Skip to content

Skip to secondary menu

Skip to table of contents

Molimau a Ieova

Faa-Samoa

Le Olomatamata (Lomiga mo Su‘esu‘ega)  |  Iuni 2017

Aua le Taulaʻi Atu i Foliga Vaaia

Aua le Taulaʻi Atu i Foliga Vaaia

E TAUMAFAI malosi Don, o se Molimau a Ieova i Kanata e talanoa atu i tagata e nonofo i luga o le auala. Ua taʻua e Don e faatatau i se tasi o na tagata: “O Peter o se tamāloa sa nofo i le auala, ma o se tasi lea e sili ona tueleelea na ou vaai i ai i magāala. E lē mafaufau ona uiga ma e leʻi fia faalatalata i ai tagata. Sa masani ona ia teena le tele o gaoioiga agalelei a tagata.” Peitaʻi, e silia i le 14 tausaga o taumafai ma le onosaʻi Don e agalelei i lenei tamāloa mai i lea taimi i lea taimi.

I se tasi aso na fesili mai ai Peter iā Don: “Aiseā e te sau soo ai? E leai lava se tagata o ano mai iā te aʻu. Aiseā e te popole mai ai fua?” Na faaaogā ma le faautauta e Don ni mau se tolu ina ia taumafai e pāʻia ai le loto o Peter. Muamua, na fesili atu iā Peter pe e na te iloa le suafa o le Atua, ma fai i ai e faitau mai i le Tusi Paia le Salamo 83:18. Ina ia iloa le māfuaaga o lona naunau atu, na sosoo ai ma le fai atu o Don iā Peter e faitau mai le Roma 10:13, 14, lea e taʻua ai “e faaolaina i latou uma o ē e valaau i le suafa o Ieova.” Na faaiʻu i le faitau e Don o le Mataio 9:36, ona fai atu lea iā Peter e toe faitau mai le mau. Ua taʻua i lenā mau: “Ua silasila atu o ia [Iesu] i le motu o tagata, ona mutimutivale ai lea o lona alofa iā i latou, auā ua pei i latou o mamoe ua faamanuʻalia ma agaleagaina, ua leai so latou leoleo mamoe.” O le taimi lenā na maligi ai loimata o Peter ma fesili mai: “Po o aʻu o se tasi o na mamoe?”

Sa amata loa ona faia e Peter ni suiga. Na taʻele mamā, teu faaaulelei lana ʻava, ma ofu i ofu mamā na ave i ai e Don. Na faaauau ona tausia e Peter lenā tulaga mamā.

Na iai se api a Peter na faamaumau ai mea na tutupu iā te ia i lea aso ma lea aso. O vaega amata o lana api o loo iai ni faamatalaga faanoanoa ma mafatia. Ae i vaega mulimuli lava o lana api, ua sui ana faamatalaga. O se tasi nei o na faamatalaga: “O ananei na ou aʻoaʻoina ai le suafa o le Atua. Pe a ou tatalo la, ua mafai ona ou tatalo iā Ieova. O se fiafiaga le iloaina o lona  suafa. Fai mai Don e mafai ona avea Ieova ma aʻu Uō moni, o sē e faafofoga mai pea iā te aʻu i so o se taimi ma so o se mea.”

O upu faaiʻu a Peter o loo fai atu i lona uso laʻitiiti ma lona tuafafine matua. Na tusi o ia:

“Ua ou lagona le vaivai i lenei aso. Ou te iloa o aafiaga ia o loʻu tulaga matua. Ae e tusa po o le aso mulimuli lenei ou te ola ai, ou te iloa lava o le a ou toe vaai i laʻu uō [o Don] i le Parataiso. Pe a lua faitau i lenei tusi, ua ou lē iai. Ae afai e te lua vāai i se tamāloa ese i oʻu toe sauniga, ia talanoa atu iā te ia, ma faamolemole ia faitau le tamaʻi tusi lanu moana lenei. * O loo faamatala ai o le a ou toe vaai i laʻu uō i le Parataiso. Ou te talitonu ma loʻu lotoatoa i lenei manatu. O lo oulua uso ma le tuagane pele, o Peter.”

Ina ua uma le sauniga o le maliu, na faamatala e le tuafafine o Peter o Ummi: “Pe tusa o le lua tausaga ua mavae, na fesootaʻi mai ai Peter. O le taimi muamua lea i le tele o tausaga ua fiafia ai o ia ma ua ʻata.” Na faapea atu Ummi iā Don: “O le a ou faitau i le tusi, auā o so o se mea na pāʻia ai le loto o loʻu tuagane, e mautinoa o se mea e faapitoa.” Na talia foʻi e Ummi se talanoaga faale-Tusi Paia ma se tasi o Molimau a Ieova, e faaaogā ai le tusi O ā Aʻoaʻoga Moni a le Tusi Paia?

E mafai foʻi ona tatou ʻalofia le taulaʻi atu i foliga vaaia, faaalia le alofa moni, ma onosaʻi i so o se ituaiga tagata. (1 Timo. 2:3, 4) A o tatou faia faapea, e mafai ona tatou pāʻia loto o tagata e pei o Peter, o ē atonu e lē tosina i ai le vaai a tagata ae e lelei o latou loto. E mafai ona tatou mautinoa o le a faatupu e le Atua o lē e “vaai i le loto,” le upu moni i loto o ē fiafia moni.​—1 Samu. 16:7; Ioa. 6:44.

^ pala. 7 Sa faasino atu i le tusi O Le Upu Moni E Taʻitaʻia Ai I Le Ola Faavavau, lea sa faia ai suʻesuʻega faale-Tusi Paia ma na ia mauaina i ni tausaga ua mavae atu. Lomia e Molimau a Ieova, peitaʻi ua lē o toe lomia nei.