Skip to content

Skip to secondary menu

Skip to table of contents

Molimau a Ieova

Faa-Samoa

Le Olomatamata (Lomiga mo Su‘esu‘ega)  |  Ianuari 2015

Aiseā e Tatau ai Ona Faamanatu le Talisuaga Afiafi a le Alii?

Aiseā e Tatau ai Ona Faamanatu le Talisuaga Afiafi a le Alii?

“Ia faia pea lenei mea e fai ma faamanatuga iā te aʻu.”​—1 KORI. 11:24.

1, 2. O le ā na faia e Iesu i le afiafi o Nisani 14 i le 33 T.A.? (Tagaʻi i le ata i luga aʻe o le matua.)

UA VAAIA le atoa o le masina i Ierusalema i le pō o Nisani 14 i le 33 T.A. I lenā afiafi, na faamanatu ai e Iesu ma ona aposetolo le Paseka, e manatua ai le taimi na faasaʻoloto ai tagata Isaraelu mai i Aikupito i le 1,500 tausaga ua mavae. Sa amata ai foʻi e Iesu ma ona aposetolo faamaoni e toʻa 11, se tausamiga faapitoa e faamanatu ai lona maliu, lea na tupu a o leʻi māeʻa lenā aso. *​—Mata. 26:1, 2.

2 Na faia e Iesu le faafetai ona tufa atu lea o le areto lē faafefeteina i ona aposetolo ma faapea atu: “Ia outou aai.” Sa ia tago foʻi i le ipu uaina, ua fai le faafetai, ma faapea atu: “Inā inu ia outou uma i ai.” (Mata. 26:26, 27) E iai le uiga faapitoa o le uaina ma le areto, ma e tele mea na aʻoaʻoina e soo faamaoni o Iesu i lenā pō tāua.

3. O ā fesili o le a iloiloina i lenei mataupu?

3 Na faavae e Iesu le Faamanatuga o lona maliu, lea ua taʻua  o “le talisuaga afiafi a le Alii.” (1 Kori. 11:20) O lea, ua fesili ai nisi: Aiseā e faamanatu ai le maliu o Iesu? O le ā le uiga o le areto ma le uaina? E faapefea ona tatou sauniuni mo le Faamanatuga? O ai e tatau ona tagofia le areto ma le uaina? E faapefea ona faaalia atu e Kerisiano e tāua iā i latou lo latou faamoemoe?

AISEĀ E FAAMANATU AI LE MALIU O IESU?

4. O le ā ua mafai ona faataunuuina i le maliu o Iesu?

4 O le agasala a Atamu ua tuufaasolo mai ai iā i tatou le agasala ma le oti. (Roma 5:12) E leai se tagata lē lelei atoatoa e mafai ona avatu i le Atua se togiola mo lona ola, po o le ola o se isi tagata. (Sala. 49:6-9) Peitaʻi o le maliu o Iesu, e na o le pau lea o le togiola talafeagai auā e lelei atoatoa lona tino ma lona toto. O le ofoina atu e Iesu o le tāua o lana taulaga i le Atua, ua faasaʻoloto ai i tatou mai i le agasala ma le oti, ma maua ai le meaalofa o le ola e faavavau.​—Roma 6:23; 1 Kori. 15:21, 22.

5. (a) E faapefea ona tatou iloa e alolofa le Atua ma Keriso i le fanau a tagata? (e) Aiseā e tatau ai ona tatou auai i le faamanatuina o le maliu o Iesu?

5 O le sauniuniga o le taulaga togiola, ua faamaonia ai le alofa o le Atua i le fanau a tagata. (Ioa. 3:16) Ua faamaonia ai foʻi le alofa o Iesu iā i tatou. A o leʻi afio mai Iesu i le lalolagi, sa avea o ia ma “tufuga poto” a le Atua, ma sa “matuā fiafia [o ia] i le fanau a tagata.” (Faata. 8:30, 31) O lo tatou loto faafetai i le Atua ma lona Alo, e uunaʻia ai i tatou e auai i le faamanatuina o le maliu o Iesu, ma usitaʻia le faatonuga: “Ia faia pea lenei mea e fai ma faamanatuga iā te aʻu.”​—1 Kori. 11:23-25.

O LE Ā LE UIGA O LE ARETO MA LE UAINA?

6. O le ā la tatou vaaiga e tatau ona iai i le areto ma le uaina e faaaogā i le Faamanatuga?

6 I le taimi na faavae ai e Iesu le Faamanatuga, e leʻi liua faavavega e Iesu le areto ma le uaina, e avea ma lona tino ma lona toto. Nai lo lea, na ia fetalai e faatatau i le areto: “O le faatusa lenei o loʻu tino.” Na ia fetalai foʻi i le uaina: “O le faatusa lenei o loʻu ʻtoto o le feagaiga,’ o le a faamaligiina mo tagata e toʻatele.” (Mare. 14:22-24) E faailoa manino mai ai, e iai se uiga faafaatusa o le areto ma le uaina.

7. O le ā ua faaāta mai i le areto e faaaogā i le Faamanatuga?

7 I lenā pō tāua i le 33 T.A., na faaaogā ai e Iesu le areto e lē faafefeteina na totoe mai i le tausamiga o le Paseka. (Eso. 12:8) I le Tusi Paia, e iai taimi e faaāta mai ai e le mea faafefete faiga piʻopiʻo po o le agasala. (Mata. 16:6, 11, 12; Luka 12:1) O lea, e tāua le faaaogāina e Iesu o le areto lē faafefeteina, auā ua talafeagai ona faaāta mai ai lona tino lelei atoatoa. (Epe. 7:26) O lea, o le ituaiga areto lenā e faaaogā i le Faamanatuga.

8. O le ā ua faaāta mai i le uaina e faaaogā i le Faamanatuga?

8 O le uaina na faaaogā e Iesu iā Nisani 14, i le 33 T.A. na faaāta mai ai le toto o Iesu, e pei foʻi o le uaina e faaaogā i le Faamanatuga i aso nei. I Kolokota, o se nofoaga i fafo atu o Ierusalema, na faamaligiina ai le toto o Iesu “e faamagalo ai agasala.” (Mata. 26:28; 27:33) O le areto ma le uaina e faaaogā i le Faamanatuga e faaāta mai ai le taulaga tautele na ofoina e Iesu mo tagata usiusitaʻi, ma e tatou te talisapaia lenā sauniuniga. O lea, e talafeagai ai ona tatou sauniuni e faamanatu le Talisuaga Afiafi a le Alii i tausaga taʻitasi.

 NISI O AUALA E SAUNIUNI AI

9. (a) Aiseā e tāua ai le faia o le faitauga Tusi Paia o le Faamanatuga? (e) O ā ni ou faalogona e faatatau i le togiola?

9 O le mulimuli i le faasologa o le faitauga Tusi Paia o le Faamanatuga o loo maua i le tamaʻitusi Iloiloina Tusitusiga Paia i Aso Taʻitasi, e tatou te manatunatu ai i mea na faia e Iesu a o leʻi maliu. O le iʻuga, e mafai ona sauniuni ai o tatou loto mo le Faamanatuga. * Na tusi mai se tasi tuafafine: “Ou te tulimataʻia le Faamanatuga, ma o se sauniga faapitoa iā te aʻu i tausaga taʻitasi. Ou te manatua loʻu iai i le fale maliu . . . ma vaavaai atu i le tino oti o si oʻu tamā pele, na ou matuā talisapaia ai le togiola. . . . Sa ou iloa uma mau o le Tusi Paia ma le auala e faamatala ai. Peitaʻi o le matuitui o le oti, sa olioli ai loʻu loto i mea o le a faataunuuina e ala i le togiola.” A o sauniuni mo le Faamanatuga, e tāua ona tatou manatunatu i le auala ua faasaʻoloto ai e le togiola a Iesu i tatou mai i le agasala ma le oti.

Faaaogā meafaigaluega ua saunia atu e sauniunia ai lou loto mo le Faamanatuga (Tagaʻi i le palakalafa 9)

10. E faapefea i le sauniuni mo le Faamanatuga ona aafia ai la tatou faiva?

10 O le sauniuni mo le Faamanatuga e aofia ai le faateleina o se sao i le faiva, e pei o le paeonia lagolago i le vaitaimi o le Faamanatuga. Pe a valaaulia tagata suʻesuʻe ma isi i le Faamanatuga, e tatou te maua le olioli i le talanoa iā i latou e faatatau i le Atua, lona Alo, ma faamanuiaga e maua e i latou e faafiafiaina ma viia Ieova.​—Sala. 148:12, 13.

11. Na faapefea ona aai ma feinu faalētatau i le areto ma le uaina nisi o Kerisiano i Korinito?

11 A o sauniuni mo le Faamanatuga, ia iloilo le tusi a Paulo i le faapotopotoga i Korinito. (Faitau le Korinito 11:27-34.) Na taʻua e Paulo o so o se tasi e ʻai ma inu faalētatau i le areto ma le uaina, e “nofosala o ia i le tino ma le toto o le Alii” o Iesu Keriso. O lea, e tatau i le ʻaufaauuina ona ʻsuʻesuʻe ifo, e faamautinoa ai pe e tatau ona ʻai ma inu.’ Pe a lē faia faapea, o le a “ʻai o ia ma inu i lona lava faamasinoga.” E leʻi talafeagai amioga a le toʻatele o i latou i Korinito, ma na “vaivai ma mamaʻi, ma ua toʻatele foʻi o ē ua feoti [faaleagaga].” Atonu o nisi sa aai ma inu tele a o leʻi faia  pe a o faia foʻi le Faamanatuga, ma tautulemomoe ai. O le tagofia o le areto ma le uaina i lenā auala lē faaaloalo, na latou lē maua ai le finagalo malie o le Atua.

12. (a) O le ā na faatusa i ai e Paulo le Faamanatuga, ma o le ā le lapataʻiga na ia avatu i ē e tagofia le areto ma le uaina? (e) O le ā e tatau ona faia e se tasi e tagofia le areto ma le uaina, pe a ia faia se agasala matuiā?

12 Na faatusa e Paulo le Faamanatuga i se tausamiga e faia ma isi tagata, ma na ia lapataʻia i latou e tagofia le areto ma le uaina: “E lē mafai ona outou inu i le ipu a Ieova ma le ipu a temoni; e lē mafai foʻi ona outou aai i ʻle laoai a Ieova’ ma le laoai a temoni.” (1 Kori. 10:16-21) Pe afai e faia e se tasi e tagofia le areto ma le uaina se agasala matuiā, e tatau ona ia saʻilia le fesoasoani faaleagaga. (Faitau le Iakopo 5:14-16.) Pe a faaalia e lea sui o le ʻaufaauuina “fua e tatau ma le salamō,” e lē o se lē faaaloalo i le taulaga a Iesu lona tagofia o le areto ma le uaina o le Faamanatuga.​—Luka 3:8.

13. Aiseā e tāua ai le tatalo e faatatau i lo tatou faamoemoe mai i le Atua?

13 A o tatou sauniuni mo le Faamanatuga, e tatou te maua aogā pe a tatalo ma manatunatu i lo tatou faamoemoe mai i le Atua. E leai se auauna tuuina atu a Ieova, ma se soo faamaoni o Keriso e manaʻo e faaalia lona lē faaaloalo i le taulaga a Iesu, e ala i le tagofia o le areto ma le uaina o le Faamanatuga, e ui e na te lē o maua ni faamaoniga manino o le avea o ia ma Kerisiano faauuina. O lea, e faapefea ona iloa pe e tatau ona tatou tagofia le areto ma le uaina?

O AI E TATAU ONA TAGOFIA LE ARETO MA LE UAINA?

14. O le ā le fesootaʻiga o le feagaiga fou ma le tagofia o le areto ma le uaina o le Faamanatuga?

14 E mautinoa e i latou taʻitoʻatasi e tagofia le areto ma le uaina o le Faamanatuga, o loo latou aofia i le feagaiga fou. Na fetalai Iesu e faatatau i le uaina: “O lenei ipu, o le faatusa lea o le feagaiga fou e ala i loʻu toto.” (1 Kori. 11:25) Na valoia e le Atua e ala mai i le perofeta o Ieremia, o le a Ia faia se feagaiga fou e ese mai i le feagaiga o le Tulafono lea na ia faia ma tagata Isaraelu. (Faitau le Ieremia 31:31-34.) Na faia e le Atua le feagaiga fou ma le Isaraelu faaleagaga. (Kala. 6:15, 16) O lenei feagaiga na faamaonia i le togiola a Iesu e ala i lona toto maligi. (Luka 22:20) O Iesu le Puluvaga o le feagaiga fou, ma o le ʻaufaauuina faamaoni uma e iai i le feagaiga fou o le a mauaina le tofi faalelagi.​—Epe. 8:6; 9:15.

15. O ai e aofia i le feagaiga o le Malo, ma o le ā le faaeaga o le a maua e i latou e faamaoni?

15 Ua iloa e tagata taʻitoʻatasi e tagofia le areto ma le uaina o le Faamanatuga, e latou te aofia i le feagaiga o le Malo. (Faitau le Luka 12:32.) O soo o Iesu na faamaoni iā te ia ma tofusia i ona mafatiaga, e latou te pule faatasi i le lagi. (Fili. 3:10) Talu ai e aofia Kerisiano faauuina faamaoni i le feagaiga o le Malo, o le a avea ai i latou ma tupu faatasi ma Keriso e faavavau i le lagi. (Faaa. 22:5) Ua latou agavaa e tagofia le areto ma le uaina o le Talisuaga Afiafi a le Alii.

16. Faamatala puupuu mai le uiga o le Roma 8:15-17.

16 E na o i latou e molimau i ai le agaga o i latou o le fanau a le Atua, e tatau ona tagofia le areto ma le uaina o le Faamanatuga. (Faitau le Roma 8:15-17.) Seʻi mātau, na faaaogā e Paulo le upu Arama “Ava,” o lona uiga “Tamā e!” E faaaogā e se tamaitiiti lenei taʻu e valaau ai lona tamā, e faaalia ai le māfana ma le faaaloalo, e pei lava o faaupuga “papa” ma le “tamā.” O i latou e mauaina le “agaga o ataliifai” e avea ma  fanau faauuina a le Atua. E molimau lona agaga i o latou agaga, ma latou mautinoa ai o i latou o atalii faauuina o le Atua. E lē faapea ua latou lē toe fia nonofo i le lalolagi. Ae ua latou mautinoa o le a latou pule faatasi ma Iesu i le Malo i le lagi, pe a faamaoni seʻia oo i le oti. I aso nei, e na o se vaega toʻaitiiti o loo totoe o le 144,000, o soo o Keriso ua ʻfaauuina e lē e paia’ o Ieova. (1 Ioa. 2:20; Faaa. 14:1) E ala i lona agaga ua latou alalaga atu ai, “Ava, le Tamā e!” Maʻeu se faiā lelei ua latou maua ma le Atua!

IA TALISAPAIA LOU FAAMOEMOE

17. O le ā le faamoemoe o le ʻaufaauuina, ma o le ā la latou vaaiga i ai?

17 Pe afai o oe o se Kerisiano faauuina, o lou faamoemoe faalelagi o se tasi o mataupu tāua o au tatalo. Pe a faapea mai le Tusi Paia e ʻtautō e faaipoipo’ i le Alii Faaipoipo i le lagi o Iesu Keriso, e te iloa e faatatau iā te oe lenā manatu, ma e te tulimataʻia le taimi e avea ai oe ma vaega o le “tamaʻitaʻi faaipoipo” a Keriso. (2 Kori. 11:2; Ioa. 3:27-29; Faaa. 21:2, 9-14) Pe a faailoa mai e le Atua i le Tusi Paia lona alofa i lana fanau faaleagaga, e te iloa o loo faasino atu iā te oe. Pe a e faitau foʻi i faatonuga o loo i le Tusi Paia e fitoitonu i le ʻaufaauuina, e uunaʻia oe e le agaga paia e faaalia le usitaʻi. E molimau le agaga o le Atua ma lou agaga e faailoa atu iā te oe lou faamoemoe faalelagi.

18. O le ā le faamoemoe o “isi mamoe,” ma o ā ni ou faalogona e faatatau i lenā faamoemoe?

18 Pe afai o oe o se tasi o le “motu o tagata e toʻatele” o “isi mamoe,” ua tuuina mai e le Atua le faamoemoe faalelalolagi. (Faaa. 7:9; Ioa. 10:16) E te manaʻo e ola e faavavau i le Parataiso, ma maua le olioli i le manatunatu loloto i faamatalaga a le Tusi Paia e faatatau i le olaga i le lalolagi. E te tulimataʻia le taimi e olioli ai i le tele o le filemu a o faifaimea faatasi ma lou aiga ma isi tagata amiotonu. Ua e naunau atu i le taimi e fau ma soloi ai meaʻai, leai se mativa, mafatiaga, faamaʻi, faapea le oti. (Sala. 37:10, 11, 29; 67:6; 72:7, 16; Isa. 33:24) Ua e tulimataʻia le taimi e faafeiloaʻi ai i latou o le a toe faatutū mai, ma ola e faavavau i le lalolagi. (Ioa. 5:28, 29) Maʻeu lou loto faafetai iā Ieova mo lou faamoemoe matagofie! E ui e te lē tagofia le areto ma le uaina, ae o lou auai i le Faamanatuga e faaalia ai lou talisapaia o le taulaga a Iesu Keriso.

PO O LE A E AUAI?

19, 20. (a) E faapefea ona taunuu moni lou faamoemoe mai i le Atua? (e) Aiseā e te auai ai i le Faamanatuga?

19 Pe e te faamoemoe i le lagi po o le lalolagi, ae e faatoʻā mafai ona taunuu moni pe a e faatuatua iā Ieova lou Atua, Iesu Keriso, ma le togiola. O lou auai i le Faamanatuga, e maua ai le avanoa e te manatunatu ai i lou faamoemoe, ma le tāua o le maliu o Iesu. O lea, ia avea ma ou sini le auai i le Talisuaga Afiafi a le Alii pe a mavae le goto o le lā i le Aso Faraile, Aperila 3 i le 2015, i se Maota mo Sauniga po o se isi lava nofoaga.

20 O le auai i le Faamanatuga e faaloloto ai lou talisapaia o le taulaga togiola a Iesu. O le faalogologo lelei i le lauga e ono uunaʻia ai oe e faaali le alofa i ou tuaoi e ala i le faailoa atu iā i latou o mea ua e aʻoaʻoina e faatatau i le alofa o Ieova, ma lana fuafuaga mo le fanau a tagata. (Mata. 22:34-40) Ia tatou taumafai malosi e auai uma i inā.

^ pala. 1 I tagata Eperu, e amata le aso mai i le goto o le lā seʻia oo i le isi goto o le lā.

^ pala. 9 Tagaʻi i Le Olomatamata o Fepuari 1, 2011 i le siata i le itulau e 23, 24.