Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

LE OLOMATAMATA (LOMIGA MO SU‘ESU‘EGA) TESEMA 2016

O le Agalelei Faifua ua Tuusaʻoloto ai Outou

O le Agalelei Faifua ua Tuusaʻoloto ai Outou

ʻE lē tatau ona pule le agasala iā te outou, auā ua outou nonofo i le agalelei faifua.’ROMA 6:14.

PESE: 46, 127

1, 2. Aiseā e tele ai ina faaaogā e Molimau a Ieova le Roma 5:12?

SEʻI faapea na e manaʻo e tusi i lalo mau o le Tusi Paia e iloa lelei ma faaaogā soo e Molimau a Ieova. Po o le a aofia ai le Roma 5:12? Seʻi mafaufau i le tele o taimi e tatou te faaaogā ai lenei mau: “E pei ona oo mai o le agasala i le lalolagi ona o le tagata e toʻatasi, o le oti foʻi ona o le agasala, ona oo mai ai lea o le oti i tagata uma auā ua agasala uma lava.”

2 E tele taimi o loo faaaogā ai lenei mau i le tusi O ā Aʻoaʻoga Moni a le Tusi Paia? A o tou suʻesuʻeina le mataupu e 35, ma le 6 o lenei tusi ma lau fanau po o isi, e lē taumatea e te faitauina le Roma 5:12 pe a talanoa e faatatau i le finagalo o le Atua mo le lalolagi, le togiola, ma le tulaga o ē ua maliliu. Ae pe e masani ona e mafaufau i le Roma 5:12 e fesootaʻi atu i lau faiā ma Ieova, au gaoioiga, ma lou lumanaʻi?

3. O le ā le mea moni e tatau ona tatou amanaʻia e faatatau i le agasala?

3 E tatau ona tatou amanaʻia le mea moni o i tatou o tagata agasala. O aso uma lava e tatou te faia ai mea sesē. Peitaʻi, ua tatou mautinoa e manatua e le Atua na faia i tatou mai i le efuefu, ma e naunau o ia e faaalia mai lona alofa mutimutivale.  (Sala. 103:13, 14) Na faaaofia e Iesu i lana tatalo faaaʻoaʻo le talosaga lenei i le Atua: “Ia faamagalo a matou agasala.” (Luka 11:2-4) O lea, e leai la se māfuaaga e tatou te toe soona mafaufau ai i mea sesē ua faamagalo e le Atua. Nai lo o lea, e tatou te maua aogā pe a mafaufau i le auala na mafai ai ona ia faamagalo i tatou.

FAAMAGALO E ALA I LE AGALELEI FAIFUA

4, 5. (a) O le ā e fesoasoani iā i tatou ina ia malamalama ai i le Roma 5:12? (e) O le ā le “agalelei faifua” o loo taʻua i le Roma 3:24?

4 I mataupu o loo siʻomia ai le faamatalaga a le aposetolo o Paulo i le Roma 5:12, aemaise lava i le mataupu e 6, e tatou te maua ai ni faamatalaga tāua. O le a tatou malamalama ai i le auala e mafai ona faamagalo ai e Ieova i tatou. Ua taʻua i le Roma 3:23, 24: “Ua agasala tagata uma lava, . . . ma o se meaalofa foaʻifua le taʻuamiotonuina o i latou i lona agalelei faifua, ma ua faasaʻolotoina ai e ala i le togiola a Keriso Iesu.” O le ā na uiga i ai Paulo ina ua ia taʻua le “agalelei faifua”? E tusa ai ma se tasi tusi, sa faaaogā e Paulo se upu Eleni e uiga atu i se “gaoioiga lelei e fai fua mo se isi, e aunoa ma le toe feau pe manaʻo i se taui.” O se gaoioiga e faia i se tasi e lē tatau i ai.

5 Na faamatala e John Parkhurst, o se tagata atamai e faapea: “Pe a talanoa e faatatau i le Atua po o Keriso, o lenei upu Eleni e tele ina faasino atu i la laʻua gaoioiga faifua po o le agalelei faifua, ina ia togiola ma faaolaina ai tagata.” O lea, ua talafeagai lelei le auala o loo faaliliu ai le faaupuga “agalelei faifua” i le Faaliliuga a le Lalolagi Fou. Ae na faapefea ona faaalia e le Atua lenei agalelei faifua? O le ā le sootaga ma lo tatou faamoemoe ma la tatou faiā ma ia? Seʻi o tatou iloiloina.

6. O ai e mafai ona maua aogā mai i le agalelei faifua o le Atua?

6 O Atamu o ia lea o le “tagata e toʻatasi” na ala ai ona “oo mai i le lalolagi” le agasala ma le oti. O lea, “ua pule le oti e pei o se tupu ona o le agasala a le tagata e toʻatasi.” Na faapea atili mai Paulo o “le tele o le agalelei faifua” o le Atua, na ala mai “i le tagata e toʻatasi o Iesu Keriso.” (Roma 5:12, 15, 17) O lenā agalelei faifua ua maua ai e tagata uma ni iʻuga lelei. Ua “taʻuamiotonuina le toʻatele ona o le usiusitaʻi o le tagata e toʻatasi [o Iesu].” O le agalelei faifua o le Atua e mafai ona taʻitaʻia atu ai “i le ola e faavavau, e ala iā Iesu Keriso.”Roma 5:19, 21.

7. Aiseā ua avea ai le sauniuniga a le Atua o le togiola o se faaaliga o le agalelei faifua?

7 E leʻi manaʻomia fua ona auina mai e Ieova lona Alo i le lalolagi ina ia saunia le togiola. O le gaoioiga foʻi na faia e le Atua ma Iesu e saunia ai le togiola, lea ua mafai ona faamagaloina ai agasala, sa lē tatau ona maua e tagata agasala e lē lelei atoatoa. O le faamagaloina la o i tatou ma le mauaina o le faamoemoe o le ola e faavavau, o se faaaliga o le matuā tele o le agalelei faifua. E tatau ona tatou matuā faatāua le meaalofa o le agalelei faifua o le Atua, ma ia taaʻina ai o tatou olaga i aso taʻitasi.

TALISAPAIA LE AGALELEI FAIFUA O LE ATUA

8. O le ā le manatu sesē e ono iai i nisi e faatatau i a latou agasala?

8 Talu ai o i tatou o ni tagata lē lelei atoatoa na tupuga mai iā Atamu, e tatou te mafuli atu i le faia o mea sesē, mea leaga, ma le agasala. Peitaʻi, e lē tatau ona tatou faaaogāsesē le agalelei faifua o le Atua, e ala i le manatu e faapea: ʻE tusa pe ou te faia se mea sesē e silasila i ai le Atua o se agasala, ou te lē popole ai. O le a faamagalo  aʻu e Ieova.’ E faanoanoa ona o nisi o Kerisiano na manatu faapena, e oo lava i taimi a o soifua nisi o le ʻauaposetolo. (Faitau le Iuta 4.) Atonu e tatou te lē faia ni faamatalaga sesē faapena, ae e tatou te ono manatu faapena pe amata foʻi ona tuputupu aʻe lenā manatu i o tatou loto.

9, 10. Na faapefea ona tuusaʻoloto Paulo ma isi mai i le agasala ma le oti?

9 Na faamamafa e Paulo e tatau ona tatou matuā teena le manatu e faapea: ʻE malamalama lava le Atua. E na te lē amanaʻia aʻu mea sesē.’ Aiseā? Talu ai na tusi Paulo o Kerisiano ua “oti e tusa ai ma le agasala.” (Faitau le Roma 6:1, 2.) E faapefea ona faapea atu na latou “oti e tusa ai ma le agasala,” ae na soifua pea i le lalolagi?

10 Na faatatau e le Atua le aogā o le togiola iā Paulo ma isi i na taimi. O lea, na faamagalo e Ieova a latou agasala, faauuina i latou i le agaga paia, ma valaauina e avea ma ona atalii faaleagaga. Na latou mauaina ai loa le faamoemoe i le lagi. Pe a tumau faamaoni, o le a latou ola ma pule faatasi ma Keriso i le lagi. Peitaʻi, na taʻua e Paulo ua latou “oti e tusa ai ma le agasala,” a o soifua pea ma auauna i le Atua i le lalolagi. Sa ia faaaogā le faaaʻoaʻoga iā Iesu, o lē na maliu o se tagata ma toe faatūina mai i le tino agaga e lē mafai ona oti i le lagi. Ua lē toe pule le oti iā Iesu. E faapena foʻi Kerisiano faauuina, na manatu ua ʻoti i latou e tusa ai ma le agasala, ae ua ola mo le Atua e ala iā Keriso Iesu.’ (Roma 6:9, 11) Na suia o latou olaga. E leʻi toe pulea i latou i faanaunauga po o tuʻinanauga agasala. Na feoti i latou e tusa ai ma o latou olaga tuai.

11. O le ā e uiga atu i ai le “oti e tusa ai ma le agasala” i Kerisiano i aso nei?

11 Ae faapefea Kerisiano i aso nei? A o leʻi avea i tatou ma Kerisiano, sa tele ina tatou agasala, ma atonu e tatou te leʻi iloa le sesē po o le leaga o a tatou gaoioiga i le silafaga a le Atua. Sa pei i tatou o ni “pologa i amioga lē mamā ma le solitulafono.” Sa fai i tatou ma ʻpologa i le agasala.’ (Roma 6:19, 20) Ae na tatou aʻoaʻoina upu moni o le Tusi Paia, faia suiga i o tatou olaga, tuuina atu i tatou i le Atua ma papatisoina. Talu mai lenā taimi, o lo tatou faanaunauga o le ʻusiusitaʻi ma o tatou loto’ i aʻoaʻoga ma tapulaa a le Atua. Ua ʻtuusaʻoloto i tatou mai i le agasala’ ma ua ʻavea i tatou ma pologa a le amiotonu.’ (Roma 6:17, 18) O lea, e mafai foʻi ona faapea atu ua tatou “oti e tusa ai ma le agasala.”

12. O le ā le filifiliga e tatau iā i tatou taʻitoʻatasi ona fai?

12 Seʻi mafaufau i lou tulaga e tusa ai ma upu nei a Paulo: “Aua neʻi pule pea le agasala e pei o se tupu i o outou tino augavale, e tou te usiusitaʻi ai i ona tuʻinanau.” (Roma 6:12) E mafai ona tatou faataga le agasala e “pule pea” iā i tatou, e ala i le faia o so o se mea e manaʻo i ai o tatou tino agasala. Talu ai e mafai ona tatou faataga pe teena le agasala e pule iā i tatou, o le fesili la, O le ā moni lava le mea e tatou te mananaʻo i ai? Ia fesili ifo: ʻPe e iai ni taimi ou te faataga ai oʻu tuʻinanauga po o mafaufauga lē lelei atoatoa, e taaʻina aʻu ina ia faia se mea sesē? Po ua ou oti e tusa ai ma le agasala? Po o ou ola mo le Atua e ala iā Keriso Iesu?’ O tali i nei fesili e faalagolago i le tele o lo tatou talisapaia o le agalelei faifua o le Atua, i lona faamagaloina o i tatou.

O SE TAUIVIGA E MAFAI ONA E MANUMALO AI

13. O le ā le faamaoniga e tatou te mautinoa ai e mafai ona tatou fulitua i le agasala?

13 Ua fulitua tagata o Ieova i “fua” na latou faaalia a o leʻi iloaina le Atua, alolofa, ma auauna iā te ia. Atonu sa aofia i o latou olaga tuai ʻmea ua latou māsiasi ai’ ua tatau i ai le oti. (Roma 6:21) Na latou faia ni  suiga. E faapena le toʻatele i Korinito lea na tusi atu i ai Paulo. O nisi sa ifo i tupua, mulilulua, tauatane, gāoi, onanā, ma faia isi agasala faapena. Peitaʻi, na “faamamāina” i latou ma “faapaiaina.” (1 Kori. 6:9-11) E lē taumatea na faapena foʻi nisi i le faapotopotoga i Roma. Sa faagaeeina Paulo e tusi atu iā i latou: “Aua neʻi tuuina atu o outou tino i le agasala e fai ma auupega o le amiolētonu, a ia tuuina atu outou i le Atua e pei o ē ua ola mai i le oti, ia faapea foʻi ona tuuina atu o outou tino i le Atua e fai ma auupega o le amiotonu.” (Roma 6:13) Sa mautinoa e Paulo e mafai ona latou tumau i le mamā faaleagaga, ma maua ai pea aogā mai i le agalelei faifua o le Atua.

14, 15. E faapefea ona faaalia o loo tatou maumauaʻi e ʻusiusitaʻi ma o tatou loto?’

14 E faapena foʻi i aso nei. O nisi o o tatou uso ma tuafāfine na ola i ni olaga e pei o i latou na iai i Korinito. Peitaʻi, ua suia i latou, ua fulitua i o latou olaga tuai, ma ua “faamamāina.” Pe afai na e fulitua i se olaga faapena, ua faapefea la lou tulaga i luma o le Atua i le taimi lenei? Talu ai ua mafai ona tatou maua le agalelei faifua o le Atua ma faamagaloina i tatou, po ua e maumauaʻi la e lē ʻtuuina atu lou tino i le agasala’? Nai lo o lea, po ua ʻtuuina atu oe i le Atua e pei o ē ua ola mai i le oti’?

15 Ina ia tatou faia faapea, e tatau ona tatou filifili e ʻalofia le faia o agasala matuiā e pei ona faia e nisi i Korinito. E tāua tele lenā mea pe afai ua tatou talia le agalelei faifua o le Atua, ma ua ʻlē toe pule le agasala iā i tatou.’ Peitaʻi, po o tatou maumauaʻi foʻi e ʻusiusitaʻi ma o tatou loto,’ e ala i le taumafai malosi e teena agasala ia e manatu nisi e lē o ni agasala matuiā?Roma 6:14, 17.

16. E faapefea ona tatou iloa e lē na o agasala matuiā e tatau ona tatou ʻalofia?

16 Seʻi mafaufau i le aposetolo o Paulo. E tatou te mautinoa e na te leʻi faia agasala matuiā ia e taʻua i le 1 Korinito 6:9-11. Peitaʻi, na ia taʻutino mai o loo nofosala pea o ia i le agasala. Na tusi o ia e faapea: “O aʻu o le tagata faaletino, ua faatauina atu i le agasala. Auā ou te lē iloa mea ou te faia. Auā o le mea ou te loto i ai, o le mea lea ou te lē faia, a o le mea ou te ʻinoʻino i ai, o lea ou te faia.” (Roma 7:14, 15) E faaalia mai i inei, e iai isi mea sa vaai i ai Paulo o ni agasala, ma sa tau foʻi o ia faasaga i nei mea sesē. (Faitau le Roma 7:21-23.) Tau ina ia tatou faia foʻi faapea a o taumafai e ʻusiusitaʻi ma o tatou loto.’

17. Aiseā e tatou te mananaʻo ai ia faamaoni?

17 O se faataʻitaʻiga, seʻi manatu i le faamaoni. O le faamaoni o se uiga e sili ona tāua i Kerisiano. (Faitau le Faataoto 14:5; Efeso 4:25.) O Satani o le “tamā o le pepelo.” Na feoti Anania ma lana avā ona o le pepelo. E tatou te lē fia faaaʻoaʻo iā i latou nei, ma e tatou te ʻalofia le pepelo. (Ioa. 8:44; Galu. 5:1-11) Ae e tele isi mea e aofia ai i le faamaoni nai lo o le tau ina ʻalofia o le pepelo. O lo tatou faamaoni e tatau ona atagia atu ai lo tatou matuā talisapaia o le agalelei faifua o le Atua.

18, 19. Aiseā e faapea atu ai o le faamaoni e lē tau ina ʻalofia le faia o ni tala pepelo?

18 O le pepelo, o le faia lea o se faamatalaga e lē moni. Peitaʻi, e iai isi mea e faatalitalia e Ieova mai i ona tagata, nai lo o le tau ina ʻalofia o le faia o ni tala pepelo. Na ia uunaʻia tagata Isaraelu anamua: “E ao ona paia outou, auā o aʻu o Ieova o lo outou Atua, e paia lava aʻu.” Sa ia taʻu atu ni faaaʻoaʻoga o le paia. Na fetalai le Atua: “Aua tou te gaoi, aua tou te taufaasesē, ma aua foʻi neʻi faapiʻopiʻo se tasi o outou i lona tuaoi.” (Levi. 19:2, 11) Atonu e taumafai malosi se tasi e aua le faia ni tala pepelo, a o le taimi e tasi e mafai ona ia taufaasesē  i isi ma feutagaʻi ma i latou i se auala lē tonu.

Po o tatou maumauaʻi e ʻalofia le pepelo ma le taufaasesē? (Tagaʻi i le palakalafa e 19)

19 O se faataʻitaʻiga, ua talosaga se tasi i lona pule e lē faigaluega pe e vave ona mānava i le aso e sosoo ai, ona e tatau ona alu e vaai le fomaʻi. A o le mea moni, nai lo o le alu e vaai le fomaʻi, e na o sina taimi puupuu lava e alu ai i le fale talavai pe alu e totogi sana pili i le falemaʻi. O le māfuaaga tonu lava e lē faigaluega ai, ona e alu e tapena lana malaga pe faatafafao lona aiga i le matafaga. Po o faamaoni lana faamatalaga ona o lea e lē o saʻo atoatoa le māfuaaga e lē faigaluega ai? Po o taufaasesē o ia? Atonu e te iloaina ni tulaga taufaasesē faapea e fai ma le loto i ai. E ono faia faapea e nisi ina ia ʻalofia ai ni faasalaga pe e saʻilia ai lo latou lava lelei. E tusa pe e leʻi faia se pepelo tuusaʻo, ae faapefea le faatonuga a le Atua e “aua tou te taufaasesē”? Ia mafaufau foʻi i le Roma 6:19 lea e faapea mai, ia “tuuina atu o outou tino, e fai ma pologa i le amiotonu e faapaiaina ai.”

20, 21. O le ā e tatau ona uunaʻia i tatou e fai ona o le agalelei faifua o le Atua?

20 O le manatu tāua, e tele atu mea e aofia ai i lo tatou talisapaia o le agalelei faifua o le Atua, nai lo o le tau ina ʻalofia o le mulilua, onā, po o isi agasala ia na faia e nisi i Korinito. O le taliaina o le agalelei faifua o le Atua, e lē gata e tatou te ʻalofia ai amioga lē mamā taufeusuaʻiga, ae e teena foʻi so o se faanaunauga ia matamata i faafiafiaga matagā. O le tuuina atu o o tatou tino e fai ma pologa i le amiotonu, e lē gata e taofia ai i tatou mai i le onā, ae e uunaʻia ai foʻi i tatou ia ʻalofia le inu tele ma toetoe ai lava ina onā. Atonu e tatou te manaʻomia ni taumafaiga malolosi ina ia tauivi ai ma na amioga sesē; peitaʻi, o se tauiviga e mafai ona tatou manumalo ai.

21 O lo tatou sini ia ʻalofia agasala matuiā faapea mea sesē e lē matuiā. E lē mafai ona tatou faia faapea i se tulaga atoatoa. Peitaʻi, e tatau ona tatou taumafai malosi ia faia faapea, e pei foʻi ona faia e Paulo. Na ia uunaʻia ona uso: “Aua neʻi pule pea le agasala e pei o se tupu i o outou tino augavale, e tou te usiusitaʻi ai i ona tuʻinanau.” (Roma 6:12; 7:18-20) E faaalia lo tatou talisapaia moni o le agalelei faifua o le Atua e ala mai iā Keriso, pe a tatou tauivi faasaga i so o se ituaiga agasala.

22. O le ā le taui mo i latou e faaauau ona talisapaia le agalelei faifua o le Atua?

22 O le agalelei faifua o le Atua ua faamagalo ai ma o le a faaauau ona faamagaloina ai a tatou agasala. O lo tatou talisapaia o lenei tulaga, e tatou te taumafai ai e manumalo mai i so o se faanaunauga ia faia agasala, e ono manatu i ai isi o ni agasala lāiti. Na faamatilatila e Paulo le taui mo i tatou: “Ona ua faasaʻolotoina outou mai i le agasala, ae ua avea ma pologa a le Atua, ua outou fua mai ai ni fua e faapaiaina ai, ma iʻu ai i le ola e faavavau.”Roma 6:22.