Skip to content

Skip to secondary menu

Skip to table of contents

Molimau a Ieova

Faa-Samoa

Le Olomatamata (Lomiga mo Su‘esu‘ega)  |  Iuni 2017

Ia E Taulaʻi Atu Pea i le Mataupu e Sili Ona Tāua

Ia E Taulaʻi Atu Pea i le Mataupu e Sili Ona Tāua

“Ina ia iloa ai e tagata o oe e ou le suafa o Ieova, e na o oe lava o Lē e Silisili Ese i le lalolagi uma.”​—SALA. 83:18.

PESE: 9, 22

1, 2. (a) O le ā le mataupu e sili ona tāua o loo feagai ma tagata uma? (e) Aiseā e tāua ai lenei mataupu iā i tatou?

O LE toʻatele o tagata i aso nei ua avea tupe ma mataupu e sili ona tāua iā i latou. Ua latou taulaʻi atu i le faateleina o le tamaoaiga pe taofimau foʻi i a latou meafaitino. Ae o isi ua avea aiga, le soifua mālōlōina, po o mea e faataunuu e le tagata lava ia, o ni mataupu e sili ona tāua iā i latou.

2 Peitaʻi, o le mataupu e sili ona tāua o loo feagai ma i tatou uma, o le faasilisilia lea o le pule silisili ese a Ieova. E ao ona tatou faaeteete ina neʻi o tatou lē taulaʻi atu i lenei mataupu tāua. E faapefea ona tupu lenei tulaga? Atonu e tatou te soona taulaʻi atu i meafai o le olaga i aso faisoo, ma galo ai iā i tatou le tāua o le faasilisilia o le pule silisili ese a le Atua. Pe atonu foʻi e avea le soona faamamafa o o tatou lava faafitauli, ma pogai e pogisa ai la tatou vaai i lenei mataupu e sili ona tāua. I le isi itu, pe afai e tatou te faasilisilia le pule silisili ese a Ieova, o le a atili ai ona saunia i tatou e feagai ma luʻi i aso taʻitasi. O le a atili ai foʻi ona tatou mafuta vavalalata atu iā Ieova.

AISEĀ E TĀUA TELE AI?

3. O ā manatu o Satani e faatatau i le pule a le Atua?

3 O le gaoioiga a Satani le Tiapolo ua fesiligia ai le tonu o le  pule silisili ese a Ieova. Ua finau mai Satani e faapea e lē tonu le pule a le Atua, ma o loo taofia e le Atua le mea e sili ona lelei mo i tatou. E manatu le Tiapolo e sili atu ona fiafia tagata pe afai e pulea e i latou i latou lava. (Kene. 3:1-5) E manatu foʻi Satani e leai se tasi e mafai ona faamaoni atoatoa i le Atua, auā o so o se tasi lava e feagai ma tulaga faigatā, o le a ia teena le pule a Ieova. (Iopu 2:4, 5) Ina ia foʻia le luʻi a le Tiapolo, o loo faataga e Ieova le taimi e faamaonia ai le mea moni e faapea, e matuā pagatia olaga o tagata pe a ola e aunoa ma Lana pule amiotonu.

4. Aiseā e tatau ai ona foʻia le finauga e faatatau i le pule silisili ese?

4 Ua silafia e Ieova e sesē tuuaʻiga a le Tiapolo. Aiseā la ua faataga ai pea e le Atua lenei finauga, ma tuu atu le avanoa iā Satani ina ia taumafai e faamaonia ai ana tuuaʻiga? E iai se vaega a tagata ma agelu i le taliina o lenei fesili. (Faitau le Salamo 83:18.) Na teena e le uluaʻi ulugalii le pule a Ieova, ma e toʻatele foʻi isi ua latou faia faapea. O lea, e ono manatu ai nisi e faapea e saʻo le Tiapolo. O le umi ona lē mautonu o tagata po o agelu e faatatau i lenei finauga, o le umi foʻi lenā ona fevaevaeaʻi o atunuu, nuu, ituaiga, aiga, ma tagata. Peitaʻi, pe a māeʻa ona faasilisilia le pule silisili ese a Ieova, o le a gauaʻi atu e faavavau agelu ma tagata uma lava i lana pule amiotonu. O le a toe faafoʻisia foʻi le filemu i le lagi ma le lalolagi.​—Efe. 1:9, 10.

5. E mafai faapefea ona tatou lagolagoina le itu a Ieova i le finauga e faatatau i le pule silisili ese?

5 O le a faasilisilia le tonu o le pule silisili ese a le Atua, ma o le a matuā lē taulau ma tafiesea pulega a Satani ma tagata. O le a taulau le pulega a le Atua e ala mai i lona Malo faa-Mesia, ma o le a faamaonia e i latou e tausisi i le faamaoni, e mafai ona lagolagoina e tagata le pule a le Atua. (Isa. 45:23, 24) Pe e te fia aufaatasi ma i latou o ē e lagolagoina ma le faamaoni le pule silisili ese a Ieova? E mautinoa o le mea lenā e te manaʻo i ai. O lea, ina ia avea i tatou ma ē e tausisi i le faamaoni, e ao ona tatou taulaʻi atu i lenā mataupu e sili ona tāua ma ia malamalama i lona tāua.

E SILI ATU ONA TĀUA LE FAASILISILIA O LE PULE NAI LO O LE FAAOLATAGA

6. O le ā le tāua o le faasilisilia o le pule silisili ese a Ieova?

6 E pei ona taʻua, o le faasilisilia o le pule silisili ese a Ieova, o se mataupu tāua o loo aofia ai tagata uma. E sili atu ona tāua nai lo o le fiafia o se tasi. Po o lona uiga la e lē tāua lo tatou faaolataga, pe e lē manatu mamafa mai foʻi Ieova iā i tatou? E leai. Aiseā?

7, 8. Aiseā e aofia ai i le faasilisilia o le pule silisili ese a le Atua le faataunuuina o ana folafolaga?

7 E matuā alofa ma tāua iā Ieova tagata. Na finagalo malie o ia e faaaogā le toto o lona Alo ina ia tatou maua ai le faaolataga. (Ioa. 3:16; 1 Ioa. 4:9) Pe afai e lē faataunuuina e Ieova ana folafolaga, o le a maua la e le Tiapolo se māfuaaga e taʻua ai le Atua o sē e pepelo o loo taofia mea lelei mai i tagata, ma e lē tonu le auala o loo pule ai. O le a lagolagoina ai foʻi ē e tetee o loo faifai mai e faapea: “Na folafola mai o ia e faatasi mai, ae o fea o iai? Auā e mai lava i le aso na maliliu ai o tatou augātamā, e leai lava se mea o suia talu mai le foafoaga o le lalolagi.” (2 Pete. 3:3, 4) O lea, o le a faamautinoa e Ieova e maua e tagata usiusitaʻi le faaolataga i le taimi e faasilisilia ai lana pule silisili ese. (Faitau le Isaia 55:10, 11.) E lē gata i lea, e mātaulia le pule silisili ese a Ieova i lona alofa. O lea, e mafai ona tatou mautinoa o le a faaauau ona ia alofa, faatāua, ma talisapaia ana auauna faamaoni.​—Eso. 34:6.

 8 Ua tatou iloa le tāua o le pule silisili ese a Ieova, ae e lē faapea ai ua tatou manatu māmā i lo tatou faaolataga po o lo tatou tāua i le silafaga a Ieova. O loo tatou taumafai ia saʻo la tatou vaai e faatatau i le pule silisili ese a le Atua ma lo tatou faaolataga. E tāua lenā vaaiga saʻo pe afai e tatou te fia taulaʻi atu pea i lenei mataupu e sili ona tāua, ma tatou lagolagoina le pule amiotonu a Ieova.

E TĀUA ONA SAʻO LE VAAI

9. O le ā le manatu o Satani e faatatau iā Iopu? (Tagaʻi i le ata i luga aʻe o le matua.)

9 O loo manino mai i le tusi o Iopu, o se tasi o tusi na muaʻi tusia o le Tusi Paia, e manaʻomia ona iai se vaaiga saʻo. O loo taʻua ai na finau mai Satani o le a teena e Iopu le Atua pe a feagai ma tofotofoga ogaoga. Na faapea atu Satani i le Atua ia faapuapuagatia Iopu. E leʻi faia faapea e Ieova, peitaʻi na ia faataga Satani ina ia tofotofo Iopu, e ala i le faapea atu: “Ua i ou lima mea uma lava ua iā te ia.” (Faitau le Iopu 1:7-12.) I se taimi puupuu, na fasiotia ai auauna a Iopu, faatamaʻia ana meafaitino, ma fasiotia si ana fanau pele e toʻasefulu. Na faia e Satani nei mea uma ae faafoliga mai o le Atua na māfua ai mafatiaga o Iopu. (Iopu 1:13-19) Sa sosoo ai ma le taia e Satani o Iopu i se maʻi tigā ma matagā. (Iopu 2:7) Na atili ona mafatia Iopu ona o upu faalotovaivai a lana avā ma aumea pepelo e toʻatolu.​—Iopu 2:9; 3:11; 16:2.

10. (a) O le ā na faia e Iopu e faaalia ai lona faamaoni i le Atua? (e) O le ā le itu na lē taulau ai Iopu?

10 O le iʻuga, na manino mai e matuā sesē lava le manatu o Satani. E leʻi fulitua Iopu i le Atua. (Iopu 27:5) Peitaʻi, sa sesē le vaaiga a Iopu mo sina taimi. Sa soona popole Iopu i le taʻutonuina o ia, ma na iʻu lava foʻi ina ia fesiligia le pogai o ona mafatiaga. (Iopu 7:20; 13:24) E tatou te ono manatu na talafeagai mafaufauga o Iopu ona o puapuaga na oo iā te ia. Peitaʻi, sa silafia e le Atua e manaʻomia ona faasaʻo manatu o Iopu. O le ā na taʻu atu e Ieova iā Iopu?

11, 12. O le ā na fesoasoani Ieova iā Iopu ina ia iloa, ma na faapefea ona tali atu Iopu?

11 O loo iai i le Iopu mataupu e 38 e oo i le 41 fetalaiga a le Atua iā Iopu. Peitaʻi, e leai se vaega o taʻua patino ai se fetalaiga a le Atua iā Iopu i le pogai o ona mafatiaga. E leʻi taumafai Ieova e faamatala atu iā Iopu māfuaaga o ona mafatiaga, e pei o loo taumafai Ieova e taʻutonuina ia lava. Nai lo o lea, na finagalo Ieova e fesoasoani iā Iopu ia iloa lona tulaga faatauvaa, pe a faatusatusa atu i le silisili ese o le Atua. Sa fesoasoani foʻi Ieova iā Iopu ia iloa e iai mataupu e sili atu ona tāua e tatau ona ia taulaʻi atu i ai.  (Faitau le Iopu 38:18-21.) Na fesoasoani lenei mea iā Iopu ina ia toe faasaʻo ai lana vaai.

12 Pe sa soona inainā Ieova i le avatuina o na fautuaga tuusaʻo, ae o lea faatoʻā uma ona feagai Iopu ma tofotofoga e sili ona ogaoga? E leai, ma e leʻi mafaufau foʻi faapena Iopu. E ui i mafatiaga o Iopu, ae na mulimuli ane ia faaalia le lotofaafetai. Na faapea atu o ia: ʻOu te toe faafoʻi mai aʻu upu, ma ua ou salamō i le efuefu ma le lefulefu.’ O le aafiaga lelei lenā o fautuaga tuusaʻo ma faalaeiau a Ieova. (Iopu 42:1-6) Muamua atu, na maua ai foʻi e Iopu ni faasaʻoga mai iā Eliu, o lē e talavou ifo. (Iopu 32:5-10) Ina ua tali atu Iopu i le aʻoaʻiga a le Atua ma toe faasaʻo ona manatu, sa faailoa atu e Ieova i isi lona fiafia iā Iopu ona o le faamaoni e ui i tofotofoga.​—Iopu 42:7, 8.

13. Sa faapefea ona aogā pea iā Iopu fautuaga a Ieova, e ui ua leva ona mavae tofotofoga na feagai ma Iopu?

13 Sa faaauau ona aogā iā Iopu fautuaga a Ieova e ui ua leva ona mavae tofotofoga na feagai ma Iopu. E faapefea? E ui lava na “faamanuia e Ieova le iʻuga o Iopu e sili atu i lo o lona amataga,” ae sa tatau ona umi se taimi e toe maua ma toe faafoʻisia ai lona tulaga na iai. Mulimuli ane, na “fanaua foʻi e ia o atalii e toʻafitu ma afafine e toʻatolu.” (Iopu 42:12-14) E mautinoa na misia e Iopu lana fanau muamua lea na feoti ona o Satani. Atonu foʻi na umi se taimi o ia manatua pea ona puapuaga. E tusa foʻi pe na mulimuli ane malamalama o ia i le pogai o ona puapuaga, ae atonu na iai taimi na mafaufau ai pe aiseā na tatau ai ona matuā ogaoga ona puapuaga. Po o ā lava ona mafaufauga, ae sa mafai ona manatunatu o ia i fautuaga a le Atua. O le iʻuga, na fesoasoani ia saʻo ai pea lana vaai ma ia maua ai se faamāfanafanaga.​—Sala. 94:19.

Pe e mafai ona tatou taulaʻi atu i le mataupu e sili ona tāua nai lo o o tatou lava faafitauli? (Tagaʻi i le palakalafa e 14)

14. O le ā le lesona e tatou te aʻoaʻoina mai i le tala iā Iopu?

14 E mafai foʻi ona tatou maua se vaaiga saʻo ma faamāfanafanaga mai i le tala iā Iopu. Sa faamauina e Ieova lenei tala ina ia “faatonu ai i tatou, ina ia tatou maua le faamoemoe e ala i lo tatou tumau, ma le faamāfanafana mai o Tusitusiga Paia.” (Roma 15:4) O le ā le lesona mo i tatou? O le manatu tāua lenei: Aua neʻi o tatou soona popole i o tatou lava faafitauli ma galo ai iā i tatou lenei mataupu e sili ona tāua, o le faasilisilia lea o le pule silisili ese a Ieova. Ia amanaʻia foʻi la tatou matafaioi i lenei mataupu tāua, o le tatou tumau faamaoni e oo lava i tulaga faigatā, e pei ona faia e Iopu.

15. O le ā le tāua o lo tatou faamaoni i taimi o faigatā?

15 Aiseā o se faamāfanafanaga ai le manatunatu i le tāua o lo tatou faamaoni? Talu  ai e iai māfuaaga o tofotofoga o loo feagai ma i tatou. E lē faapea o se lē fiafia o le Atua, ae ua maua ai le avanoa e faaalia atu ai o loo tatou lagolagoina le pule silisili ese a le Atua. (Faata. 27:11) O lo tatou tumau “e maua ai le finagalo malie o le Atua” ma faamalosia ai lo tatou faamoemoe. (Faitau le Roma 5:3-5.) Ua iloa mai i le tala iā Iopu, “e alofa faapelepele ma alofa mutimutivale Ieova.” (Iako. 5:11) O lea, e tatou te mautinoa o le a tauia e Ieova i tatou uma o ē e lagolagoina lana pule silisili ese. O le iloaina o lenei mea e fesoasoani iā i tatou ina ia “tutumau atoatoa ma ia faapalepale, atoa ma le olioli.”​—Kolo. 1:11.

IA TAULAʻI ATU PEA

16. Aiseā e tatau ai ona faamanatu iā i tatou lava le tāua o le faasilisilia o le pule silisili ese a Ieova?

16 Atonu e faigatā ona tatou taulaʻi atu pea i le faasilisilia o le pule silisili ese a Ieova. O nisi taimi e foliga mai ua lofitūina i tatou i o tatou faafitauli. E oo lava i faafitauli lāiti e mafai ona soona faamamafa i o tatou mafaufau pe afai e mafaufau pea i ai. O lea la, pe a tatou feagai ma tulaga faigatā, o se mea lelei le faamanatu pea iā i tatou lava o le tāua o le lagolagoina o le pule silisili ese a le Atua.

17. E faapefea i le faia o se sao e lē aunoa i le galuega a Ieova, ona fesoasoani iā i tatou e taulaʻi atu ai pea i le mataupu e sili ona tāua?

17 O le faia o se sao e lē aunoa i le galuega a Ieova, e fesoasoani e tatou te taulaʻi atu ai pea i le mataupu e sili ona tāua. O se faaaʻoaʻoga, o se Molimau e igoa iā Renee. Na pē le isi itu o lona tino ma na tauivi ma tigā faaumiumi ma le kanesa. A o fai ona togafitiga i falemaʻi, sa molimau atu i le ʻaufaigaluega, o tagata mamaʻi, ma tagata asi maʻi. E 80 itula na ia faaalu e molimau atu ai i se falemaʻi mo na o le lua ma le ʻafa vaiaso. E oo lava i le taimi ua lata ai ona maliu Renee, sa taulaʻi atu pea i le pule silisili ese a Ieova. O le faia faapea na fesoasoani e faaitiitia ai nisi o ona tigā.

18. E faapefea i le mea na tupu iā Jennifer ona faaalia mai ai iʻuga lelei o le lagolagoina o le pule silisili ese a Ieova?

18 E oo lava i taimi o omiga ma faafitauli i aso taʻitasi, e tatou te mananaʻo ia taulaʻi atu pea i le pule silisili ese a Ieova. O se faaaʻoaʻoga, e tolu aso na iai Jennifer i se malae vaalele e faatali mo se vaa e alu ai i lona aiga. Na tolopō faigāmalaga a le tele o vaalele. Sa ia lagona le tuua toʻatasi ma le vaivai, ma sa ono faigofie ona ia taulaʻi atu i ona lava faalogona lē fiafia. Nai lo o lea, sa tatalo o ia mo se auala e fesoasoani ai faaleagaga i isi sa aafia foʻi i lenā tulaga faigatā. O le iʻuga, sa ia molimau atu i le toʻatele o tagata ma ofo atu le tele o lomiga. Ua faapea mai o ia, “Ou te iloa na faamanuia mai Ieova iā te aʻu e ui i lenei tulaga lē lelei, ma na ia foaʻi mai le malosi talafeagai ina ia ou faamamaluina ai lona suafa.” Ioe, sa taulaʻi atu Jennifer i le finagalo o Ieova.

19. O le ā o loo faia e tagata o Ieova e tusa ai o lana pule silisili ese?

19 O le faatāuaina o le pule silisili ese a Ieova, ua faaesea ai le tapuaʻiga moni mai i lotu sesē. Ua leva ona lagolagoina e tagata o le Atua lana pule silisili ese. O lea, i le avea ai ma ē e lagolagoina le tapuaʻiga moni, e tatau iā i tatou taʻitoʻatasi ona taumafai ia lagolagoina pea le pule silisili ese a Ieova.

20. O ā faalogona o Ieova e faatatau i au taumafaiga ina ia lagolagoina lana pule silisili ese?

20 Ia e mautinoa e tāua iā Ieova au taumafaiga ina ia lagolagoina lana pule silisili ese, e ala i lau auaunaga faamaoni ma le tumau i taimi o faigatā. (Sala. 18:25) O le a talanoaina atili i le mataupu o loo sosoo mai, māfuaaga e tatau ai ona e lagolagoina ma le lotoatoa le pule silisili ese a Ieova, ma auala e mafai ona e faia ai faapea.