Skip to content

Skip to secondary menu

Skip to table of contents

Molimau a Ieova

Faa-Samoa

Le Olomatamata (Lomiga mo Su‘esu‘ega)  |  Iuni 2017

Pe E te Manatua?

Pe E te Manatua?

Pe na e faitauina māeʻaeʻa lomiga fou o Le Olomatamata? Seʻi vaai pe mafai ona e taliina fesili o loo mulimuli mai:

O le ā le uiga e tatau ona iai i uso e pei o ovasia o matagaluega ma toeaina o faapotopotoga, pe a latou maua ni taʻiala mai i le faalapotopotoga a le Atua?

E tatau ona vave ona latou usitaʻia. E mafai ona fesili ifo iā i latou lava: ʻPo o oʻu faalaeiau i oʻu uso ma tuafāfine ia faamaoni iā Ieova? Po o vave ona ou talia ma lagolagoina taʻiala ua tuuina mai?’​—w16.11, itu. 11.

O anafea na amata ai ona saisaitia Kerisiano moni i Papelonia?

Ina ua faatoʻā mavae le maliliu o le ʻauaposetolo. O le taimi lenā na aliaʻe mai ai se vaega faapitoa o taʻitaʻi lotu. Sa lagolagoina e le lotu ma le malo o Roma le lotu Kerisiano ua liliuese mai i le upu moni, ma taumafai e teena faamatalaga a Kerisiano ua pei o saito. Peitaʻi, na amata ona saʻoloto le ʻaufaauuina a o leʻi taitai oo i le 1914.​—w16.11, itu. 23-25.

Aiseā na tāua ai le galuega a Lefèvre d’Étaples?

I vaitausaga o le 1520, na faaliliu ai e Lefèvre le Tusi Paia i le gagana Falani ina ia mafai ona malamalama ai tagata lautele. O le auala na ia faamatala ai mau o le Tusi Paia na aafia ai Martin Luther, William Tyndale, ma John Calvin.​—wp16.6, itu. 10-12.

O le ā le eseesega o le “uaʻi atu i le tino” ma le “uaʻi atu i le agaga”? (Roma 8:6)

O le vaega muamua, e faatatau atu i se tasi e uaʻi atu i ona tuʻinanauga ma faanaunauga lē lelei atoatoa, e talanoa soo ma viiviia mea a le tino. A o le vaega mulimuli, e faatatau atu i se tasi e taulaʻi lona olaga i mea e fesootaʻi atu i le Atua ma lona finagalo. O lenā Kerisiano e pulea e le agaga paia. O le vaega muamua e iʻu ai i le oti, a o le vaega mulimuli e iʻu ai i le ola ma le filemu.​—w16.12, itu. 15-17.

O ā nisi o auala lelei e faaitiitia ai le popole?

Ia faatulaga mea e tatau ona faamuamua, ia talafeagai mea e te faatalitalia, ia faatulaga se taimi paganoa mo oe i aso taʻitasi, ia matamata i le matagofie o foafoaga a le Atua, ia faaalia uiga agamālie, ia fai e lē aunoa ni faamalositino, ma ia lava le moe.​—w16.12, itu. 22-23.

ʻNa aveeseina Enoka ina ia lē vaai i le oti.’ (Epe. 11:5) E faapefea?

E foliga mai na aveese e le Atua Enoka i se auala filemu, e aunoa ma le iloa e Enoka o le a oti o ia.​—wp17.1, itu. 12-13.

Aiseā e tāua ai pea le faamaulalo?

O le faamaulalo e aofia ai le iai o se vaaiga talafeagai iā i tatou lava, ma iloa le mea e gata ai lo tatou malosi. E ao ona tatou iloa pe faapefea i a tatou amio ona aafia ai isi, ma e tatou te lē faatāua naʻuā i tatou lava.​—w17.01, itu. 18.

O ā faamaoniga e iloa ai sa taʻitaʻia e le Atua le vaega pule i le uluaʻi senituri, e pei ona ia taʻitaʻia foʻi le Vaega Pule i aso nei?

Na fesoasoani le agaga paia ina ia latou malamalama ai i upu moni o le Tusi Paia. Na fesoasoani agelu a o latou vaavaaia le galuega talaʻi, ma na latou faalagolago i le Afioga a le Atua pe a aumaia taʻiala. O faamaoniga foʻi na i aso nei.​—w17.02, itu. 26-28.

O ā vala e uunaʻia ai i tatou e manatu i le togiola o se mea e matuā tāua?

E fā vala: O ai na foaʻiina mai, aiseā na foaʻi mai ai, o le ā le faataulaga na faia, ma o le ā le manaʻoga moni na faamalieina ai. E tatau ona tatou manatunatu loloto pe na faapefea ona aofia ai na vala.​—wp17.2, itu. 4-6.

Pe e mafai ona sui e se Kerisiano se filifiliga ua uma ona ia faia?

E tatau ona tatou faia le mea ua tatou filifili e fai. Peitaʻi, e iai taimi e tatau ai ona toe iloilo se filifiliga. Ina ua salamō tagata Nineva, sa suia e le Atua lana faaiʻuga e faatatau iā i latou. E iai foʻi taimi atonu e manaʻomia ai ona sui a tatou filifiliga, ona ua suia le tulaga o mea pe ona o ni faamatalaga fou ua tatou maua.​—w17.03, itu. 16-17.

Aiseā o se matuā lamatiaga ai le faia o ni tala taufaaleaga?

E ono atili ai ona telē se faafitauli. Pe e tatou te saʻo pe sesē, ae o le faia o ni faamatalaga lē lelei e lē taitai ona faaleleia ai se tulaga ua tupu.​—w17.04, itu. 21.