Skip to content

Skip to secondary menu

Skip to table of contents

Molimau a Ieova

Faa-Samoa

Le Olomatamata (Lomiga mo Su‘esu‘ega)  |  Iuni 2017

Saunia e Ieova Faamāfanafanaga mo o Tatou Puapuaga Uma

Saunia e Ieova Faamāfanafanaga mo o Tatou Puapuaga Uma

ʻO le Atua o faamāfanafanaga uma, e na te faamāfanafanaina i tatou i o tatou puapuaga uma.’​—2 KORI. 1:3, 4.

PESE: 33, 41

1, 2. E faapefea ona faamāfanafanaina i tatou e Ieova i o tatou puapuaga, ma o le ā le faamautinoaga o loo taʻua i lana Afioga?

NA TALANOA atu se uso talavou nofofua o le a faaigoa iā Eduardo, i se uso toeaina ua faaipoipo e matua atu e igoa iā Stephen, e faatatau i se mea na mafaufau i ai. Na manatunatu Eduardo i le faamatalaga o loo i le 1 Korinito 7:28: “O i latou e faaipoipo, e oo puapuaga i o latou tino.” Na fesili atu o ia, “O le ā e faasino i ai nei ʻpuapuaga,’ ma e faapefea ona ou taulimaina pe a ou faaipoipo?” A o leʻi tali mai Stephen, na fai iā Eduardo ia manatunatu i upu a le aposetolo o Paulo e faapea, o Ieova o le “Atua o faamāfanafanaga uma, o lē na te faamāfanafanaina i tatou i o tatou puapuaga uma.”​—2 Kori. 1:3, 4.

2 O Ieova o ia moni o le Tamā alofa ma e na te faamāfanafanaina i tatou pe a feagai ma tulaga faigatā. Atonu na e tofo totino i ni mea na tutupu na saunia ai e le Atua le lagolagosua ma le taʻitaʻiga, lea e tele ina ala mai i lana Afioga. E mafai ona tatou mautinoa e naunau o ia mo lo tatou lelei, e pei ona ia faia i ana auauna i aso ua mavae.​—Faitau le Ieremia 29:11, 12.

3. O ā fesili o le a tatou talanoaina?

 3 O le mea moni, pe a tatou iloa le pogai o o tatou faafitauli po o puapuaga, o le a faigofie la ona tatou taulimaina. O le tulaga foʻi lenā e faatatau i puapuaga i le faaipoipoga po o le olaga faaleaiga. O ā nisi o tulaga e ono faapogaia ai ʻpuapuaga i le tino’ e pei ona taʻua e Paulo? O ā faaaʻoaʻoga i taimi o le Tusi Paia ma o tatou aso e mafai ona tatou maua ai faamāfanafanaga? O le iloaina o tali o nei fesili o le a fesoasoani iā i tatou e fesagaʻia ai nei puapuaga.

ʻPUAPUAGA I LE TINO’

4, 5. O ā nisi o tulaga e faapogaia ai ʻpuapuaga i le tino’ i se ulugalii?

4 O le fetalaiga lenei a le Atua i le amataga o le talafaasolopito o le tagata: ʻE tuua e le tane lona tamā ma lona tinā, ma nonofo faatasi ma lana avā, ona avea ai lea o i laʻua ma tino e tasi.’ (Kene. 2:24) O le fetalaiga lenā a Ieova ina ua ia faia le uluaʻi faaipoipoga. Peitaʻi, ona o le tulaga lē lelei atoatoa, e ono tulaʻi mai ai faafitauli i faiā faaleaiga pe a faaipoipo se tasi ma amata se aiga fou. (Roma 3:23) E masani lava ona suia le pule a mātua i le pule a le tane. Ua tofia e le Atua le tane e avea ma ulu i lana avā. (1 Kori. 11:3) E faigatā i nisi o tane ma avā faatoʻā faaipoipo lenei tulaga. E tusa ai ma le Afioga a le Atua, e tatau ona talia e le avā o le a taʻitaʻia o ia e lana tane ae e lē o ona mātua. E ono tulaʻi mai foʻi luʻi ma puapuaga i le ulugalii fou ona o faiā ma aiga o le paaga faaipoipo.

5 E tulaʻi mai nisi popolega pe a faailoa atu e le avā i lana tane, “Ua ou tō.” E masani ona vaeluaina le fiafia o le ulugalii i le la pepe o le a maua, ona o le popole i le tulaga tau soifua mālōlōina i le taimi a o maʻitaga le tinā po o se taimi mulimuli ane. O le a iai foʻi aafiaga i le tulaga tau tupe e lē gata i le taimi lenā a o le lumanaʻi. E tele fetuunaʻiga e manaʻomia ona fai pe a fanau mai le pepe. Atonu o le a tele ina uaʻi atu le tinā ma faaalu lona taimi i le tausiaina o le pepe. E ono manatu le tane e pei ua lē amanaʻia o ia ona o le pisi o le avā i le tausiaina o le pepe. I le isi itu, ua iai foʻi tiute tauave fou a le tamā ona ua iai se isi sui faaopoopo e tausi i le aiga.

6-8. E faapefea i le lē maua o se fanau ona avea ma pogai o mafatiaga?

6 O se isi puapuaga o loo feagai ma nisi ulugalii faaipoipo, o le matuā naunau lea ia maua se fanau, ae e lē o maua lava. Pe a lē fanau le avā, atonu e na te lagona le matuā mafatia. O le faaipoipo ma le maua o ni fanau, e lē faapea ai o le a mautinoa e fiafia se tasi. Peitaʻi, o le lē taunuu o le faanaunauga ia maua se fanau, e avea o se ʻpuapuaga i le tino.’ (Faata. 13:12) I taimi o le Tusi Paia, na avea le lē fanau o se mea e faalumaina ai. Na faailoa atu e le avā a Iakopo, o Rasela, le tigā o ona faalogona i le vaai atu ua maua se fanau a lona uso. (Kene. 30:1, 2) E masani ona fesiligia misionare o loo auauna i atunuu o la latou tū masani le toʻatele o fanau, pe aiseā ua lē faia ai ni a latou fanau. E ui e latou te faamatala atu ma le faautauta ni māfuaaga lelei, ae e tali mai tagata, “Talofa e, o le a matou tatalo mo oulua!”

7 Seʻi manatu i le tulaga o se tuafafine i Egelani na matuā naunau ia maua sana fanau, ae e leʻi taunuu lona faanaunauga. Na faasolo ina matua ma ua mautinoa e lē mafai ona ia fanaua se pepe. Na ia taʻutino mai na matuā faanoanoa lava i le iloaina, o le a lē faamalieina lona faanaunauga a o ola ai i lenei faiga o mea. O lea na la filifili ai loa ma lana tane e fai se la tamafai. E ui i lea, na faapea mai o ia: “Na ou lagona pea le faanoanoa. Na ou iloa e lē tutusa le  fai o se tamafai ma le fanauina o saʻu ia lava pepe.”

8 O loo taʻua i le Tusi Paia “e saogalemu” se fafine Kerisiano ʻpe a ia fanauina ni tama.’ (1 Timo. 2:15) Peitaʻi, e lē uiga ai e faapea o le fanauina po o le tausia o se fanau o le a maua ai le ola e faavavau. Nai lo o lea, o le iai o se fanau a se fafine ma pisi e tausia se aiga, atonu e na te ʻalofia ai le vaivaiga o le faitala ma le isuisu fua i mataupu a isi. (1 Timo. 5:13) Peitaʻi, e na te ono fesagaʻia pea puapuaga i le faaipoipoga ma le olaga faaleaiga.

E faapefea ona faamāfanafanaina se tasi pe a maliu sē e pele? (Tagaʻi i le palakalafa e 9, 12)

9. E faapefea ona avea le maliu o se paaga faaipoipo o se puapuaga e sili ona faigatā?

9 O se isi puapuaga i le faaipoipoga e seāseā tau i ai o tatou mafaufau, o le maliu lea o sē e pele. Ioe, o le maliu o se paaga faaipoipo, o se puapuaga e sili ona faigatā ua fesagaʻia e le toʻatele. O se puapuaga atonu e leʻi faatalitalia e le paaga o loo soifua pea o le a ia fesagaʻia i lenei faiga o mea. E talitonu ma le mautinoa Kerisiano i le folafolaga a Iesu e faatatau i le toetū i le lumanaʻi. (Ioa. 5:28, 29) O le ā le aogā o lenā folafolaga i le paaga o loo soifua pea? E matuā faamāfanafanaina ai o ia. O se tasi lea o auala o loo saunia mai ai e lo tatou Tamā alofa le lagolagosua ma faamāfanafanaga i ē o loo feagai ma puapuaga, e ala mai i lana Afioga. Seʻi o tatou tilofaʻia po o ā faalogona ma aogā na maua e nisi o auauna a Ieova, ona o faamāfanafanaga na ia saunia mai.

FAAMĀFANAFANAGA PE A FEAGAI MA PUAPUAGA

10. Na faapefea ona maua e Hana le mapusaga mai i mea na mafatia ai? (Tagaʻi i le ata i luga aʻe o le matua.)

10 Sa feagai Hana le avā pele a Elekana ma se puapuaga faigatā. Na lē fanau o ia ae na fanauina e Penina o le isi avā a Elekana, ni fanau. (Faitau le 1 Samuelu 1:4-7.) Na faalili atu Penina iā Hana i “lea tausaga ma lea tausaga.” O lenā gaoioiga na matuā faatigā ai iā Hana ma ia lagona ai le atuatuvale. Na saʻili e Hana se mapusaga e ala i le tuu atu o le mataupu iā Ieova i le tatalo. Sa “umi ona tatalo atu o ia i luma o Ieova.” Pe na ia faatalitalia o le a tali mai Ieova i lana tatalo? O le mea lenā na ia faamoemoe i ai. Ina ua uma ona tatalo, e leʻi ʻtoe foliga popole o ia.’ (1 Samu. 1:12, 17, 18) Na ia maufaatuatuaina o le a faamuta e Ieova lona tulaga lē fanau, pe faamalieina lona manaʻoga i se isi auala.

11. E faapefea ona avea le tatalo ma faamāfanafanaga iā i tatou?

11 O le a faaauau ona iai puapuaga a o tatou iai i le tulaga lē lelei atoatoa, ma ola ai i lenei faiga o mea o loo pulea e Satani. (1 Ioa. 5:19) E maʻeu se mea inā lelei o le iloaina o Ieova o ia o le “Atua o faamāfanafanaga uma”! O se tasi o auala e tatou te maua ai le fesoasoani e feagai ai ma puapuaga, o le tatalo. Na sasaa atu e Hana lona loto iā Ieova. I se tulaga talitutusa, pe a tatou feagai ma puapuaga, e lē lava le tau ina faailoa atu iā Ieova o o tatou faalogona. E manaʻomia ona tatou faatoga atu iā te ia, o lona uiga ia sasaa atu o tatou faalogona e ala i le tatalo faatauanau atu mai i o tatou loto.​—Fili. 4:6, 7.

12. Aiseā na olioli ai Ana e ui i ona puapuaga?

12 E tusa pe e tatou te lagona e iai se mea o loo misi i o tatou olaga, e pei o le lē maua o se fanau po o le maliu foʻi o sē e pele, ae e mafai lava ona tatou maua faamāfanafanaga. O se faaaʻoaʻoga, o le perofeta fafine o Ana o lē na soifua i taimi o Iesu. Na maliu lana tane ae faatoʻā fitu tausaga talu ona la faaipoipo. E lē o taʻua i le Tusi Paia na iai se fanau a Ana. O le ā na faaauau ona faia e Ana i le 84 o ona tausaga? O loo taʻua  i le Luka 2:37, na “iai pea o ia i le malumalu e fai le auaunaga paia i le pō ma le ao, faatasi ma anapogi ma tatalo faatauanau.” Ioe, na maua e Ana faamāfanafanaga ma le olioli i le tapuaʻi iā Ieova.

13. E faapefea ona faamāfanafanaina i tatou e uō moni, e tusa pe e lē o faia faapea e o tatou aiga?

13 E tatou te maua uō moni ma aumea vavalalata, pe a auaufaatasi vavalalata ma o tatou uso ma tuafāfine. (Faata. 18:24) E manatua e Paula lona faanoanoa ina ua tuua e lona tinā le upu moni i le lima o ona tausaga. E leʻi faigofie le feagai ai ma lea puapuaga. Peitaʻi, na matuā faalaeiauina o ia ina ua faaalia e Ann, o se tuafafine paeonia i le faapotopotoga, le naunau moni mo lona lelei faaleagaga. Ua faapea mai Paula: “E ui e ma te lē aiga ma Ann, ae na matuā fesoasoani iā te aʻu lona manatu mamafa mai. Na fesoasoani ou te auauna ai pea iā Ieova.” O loo auauna pea ma le faamaoni Paula iā Ieova. Ua matuā fiafia foʻi o ia ona ua toe auauna faatasi ma lona tinā i le faapotopotoga. E fiafia foʻi Ann ona na avea o ia ma tinā faaleagaga iā Paula.

14. O ā aogā e tatou te maua pe a tatou faamāfanafana atu i isi?

14 Pe a tatou faaalia le naunau moni i isi, o le a fesoasoani e faamatuu ese ai ni o tatou faalogona lē lelei. Ua iloa e tuafāfine nofofua pe faaipoipo, e latou te maua le tele o le olioli i le avea ai ma ʻaufaigaluega faatasi ma le Atua, e faailoa atu le tala lelei. O lo latou sini ia faamamaluina le Atua  e ala i le faia o lona finagalo. O nisi ua avea le faia o se sao i le faiva e pei o se vai mālū e faaleleia ai o latou faalogona. E tatou te saosaolaumea uma i le mauaina o ni faiā māfana ma isi i le faapotopotoga, pe a tatou faaalia le manatu mamafa i isi i le oganuu ma le faapotopotoga. (Fili. 2:4) O le aposetolo o Paulo o se faaaʻoaʻoga lelei. Na avea o ia e pei o se “failele” iā i latou i le faapotopotoga i Tesalonia, ma na pei foʻi o ia o se tamā faaleagaga.​—Faitau le 1 Tesalonia 2:7, 11, 12.

FAAMĀFANAFANAGA I LE AIGA

15. O ai e paʻū i ai le tiute tauave autū o le aʻoaʻoina o fanau i le upu moni?

15 O le isi vala e tatau ona uaʻi atu i ai, o le saunia lea o faamāfanafanaga ma le fesoasoani mo aiga. E iai taimi e talosagaina ai e ē fou le fesoasoani a tagata talaʻi taʻumatuaina, i le aʻoaʻoina o a latou fanau i le upu moni pe faia foʻi suʻesuʻega a le fanau. I le Tusi Paia, o le aʻoaʻoina ma le toleniina o le fanau o le tiute tauave autū lea a mātua. (Faata. 23:22; Efe. 6:1-4) E iai tulaga e manaʻomia ai le fesoasoani a isi ma e matuā talisapaia e mātua. Peitaʻi, o loo tumau pea le tiute tauave a mātua. E tāua le fesootaʻi e lē aunoa o mātua ma fanau.

16. O le ā e tatau ona manatua pe a fesoasoani i fanau?

16 Pe a filifili se matua e fai e se isi le suʻesuʻega a lana fanau, e lē tatau i lē e faia le suʻesuʻega ona taumafai e faoa le tiute tauave a mātua. E iai taimi e ono talosagaina ai se Molimau ina ia suʻesuʻe ma fanau e lē fiafia o latou mātua i le upu moni. E tatau ona manatua e le Molimau, o lona saunia o le fesoasoani faaleagaga, e lē faapea ai ua avea o ia ma tamā po o le tinā o le tamaitiiti. Pe a faia le suʻesuʻega, o se gaoioiga atamai le faia i le fale o le tamaitiiti a o iai ona mātua po o se isi Molimau taʻumatuaina, pe fai foʻi i se nofoaga faitele e talafeagai. O le faia faapea o le a lē faauigasesē ai e tagata le mea o loo fai. E faamoemoe e iai se taimi o le a faatino ai e mātua lo la tiute tauave mai i le Atua, o le aʻoaʻoina lea o le la fanau i le itu faaleagaga.

17. E mafai faapefea ona avea fanau talavou ma puna o faamāfanafanaga?

17 O fanau talavou e alolofa i le Atua moni ma mulimuli i ana poloaʻiga, e mafai ona avea ma puna o faamāfanafanaga i le aiga. E latou te faia faapea e ala i le faaalia o le faaaloalo i o latou mātua ma fesoasoani iā i latou i le itu faaletino. E mafai foʻi ona faia so latou sao i le faamalosia o le itu faaleagaga o le aiga. A o leʻi oo mai le Lolo, sa tapuaʻi iā Ieova lē na tupuga mai iā Setu, o Lameko. Na faapea mai Lameko e faatatau i lona atalii o Noa: “E faamāfanafanaina i tatou e ia i la tatou galuega, ma le tigā o o tatou lima ona ua faamalaiaina e Ieova le laueleele.” Na faataunuuina lenā valoaga ina ua aveesea le faamalaiaina o le laueleele. (Kene. 5:29; 8:21) I aso foʻi nei, o fanau o loo iai i le tapuaʻiga moni ua mafai ona avea ma puna o faamāfanafanaga i o latou aiga, e ala i le fesoasoani i sui uma o le aiga ina ia tumau i puapuaga i le taimi nei, ma faasaoina ai i le lumanaʻi i se mea e sili atu nai lo o le Lolo.

18. O le ā e fesoasoani iā i tatou e tutumau ai ma le lototetele i so o se puapuaga e tatou te fesagaʻia?

18 O le tatalo, manatunatu loloto i faaaʻoaʻoga o loo i le Tusi Paia, ma auaufaatasiga vavalalata ma tagata o Ieova, ua fesoasoani i le faitau miliona i aso nei e maua ai faamāfanafanaga i o latou puapuaga uma. (Faitau le Salamo 145:18, 19.) O lo tatou iloaina o Ieova o le Puna sili o faamāfanafanaga, e fesoasoani iā i tatou e tutumau ai ma le lototetele i so o se puapuaga e tatou te fesagaʻia i le taimi nei ma le lumanaʻi.