Skip to content

Skip to secondary menu

Skip to table of contents

Molimau a Ieova

Faa-Samoa

Le Olomatamata (Lomiga mo Su‘esu‘ega)  |  Fepuari 2015

Fesili Mai le ʻAufaitau

Fesili Mai le ʻAufaitau

O le ā e mafai ona fai e fesoasoani ai i uso ma tuafāfine e matuā aafia o latou tino i fagu faamanogi?

E feagai i latou e aafia i fagu faamanogi ma se luʻi faigatā. E faigatā ona latou fesagaʻia lenei tulaga pe a feagai ma tagata ese i aso taʻitasi. Ae ua fesili mai nisi pe e talafeagai ona talosaga atu i uso ma tuafāfine e ʻalofia le faaaogāina o fagu faamanogi i sauniga, fonotaga ma tauaofiaga.

E mautinoa e leai se Kerisiano e manaʻo e faafaigatā ona auai isi i sauniga, auā e tatou te manaʻomia uma faalaeiauga e maua mai i sauniga. (Epe. 10:24, 25) O i latou e matuā aafia i fagu faamanogi ma faigatā ai ona auai i sauniga, atonu e latou te fia talanoa i toeaina e faatatau i lea mataupu. E lē faale-Tusi Paia pe e talafeagai ona faia ni tulafono e faatatau i le faaaogāina o fagu faamanogi e i latou e auai i sauniga. O lea e ono saunia ai e toeaina faamatalaga e fesoasoani i le faapotopotoga e malamalama ai i le tulaga o loo feagai ma isi. E fua lava i le tulaga o mea, ae atonu e filifili toeaina e talanoaina i manaʻoga o le faapotopotoga i le Sauniga o le Auaunaga, ni mataupu sa lomia i a tatou lomiga. Pe atonu e latou te filifili e faia se faasilasilaga faautauta e faatatau i lea mataupu. Peitaʻi, e lē o taimi uma e tatau ai i toeaina ona faia se faasilasilaga e faatatau i lea mataupu. Atonu e lē malamalama tagata fou e auai i a tatou sauniga i lenei faafitauli, ma e tatou te lē mananaʻo e faaleaga o latou faalogona. E lē tatau ona iai i se tasi ni faalogona lē lelei ona o lona faaaogāina o fagu faamanogi.

Pe a tulaʻi mai lenei faafitauli ma talafeagai ma le tulaga o mea, atonu e faatulaga e le ʻautoeaina se nofoaga i le Maota mo Sauniga e nonofo ai i latou e aafia i fagu faamanogi. O se faaaʻoaʻoga, atonu e iai se potu e mafai ona latou faalogologo mai ai i le sauniga. Pe afai lava e lē mafai ona foʻia ai le faafitauli, atonu e mafai e le faapotopotoga ona puʻe le sauniga, po o le faatulaga foʻi ina ia mafai ona latou faalogologo mai i le fale e ala i le telefoni, e pei ona faia iā i latou ua lē mafai ona auai i sauniga.

I tausaga talu ai nei, na faalaeiau mai ai La Tatou Faiva o le Malo e faaalia le manatu mamafa i lenei tulaga pe a auai i tauaofiaga itumalo. O nisi tauaofiaga e faia i nofoaga e faaaogā ai masini e faasau ai le ʻea i totonu. O lea, atonu e talosagaina ai le ʻauusufono e aua le soona faaaogāina fagu faamanogi malolosi i na faatasiga. E tāua le manatu mamafa i lenei tulaga i tauaofiaga itumalo, auā e faigatā ona maua ni vaega o le maota e nonofo ai i latou nei. Peitaʻi, e leʻi fuafuaina lenei taʻiala e fai ma tulafono i taimi o sauniga, ma e lē tatau lava ona iai se manatu faapena.

A o tatou ola ai i lenei faiga o mea, ua tatou mafatia i āuga o le tulaga lē lelei atoatoa. Maʻeu lo tatou talisapaia o taumafaiga a isi e fesoasoani i o tatou mafatiaga! Atonu e faia e nisi ni faataulaga e ʻalofia ai le faaaogāina o fagu faamanogi, ina ia faigofie ona auai ai uso ma tuafafine i sauniga. O le alofa e uunaʻia ai i tatou e faia faapea.

 Pe e lagolagoina e nisi tusitusiga sa soifua moni Ponotio Pilato?

O le maa lenei na tusia ai le igoa o Pilato i le gagana Latina

E lauiloa Ponotio Pilato i tagata faitau o le Tusi Paia ona o lana vaega i le faamasinoina ma le fasiotia o Iesu. (Mata. 27:1, 2, 24-26) Peitaʻi, o loo iai foʻi lona igoa i le tele o isi tusitusiga o le talafaasolopito. Na taʻua i le The Anchor Bible Dictionary, e sili atu ona tele faamatalaga e faatatau iā Pilato, ʻnai lo o se isi lava kovana o Roma i Iutaia.’

E tele ina maua le igoa o Pilato i tusitusiga a le tusitala Iutaia o le talafaasolopito o Josephus, lea na faamatalaina mea faigatā e tolu na fesagaʻia e Pilato, a o avea ma kovana i Iutaia. Ae o le mea lona fa na faamatalaina e le tusitala Iutaia o le talafaasolopito o Philo. O le tusitala Roma o Tacitus, lea na faamaumauina le talafaasolopito o emeperoa o Roma, na ia faamaonia o Ponotio Pilato na faatonuina le fasiotia o Iesu, a o avea Tiperio ma Emeperoa.

I le 1961, na maua ai e tagata na eliina toega o mea i le fale mataaga o Roma i Kaisareia i Isaraelu, se maa na tusia ai le suafa o Ponotio i le gagana Latina. O faamatalaga o loo faaalia i le ata o se toega o loo totoe, peitaʻi o faaupuga sa iai i le taimi muamua: “Ua faaulufaleina e Ponotio Pilato le taʻitaʻi o Iutaia (le) Tiberieum e faamamaluina ai atua.” E foliga mai o lenei fale e pei o se malumalu na faamamaluina ai le Emeperoa Roma o Tiperio.