Skip to content

Skip to secondary menu

Skip to table of contents

Molimau a Ieova

Faa-Samoa

Le Olomatamata (Lomiga mo Su‘esu‘ega)  |  Ianuari 2015

Ia Faamalosia ma Leoleoina e Ieova Lau Faaipoipoga

Ia Faamalosia ma Leoleoina e Ieova Lau Faaipoipoga

“Afai e lē leoleoina e Ieova lava ia le aai, e mataala fua la lē e leoleoina.”​—SALA. 127:1e.

1, 2. (a) Aiseā na melea ai e tagata Isaraelu e 24,000 faamanuiaga matagofie? (e) Aiseā e tāua ai iā i tatou le mea na tupu i aso anamua?

A O TOEITIITI lava ulu atu Isaraelu i le Nuu Folafolaina, e faitau sefulu afe tane na faia “feusuaʻiga lē mamā ma afafine o tagata Moapi.” O le iʻuga e 24,000 tagata Isaraelu na faaumatia e Ieova. Seʻi manatu i le umi o le taimi na latou faatalitali ai, ma ua toetoe lava a maua lo latou tofi, ae toe melea lava ona o le lolo atu i faaosoosoga.​—Nu. 25:1-5, 9.

2 Na faamauina lenā faaaʻoaʻoga leaga, e “lapataʻia ai i tatou o ē o loo ola i le iʻuga o faiga o mea a le lalolagi.” (1 Kori. 10:6-11) Ua tatou ola i siʻui o “aso e gata ai,” ma ua matuā lalata atu auauna a le Atua i le lalolagi fou amiotonu. (2 Timo. 3:1; 2 Pete. 3:13) Ae pagā lea, ua paʻū maulalo le tulaga tau amio a nisi o tagata tapuaʻi o Ieova. Ua maileia i latou i amioga lē mamā, ma ua latou selesele mai ai āuga tigā. E latou te ono misia le faamanuiaga e ola ai e faavavau.

3. Aiseā e manaʻomia ai e ulugalii faaipoipo le taʻitaʻiga ma le puipuiga a Ieova? (Tagaʻi i le ata i luga aʻe o le matua.)

3 E manaʻomia e tane ma avā le taʻitaʻiga ma le puipuiga a  Ieova, a o taumafai e puipuia a latou faaipoipoga, talu ai ua sasao faaafi amioga lē mamā. (Faitau le Salamo 127:1.) O le a tatou talanoaina le auala e faamalosia ai e se ulugalii la laʻua faaipoipoga, e ala i le leoleoina o o la loto, mafuta vavalalata atu i le Atua, oofu i le tagata fou, tausisia o fesootaʻiga lelei, ma le tuuina atu o le mea e tatau ai i le faaipoipoga.

IA LEOLEOINA LOU LOTO

4. O le ā ua taʻitaʻia ai nisi Kerisiano e faia mea sesē?

4 E faapefea ona faaosoosoina se Kerisiano e faia amioga lē mamā? E masani lava ona amata mai i mata. Na faamatala e Iesu: “Ai se tasi e vaavaai pea i se fafine ma manaʻonaʻo i ai, ua uma ona mulilua ma ia i lona loto.” (Mata. 5:27, 28; 2 Pete. 2:14) O le toʻatele o Kerisiano ua lolo atu i amioga lē mamā, ona o le faitau i tusi e faatatau i feusuaʻiga, ma matamata i ata o tagata telenonoa i tusi, Initaneti, ma isi auala. O nisi ua matamata i ata matagā tau feusuaʻiga i vitiō, i tala faatino, ma polokalame o le televise. Ua ō atu nisi i fale kalapu, po o fale e fai ai faaaliga a tagata o loo telenonoa, po o le ō atu foʻi i fale e fai ai fofō e faagaee ai faalogona.

5. Aiseā e tatau ai ona leoleoina o tatou loto?

5 O nisi ua lolo atu i faaosoosoga ona ua sesē le tagata e liliu atu i ai mo se fesoasoani. Ua tatou ola i se lalolagi ua leai se pulea o tagata, ma ua fiafia i so o se ituaiga o amioga lē mamā. Talu ai o o tatou loto e lē lelei atoatoa, e taufaaʻoleʻole ma matuā leaga, e faigofie ai ona atiaʻe lagona fetosinaaʻi i se tasi e lē o sau paaga. (Faitau le Ieremia 17:9, 10.) Ua fetalai mai Iesu: “E sau mai i le loto o mafaufauga leaga, o le fasioti tagata, mulilua, faitaaga.”​—Mata. 15:19.

6, 7. (a) O le ā e tupu pe afai e mauaa i le loto se tuʻinanauga sesē? (e) E faapefea ona ʻalofia le faia o le agasala?

6 Ua amata ona mauaa tuʻinanauga sesē i loto taufaaʻoleʻole o ni tagata se toʻalua ua fetosinaaʻi. O le iʻuga, ua oo ina talanoa i mataupu e na o a latou paaga e tatau ona talanoa i ai. Mulimuli ane, ua la saʻilia foʻi ni avanoa e faatasitasi ai pea, ma ua fai ma masani le feiloaʻi ae faafoliga atu e la te leʻi fuafuaina. A o faasolo ina malolosi o laʻua faalogona, ua atili faigatā ai ona la faia le mea saʻo. O le atili māfana o la laʻua faiā, o le faigatā foʻi lenā ona faamuta, e ui lava ina iloa e sesē le mea o loo fai.​—Faata. 7:21, 22.

7 Ua matuā galo iā i laʻua tapulaa tau amio a Ieova. Na amata mai i tuʻinanauga ma talanoaga lē talafeagai, ma iʻu atu ai i le uu lima, feasogi, fusifusi ma milimili itutino sā ma isi gaoioiga lē pulea. O gaoioiga ia e na o totonu lava o le liʻo o le faaipoipoga e tatau ona faia ai. Mulimuli ane, “ua tosina ma maileia i [o laʻua] lava tuʻinanau.” Pe a malolosi tuʻinanauga, ona “fanau mai ai lea o le agasala,” o lona uiga o le mulilua. (Iako. 1:14, 15) Pagā se iʻuga faanoanoa! Sa ono mafai ona la ʻalofia le faia o le agasala, pe ana mulimuli i taʻiala a Ieova e faamalosia ai lo laʻua faaaloalo mo le paia o le faaipoipoga. E faapefea ona faia lenā mea?

IA MAFUTA VAVALALATA ATU PEA IĀ IEOVA

8. E faapefea i le faauōga ma Ieova ona avea o se puipuiga tau amio?

8 Faitau le Salamo 97:10. O le faauōga ma Ieova o le puna tāua lea mo le puipuiga  tau amio. A o tatou aʻoaʻoina uiga matagofie o Ieova, e tatou te taumafai “ia faaaʻoaʻo i le Atua e faapei o lana fanau pele, ma ia savavali i le alofa,” o le a faamalosia ai i tatou e teena le faia o le “faitaaga ma amioga lē mamā uma.” (Efe. 5:1-4) O le iloaina e tane ma avā “e faamasino e le Atua o ē e faitaaga ma ē e mulilulua,” e latou te galulue malosi ai e faamamaluina a latou faaipoipoga ma ia lē faaleeagaina.​—Epe. 13:4.

9. (a) Na faapefea ona teena e Iosefa faaosoosoga o amioga lē mamā? (e) O ā lesona e tatou te aʻoaʻoina mai i le faaaʻoaʻoga a Iosefa?

9 Ua faigatā i nisi auauna faamaoni a le Atua ona faia le mea saʻo, ona o le faifaimea faatasi ma ē e lē o ni Molimau latou te faigaluega faatasi pe a mānava. Ua faaosoosoina nisi a o iai i galuega. O le mea lenā na tupu iā Iosefa i le galuega, na ia iloa e faatosina le toʻalua o lona pule iā te ia. O aso uma lava e taumafai ai lenei fafine e tauanau o ia. Mulimuli ane, ona “tago atu lea o le fafine i lona ofu ma fai atu: ʻInā ta momoe ia.’” Peitaʻi na musu Iosefa ma sola ese mai iā te ia. O le ā na fesoasoani iā Iosefa e tumau ai i le faamaoni e ui ina faaosoosoina? O lona maumauaʻi ia aua neʻi faaleagaina lana faiā ma le Atua, na leoleoina ai lona tulaga mamā ma lona faamaoni. Na tuliesea o ia mai i lana galuega ma tuuina atu i le falepuipui, peitaʻi na faamanuia Ieova iā te ia. (Kene. 39:1-12; 41:38-43) E tatau i Kerisiano ona ʻalofia le tuua o i latou i tulaga e faaosoosoina ai ma se tasi e lē o sana paaga, i galuega po o se isi foʻi nofoaga.

IA OOFU I LE TAGATA FOU

10. O le ā le puipuiga tau amio e maua ona o le oofu i le tagata fou?

10 O le tagata fou lea “na foafoaina e tusa ma le finagalo o le Atua, i le amiotonu moni ma le faamaoni,” o le a puipuia ai tapulaa tau amio a se ulugalii. (Efe. 4:24) Pe a oofu i le tagata fou, ua tatou “fasiotia” ai tuʻinanauga i o tatou itutino “o le faitaaga, o amioga lē mamā, le tuʻinanau i feusuaʻiga, o tuʻinanauga leaga ma le manaʻo tele.” (Faitau le Kolose 3:5, 6.) O le upu “fasiotia” ua faailoa mai ai e tatau ona tatou tauivi malosi e tetee i tuʻinanauga leaga. O le a ʻalofia ai so o se mea e faagaee ai tuʻinanauga i feusuaʻiga ma se tasi e lē o sau paaga. (Iopu 31:1) Pe a ōgatusa o tatou olaga ma le finagalo o le Atua, o le a aʻoaʻoina ai i tatou ia “ʻinoʻino i le leaga, ae pipii i le lelei.”​—Roma 12:2, 9.

11. E faapefea i le oofu i le tagata fou ona faamalosia ai faaipoipoga?

11 O le oofu i le tagata fou ua tatou faaaʻoaʻo ai i uiga o Ieova. (Kolo. 3:10) Pe afai e faaalia e tane ma avā le “alofa mutimutivale, le agalelei, lotomaulalo, agamalu ma le faapalepale,” o le a faamalosia ai a latou faaipoipoga ma maua faamanuiaga a Ieova. (Kolo. 3:12) O le a maua le olioli i se faaipoipoga, pe afai e “pulea foʻi e le filemu mai iā Keriso o outou loto.” (Kolo. 3:15) E tauia ulugalii i le “alofa faapelepele [o] le tasi i le isi,” ma maua le fiafia pe a “tausolomua ona faaaloalo le tasi i le isi.”​—Roma 12:10.

12. O ā uiga e te manatu e tāua mo se faaipoipoga fiafia?

12 Ina ua fesiligia se ulugalii po o ā uiga na saosaolaumea i la laʻua faaipoipoga fiafia, na faapea mai Sid: “O le alofa, o le uiga autū lea e masani ona ma galulue i ai. Ua ma iloa foʻi e ese le tāua o le agamalu.” Ua ioe i ai i lana avā o Sonja ma faapea mai: “E mautinoa e tāua foʻi le  agalelei. Ua ma taumafai e faaalia le lotomaulalo e ui e lē faigofie.”

TAUSIA FESOOTAʻIGA LELEI

13. O le ā se tasi o ki mo se faaipoipoga tumau, ma aiseā?

13 O le talanoa atu i se auala agalelei, o se tasi foʻi lea o ki mo se faaipoipoga tumau. Pagā le faanoanoa ona o nisi ulugalii, ua sili atu ona faaaloalo pe a talanoa i tagata ese po o a latou fagafao, nai lo o a latou paaga! Pe a faia e ulugalii ni faamatalaga ona o le “ita umi, ma le itaitagofie, ma le lotoa, ma le soona ʻeʻē, ma upu masoā,” e faaleagaina ai la laʻua faiā i le faaipoipoga. (Efe. 4:31) E tatau i ulugalii ona faamalosia la laʻua faiā, e ala i le talanoa atu ma le agalelei, faapelepele ma le alofa, nai lo o le soona faitio ma faia faamatalaga tutui.​—Efe. 4:32.

14. O ā gaoioiga e atamai ona ʻalofia?

14 Ua faapea mai le Tusi Paia e iai le “taimi e filemu ai.” (Fai. 3:7) E lē o le uiga o lenei mea o le a tatou lē talanoa ai iā tatou paaga faaipoipo, auā e tāua fesootaʻiga mo se faaipoipoga lelei. Ua faapea mai se avā mai i Siamani: “I na tulaga, o le lē talanoa e mafai ona faatigā ai i lau paaga.” Peitaʻi, ua ia toe faapea mai: “E ui e lē faigofie ona toʻafilemu i le taimi e popole ai, ae e lē lelei ona faapasae aʻe lou ita. E te ono faia ai se faamatalaga po o se gaoioiga e tigā ai lau paaga, ma atili ai ona leaga le tulaga o mea.” E lē tatau i avā ma tane ona foʻia o latou faafitauli i le soona ee, po o le mumusu foʻi e talanoa. Nai i lo o lea, e faamalosia la laʻua faaipoipoga e ala i le vave foʻia o feeseeseaʻiga, ma aua neʻi tuua seʻia oo ina tupu ai ni finauga.

15. E mafai faapefea e fesootaʻiga lelei ona faamalosia ai se faaipoipoga?

15 E mafai e se ulugalii ona faamalosia la laʻua faaipoipoga, pe a sema se taimi e fefaasoaaʻi ai o la lagona ma manatu. O le auala e fai atu ai se faamatalaga e tāua e pei o le mea o loo e fai atu ai. O lea la, e tusa lava po o ā tulaga faigatā, ia faia le  mea sili e faaaogā ai upu logolelei ma tautala atu i se leo mālū. O le a faigofie ai mo lau paaga ona faalogo iā te oe. (Faitau le Kolose 4:6.) E mafai e se ulugalii ona faamalosia la laʻua faaipoipoga i fesootaʻiga lelei, e ala i le fai atu o “upu lelei e atiaʻe ai i taimi e tatau ai, ina ia aogā” i lana paaga.​—Efe. 4:29.

E mafai e le tane ma le avā ona faamalosia la laʻua faaipoipoga e ala i fesootaʻiga lelei (Tagaʻi i le palakalafa e 15)

TUUINA ATU LE MEA E TATAU AI I LE FAAIPOIPOGA

16, 17. Aiseā e tāua ai i ulugalii ona manatu mamafa i faalogona ma manaʻoga tau feusuaʻiga o a latou paaga?

16 E mafai foʻi e ulugalii ona atiaʻe se faaipoipoga malosi, e ala i le faamuamua o mea e lelei ai a latou paaga nai lo o i latou lava. (Fili. 2:3, 4) E tatau i tane ma avā ona manatu mamafa i faalogona ma manaʻoga tau feusuaʻiga o a latou paaga.​—Faitau le 1 Korinito 7:3, 4.

17 E faanoanoa lava ona o nisi paaga faaipoipo ua mumusu e faaali o latou faalogona alofa ma faia feusuaʻiga, ma o nisi tane ua latou manatu o se uiga vaivai le faapelepele o se avā. Ua faapea mai se faaliliuga o le Tusi Paia: “O outou tane, ia taumafai e malamalama iā outou avā.” (1 Pete. 3:7, Phillips) E tatau i le tane ona malamalama o le tuuina atu o le mea e tatau ai i le faaipoipoga, e lē na o feusuaʻiga e aofia ai. E tatau i le tane ona alofa ma faapelepele i taimi uma, ma o le a olioli ai lana avā i taimi o feusuaʻiga. Pe afai e la te faaalia le alofa ma le magafagafa, o le a faamalieina ai o la faalogona ma manaʻoga faaletino.

18. E mafai faapefea e le tane ma le avā ona faamalosia la laʻua faaipoipoga?

18 E lē tatau ona iai se faamolemolega mo i tatou e lē faamaoni ai i le faaipoipoga. Peitaʻi o le leai o se alofa faapelepele, o se māfuaaga lea e ono saʻili atu ai le tane po o le avā i feusuaʻiga ma se tasi e lē o sana paaga. (Faata. 5:18; Fai. 9:9) O le mea lea ua lapataʻi mai ai le Tusi Paia i ulugalii faaipoipo: “Aua le faafiti le tasi i le isi i lenei mea, seʻiloga e malilie faatasi i se taimi ua fuafuaina.” Aiseā? “Ina neʻi faaosoosoina outou e Satani ona o le lē puleaina o outou faalogona.” (1 Kori. 7:5) Pagā se faanoanoa pe afai e faaaogā e Satani le ʻlē puleaina o faalogona,’ e faaosooso ai se tasi o i laʻua e faia le mulilua! O le tuuina atu o le mea e tatau ai i le faaipoipoga, e lē saʻili ai e le paaga “lona lava lelei, a ia faaauau ona saʻili le lelei o isi.” E la te faia lenā mea, ona e alofa le tasi i le isi, ae e lē o se mea e tau ina fai. O le faaalia o le alofa faapelepele i taimi o feusuaʻiga, e faamalosia ai la laʻua faaipoipoga.​—1 Kori. 10:24.

IA LEOLEOINA PEA LAU FAAIPOIPOGA

19. O le ā e tatau ona tatou maumauaʻi e fai, ma aiseā?

19 Ua tatou lalata atu i le lalolagi fou amiotonu. Pagā se leaga o le lolo atu i tuʻinanauga sesē e pei ona sa faia e tagata Isaraelu e 24,000 i Moapi! Ina ua uma ona faamatalaina le mea na tupu, ona lapataʻi mai lea o le Tusi Paia: “O lē ua manatu o loo tū o ia, ia faaeteete neʻi paʻū.” (1 Kori. 10:12) Maʻeu le tāua o le faamalosia o a tatou faaipoipoga e ala i le tumau ma le faamaoni i lo tatou Tamā o i le lagi ma a tatou paaga! (Mata. 19:5, 6) O lea la, o le taimi sili lenei e ʻtatou te finafinau ai ina ia maua mai tatou e ia, e leai so tatou ila, e lē ponā, ma e filemu.’​—2 Pete. 3:13, 14.