Skip to content

Skip to secondary menu

Skip to table of contents

Molimau a Ieova

Faa-Samoa

Le Olomatamata (Lomiga mo Su‘esu‘ega)  |  Mati 2015

“O le Mea Lea ua E Finagalo Malie i Ai”

“O le Mea Lea ua E Finagalo Malie i Ai”

“Ua e matuā natia nei mea mai i tagata popoto ma ē e atamamai, a ua faaalia i tamaiti.”​—LUKA 10:21.

1. Aiseā na ʻmatuā fiafia ai Iesu i le agaga paia’? (Tagaʻi i le ata i luga aʻe o le matua.)

PE E mafai ona faaāta i lou mafaufau le fiafia o foliga o Iesu ina ua “matuā fiafia o ia i le agaga paia”? O le māfuaaga, e leʻi leva talu ona ia auina atu ona soo e toʻa 70 e talaʻi le tala lelei o le Malo o le Atua. Sa ia naunau patino i le auala e faataunuu ai e le ʻausoo lo latou tiute tauave. Sa iai fili malolosi o le tala lelei, e pei o le o le ʻautusiupu ma Faresaio popoto na aʻoaʻoina lelei. O a latou taaʻiga na vaai maulalo ai isi iā Iesu ua na o ia o se kamuta, ma o ona soo o ni “tagata e leʻi lava ni aʻoaʻoga ma e faatauvaa.” (Galu. 4:13; Mare. 6:3) E ui i lea, sa toe foʻi mai le ʻauuso ma le fiafia mai i la latou galuega. Sa latou talaʻi e ui i teteega, e oo lava foʻi i teteega mai i temoni. Aiseā na latou olioli ma lototetele ai?​—Faitau le Luka 10:1, 17-21.

2. (a) O le ā le auala sa pei ai soo o Iesu o ni tamaiti? (e) O le ā na mafai ai ona maua e soo o Keriso upu moni tāua faaleagaga?

2 Seʻi mātau faamatalaga a Iesu na fai atu iā Ieova: “Ou te vivii atu iā te oe i luma o tagata, loʻu Tamā e, le Alii o le lagi ma le lalolagi, auā ua e natia nei mea mai i tagata popoto ma ē e atamamai, a ua faaalia i tamaiti. Ioe, loʻu Tamā e, auā o  le mea lea ua e finagalo malie i ai.” (Mata. 11:25, 26) E lē o le uiga o le fetalaiga a Iesu o ona soo o ni tamaiti. Peitaʻi, sa pei i latou o ni tamaiti pe a faatusatusa i tagata atamamai ma aʻoaʻoina lelei, lea sa atamamai i o latou lava manatu. Ae e sili atu i lenā, na aʻoaʻoina e Iesu ona soo ina ia pei o ni tamaiti e lotomaulalo ma aʻoaʻogofie. (Mata. 18:1-4) O le ā le aogā o le lotomaulalo iā i latou? O le fesoasoani a Ieova e ala i le agaga paia, na latou mauaina ai upu moni tāua faaleagaga, lea na teena e tagata na faatauasoina e Satani i le faamaualuga.

3. O le ā o le a iloiloina i lenei mataupu?

3 Sa matuā fiafia Iesu i le vaai atu i le auala na faailoa mai ai e Ieova upu moni loloto faaleagaga i so o se tagata lotomaulalo, e tusa po o ā o latou tulaga tauaʻoaʻoga ma tomai. Sa ia fiafia ona sa finagalo malie Ieova i aʻoaʻoga e manino ma faigofie. Po o faaauau pea ona fiafia Ieova i lenei auala e aʻoaʻo ai? A o tatou iloiloina le tali o lenei fesili, o le a tatou maua le fiafia e pei foʻi ona tupu iā Iesu.

MAFAI ONA ILOA E TAGATA UMA UPU MONI LOLOTO

4. O ā auala ua faamaonia ai o le lomiga o Le Olomatamata i le gagana faigofie o se sauniuniga alofa?

4 I tausaga talu ai nei, na matuā faamatilatila mai ai le manino ma faigofie o faatonuga faaleagaga e aumaia e le faalapotopotoga a Ieova. Seʻi o tatou iloiloina ni faaaʻoaʻoga se tolu. Muamua, o le faaaogāina lomiga o Le Olomatamata i le gagana faigofie. * Ua faamaonia le aogā o lenei lomiga, ma o se sauniuniga alofa mo i latou e faigatā ona faitau pe malamalama i se gagana. Ua iloa e ulu o aiga ua matuā fiafia fanau e faia so latou sao i le suʻesuʻeina o lenei lomiga, o le auala autū lea ua fafagaina ai i tatou faaleagaga. Ua tusi atu le toʻatele i le Vaega Pule e faailoa atu lo latou lototalisapaia. Na faapea mai se tuafafine na faigatā ona fai sona sao i le Suʻesuʻega o le Olomatamata: “Sa ou matamuli, ae i le taimi lenei ua ou lē toe popole ma ua tele foʻi ina fai oʻu sao. Ou te faafetai ai iā Ieova ma outou.”

5. O ā nisi o itu lelei o le lomiga ua toe teuteuina O le Tusi Paia o le Faaliliuga a le Lalolagi Fou?

5 Lona lua, o le lomiga ua toe teuteuina O le Tusi Paia o le Faaliliuga a le Lalolagi Fou, lea na tatalaina i le gagana Peretania i le fonotaga faaletausaga sa faia iā Oketopa 5, 2013. * Ua iai nisi mau ua faaitiitia upu ma ua sili atu ona manino ma malamalamagofie. O se faaaʻoaʻoga, i le Iopu 10:1 sa 27 upu ae ua faaitiitia i le 19 upu, ae o le Faataoto 8:6 sa 20 upu, ae ua faaitiitia nei i le 13 upu. Ae ua sili atu ona manino nei mau uma i le lomiga fou. Ua faapea mai se uso faauuina ua loa tausaga o auauna faamaoni: “O le taimi na ou faitau ai i le tusi o Iopu i le lomiga fou, e pei o lea faatoʻā ou malamalama i ai.” E faapena foʻi manatu o le toʻatele.

6. O ā ni ou faalogona i le fetuunaʻiga o lo tatou malamalamaga i le Mataio 24:45-47?

6 Lona tolu, seʻi o tatou iloiloina nisi o fetuunaʻiga o lo tatou malamalamaga talu ai nei. O se faaaʻoaʻoga, o le fetuunaʻiga o lo tatou malamalamaga e faatatau  i le “pologa faamaoni ma le faautauta,” lea na lomia i Le Olomatamata o Iulai 15, 2013. (Mata. 24:45-47) Sa faamatalaina ai o le pologa faamaoni o le Vaega Pule, ae o le “ʻaufaigaluega” o i latou uma e fafagaina faaleagaga, e tusa po o le ʻaufaauuina po o “isi mamoe.” (Ioa. 10:16) Maʻeu lo tatou olioli i le aʻoaʻoina o na upu moni ma aʻoaʻoina ai ē e fou mai! O ā nisi o auala e faailoa mai ai le finagalo malie o Ieova e aʻoaʻoina i tatou i se auala manino ma faigofie?

FAAMATALAINA FAIGOFIE MA MANINO O TALA FAALE-TUSI PAIA

7, 8. O ā nisi o faaaʻoaʻoga o ni faaataga faavaloaga faagaeeina o loo i le Tusi Paia?

7 Pe afai ua loa tausaga o e auauna iā Ieova, atonu e te mātauina ua suia le auala ua faamatala ai i a tatou lomiga le tele o tala faale-Tusi Paia. I le ā le itu? I le taimi ua mavae, sa masani ona faamatala i a tatou lomiga se faaataga (type) ma se faataunuuga (antitype) o se tala faale-Tusi Paia. E iai le faavae faale-Tusi Paia mo le faia o nei faaataga faavaloaga. O se faaaʻoaʻoga, o le fetalaiga a Iesu i le “faailoga o Iona le perofeta.” (Faitau le Mataio 12:39, 40.) Na faamatala e Iesu o le iai o Iona i le manava o le iʻa i se taimi puupuu, na faaāta mai ai le taimi na iai o Ia i le tuugamau.

8 O loo iai i le Tusi Paia le tele o faaataga faavaloaga faagaeeina, lea na aofia foʻi i tusitusiga a Paulo. O se faaaʻoaʻoga, o le faiā a Aperaamo ma Akara faapea Sara, na faaāta mai ai faavaloaga le faiā a Ieova ma le nuu o Isaraelu, faapea le vaega faalelagi o le faalapotopotoga a le Atua. (Kala. 4:22-26) E faapena foʻi le faleʻie o le feiloaʻiga ma le malumalu, le Aso o le Togisala, le ositaulaga sili, ma isi vaega o le Tulafono a Mose, sa iai le “ata o mea lelei i le lumanaʻi.” (Epe. 9:23-25; 10:1) Maʻeu le faamalosia o lo tatou faatuatua pe a iloiloina na faaataga faavaloaga! Ae pe e mafai ona tatou faapea atu o tagata uma i se tala, po o mea uma lava o loo faamatalaina i le Tusi Paia e iai sona faaataga?

9. O le ā le auala sa faamatalaina ai i aso ua mavae le tala iā Napota?

9 I le taimi ua teʻa, o le auala lea na tele ina faamatala ai mea. O se faaaʻoaʻoga o le tala iā Napota, lea na faamasinoina ma le lē tonu, ma na faufau e le masiofo leaga o Iesepela le fasiotiga o ia, ina ia maua ai e lona toʻalua o Aapo le togāvine a Napota. (1 Tu. 21:1-16) I le 1932, na faamatalaina lenā tala e iai sona faaataga faavaloaga. O Aapo ma Iesepela na faaāta mai ai Satani ma lana faalapotopotoga. O Napota na faaāta mai ai Iesu, ae o le maliu o Napota na faaāta mai ai le fasiotia o Iesu. Peitaʻi, i tausaga mulimuli ane na taʻua ai i le tusi “Let Your Name Be Sanctified,” lea na lomia i le 1961, o Napota e faaāta mai le ʻaufaauuina, a o Iesepela e faaāta mai lotu ua faapea mai o Kerisiano. O le sauāina e Iesepela o Napota, na faaāta mai ai le sauāina o le ʻaufaauuina a o faagasolo aso e gata ai. A o faagasolo tausaga, sa faamalosia le faatuatua o tagata o le Atua i le auala na faamatala ai nei tala faale-Tusi Paia. Aiseā la ua suia ai le tulaga o mea?

10. (a) Aiseā ua sili ai ona faautauta le faamatalaina o tala faale-Tusi Paia? (e) O le ā ua uaʻi atu ai lomiga i aso nei?

10 A o faagasolo tausaga, ua faaauau ona fesoasoani Ieova i le “pologa  faamaoni ma le faautauta” ina ia faaalia pea le faautauta. Ae ua sili ona latou faautauta i le faia lea o ni faaataga faavaloaga o ni tala faale-Tusi Paia, seʻi vaganā ua iai se faavae faale-Tusi Paia. Ua mātauina foʻi, o le auala na faamatala ai nisi o faaataga ma faataunuuga o tala faale-Tusi Paia, e faigatā ona manatua e le toʻatele. O le tele o faamatalaga i nei aʻoaʻoga e faigatā ona manatua ma faatatau. Ae o le popolega sili, ua faigatā ai ona iloa ma manino lesona aogā mai i tala faale-Tusi Paia. O lea, o lomiga i aso nei, ua uaʻi atu i lesona aogā ma faigofie e faatatau i le faatuatua, tumau, tuutoina atu i le Atua, ma isi uiga tāua e tatou te aʻoaʻoina mai i tala faale-Tusi Paia. *

O le tala iā Napota e tatou te aʻoaʻoina mai ai se lesona aogā (Tagaʻi i le palakalafa e 11)

11. (a) O le ā lo tatou malamalamaga ua iai nei e faatatau i le tala iā Napota, ma aiseā e aogā ai lana faaaʻoaʻoga iā i tatou uma? (e) Aiseā ua seāseā ai ona toe taʻua i a tatou lomiga ni faaataga ma faataunuuga o tala o le Tusi Paia? (Tagaʻi i le mataupu “Fesili mai le ʻAufaitau” o loo i lenei lomiga.)

11 O le ā lo tatou malamalamaga ua iai nei i le tala e faatatau iā Napota? Ua sili atu nei ona manino ma faigofie. Na maliu lenei tane amiotonu, e lē ina ia faaāta mai ai Iesu po o le ʻaufaauuina, ae ona o lona faamaoni. Sa ia tausia Tulafono a Ieova a o ia fesagaʻia le faaaogāsesēina o le pule. (Nu. 36:7; 1 Tu. 21:3) E aogā lana faaaʻoaʻoga iā i tatou, auā e fesagaʻia e so o se tasi sauāga ona o māfuaaga faapena. (Faitau le 2 Timoteo 3:12.) O nei lesona aogā e mafai ona malamalama ma manatua e so o se tagata.

12. (a) O le ā e mafai ona faapea atu e faatatau i tala o loo i le Tusi Paia? (e) Aiseā ua tatou maua ai ni faamatalaga manino e faatatau i mea loloto? (Tagaʻi i le faaopoopoga.)

12 Pe e mafai la ona tatou faapea atu e na o lesona aogā e maua mai i tala faale-Tusi Paia, ae e leai se isi uiga? E leai. I aso nei, ua tele ina aʻoaʻoina i a tatou lomiga se mea e mafai ona avea ma faamanatu, pe e faataʻitaʻi ai se manatu. Ae ua seāseā ona faamatala ni tala i le Tusi Paia i se auala e iai sona faaataga faavaloaga  ma lona faataunuuga. O se faaaʻoaʻoga, e mafai ona tatou faapea atu o le faamaoni o Napota ina ua feagai ma sauāga ma lona maliu, ua faamanatu mai ai le faamaoni o Keriso ma le ʻaufaauuina. Peitaʻi, e faamanatu mai ai foʻi le tulaga faamaoni o le toʻatele o “isi mamoe” a le Alii. O lenā faatusatusaga manino ma faigofie o se vaega o le aʻoaʻoga tauatua. *

FAAMATALAGA FAIGOFIE O TALAFAATUSA A IESU

13. O ā faaaʻoaʻoga e iloa ai ua sili atu nei ona faigofie ma manino le faamatalaina o nisi o talafaatusa a Iesu?

13 O Iesu le faiaʻoga sili sa iai i le lalolagi. O se tasi o auala sa ia aʻoaʻo ai, o le faaaogāina lea o talafaatusa. (Mata. 13:34) O talafaatusa e mafai ona faaāta ai i o tatou mafaufau se manatu, lea e mafai ona aafia ai o tatou mafaufau ma pāʻia ai o tatou loto. A o faagasolo tausaga, ua faamatalaina foʻi i a tatou lomiga talafaatusa na faaaogā e Iesu i se auala e sili atu ona manino ma faigofie. Pe e tatou te leʻi fiafia ea i fetuunaʻiga o lo tatou malamalamaga i faataʻitaʻiga a Iesu e faatatau i le mea faafefete, le fatu o le sinapi ma le upega lea na taʻua i Le Olomatamata o Iulai 15, 2008? Ua tatou iloa o nei talafaatusa e faatatau atu i le Malo o le Atua, ma le taulau manuia o le Malo i le aoaoina mai o soo moni o Keriso mai i lenei lalolagi amioleaga.

14. (a) O le ā le auala sa faamatala ai le talafaatusa i le Samaria agalelei? (e) O le ā lo tatou malamalamaga ua iai i lenā talafaatusa?

14 Ae faapefea nisi o faataoto po o talafaatusa na faamatalaina e Iesu? E iai nisi talafaatusa e iai o latou uiga ma faaataga faavaloaga, a o nisi e faamatilatila ai ni lesona aogā. E faapefea ona tatou iloa le eseesega? A o faagasolo tausaga, na amata ona manino mai ai le tali o lenā fesili. O se faaaʻoaʻoga, seʻi o tatou iloiloina le auala sa faamatala ai le talafaatusa a Iesu i le Samaria agalelei. (Luka 10:30-37) I le 1924, na taʻua ai i le Watch Tower o le tamāloa Samaria e faaāta mai ai Iesu; o le auala mai i Ierusalema agaʻi i Ieriko e tai pei o se vanu, e faaāta mai ai le paʻū maulalo o le tulaga o le tagata talu mai le fouvalega i Etena; o tagata gāoi i le auala e faaāta mai ai faalapotopotoga tetele ma tagata mauoloa; ae o le ositaulaga ma le sā Levī e faaāta mai ai faalapotopotoga faalelotu. I aso nei, ua faaaogā i a tatou lomiga lenei talafaatusa e faamanatu ai i Kerisiano uma e lē tatau ona latou faailogatagata i ē o loo manaʻomia le fesoasoani, aemaise i le itu faaleagaga. Pe e tatou te lē talisapaia ea le auala ua faafaigofie mai ai e Ieova ana aʻoaʻoga iā i tatou?

15. O le ā o le a iloiloina i le mataupu o loo sosoo mai?

15 I le mataupu o loo sosoo mai, o le a iloiloina ai le talafaatusa a Iesu i taupou e toʻasefulu. (Mata. 25:1-13) O le ā le auala e finagalo Iesu i ona soo i aso e gata ai, e malamalama ai i lenā talafaatusa? Pe e faasino atu i se tala e iai sona faaataga faavaloaga? Pe e finagalo Iesu e avea lenei talafaatusa ma lesona aogā e taʻitaʻia ai i tatou i nei aso e gata ai?

^ pala. 4 O le uluaʻi taimi na lomia ai lenei lomiga i le gagana Peretania o Iulai i le 2011. Talu mai lenā taimi, ua mafai foʻi ona maua lenei lomiga i nisi o gagana.

^ pala. 5 O loo faia galuega mo le sauniaina o lenei lomiga i isi gagana.

^ pala. 10 O se faaaʻoaʻoga, o loo talanoaina i le tusi Faaaʻoaʻo i lo Latou Faatuatua olaga o tagata eseese e toʻa 14 o loo taʻua i le Tusi Paia. O loo faamatilatila i le tusi aʻoaʻoga aogā, ae lē o ni faaataga faavaloaga.

^ pala. 12 E anoanoaʻi mea i le Tusi Paia e “faigatā ona malamalama i ai,” e aofia ai nisi vaega o tusitusiga a Paulo. Peitaʻi, na faagaeeina e le agaga paia tusitala uma o le Tusi Paia. O le mana lava lenā ua fesoasoani i Kerisiano moni i aso nei e malamalama ai i upu moni faaleagaga, ma “e oo lava i mea loloto a le Atua,” ua mafai ona tatou manino ma malamalama i ai.​—2 Pete. 3:16, 17; 1 Kori. 2:10.