Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

LE OLOMATAMATA (LOMIGA MO SU‘ESU‘EGA) MATI 2016

Talavou—E Faapefea Ona Outou Sauniuni mo le Papatisoga?

Talavou—E Faapefea Ona Outou Sauniuni mo le Papatisoga?

“Loʻu Atua e, ou te fiafia e fai lou finagalo.”—SALA. 40:8.

PESE: 51, 58

1, 2. (a) Faamatala le māfuaaga e tāua ai le papatisoga. (e) O le ā e tatau ona mautinoa i ai se tasi a o leʻi papatiso, ma aiseā?

PO O oe o se talavou o loo fia papatiso? Pe afai o lea, o le faaeaga silisili lenā e mafai ona e mauaina. E pei ona taʻua i le mataupu ua mavae, o le papatisoga o se filifiliga e matuā tāua lava. E faailoa atu ai i isi ua uma ona e tuuina atu iā Ieova, lea na e folafola atu ai iā Ieova o le a e auauna iā te ia e oo i le faavavau, ma o le faia o lona finagalo o le mea lenā e sili ona tāua i lou olaga. Talu ai e tāua tele lenā folafolaga i le Atua, e tatau ai la ona e papatiso pe afai ua e faatagata matua i le mafaufau, o lou lava faanaunauga lenā, ma ua e malamalama foʻi i le uiga o le tuuina atu i le Atua.

2 Atonu e te manatu e te leʻi sauni mo le papatisoga. Pe e te manatu foʻi ua e sauni, peitaʻi e mafaufau ou mātua e tatau ona e faatali teisi ma ia e maua le poto masani i le olaga. O le ā e tatau ona e faia? Aua e te lotovaivai. Nai lo o lea, ia faaaogā lenei taimi ina ia agaʻigaʻi ai i luma ma vave ona e agavaa ai mo le papatisoga. Ina ia faia faapea, e mafai ona e faatutū  ni sini i vala nei e tolu: (1) o ou talitonuga, (2) o au gaoioiga ma le (3) o lou lotofaafetai.

O LOU MAUTINOA I OU TALITONUGA

3, 4. O le ā e mafai ona aʻoaʻoina e talavou mai i le faaaʻoaʻoga a Timoteo?

3 Ia mafaufau i le auala e te tali ai i fesili nei: Aiseā ou te talitonu ai o loo soifua le Atua? Aiseā ou te talitonu ai o le Tusi Paia o le Afioga a le Atua? Aiseā ou te usitaʻi ai i faatonuga a le Atua nai lo tapulaa tau amio a le lalolagi? O na fesili e fesoasoani iā te oe e mulimuli ai i le fautuaga a Paulo: “Ia faamaonia e outou lava po o le ā le finagalo o le Atua, lea e lelei, e mālie, ma lelei atoatoa.” (Roma 12:2) Aiseā e tatau ai ona e faia lenā mea?

4 E mafai ona fesoasoani iā te oe le faaaʻoaʻoga a Timoteo. Sa ia malamalama lelei i Tusitusiga Paia ona sa aʻoaʻoina ai o ia e lona tinā ma le tinā o lona tinā. Peitaʻi na faapea atu Paulo iā Timoteo: “Ia e tausisi pea i mea ua e aʻoaʻoina ma na faatalitonu ai oe.” (2 Timo. 3:14, 15) O le upu “faatalitonu,” e uiga atu “i le mautinoa i le moni o se mea.” O lea, sa tatau ona mautinoa Timoteo e maua le upu moni i Tusitusiga Paia. Sa ia talia e lē ona sa tauanau o ia e lona tinā ma le tinā o lona tinā ia faia faapea. Peitaʻi, sa ia fefulifulisaʻi pe manatunatu loloto i mea na ia aʻoaʻoina ma faatalitonuina ai o ia.—Faitau le Eperu 5:14.

5, 6. Aiseā e tāua ai le faaaogāina o le “mafaufau lelei” mai lava a o laʻitiiti?

5 Ae faapefea oe? Atonu ua leva ona e iloaina le upu moni. O lea, ia fai ma ou sini le mafaufau i māfuaaga o ou talitonuga. O le a fesoasoani lea iā te oe e faamalosia ai lou faatuatua, ma ʻalofia ai lou faia o ni filifiliga sesē ona o omiga mai i uō, manatu o le lalolagi, po o ou lava faalogona.

6 Pe a e iloa faaaogā le “mafaufau lelei” a o e laʻitiiti, o le a mafai ona e taliina ai fesili nei mai i au uō: ʻE faapefea ona e mautinoa e iai se Atua? Aiseā e faataga ai e le Atua mea leaga e tutupu pe afai e alofa o ia iā i tatou? O ai na foafoaina le Atua?’ Pe a e nofosauni, o le a lē mafai e na fesili ona faatupu ai ni masalosaloga i lou mafaufau, peitaʻi o le a uunaʻia ai oe e iloilo totoʻa le Tusi Paia.

7-9. Faamatala le auala e fesoasoani ai le tusi O ā Aʻoaʻoga Moni a le Tusi Paia? i lou mautinoa i ou talitonuga.

7 O au lava suʻesuʻega māeʻaeʻa e mafai ona fesoasoani iā te oe e taliina ai fesili a isi, aveese ai ni ou masalosaloga, ma faamalosia ai lou mautinoa i ou talitonuga. (Galu. 17:11) E tele a tatou lomiga e mafai ona fesoasoani iā te oe e faia ai faapea. Ua fesoasoani i le toʻatele le suʻesuʻeina o a tatou lomiga [1] e faatatau i Lē na Foafoaina Mea, ma ana foafoaga. E fesoasoani foʻi le tusi O ā Aʻoaʻoga Moni a le Tusi Paia?, e faamalosia ai lou mautinoa i se mataupu o le Tusi Paia.

8 Atonu ua e iloaina tali i nisi o fesili o loo i lenā tusi, ona o oe o se tagata aʻoga o le Tusi Paia. Ae po ua e mautinoa i au tali? E faalaeiauina oe e toe faitau tamaʻi ulutala, iloilo fesili autalu, ma manatunatu loloto i mau e lagolagoina ai au tali, ma māfuaaga e te talitonu ai i na manatu. E mafai foʻi ona tusi i lalo au tali. O le a fesoasoani lenā e te iloa ai le auala e faamatala atu ai ou talitonuga i isi. O le suʻesuʻe faapena, e fesoasoani iā te oe e mautinoa ai i ou talitonuga.

9 E tatau ona faamaonia e oe lava o le upu moni lenei. O le a fesoasoani lenā e  sauniunia ai oe mo le papatisoga. Ua faapea mai se tasi tuafafine talavou: “A o ou leʻi papatiso, sa ou suʻesuʻeina le Tusi Paia ma iloa ai o le lotu moni lenei. Na faasolo ina faamalosia lenā lagona mautinoa i aso taʻitasi.”

O AU GAOIOIGA

10. Aiseā e ao ai ona faatalitalia se Kerisiano ua papatiso ina ia ōgatasi ana gaoioiga ma lona faatuatua?

10 Ua faapea mai le Tusi Paia: “E faapea foʻi ona mate le faatuatua pe a leai ni galuega.” (Iako. 2:17) Afai ua e matuā mautinoa i ou talitonuga, o le a atagia mai lenā i au gaoioiga. O le a e faia “amioga paia ma galuega o le faamaoni i le Atua,” e pei ona taʻua i le Tusi Paia.—Faitau le 2 Peteru 3:11.

11. Faamatala le uiga o “amioga paia.”

11 O ā “amioga paia”? Pe a paia au amioga, o lona uiga e mamā lau amio. O se faaaʻoaʻoga, ia mafaufau i le ono masina ua mavae. Pe na e mafaufau o le ā le mea saʻo po o le mea sesē ina ua tofotofoina oe? (Epe. 5:14) Pe e te manatua se taimi patino e te leʻi lolo atu ai i se faaosoosoga po o omiga mai i au uō? Po o avea oe ma faaaʻoaʻoga lelei i isi i le aʻoga? Po o e taumafai e faamaoni iā Ieova po o le faaaʻoaʻo i isi tamaiti ina ia latou lē ula mai ai iā te oe? (1 Pete. 4:3, 4) O le mea moni e leai se tasi e lelei atoatoa. E oo lava iā i latou ua leva ona auauna iā Ieova, e iai lava taimi e matamumuli ai ma faigatā ai ona talaʻi atu i isi. Peitaʻi, e mitamita se tasi ua tuuina atu i le Atua ona o le avea o ia o se Molimau a Ieova, ma e atagia atu lenā i ana amioga mamā.

12. O ā nisi o “galuega o le faamaoni i le Atua,” ma o le ā lau vaaiga e tatau ona iai i na galuega?

12 O ā “galuega o le faamaoni i le Atua”? E aofia ai au galuega i le faapotopotoga, e pei o le auai i sauniga ma le talaʻiga. Peitaʻi e aofia ai foʻi gaoioiga e lē o iloa atu e isi, e pei o au lava tatalo iā Ieova ma au lava suʻesuʻega. O se tasi ua tuuina atu iā Ieova, e lē manatu i na gaoioiga o se avega mamafa. E tutusa ona faalogona ma le tupu o Tavita lea na faapea mai: “Loʻu Atua e, ou te fiafia e fai lou finagalo, ua i totonu foʻi iā te aʻu lau tulafono.”—Sala. 40:8.

13, 14. O le ā le sauniuniga e mafai ona fesoasoani iā te oe ina ia faia “galuega o le faamaoni i le Atua,” ma na faapefea ona maua ai e nisi o talavou aogā?

13 Ina ia fesoasoani iā te oe e faatutū ni ou sini, o loo iai se pepa fesili i le itulau 308 ma le 309 o le tusi lona lua o le Questions Young People Ask—Answers That Work. [2] E mafai ona tusia i luga o le pepa fesili au tali mo fesili e pei: “Pe e faapeʻī le patino o au tatalo ma o le ā ua faaalia ai e faatatau i lou alofa iā Ieova?” “O ā mea e te faaaofia i au lava suʻesuʻega?” “Pe e te auai i le faiva e tusa pe lē auai ou mātua?” O loo iai foʻi i le pepa fesili ni avanoa e tusia ai ni ou sini e faatatau i au tatalo, au lava suʻesuʻega, ma le talaʻiga.

14 O le toʻatele o talavou o loo mafaufau e papatiso, ua latou manatu o lenei pepa fesili o se fesoasoani aogā. Ua faapea mai se tuafafine talavou e igoa iā Tilda: “Na ou faaaogāina le pepa fesili i le faatutūina o oʻu sini. Na faasolosolo ona ou ausia na sini, ma agavaa ai mo le papatisoga i le tausaga na sosoo ai.” Na faapena foʻi le taulau manuia o se uso talavou e igoa iā Patrick. Na ia faapea mai: “Ua leva ona ou iloa oʻu sini, a o le tusiaina i lalo na uunaʻia ai aʻu e taumafai malosi ina ia ausia.”

Po o le a faaauau ona e auauna iā Ieova e tusa pe e leʻi faia faapea e ou mātua? (Tagaʻi i le palakalafa e 15)

15. Faamatala le māfuaaga e avea ai le tuuina atu o se filifiliga e fitoitonu i le tagata lava ia.

 15 O se tasi o fesili o loo iai i lenā pepa fesili: “Pe e faaauau pea ona e auauna iā Ieova e tusa po ua lē toe faia faapea e ou mātua ma au uō?” Pe a e tuuina atu iā Ieova ma papatiso, o le a iai lau lava faiā ma Ieova. O lea, o mea e te faia mo Ieova e lē faalagolago i ou mātua po o isi tagata. E atagia mai i au amioga paia, ma galuega o le faamaoni i le Atua, lou mautinoa ua e mauaina le upu moni, ma lou maumauaʻi e mulimuli i tapulaa a le Atua. O le a lē umi ae e agavaa mo le papatisoga.

O LOU LOTOFAAFETAI

16, 17. (a) O le ā e tatau ona uunaʻia ai se tasi e avea ma Kerisiano? (e) E faapefea ona faataʻitaʻi lo tatou lotofaafetai mo le togiola?

16 I se tasi aso, na fesili atu ai iā Iesu se tamāloa na malamalama lelei i le tulafono faa-Mose: “O le ā le poloaʻiga e sili i le Tulafono?” Na tali Iesu: “Ia e alofa atu iā Ieova lou Atua ma lou lotoatoa, ma lou ola atoa, ma lou mafaufau atoa.” (Mata. 22:35-37) Ua faapea mai Iesu o le alofa iā Ieova o le māfuaaga lea e papatiso ai se tagata ma avea ma Kerisiano. O se tasi o auala sili e faamalosia ai lou alofa mo Ieova, o le manatunatu loloto lea i le meaalofa silisili a le Atua mo tagata, o le togiola. (Faitau le 2 Korinito 5:14, 15; 1 Ioane 4:9, 19.) Pe a e faia faapea, o le a e manaʻo e faailoa atu lou lotofaafetai mo lenā meaalofa matagofie.

17 E mafai ona faamatalaina lou talisapaia o le togiola i le auala lenei: Seʻi faapea na e tau malemo ma na faasaoina e se isi lou ola. Po o le a vave ona galo iā te oe le mea na faia e lenā tagata pe a e toe foʻi i lou fale? E leai. O le a e lotofaafetai pea i le tagata na laveaʻia lou ola. I se tulaga talitutusa, e tatau ona tatou lotofaafetai iā Ieova ma Iesu mo le togiola. O i laʻua ua mafai ona faasaoina ai o tatou ola. Ua laʻua laveaʻia i tatou mai i le agasala ma le oti. O lo laʻua alolofa iā i tatou, ua tatou maua ai le faamoemoe o le ola e faavavau i le Parataiso i le lalolagi.

18, 19. (a) Aiseā e lē tatau ai ona e fefe i le avea ma auauna a Ieova? (e) E faapefea ona faaleleia lou olaga pe a e auauna iā Ieova?

18 Pe e te lotofaafetai i mea ua faia e Ieova mo oe? Pe afai o lea, o le tuuina atu ma le papatisoga o le mea saʻo lenā e tatau ona fai. O le tuuina atu, o lau  folafolaga lenā iā Ieova o le a e faia lona finagalo e oo i le faavavau. Pe e tatau ona e fefe e faia lenā folafolaga? E leai. E finagalo Ieova ina ia e maua le mea sili ona lelei, ma o le a ia tauia i latou e faia lona finagalo. (Epe. 11:6) Pe a tuuina atu ma papatisoina, o le a lē leaga ai lou olaga, peitaʻi o le a faasolo ina faaleleia. Ua faapea mai se uso talavou e 24 tausaga na papatiso a o leʻi atoa le 13 o ona tausaga: “Atonu na ono telē loʻu malamalamaga a o faasolo ina matua, ae o laʻu filifiliga ina ia tuuina atu iā Ieova, na puipuia ai aʻu mai i le tuliloaina o sini a le lalolagi.”

19 E finagalo Ieova ina ia e maua le mea sili ona lelei. Peitaʻi, e manatu faapito Satani ma e lē taitai manatu mamafa iā te oe. E lē mafai ona ia aumaia se mea lelei mo oe pe afai e te mulimuli iā te ia. E faapefea ona ia aumaia se mea e na te lē o mauaina? E lē o iā te ia se tala lelei ma e leai sona faamoemoe. E na o se lumanaʻi leaga o le a ia aumaia iā te oe, auā e pau lenā o le mea o le a ia mauaina.—Faaa. 20:10.

20. O le ā e mafai ona faia e se talavou ina ia agaʻigaʻi i luma e tuuina atu ma papatisoina? (Tagaʻi foʻi i le pusa “ Fesoasoani mo le Agaʻigaʻi i Luma Faaleagaga.”)

20 O le tuuina atu o lou ola iā Ieova o le filifiliga sili lenā o le a e faia. Po ua e nofosauni e uia lenā laasaga? Pe afai o lea, aua neʻi e fefe e faia lenā folafolaga. Ae pe afai e te leʻi sauni, ia faaaogā manatu mai i lenei mataupu ina ia faaauau ai ona e agaʻigaʻi i luma. Na faalaeiau atu Paulo i uso i Filipi ina ia faaauau ona agaʻigaʻi i luma. (Fili. 3:16) Pe a e mulimuli i lenā fautuaga, o le a lē umi ae e filifili e tuuina atu lou ola iā Ieova ma papatisoina.

^ [1] (palakalafa e 7) Tagaʻi foʻi i le mataupu e 5, ma le mataupu e 17 i le palakalafa e 9-14 o le tusi Faalatalata Atu iā Ieova.

^ [2] (palakalafa e 13) Tagaʻi foʻi i Le Olomatamata o Iuni 15, 2011, itu. 3-6.