Skip to content

Skip to table of contents

Ia Faafetai Atu iā Ieova ma Manuia Ai

Ia Faafetai Atu iā Ieova ma Manuia Ai

“Ia faafetai atu iā Ieova, auā e lelei o ia.”​—SALA. 106:1.

1. Aiseā e alagatatau ai ona avatu iā Ieova le faafetai?

UA FOAʻI mai e Ieova “meaalofa lelei uma ma mea uma e atoatoa ona lelei,” ma e alagatatau ai ona avatu iā te ia le faafetai. (Iako. 1:17) O ia o lo tatou Leoleo Mamoe alofa, ma e na te tausia faapelepele i tatou i le itu faaletino ma le faaleagaga. (Sala. 23:1-3) Ua faamaonia o Ieova “o lo tatou malu ma lo tatou malosi,” aemaise lava i taimi o puapuaga. (Sala. 46:1) E tele māfuaaga e tatou te ioe ai i le manatu o le faisalamo: “Ia faafetai atu iā Ieova, auā e lelei o ia, auā e faavavau lava lona alofa faamaoni.”​—Sala. 106:1.

O le mau o le tausaga 2015: “Ia faafetai atu iā Ieova, auā e lelei o ia.”​—Salamo 106:1

2, 3. (a) Aiseā o se lamatiaga ai le lē talisapaia o faamanuiaga ua tatou mauaina? (e) O ā fesili o le a iloiloina i lenei mataupu?

2 Aiseā e tāua ai ona tatou faafetai atu iā Ieova? E pei ona valoia, o le a faateteleina le lē loto faafetai o tagata i aso e gata ai. (2 Timo. 3:2) E lē talisapaia e le toʻatele faamanuiaga ua latou mauaina. Ua latou aafia i le uiga matapeʻapeʻa o le lalolagi, ma ua taumafai le faitau miliona e faatau mai isi mea e latou te lē manaʻomia, nai lo o le lotomalie i mea ua maua. E  mafai foʻi ona tatou aafia i lenā uiga o le lē loto faafetai. E pei o tagata Isaraelu anamua, e mafai ona tatou aafia i le lē loto faafetai, ma lē talisapaia ai la tatou faiā tautele ma Ieova, faapea faamanuiaga mai iā te ia.​—Sala. 106:7, 11-13.

3 Pe a feagai ma tulaga faigatā, o taimi na e faigofie ona lofitūina ai i tatou, ma lē uaʻi ai i faamanuiaga ua tatou mauaina. (Sala. 116:3) O lea seʻi o tatou iloiloina fesili nei: E faapefea ona tatou atiaʻe ma faatumauina le loto faafetai? O le ā e fesoasoani iā i tatou e faatumau se vaaiga saʻo e ui i tulaga faigatā?

“E TELE LAVA MEA UA E FAIA, IEOVA E”

4. E faapefea ona tatou faatumauina le uiga o le loto faafetai?

4 Pe a tatou mananaʻo e atiaʻe ma faatumauina le loto faafetai, e tatau ona tatou iloa o tatou faamanuiaga mai iā Ieova. Ia manatunatu loloto foʻi i auala ua faailoa mai ai lona alofa faamaoni iā i tatou. O le faia faapea, na matuā maofa ai le faisalamo ina ua ia iloa le tele o mea matagofie na faia e Ieova mo ia.​—Faitau le Salamo 40:5; 107:43.

5. O le ā e tatou te aʻoaʻoina mai i le aposetolo o Paulo i le atiaʻe o le loto faafetai?

5 E mafai ona tatou aʻoaʻoina ni lesona mai i le aposetolo o Paulo i le atiaʻe o le loto faafetai. Sa ia manatunatu loloto i faamanuiaga sa ia mauaina, auā sa ia faailoa atu e lē aunoa lona loto faafetai. Sa iloa lelei e Paulo o ia o se tagata sa ʻupuleaga muamua ma faasauā, ma fiasili.’ O lea na ia loto faafetai ai, auā e ui i ona uiga leaga sa iai, ae na faaalia e le Atua ma Keriso le agalelei iā te ia, ma tuuina atu se faiva iā te ia. (Faitau le 1 Timoteo 1:12-14.) Sa talisapaia foʻi e Paulo ona uso Kerisiano, ma faafetai e lē aunoa iā Ieova ona o o latou uiga lelei ma le faamaoni. (Fili. 1:3-5, 7; 1 Tesa. 1:2, 3) I le taimi na feagai ai Paulo ma tulaga faigatā, sa vave ona ia faafetai atu iā Ieova, mo le fesoasoani talafeagai sa ia maua mai i ona uso faaleagaga. (Galu. 28:15; 2 Kori. 7:5-7) O lea, e lē faateʻia i tatou ina ua faalaeiau atu Paulo i Kerisiano: “Ia faaalia foʻi lo outou loto faafetai . . . , ma apoapoaʻi atu le tasi i le isi i salamo, o viiga i le Atua, o pese mananaia faaleagaga.”​—Kolo. 3:15-17.

O LE MANATUNATU LOLOTO MA LE TATALO E FESOASOANI E FAATUMAU AI LE LOTO FAAFETAI

6. O ā mea e te loto faafetai ai iā Ieova?

6 E faapefea ona tatou faataʻitaʻi i le faaaʻoaʻoga lelei a Paulo i le atiaʻe ma le faaalia o le loto faafetai? E pei o Paulo, e manaʻomia ona tatou manatunatu loloto i mea ua faia e Ieova mo i tatou taʻitoʻatasi. (Sala. 116:12) Pe a fesili atu se tasi iā te oe, ʻO ā faamanuiaga mai iā Ieova e te loto faafetai ai?’ O le ā lau tali? Po o le a e faaaofia ai lau faiā tautele ma Ieova? Ae faapefea le faamagaloga ua e mauaina ona o lou faatuatua i le taulaga togiola a Keriso? Pe e te faaaofia ai ma igoa o uso ma tuafāfine na fesoasoani iā te oe i tofotofoga faigatā? E mautinoa e lē galo iā te oe lau paaga faaipoipo ma lau fanau peleina. O le faaalu o le taimi e manatunatu loloto ai i faamanuiaga matagofie mai i lo tatou Tamā alofa o Ieova, o le a faatumulia ai o tatou loto i le faafetai. O le iʻuga, o le a uunaʻia ai i tatou e faafetai atu iā te Ia i aso taʻitasi.​—Faitau le Salamo 92:1, 2.

7. (a) Aiseā e tatau ai ona tatou faafetai atu iā Ieova e ala i le tatalo? (e) O ā aogā e maua mai i le faaalia o le loto faafetai i le tatalo?

 7 Pe a mafaufau i o tatou faamanuiaga, o le a saunia ai o tatou loto e tatalo ma avatu iā Ieova le faafetai. (Sala. 95:2; 100:4, 5) O nisi e faatoʻā tatalo i le Atua pe a mananaʻo i ni mea. Peitaʻi, ua tatou iloa e fiafia le finagalo o Ieova pe a faaalia le loto faafetai i mea ua tatou maua. O loo iai i le Tusi Paia le anoanoaʻi o tatalo faafetai, e aofia ai tatalo a Hana ma Esekia. (1 Samu. 2:1-10; Isa. 38:9-20) O lea, ia faataʻitaʻi i auauna faamaoni na faaalia le loto faafetai. Ia tatalo iā Ieova e faafetai ai mo faamanuiaga ua tatou mauaina. (1 Tesa. 5:17, 18) O le faia faapea, e maua ai le tele o aogā. O le a faafouina ai oe, faamalosia lou alofa mo Ieova, ma mafuta vavalalata atu ai iā te ia.​—Iako. 4:8.

O ā faamanuiaga mai iā Ieova e te loto faafetai ai? (Tagaʻi i le palakalafa 6, 7)

8. O le ā e ono māfua ai ona tatou lē loto faafetai?

8 Aiseā e tatau ai ona tatou nofouta i le lamatiaga o le mou atu o lo tatou loto faafetai mo mea lelei ua faia e Ieova? Talu ai ua tuufaasolo mai iā i tatou le uiga o le lē loto faafetai. Seʻi mafaufau i le vala lenei: Sa iai o tatou uluaʻi mātua o Atamu ma Eva i se faatoʻaga Parataiso. Sa faamalieina o laʻua manaʻoga uma, ma mafai ona ola e faavavau i se olaga filemu. (Kene. 1:28) E la te leʻi talisapaia o la faamanuiaga, ae na manaʻonaʻo i nisi mea. O le iʻuga, na la melea mea uma. (Kene. 3:6, 7, 17-19) Ua siʻomia i tatou i se lalolagi e lē loto faafetai, ma e mafai ona tatou lē talisapaia ai mea ua faia e Ieova mo i tatou. Atonu o le a amata ona tatou faalēano i la tatou faauōga ma Ieova, ma lē talisapaia le faaeaga o le avea ma vaega o lo tatou ʻauuso i le lalolagi aoao. E mafai ona tatou tosina ese atu ai i mea o le lalolagi lea o lea mavae ese atu. (1 Ioa. 2:15-17) E mafai ona ʻalofia lenā mailei, pe a tatou manatunatu loloto i o tatou faamanuiaga, ma faafetai e lē aunoa iā Ieova i le faaeaga o le avea o i tatou ma ona tagata.​—Faitau le Salamo 27:4.

PE A FEAGAI MA TOFOTOFOGA

9. Aiseā e tatau ai ona tatou manatunatu i o tatou faamanuiaga, pe a feagai ma tofotofoga e sili ona faigatā?

9 O le loto faafetai e fesoasoani iā i tatou e feagai ai ma tofotofoga e sili ona faigatā. Atonu e tatou te mafatia pe a faafuaseʻi  ona suia o tatou olaga, ona o faafitauli ogaoga e pei o le lē faamaoni o le paaga faaipoipo, maʻi tugā, maliu o sē e pele, po o aafiaga foʻi o se mala faalenatura. I taimi faapena, e mafai ona faamāfanafanaina ma faamalosia i tatou e ala i le manatunatu i faamanuiaga ua tatou mauaina. Seʻi o tatou iloiloina nisi o mea moni na tutupu.

10. Na faapefea ona maua e Irina aogā ona o le manatunatu i ona faamanuiaga?

10 O Irina *, o se paeonia sauatoa i Amerika i Mātū. Sa faaipoipo i se toeaina na lē faamaoni ma lafoaʻia o ia ma lana fanau. O le ā na fesoasoani iā Irina e auauna faamaoni ai iā Ieova? Na ia faapea mai: “Ou te loto faafetai i le tausiga a Ieova iā te aʻu. O le manatunatu i oʻu faamanuiaga i aso taʻitasi, ua ou iloa ai o se faaeaga le iloaina ma le alofa mai o lo tatou Tamā o i le lagi iā te aʻu. Ou te iloa e lē mafai ona ia tuulafoaʻia aʻu.” E ui na feagai Irina ma le tele o tulaga faigatā i lona olaga, ae o lona olioli ua ia tumau ai pea, ma avea ai o ia ma puna o faalaeiauga i isi.

11. O le ā na fesoasoani iā Kyung-sook e fesagaʻia ai lona maʻi tugā?

11 E nonofo Kyung-sook ma lana tane i Asia, ma na paeonia mo le silia i le 20 tausaga. Sa faafuaseʻi ona aafia ona māmā i le kanesa, ma na faailoa ane iā te ia, ua toe tolu i le ono masina ona maliu loa lea. Sa lelei lo la soifua mālōlōina i le taimi muamua, e ui i le tele o tofotofoga eseese sa la fesagaʻia. Na ia faapea mai: “Na ou matuā aafia lava i lenei maʻi. Na ou mafaufau ua leai soʻu faamoemoe, ma sa ou matuā fefe lava.” O le ā na fesoasoani iā Kyung-sook? Na ia faapea mai: “Ae ou te leʻi moe i le pō, ou te alu i le fale a luga o lo ma fale ma tatalo e faatatau i ni mea se lima ou te faafetai ai iā Ieova i lenā aso. Ou te lagona le māfanafana, ma uunaʻia ai aʻu e faailoa atu loʻu alofa iā Ieova.” Na faapefea ona maua e Kyung-sook aogā mai i na tatalo? Na ia faapea mai: “Ua ou iloa o Ieova ua faamalosia i tatou i tofotofoga eseese, ma e tele atu faamanuiaga i o tatou olaga nai lo o tofotofoga.”

O i laʻua ma lona tuagane o John lea na faasaoina (Tagaʻi i le palakalafa 13)

12. Na faapefea ona faamāfanafanaina Iasoni ina ua maliu lana avā?

12 O loo auauna Iasoni i le ofisa o le lālā i Aferika, ma ua silia i le 30 tausaga o auai i le auaunaga faataimi atoa. Ua ia faapea mai: “I le fitu tausaga ua mavae, na maliu ai laʻu avā ma na ou matuā mafatia ai lava. Pe a ou mafaufau i le taimi na tigāina ai o ia i le kanesa, ou te matuā faanoanoa ai lava.” O le ā na fesoasoani iā Iasoni? Na ia faapea mai: “Ou te mafaufau i taimi na ma fiafia faatasi ai ma laʻu avā, ma ou faafetai ai iā Ieova. Sa ou maua ai le toʻafilemu, ma amata ai ona ou faafetai e lē aunoa mo na taimi fiafia. O le loto faafetai na suia ai laʻu vaaiga. O loo oʻu mafatia pea, ae o le faafetai iā Ieova mo se faaipoipoga fiafia, ma le faaeaga o le auauna faatasi ma se tasi e alofa moni iā te ia, ua suia ai laʻu vaaiga.”

“Ou te matuā faafetai ona o Ieova o loʻu Atua.”​—Sheryl

13. O le ā na fesoasoani iā Sheryl ina ua maliliu le toʻatele o lona aiga?

13 I le taufaaiʻuiʻuga o le 2013, na taia ai le ogatotonu o Filipaina e le afā malosi o Haiyan. E na o le 13 tausaga o Sheryl i le taimi na tupu ai lenei mala mataʻutia. Na ia faapea mai: “Na faaleagaina lo matou fale, ma na maliliu le toʻatele o loʻu aiga.” Na maliliu ona mātua, faapea lona tuagane ma ona uso e toʻalua. O le ā na fesoasoani iā Sheryl i na taimi faigatā? Sa ia  loto faafetai pea i faamanuiaga o loo ia mauaina: “Sa ou vaaia le fesoasoani mai o uso ma aumaia faalaeiauga iā i latou na manaʻomia le fesoasoani. Ou te iloa o loo tatalo uso uma i le lalolagi aoao mo aʻu.” Na ia toe faapea mai: “Ou te matuā faafetai ona o Ieova o loʻu Atua. E na te aumaia pea mea e tatou te manaʻomia.” O le manatunatu i o tatou faamanuiaga, o se vaifofō sili lea mo mafatiaga. O le iai o se lototalisapaia e tatou te tumau ai pea e tusa po o ā faigatā e tatou te fesagaʻia.​—Efe. 5:20; faitau le Filipi 4:6, 7.

“A O AʻU OU TE OLIOLI IĀ IEOVA”

14. O le ā le faamoemoe matagofie o loo tatou faatalitali i ai? (Tagaʻi i le ata i luga aʻe o le matua.)

14 A o faagasolo taimi, o loo olioli tagata o Ieova i faamanuiaga ua latou mauaina. O se faaaʻoaʻoga, ina ua faasaoina tagata Isaraelu mai iā Farao ma ana ʻautau i le sami Ulaula, na faailoa atu lo latou olioli i pese o viiga ma faafetai. (Eso. 15:1-21) I aso nei, o se tasi o o tatou faamanuiaga tautele, o le mautinoa lea i lo tatou faamoemoe lea o le a lē toe iai ni tigā. (Sala. 37:9-11; Isa. 25:8; 33:24) Seʻi mafaufau i o tatou faalogona i le taimi o le a faaumatia ai e Ieova ona fili uma, ma taʻitaʻiina atu i tatou i le lalolagi fou filemu ma amiotonu. Maʻeu lo tatou loto faafetai i lenā taimi!​—Faaa. 20:1-3; 21:3, 4.

15. O le ā ua e maumauaʻi e fai a o faagasolo le 2015?

15 A o faagasolo le 2015, e tatou te tulimataʻia le tele o faamanuiaga faaleagaga mai iā Ieova. E tatou te ono fesagaʻia tofotofoga. Peitaʻi, e tatou te mautinoa e lē tuulafoaʻia i tatou e Ieova. (Teu. 31:8; Sala. 9:9, 10) O le a faaauau ona ia saunia mea uma e tatou te manaʻomia, ina ia auauna ai iā te ia ma le faamaoni. O lea, ia tatou faaaʻoaʻo iā Sapakuka o lē na faapea mai: “E ui ina lē fuga mai le mati ma lē fua mai le vine; e iʻuvale foʻi fua o le laau o le olive, e lē tupu mai ni mea e ʻai mai i fanua malifa; e faaumatia le lafu mamoe mai i le lotoā, ma e leai ni lafu i le pā; a o aʻu ou te olioli iā Ieova; ou te fiafia i le Atua o loʻu faaolataga.” (Sapa. 3:17, 18) A o faagasolo lenei tausaga, seʻi faaauau ona tatou manatunatu i faamanuiaga ua tatou mauaina, ma mulimuli i le apoapoaʻiga i le mau o le tausaga 2015: “Ia faafetai atu iā Ieova, auā e lelei o ia.”​—Sala. 106:1.

^ pala. 10 Ua suia nisi igoa i lenei mataupu.