiti” o soo faauuina: “Ia fusia o outou sulugātiti, ma ia mumū pea a outou molī, ona pei lea o outou o tagata ua faatalitali i le toe foʻi mai o lo latou matai mai i le faaipoipoga.” (Luka 12:32, 35, 36) E lē gata i lea, na faagaeeina aposetolo o Paulo ma Ioane e faatusatusa atu soo faauuina o Keriso i taupou. (2 Kori. 11:2; Faaa. 14:4) E manino mai, na faia e Iesu le talafaatusa o loo faamauina i le Mataio 25:1-13, e avea ma fautuaga ma se lapataʻiga i ona uso faauuina.

5. Na faapefea ona faailoa mai e Iesu le taimi e faatatau atu ai lana talafaatusa?

5 O le vala e sosoo ai, o le iloiloina lea o le taimi e faasino atu ai lana talafaatusa. O le ā le vaitaimi na faatatau atu ai le fautuaga a Iesu? Na faailoa manino mai e Iesu lenā vala ina ua lata ina māeʻa lana talafaatusa, lea na ia taʻua ai le ʻtaunuu mai o le alii faaipoipo.’ (Mata. 25:10) E pei ona taʻua i le Olomatamata o Iulai 15, 2013, o le valoaga a Iesu o loo faamauina i le Mataio mataupu e 24 ma le 25, e faavalu ona taʻua ai lona “sau” po o lona “taunuu mai.” I na taimi taʻitasi, e tutusa le upu Eleni o loo faaaogāina. I na foʻi taimi taʻitasi, o loo faasino atu Iesu i le taimi e afio mai ai a o faagasolo le puapuaga tele e faia le faamasinoga ma faaumatia lenei faiga o mea. O lea, e faatatau atu lenei talafaatusa i le taimi a o faagasolo aso e gata ai, ae e taualuga a o faagasolo le puapuaga tele.

6. E tusa ai ma le siʻomaga o le talafaatusa, o le ā lona feʻau autū?

6 O le ā le feʻau autū o le talafaatusa? Seʻi mātau le siʻomaga o le talafaatusa. O lea faatoʻā uma ona taʻua e Iesu le “pologa faamaoni ma le faautauta.” O lenā pologa e faasino atu i se vaega toʻaitiiti o tane faauuina o le a taʻimua i soo o Keriso, a o faagasolo aso e gata ai. Na lapataʻia e Iesu nei tane e tatau ona latou tutumau faamaoni. Na sosoo ai ma le faalautele atu e Iesu o lana apoapoaʻiga i ona soo faauuina uma o le a soifua i aso e gata ai, ina ʻia faaauau ona latou mataala,’ ina neʻi mou atu lo latou taui tautele. (Mata. 25:13) O lea, seʻi o tatou iloiloina le talafaatusa ma mātau  le auala e faatatau ai e le ʻaufaauuina fautuaga mai i lenā talafaatusa.

E FAAPEFEA ONA FAATATAU E LE ʻAUFAAUUINA LE FAUTUAGA MAI I LE TALAFAATUSA?

7, 8. (a) O ā uiga e lua na faaalia e taupou faautauta? (e) Ua faapefea ona faamaonia le nofosauni o le ʻaufaauuina?

7 Na faamatilatila mai i le talafaatusa a Iesu le ese mai o taupou faautauta mai i taupou vālea, ma na latou nofosauni mo le taunuu mai o le alii faaipoipo. O le māfuaaga, e lua uiga tāua na latou faaalia: o le nofosauni ma le mataala. O taupou sa tofia e faatalitali mo le taunuu mai o le alii faaipoipo i lenā taimi o le pō, sa manaʻomia ona mumū pea a latou molī, ma mataala i le pō atoa seʻia oo ina taunuu mai le alii faaipoipo. E ese mai i taupou vālea, sa nofosauni taupou faautauta, ma na aumai a latou molī faatasi ai ma suāuu faaleoleo sa iai i a latou fagu. Pe e faapena le auala ua faaalia ai le nofosauni o le ʻaufaauuina faamaoni?

8 O le tulaga moni lenā. A o faagasolo aso e gata ai, ua gaoioi le ʻaufaauuina faamaoni e pei o na taupou faautauta, e ala i le sauniuni e faataunuu ma le faamaoni o latou faaeaga seʻia oo i le iʻuga. Ua malamalama i le tele o mea e aofia i la latou auaunaga faamaoni. Ua latou iloa mai i le amataga o lo latou tofiga, e tatau ona latou faataulaga le tele o mea o loo ofo mai e le lalolagi a Satani. Ua tuutoina atu o latou olaga atoa iā Ieova ma auauna iā te ia, ona o lo latou alolofa ma le faamaoni iā te Ia ma lona Alo. Ua latou tutumau faamaoni, ma tetee atu i le agaga o lenei lalolagi amioleaga, faapea le matapeʻapeʻa, o amioga lē mamā ma uiga manatu faapito. O lea, ua latou nofosauni ma susulu atu pea e pei o ni lamepa, ma lē tosina ese ona o le tuai mai o le Alii faaipoipo.​—Fili. 2:15.

9. (a) O le ā le lapataʻiga a Iesu e faatatau i le tulaga masani o le tautulemoe? (e) Na faapefea ona tali atu le ʻaufaauuina i le alaga: “Ua sau le alii faaipoipo”? (Tagaʻi i le faaopoopoga.)

9 O le uiga lona lua na fesoasoani i taupou e nofosauni ai o le mataala. Pe e mafai ona tautulemomoe sui taʻitoʻatasi o le ʻaufaauuina a o faasolo ina leva le pō? E mafai ona tupu lenā mea. Mātau le fetalaiga a Iesu e faatatau i taupou e toʻasefulu, ona “tau tulemomoe ai lea o i latou uma ma ua momoe loa” ina ua tuai mai le alii faaipoipo. Sa silafia e Iesu e tusa pe e iai i se tasi le uiga naunau, ae e mafai lava ona faavaivaia ona o le tino augavale. Ua amanaʻia e le ʻaufaauuina faamaoni lenā lapataʻiga, ma galulue malosi ai e mataala pea. I le talafaatusa, na tali uma atu taupou ina ua sau le alaga: “Ua sau le alii faaipoipo!” Ae e na o ē na mataala na mafai ona tumau seʻia oo i le iʻuga. (Mata. 25:5, 6; 26:41) Ae faapefea le ʻaufaauuina faamaoni i aso nei? A o faagasolo aso e gata ai, ua latou tali atu i faamaoniga o le alaga, “Ua sau le alii faaipoipo.” Na latou tumau ma nofosauni mo le taunuu mai o le Alii Faaipoipo. * Peitaʻi, e iai se vaitaimi patino o loo uaʻi atu i ai le taualuga o lenei talafaatusa. I le ā le itu?

TAUI O LE FAAUTAUTA MA LE FAASALAGA O LE VALEA

10. O le ā le fesili ua lāgā ona o le fetaliaʻiga a taupou faautauta ma taupou vālea?

10 O le vala lavelave o le talafaatusa, o le fetaliaʻiga a taupou faautauta ma taupou vālea. (Faitau le Mataio 25:8, 9.) O lenei  vala ua lāgā ai le fesili: “O le ā se vaitaimi o le talafaasolopito o tagata o le Atua, na lē fesoasoani ai ē faamaoni i ē na talosaga mai mo se fesoasoani?” E maua le tali o lenā fesili i le toe iloiloina o le taimi e aofia ai i lenā mea. O le faalautelega o lo tatou malamalamaga ua tatou iloa ai e taunuu mai Iesu le Alii Faaipoipo, e faia le faamasinoga pe a lata i le iʻuga o le puapuaga tele. O lea, e uaʻi atu lenei vaega o le talafaatusa i se mea e tupu, a o leʻi oo i lenā vaitaimi o le faamasinoga. E foliga mai o le tulaga lenā, auā e oo ane i lenā taimi ua maua e le ʻaufaauuina le faamaufaailoga faaiʻu.

11. (a) O le ā o le a tupu a o leʻi gāpā le puapuaga tele? (e) Aiseā na faatonuina ai e taupou faautauta taupou vālea e ō e saʻili ni a latou lava suāuu?

11 O lea, a o leʻi gāpā le puapuaga tele, o le a maua e le ʻaufaauuina faamaoni uma o le a iai i le lalolagi lo latou faamaufaailoga faaiʻu. (Faaa. 7:1-4) E amata mai i lenā taimi ona latou mautinoa i lo latou faamoemoe. Ae seʻi mafaufau i tausaga a o leʻi gāpā le puapuaga tele. O le ā o le a tupu i sui o le ʻaufaauuina o le a lē tumau ona mataala, po o le lē faamaoni foʻi? O le a melea lo latou taui faalelagi, ma o le a latou lē mauaina le faamaufaailoga faaiʻu, a o leʻi gāpā le puapuaga tele. A o leʻi oo i lenā taimi, o le a faauuina isi tagata faamaoni. Pe a gāpā le puapuaga tele, o le a faateʻia tagata vālea i le faaumatiaina o Papelonia le Aai Tele. O i inā atonu e latou te iloa ai e latou te leʻi sauni mo le taunuu mai o le Alii Faaipoipo. Pe a latou saʻili mo le fesoasoani i lenā taimi, o le ā o le a tupu? E maua le tali i le talafaatusa a Iesu. O le a lē avatuina e taupou faautauta a latou suāuu i taupou vālea, ma faatonu e ō e saʻili ni a latou lava suāuu. Peitaʻi ia manatua, “ua oo i le vaeluapō.” Po o le a latou maua ni tagata faatau suāuu i lenā taimi? E mautinoa e leai, ona ua tuai.

12. (a) O le ā o le a tupu a o faagasolo le puapuaga tele i ē faauuina o le a lē faamaoni? (e) O le ā le iʻuga o le a maua e i latou o le a pei o taupou vālea?

12 I se tulaga talitutusa, o le a lē mafai ona fesoasoani atu le ʻaufaauuina faamaoni i so o se tasi o le a lē faamaoni a o faagasolo le puapuaga tele. O le a latou lē maua le fesoasoani ona ua tuai. O le ā le iʻuga o le a latou maua? Na faamatala e Iesu le mea na tupu ina ua ō taupou vālea e faatau suāuu: Ua “taunuu mai loa le alii faaipoipo, ona ō atu ai lea o taupou ua uma ona sauni, faatasi ma ia i le ʻaiga o le faaipoipoga; ona tapuni ai lea o le faitotoʻa.” Pe a afio mai Iesu i lona mamalu a o lata ina māeʻa le puapuaga tele, o le a ia aoaoina le ʻaufaauuina faamaoni i le lagi. (Mata. 24:31; 25:10; Ioa. 14:1-3; 1 Tesa. 4:17) O le a tapunia le faitotoʻa i ē lē faamaoni, ma faamaonia ai o i latou o taupou vālea. O le iʻuga o le a latou faapea atu: “Lau susuga e, lau susuga e, seʻi tatala mai le faitotoʻa iā i matou!” Ae o le a latou mauaina le tali e talitutusa ma le tali e fai atu e Iesu i ē e pei o ni ʻoti i le taimi o le faamasinoga: “Ou te taʻu atu iā te outou le mea moni, ou te lē iloa outou.” Pagā se iʻuga faanoanoa!​—Mata. 7:21-23; 25:11, 12.

13. (a) Aiseā e tatou te lē faapea atu ai, o le a lē faamaoni le toʻatele o soo faauuina o Keriso? (e) Aiseā e mafai ai ona avea le lapataʻiga a Iesu o se faamautinoaga agaalofa? (Tagaʻi i le ata i luga aʻe o le matua.)

13 O le ā se faaiʻuga e mafai ona tatou faia e tusa ai ma manatu ua uma ona tatou iloiloina? Pe na fetalai Iesu o le a toʻatele ana auauna faauuina o le a lē faamaoni, ma e manaʻomia ona toe suia i latou? E leai. Manatua, na lapataʻia e Iesu le “pologa faamaoni ma le faautauta,” ina ia aua  neʻi avea ma pologa leaga. Ae e lē faapea ai o le tulaga lenā na ia faatalitalia. I se tulaga talitutusa, o lenei talafaatusa ua aumaia ai se lapataʻiga malosi. E pei lava o taupou valea e toʻalima ma taupou faautauta e toʻalima, ua maua e le ʻaufaauuina taʻitoʻatasi uma le avanoa e filifili ai e nofosauni ma mataala, po o le filifili foʻi e lē faamaoni. O le manatu foʻi lenā na faagaeeina le aposetolo o Paulo e tusia e faatatau i ona uso faauuina. (Faitau le Eperu 6:4-9; faatusatusa i le Teuteronome 30:19.) E malosi le lapataʻiga na avatu e Paulo, ae na ia faaiʻu i le fai atu o se faamatalaga agaalofa e faailoa atu ai lona mautinoa e iai “tulaga e sili ona lelei” o loo faatali mai mo uso ma tuafāfine Kerisiano. I se tulaga talitutusa, o le lapataʻiga mai i le talafaatusa a Iesu ua aumaia ai se faamautinoaga alofa. Na silafia e Iesu e mafai e ana auauna faauuina taʻitoʻatasi, ona tumau faamaoni ma maua lo latou taui mataʻina.

E FAAPEFEA ONA MAUA E “ISI MAMOE” A KERISO AOGĀ?

14. Aiseā e mafai ai e “isi mamoe” ona maua aogā mai i le talafaatusa i taupou e toʻasefulu?

14 Talu ai na taulaʻi atu le talafaatusa a Iesu i taupou e toʻasefulu i le ʻaufaauuina, po o lona uiga e lē mafai ona maua ai e “isi mamoe” a Keriso aogā? (Ioa. 10:16) E leai. Manatua, e faigofie le feʻau o le talafaatusa: “Ia faaauau ona mataala.” Pe e na o le ʻaufaauuina e faatatau atu ai lenā manatu? Na toe fetalai Iesu: “O aʻu upu ou te fai atu ai iā te outou, ou te fai atu ai foʻi i tagata uma, Ia faaauau ona mataala.” (Mare. 13:37) E faatalitalia e Iesu ona soo uma e sauniunia o latou loto mo le auaunaga ma ia faaalia foʻi le mataala. O lea, e tatau ai i Kerisiano uma ona mulimuli i le faaaʻoaʻoga a le ʻaufaauuina i le faaalia o le mataala, ia faaaʻoaʻo i a latou galuega lelei ma faamuamua le faiva i le olaga. Ia tāmau i o tatou mafaufau le talosaga atu o taupou vālea, i taupou faautauta mo ni a latou suāuu. O lenā talosaga e faamanatu mai ai, e lē mafai ona faamaoni se tasi mo i tatou, e lē mafai ona tumau se tasi i le upu moni mo i tatou, pe e mataala foʻi mo i tatou. E taʻitoʻatasi i tatou ma tali atu i le Pule amiotonu ua tofia e Ieova. E tatau ona tatou nofosauni, auā ua toeitiiti ona taunuu mai lea o ia.

O le talosaga atu mo se suāuu e faamanatu mai ai e leai se tasi e mafai ona mataala ma faamaoni mo i tatou

15. Aiseā e tāua ai i Kerisiano uma le faaipoipoga a Keriso ma le tamaʻitaʻi faaipoipo?

15 E mafai e Kerisiano uma ona maua aogā mai i le faatasiga fiafia i le talafaatusa a Iesu. E mautinoa o le a tatou fiafia uma i lenā faaipoipoga. O le a iai le ʻaufaauuina i le lagi pe a māeʻa le taua iā Amaketo, ma o le a avea i latou ma tamaʻitaʻi faaipoipo. (Faaa. 19:7-9) Ae o le a maua e tagata uma i le lalolagi aogā mai i lenā faaipoipoga i le lagi, lea o le a maua ai e tagata uma se faigāmalo lelei atoatoa. Pe e tatou te faamoemoe e ola i le lagi po o le lalolagi, e tatau ona tatou maumauaʻi e aʻoaʻoina le lesona tāua mai i le talafaatusa i taupou e toʻasefulu. Ia faamaonia atu ua tatou nofosauni, e ala i le sauniunia o o tatou loto ma tumau faamaoni, ina ia mafai ai ona tatou olioli i le lumanaʻi pupula ua saunia mai e Ieova mo i tatou.

^ pala. 9 I le talafaatusa, e iai le va o le alaga, “Ua sau le alii faaipoipo!” (fuaiupu e 6) ma le sau po o le taunuu moni mai o le alii faaipoipo (fuaiupu e 10). A o faagasolo aso e gata ai, ua malamalama le ʻaufaauuina mataala i le faailoga o le faatasi mai o Iesu. Ua latou malamalama ua “sau” o ia, po ua pule o ia e ala i le mana o le Malo. Ua latou feagai ma le luʻi o le tumau seʻia oo i le taimi e taunuu mai ai o ia.