Skip to content

Skip to secondary menu

Skip to table of contents

Molimau a Ieova

Faa-Samoa

Le Olomatamata (Lomiga mo Su‘esu‘ega)  |  Fepuari 2015

Faaaʻoaʻo i le Lotomaulalo ma le Faapelepele o Iesu

Faaaʻoaʻo i le Lotomaulalo ma le Faapelepele o Iesu

ʻO Keriso na puapuagatia mo outou, ua ia tuuina mai ai le faaaʻoaʻoga mo outou ina ia outou mulimulituʻi ai i ona tulaga aao.’​—1 PETE. 2:21.

1. Aiseā e tatou te māfana atu ai iā Ieova pe a faaaʻoaʻo iā Iesu?

E TATOU te mananaʻo e faaaʻoaʻo iā i latou e tatou te fiafia i o latou uiga ma amioga. O i latou uma lava i le lalolagi, e leai se tasi e sili ona tatou faaaʻoaʻo i ai nai lo o Iesu. Aiseā? Na fetalai Iesu lava ia: “O lē ua vaai mai iā te aʻu, ua vaai foʻi o ia i le Tamā.” (Ioa. 14:9) Na matuā lelei atoatoa ona faaatagia mai e Iesu uiga o lona Tamā, o lea la o lē e vaai iā Iesu ua vaai foʻi i le Tamā. A o tatou faaaʻoaʻo iā Iesu, e tatou te māfana atu ai iā Ieova, o Lē e silisili ese i le vateatea. Maʻeu le tauia o lo tatou faaaʻoaʻo i uiga ma ala o lona Alo!

2, 3. (a) Aiseā ua saunia ai e Ieova faamaumauga e faatatau i lona Alo, ma o le ā ua faatalitalia e Ieova i tatou e fai? (e) O le ā o le a talanoaina i lenei mataupu ma le mataupu o sosoo mai?

2 E faapefea ona tatou iloa le ituaiga tagata sa iai Iesu? O le mea e faafetai ai ona ua iā i tatou Tusitusiga Paia e faatatau iā te ia. Ua saunia e Ieova na faamaumauga, e pei ona maua i Tusitusiga Eleni, auā o lona finagalo ia tatou iloa lelei lona Alo ma faaaʻoaʻo iā te ia. (Faitau le 1 Peteru 2:21.) I le  Tusi Paia, o faaaʻoaʻoga na faataatia e Iesu ua faatusatusa atu i ni “tulaga aao.” O lea, o loo fetalai mai Ieova iā i tatou ina ia faaaʻoaʻo iā Iesu ma mulimuli i ona tulaga aao. Na faataatia e Iesu se faaaʻoaʻoga lelei atoatoa mo i tatou, peitaʻi e tatou te lē lelei atoatoa. E lē faatalitalia e Ieova i tatou ia atoatoa ona mulimuli i tulaga aao o Iesu. Nai lo o lea, e faatalitalia e le Tamā i tatou e faia le mea sili e tatou te faaaʻoaʻo ai i lona Alo e ui e tatou te lē lelei atoatoa.

3 O lea, seʻi o tatou tilofaʻia nisi o uiga lelei o Iesu. O le a talanoaina i lenei mataupu lona lotomaulalo ma lona faapelepele, ae i le mataupu o sosoo mai, o le a tatou iloiloina ai lona lototele ma lana faautaga loloto. E tusa ai ma nei uiga taʻitasi o le a taliina ai fesili nei e tolu: O le ā lona uiga? E faapefea ona faaalia e Iesu lenei uiga? E faapefea ona tatou faaaʻoaʻo iā te ia?

E LOTOMAULALO IESU

4. E faapefea ona e faamatalaina le lotomaulalo?

4 O le ā le uiga o le lotomaulalo? I lenei lalolagi faamaualuga, e ono taumānatu nisi e faapea, o le lotomaulalo e uiga atu i le vaivai po o le lē mautonu. Peitaʻi e lē saʻo lenā manatu. O le faaalia o le lotomaulalo e manaʻomia ai le malosi ma le lototele. Ua faamatalaina le lotomaulalo o “le tuufaafeagai lea o le faamaualuga ma le fiasili.” Ua faamatalaina le upu “lotomaulalo” i Tusitusiga Eleni, o le manatu faatauvaa iā i tatou lava. (Fili. 2:3) E amata mai le lotomaulalo i le auala e tatou te manatu ai iā i tatou lava. Ua faapea mai se lomifefiloi: “O le lotomaulalo o le iloa lea o lo tatou tulaga maulalo i luma o le Atua.” Pe afai e tatou te lotomaulalo moni lava i luma o le Atua, o le a ʻalofia ai le manatu ua sili atu i tatou nai lo o isi. (Roma 12:3) E lē faigofie mo tagata lē lelei atoatoa ona atiaʻe le lotomaulalo. Ae pe afai e tatou te tomānatu i o tatou tulaga faatauvaa i luma o le Atua ma mulimuli i tulaga aao a lona Alo, e mafai ona aʻoaʻoina ai i tatou ia lotomaulalo.

5, 6. (a) O ai Mikaele le agelu sili? (e) Na faapefea ona faaalia e Mikaele le lotomaulalo?

5 Na faapefea ona faaalia e Iesu le lotomaulalo? Ua loa ona faaalia e le Alo o le Atua le lotomaulalo a o avea o ia o se foafoaga agaga malosi i le lagi, ma se tagata lelei atoatoa i le lalolagi. Seʻi o tatou iloiloina ni faataʻitaʻiga.

6 O ona uiga.Ua faamauina e Iuta se faaaʻoaʻoga a Iesu a o leʻi avea ma tagata. (Faitau le Iuta 9.) Ua ʻfinau le tiapolo’ o lē o loo leaga ma Mikaele le agelu sili po o Iesu, e faatatau i le “tino o Mose.” Ina ua maliu Mose, na tanumia e Ieova lona tino i se nofoaga e lē iloa e se isi. (Teu. 34:5, 6) Atonu na manaʻo le Tiapolo e faaaogā le tino maliu o Mose e faaauiluma ai tapuaʻiga sesē. Sa lototele pea Mikaele e tusa lava po o ā faufauga leaga sa mafaufau i ai le Tiapolo. Ua taʻua i se tasi o tusi e faapea, o le upu Eleni mo le “finau,” e fesootaʻi atu i se “finauga faaletulafono,” lea na ono “luʻia ai e Mikaele le aiā a le Tiapolo e ave ai le tino maliu o Mose.” Na silafia e le agelu sili e lē o iā te ia le aiā e faia ai le faamasinoga. O lea, na ia tuu atu ai le mataupu iā Ieova le Faamasino Sili. E ui i lenā faafitauli, ae e leʻi sopotapulaa ai le pule a Mikaele. Maʻeu lona lotomaulalo!

7. Na faapefea ona faaalia e Iesu le lotomaulalo i ana fetalaiga ma gaoioiga?

7 I le faiva a Iesu i le lalolagi, na ia fetalai  ma gaoioi i auala e iloa ai lona lotomaulalo moni. O ana fetalaiga. E leʻi uaʻi atu o ia iā te ia lava. Ae na ia avatu le mamalu uma i lona Tamā. (Mare. 10:17, 18; Ioa. 7:16) E leʻi atagia mai i ana fetalaiga lona vaai maulalo i ona soo, pe e latou te lagona ai le faatauvaa. Nai lo o lea, na ia faamamaluina ma viiviia i latou mo mea lelei na latou faia, ma faailoa atu lona maufaatuatuaina o i latou. (Luka 22:31, 32; Ioa. 1:47) O ana gaoioiga. Na filifili Iesu e soifua i se olaga faigofie e lē tele ni meafaitino. (Mata. 8:20) Na lotomalie o ia e faia ni galuega e sili ona faatauvaa. (Ioa. 13:3-15) Na matilatila ona ia faaalia le lotomaulalo e ala i lona usiusitaʻi. (Faitau le Filipi 2:5-8.) E lē pei o ia o tagata fia sili o ē mumusu e usiusitaʻi, ae sa gauaʻi ma le lotomaulalo Iesu e fai le finagalo o le Atua, ma “usiusitaʻi e oo i le oti.” E mautinoa, sa “lotomaulalo” Iesu, le Atalii o le tagata.​—Mata. 11:29.

FAAAʻOAʻO I LE LOTOMAULALO O IESU

8, 9. E faapefea ona tatou faaalia le lotomaulalo?

8 E faapefea ona tatou faaaʻoaʻo iā Iesu i le lotomaulalo? O o tatou uiga. O le lotomaulalo e taofia ai tatou mai le sopotapulaa o la tatou pule. Pe afai tatou te iloa e lē o iā i tatou le pule e faamasino ai isi, o le a tatou lē vave faitioina ai isi ona o a latou mea sesē, po o le fesiligia foʻi o o latou uunaʻiga. (Luka 6:37; Iako. 4:12) O le lotomaulalo foʻi e tatou te lē soona “amiotonu naʻuā” ai ma vaai maulalo iā i latou e leai ni tomai po o ni faaeaga. (Fai. 7:16) E lē manatu toeaiina lotomaulalo e sili atu i latou nai lo o latou uso talitonu. O na leoleo mamoe e latou te “manatu ua sili isi” nai lo o i latou ma gaoioi ai pei o ni ē faatauvaa.​—Fili. 2:3; Luka 9:48.

9 Seʻi manatu i le faaaʻoaʻoga a W. J. Thorn, o lē sa amata ona auauna o se ovasia femalagaaʻi talu mai le 1894. Ina ua mavae le tele o tausaga o galue i lea galuega, sa valaaulia o ia e galue i le falemoa i le faatoʻaga a le Peteli i Niu Ioka. Na ia faapea mai: “O so o se taimi lava ou te mitamita ai iā te aʻu lava, ona ou nofo lea i lalo ma faapea ifo: ʻO aʻu o se pefu itiiti. O le ā se mea ou te mitamita ai?’” (Faitau le Isaia 40:12-15.) Maʻeu se uiga lotomaulalo!

10. E faapefea ona tatou faaalia le lotomaulalo i a tatou faamatalaga ma gaoioiga?

10 O a tatou faamatalaga. E atagia mai i a tatou faamatalaga lo tatou lotomaulalo moni. (Luka 6:45) Pe a talanoa ma isi, e tatou te ʻalofia le uaʻi atu i mea ua tatou ausia ma o tatou faaeaga. (Faata. 27:2) Nai lo o lea, o le a tatou vaai i mea e lelei ai o tatou uso ma tuafāfine, ma faamālō i o latou uiga lelei, tomai ma mea ua latou ausia. (Faata. 15:23) O a tatou gaoioiga. E lē saʻilia e Kerisiano lotomaulalo tulaga aloaʻia i lenei faiga o mea. E latou te ola i ni olaga faigofie, e oo lava i le faatinoina o galuega ia e manatu i ai le lalolagi e faatauvaa ina ia latou auauna ai ma le atoatoa iā Ieova. (1 Timo. 6:6, 8) E mafai ona tatou faaalia le lotomaulalo e ala i le usiusitaʻi. O le “usiusitaʻi i ē o taʻimua” i le faapotopotoga e manaʻomia ai le lotomaulalo, ia talia ma mulimuli i taʻitaʻiga e maua mai i le faalapotopotoga a Ieova.​—Epe. 13:17.

E FAAPELEPELE IESU

11. Faamatala le uiga o le faapelepele.

11 O le ā le uiga o le faapelepele? Ua faamatalaina le upu “faapelepele” e faapea o le “faaalia o faalogona māfana.” O  le faapelepele o se vala o le alofa, ma e tutusa ma “faalogona māfana” e pei o le tigā alofa ma le alofa mutimutivale. Ua taʻua i le Tusi Paia le “alofa faapelepele,” ma le “alofa mutimutivale.” (Luka 1:78; 2 Kori. 1:3; Fili. 1:8) Ua faapea mai se tasi o tusi e faatatau i le alofa mutimutivale: “O lenā uiga e sili atu nai lo o tatou faalogona e fia fesoasoani i tagata lē tagolima. O lona uiga e tatou te manatu mamafa iā i latou, ma gaoioi e saunia se fesoasoani ina ia faaleleia ai o latou olaga.” O le faapelepele o se malosiaga e uunaʻia ai i tatou e fesoasoani atu i isi.

12. E faapefea ona iloa sa alofa mutimutivale Iesu i isi, ma o le ā na uunaʻia ai o ia e fai?

12 Na faapefea ona faaalia e Iesu le faapelepele? O ona faalogona ma gaoioiga faapelepele. Sa alofa mutimutivale Iesu i isi. Ina ua ia silasila atu iā Maria ma isi o loo fetagisi ona o le maliu o lona tuagane o Lasalo, ona “tagi ai lea” o ia. (Faitau le Ioane 11:32-35.) Ua tigā alofa o ia ma ua ia faatūina Lasalo e pei o le tama a le fafine ua oti lana tane. (Luka 7:11-15; Ioa. 11:38-44) O lenā gaoioiga alofa, atonu na mafai ona tuu atu ai e Iesu iā Lasalo le avanoa e mafai ona ia maua ai le faamoemoe i le lagi. I se tasi mea na tupu, na “tigā alofa” Iesu i le motu o tagata lea na ō atu iā te ia. O lona alofa faapelepele na uunaʻia ai o ʻia e aʻoaʻo i latou i le tele o mea.’ (Mare. 6:34) Maʻeu se suiga o le olaga, mo so o se tasi e tali atu i ana aʻoaʻoga! O le faapelepele o Iesu e lē na o se faalogona, peitaʻi na uunaʻia ai foʻi o ia e tausolomua ona fesoasoani atu i isi.​—Mata. 15:32-38; 20:29-34; Mare. 1:40-42.

13. Na faapefea ona talanoa atu Iesu i isi i se auala faapelepele? (Tagaʻi i le ata i luga aʻe o le matua.)

13 O ana fetalaiga faapelepele. O faalogona māfana o Iesu na uunaʻia ai o ia e talanoa atu i isi ma le faapelepele, aemaise lava i latou na mafatia. Na faatatau atu e Mataio upu a Isaia iā Iesu: “O le a ia lē gausia le ū ua nutililiia; o le a ia lē tineia le vavae ua mū itiiti.” (Isa. 42:3; Mata. 12:20) Na fetalai Iesu i se auala na faalaeiauina ai loto o i latou o ē ua pei o se ū ua nutililiia, po o se vavae o se lamepa ua mū itiiti. Ua ia folafola atu le feʻau o le faamoemoe ina ia “fusifusi i ē ua loto momomo.” (Isa. 61:1) Na ia valaaulia foʻi i latou o ē ua “tigāina ma mafatia i avega” e ō mai iā te ia, ma faamautinoa atu o le a ʻʻfaafouina” ai i latou. (Mata. 11:28-30) Na ia faamautinoa atu i ona soo e manatu mamafa le Atua i ona tagata tapuaʻi e aofia ai ē “faatauvaa,” o ē foliga mai e lē tāua i le vaaiga a le lalolagi.​—Mata. 18:12-14; Luka 12:6, 7.

FAAAʻOAʻO I LE FAAPELEPELE O IESU

14. E faapefea ona atiaʻe o tatou faalogona faapelepele e faatatau i isi?

14 E faapefea ona tatou faaaʻoaʻo i le faapelepele o Iesu? O o tatou faalogona faapelepele. E lē otometi ona tatou mauaina na faalogona, ae ua faalaeiau i tatou e le Tusi Paia ina ia taumafai e atiaʻe. O le “alofa mutimutivale” o se vaega o le tagata fou lea e manaʻomia ona oofu ai Kerisiano uma. (Faitau le Kolose 3:9, 10, 12.) E faapefea ona atiaʻe o tatou faalogona faapelepele e faatatau i isi? Ia faalautele atu lou loto. (2 Kori. 6:11-13) Ia faalogologo lelei pe a sasaa atu faalogona ma popolega o se tasi iā te oe. (Iako. 1:19) Ia manatunatu ma fesili ifo iā te oe lava: ʻO ā ni oʻu faalogona pe afai e tuu aʻu i lona tulaga? O ā ni mea ou te manaʻomia?’​—1 Pete. 3:8.

15. E faapefea ona tatou fesoasoani i ē ua pei o ni ū ua nutililiia ma vavae ua mū itiiti?

 15 O a tatou gaoioiga faapelepele. O le faapelepele e uunaʻia ai i tatou e fesoasoani i olaga o isi, aemaise i latou ua pei o ni ū ua nutililiia ma ni vavae ua mū itiiti. E faapefea ona tatou fesoasoani iā i latou? Ua faapea mai le Roma 12:15: “Ia fetagisi faatasi ma ē o loo fetagisi.” E latou te manaʻomia lo tatou tigā alofa nai lo o le tau ina tali atu. Ua faapea mai se tuafafine na faamāfanafanaina e tagata tapuaʻi ina ua oti lana tama teine: “Na ou matuā talisapaia le ō mai o uō ma matou fetagisi faatasi.” E mafai foʻi ona faaalia o tatou faalogona faapelepele e ala i le faia o gaoioiga agalelei. Po o e iloa se fafine ua oti lana tane o loo manaʻomia se fesoasoani i le toe faaleleia o lona fale? Po o iai se Kerisiano matua o manaʻomia se auala e alu ai i sauniga, i talaʻiga ma alu ai e vaai le fomaʻi? E tusa lava pe e na o sina galuega agalelei ae e telē se aogā i olaga o isi. (1 Ioa. 3:17, 18) E mafai ona faaalia faalogona faapelepele i isi e ala i le faia o se sao atoatoa i le faiva. O le auala sili lenā e tatou te fesoasoani ai i tagata loto faamaoni.

Po o e naunau moni lava i uso talitonu? (Tagaʻi i le palakalafa e 15)

16. O ā ni faaupuga e tatou te faia e faalaeiau ai i latou o mafatia?

16 O a tatou faaupuga faapelepele. O o tatou faalogona faapelepele e uunaʻia ai i tatou e “faamāfanafana i ē mafatia.” (1 Tesa. 5:14) O ā ni faaupuga e faalaeiauina ai i latou? E mafai ona faagaeetia o latou loto e ala i le faailoa atu o le naunau moni iā i latou. O le faamālō atu ma le faamaoni, e fesoasoani iā i latou e iloa ai o latou uiga lelei ma tomai. Ia faamanatu atu foʻi, na tosina mai i latou e Ieova i lona Alo, ma e tautele i latou i Lana silafaga. (Ioa. 6:44) Ia faamautinoa atu iā i latou, e manatu mamafa Ieova i ana auauna ua “loto nutimomoia.” (Sala. 34:18) O a tatou faaupuga faapelepele e mafai ona faafouina ai i latou o loo manaʻomia faamāfanafanaga.​—Faata. 16:24.

17, 18. (a) O le ā le auala o loo faatalitalia e Ieova toeaina e tausia ai ana mamoe? (e) O le ā o le a talanoaina i le mataupu o sosoo mai?

17 E faatalitalia e Ieova toeaina ina ia tausia ma le faapelepele ana mamoe. (Galu. 20:28, 29) Ia manatua o lo outou tiute tauave le faafaga, faalaeiau, ma faafouina ana mamoe. (Isa. 32:1, 2; 1 Pete. 5:2-4) O se toeaina e alofa faapelepele, e lē taumafai e pulea mamoe, pe faia ni tulafono, pe e taumafai e faamalosia i latou e faia ni mea se tele e lē talafeagai ma o latou tulaga. E taumafai o ia e faafiafia o latou loto, ma e na te mautinoa o lo latou alofa mo Ieova e uunaʻia ai i latou e auauna ma le lotoatoa.​—Mata. 22:37.

18 A o tatou manatunatu loloto i le lotomaulalo ma le faapelepele o Iesu, e mautinoa e uunaʻia ai i tatou e mulimuli pea i ona tulaga aao. O le a talanoaina i le mataupu o sosoo mai isi uiga lelei e lua o Iesu, o le lototele ma le faautaga loloto.