Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

LE OLOMATAMATA (LOMIGA MO SU‘ESU‘EGA) TESEMA 2016

Ia Taʻu Atu o Outou Popolega Uma iā Ieova

Ia Taʻu Atu o Outou Popolega Uma iā Ieova

“Ia taʻu atu o outou popolega uma iā [Ieova], auā o loo manatu mamafa mai o ia iā te outou.”1 PETE. 5:7.

PESE: 38, 7

1, 2. (a) Aiseā e lē tatau ai ona faateʻia i tatou pe a feagai ma ni popolega? (Tagaʻi i le ata i luga aʻe o le matua.) (e) O le ā o le a tatou iloiloina i lenei mataupu?

UA TATOU ola i taimi e sili ona faigatā. Ua matuā ita Satani le Tiapolo ma “o loo fealuaʻi . . . e pei o se leona o loo tagi leotele, e saʻili se tasi e na te ʻaina.” (1 Pete. 5:8; Faaa. 12:17) O lea, e lē o se mea e faateʻia ai ona e oo lava iā i tatou o auauna a le Atua, e iai taimi e lagona ai le popole. E oo lava foʻi i auauna faamaoni a le Atua i aso ua mavae, sa iai taimi na matuā popole ai, e pei o le tupu o Tavita. (Sala. 13:2) E faapena foʻi le aposetolo o Paulo, sa “popole i faapotopotoga uma.” (2 Kori. 11:28) Ae o le ā e mafai ona tatou faia pe a lofitūina i tatou i popolega?

2 Sa fesoasoani lo tatou Tamā alofa i le lagi i ana auauna i aso ua mavae. E mafai foʻi ona ia fesoasoani mai i aso nei ina ia tatou maua le mapusaga mai i mafatiaga po o popolega. Ua uunaʻia i tatou i le Tusi Paia: “Ia taʻu atu o outou popolega uma iā te ia, auā o loo manatu mamafa mai o ia iā te outou.” (1 Pete. 5:7) Ae e mafai faapefea ona tatou faia lenei mea? Seʻi o tatou iloilo ni auala se fā: (1) tatalo mai i le loto, (2) faitau ma manatunatu loloto i le Afioga a le Atua, (3) ōle atu mo le agaga paia o Ieova,  ma le (4) sasaa atu ou faalogona i se tagata e te maufaatuatuaina. A o tatou iloiloina nei auala e fā, mātau ni laasaga talafeagai e te manaʻo e faatatau.

“IA TUUINA ATU IĀ IEOVA OU POPOLEGA UMA”

3. E faapefea ona “tuuina atu iā Ieova ou popolega uma”?

3 O le laasaga muamua e mafai ona tatou faia, o le faalatalata atu lea iā Ieova i le tatalo faatauanau. Pe a e feagai ma tulaga e lagona ai le lē mautonu, atugalu, po o le popole, ia sasaa atu lou loto i lo tatou Tamā alofa i le lagi. Sa ōle atu le faisalamo o Tavita iā Ieova: “Le Atua e, ia e faafofoga mai i laʻu tatalo.” Na toe faapea mai Tavita i lenā lava salamo: “Ia tuuina atu iā Ieova ou popolega uma, o ia lava e na te tausia oe.” (Sala. 55:1, 22) Pe a uma ona faia au taumafaiga uma ina ia foʻia se faafitauli, e mautinoa e telē le aogā o le tatalo mai i le loto nai lo o le faaauau ona popole. Ae e faapefea ona fesoasoani le tatalo iā te oe ina ia ʻalofia ai le lofitūina i popolega o le loto ma le faanoanoa?Sala. 94:18, 19.

4. Aiseā e tāua tele ai le tatalo pe a tatou popole?

4 Faitau le Filipi 4:6, 7E mafai ona tali mai Ieova i a tatou faatoga mai i le loto, e faia faatauanau ma e lē aunoa. E faapefea? E ala i le foaʻi mai o le filemu o le mafaufau lea e aveesea ai le popole i o tatou mafaufau ma loto. E ioe le toʻatele i lenei manatu pe a fua i mea na tutupu iā i latou. Ina ua feagai ma popolega po o lagona lē mautonu, sa fesoasoani le Atua iā i latou ia lagona le tele o le filemu lea e lē malamalama i ai tagata. O le mea foʻi lenā e mafai ona tupu iā te oe. O lea, e mafai e le “filemu mai i le Atua” ona manumalo i so o se luʻi e te ono fesagaʻia. E mafai ona e maufaatuatuaina atoatoa le folafolaga alofa lenei a Ieova: “Aua e te vaai solo, auā o aʻu o lou Atua. Ou te faamalosi iā te oe. Ou te matuā fesoasoani iā te oe.”Isa. 41:10.

FILEMU O LE MAFAUFAU ONA O LE AFIOGA A LE ATUA

5. E faapefea ona tatou maua le filemu o le mafaufau ona o le Afioga a le Atua?

5 O le auala lona lua e maua ai le filemu o le mafaufau, o le faitau lea o le Tusi Paia ma manatunatu loloto i ai. Aiseā e tāua ai lenei auala? O loo iai i le Tusi Paia taʻiala faaleagaga e fesoasoani iā te oe ina ia ʻalofia, faaitiitia, pe feagai ai ma popolega. Ia manatua o le Afioga a le Atua e aogā ma faafouina ai, auā o loo tusia ai fetalaiga atamai a Lē na faia i tatou. O le a matuā faamalosia oe a o e manatunatu loloto i manatu o le Atua i aso taʻitasi, ma iloilo le auala sili e faatatau ai taʻiala aogā a le Tusi Paia. Na faafesootaʻi e Ieova le faitauina o lana Afioga i le mauaina o le “lototele ma faamalosi,” ma le lē “fefe pe mataʻu.”Iosua 1:7-9.

6. O ā aogā e te maua mai i fetalaiga a Iesu?

6 E tatou te maua i le Afioga a le Atua fetalaiga faamāfanafanaloto a Iesu. Sa faafouina ē na faalogologo i ana fetalaiga ma aʻoaʻoga. E toʻatele i latou na faalatalata atu iā te ia ona sa ia faatoʻafilemu ē na atuatuvale o latou loto, faamalosia ē vaivai, ma faamāfanafana i ē na mafatia. (Faitau le Mataio 11:28-30.) Sa manatu alofa o ia i manaʻoga faaleagaga, tau faalogona, ma manaʻoga faaletino o isi. (Mare. 6:30-32) O loo tumau pea le folafolaga a Iesu o le a ia lagolagoina i tatou. E mafai ona taunuu moni iā te oe, e pei foʻi ona moni i aposetolo o Iesu. E lē tau manaʻomia ona lua iai faatasi ma Iesu ina ia aogā ai iā te oe lana folafolaga. I le avea ai ma Tupu i le lagi, e faaauau ona faaalia e Iesu le tigā alofa. O lea, pe a e popole, e mafai ona ia “fesoasoani” mai ma le alofa iā te oe “i le taimi e tatau ai.” Ioe, e mafai ona fesoasoani fetalaiga a Iesu iā te  oe ina ia feagai ai ma mafatiaga, ma maua le faamoemoe ma le lototele.Epe. 2:17, 18; 4:16.

FAAALIA VALA O LE FUA O LE AGAGA PAIA

7. O ā aogā e tatou te maua pe a tali mai le Atua i a tatou tatalo mo le agaga paia?

7 Na folafola e Iesu o le a foaʻi mai e lo tatou Tamā i le lagi le agaga paia i ē e ōle atu iā te Ia. (Luka 11:10-13) O le faia faapea, o le a tatou maua ai le fesoasoani malosi lona tolu e faaitiitia ai popolega, o le fua lea o le agaga paia. O le malosi galue o le Atua, e mafai ona atiaʻe ai uiga lelei ia e faaatagia atu ai uiga tonu lava o le Atua o Lē e ona le malosi uma lava. (Faitau le Kalatia 5:22, 23; Kolo. 3:10) A o e atiaʻe le fua o le agaga, o le a faaleleia ai a outou faiā ma isi. O le a ʻalofia ai le tele o tulaga ia e ono faapogaia ai le popole. Seʻi o tatou iloilo auala o le a fesoasoani ai iā te oe le fua o le agaga.

8-12. E faapefea ona fesoasoani le fua o le agaga paia iā te oe?

8 “O le alofa, o le olioli, o le filemu.” Pe a e taumafai e feutagaʻi ma tagata i se auala faaaloalo, o le a e iloa ai taulima ni faalogona lē lelei o loo iā te oe. E faapefea? A o e faaalia le alofa faaleuso, alofa faapelepele, ma le faaaloalo, o le a e ʻalofia ai tulaga e faapogaia ai le popole.Roma 12:10.

9 “O le faapalepale, o le agalelei, o le mataalofa.” E te atiaʻe ni faiā filemu ma isi pe a e utagia le apoapoaʻiga lenei: “Ia agalelei le tasi i le isi, ia māfana lo outou alofa, ma ia fefaamagaloaʻi ma le lotoatoa.” (Efe. 4:32) O le faia faapea, o le a e ʻalofia ai tulaga e ono faapogaia ai le popole. O le a lelei foʻi le auala e te taulima ai tulaga e tulaʻi mai ona o le tino lē lelei atoatoa.

10 “O le faatuatua.” E masani ona tatou popole i aso nei e faatatau i tupe ma meafaitino. (Faata. 18:11) Peitaʻi, o le matuā faatuatuaina o le tausiga alofa a Ieova, e mafai ona fesoasoani iā te oe e fesagaʻia ai pe ʻalofia na popolega. E faapefea? E mafai ona e ʻalofia le tele o popolega pe a utagia le fautuaga a le aposetolo o Paulo, ia “lotomalilie i mea ua iai.” Na faapea atili mai Paulo: “Auā na fetalai [le Atua]: ʻOu te lē tuua lava oe, ma ou te lē tuulafoaʻia lava oe.’ Ia tatou lototetele ma faapea atu: ʻO Ieova o loʻu fesoasoani ia; ou te lē fefe lava. O le ā la se mea e mafai ona faia e tagata iā te aʻu?’”Epe. 13:5, 6.

11 “O le agamalu, ma le amio pulea.” Seʻi manatu i aogā e te maua pe a faaalia nei uiga. O le a e ʻalofia ai gaoioiga e faapogaia ai lou popole, ma e te maua aogā e ala i le ʻalofia o le “ita umi, ma le itaitagofie, ma le lotoa, ma le soona ʻeʻē, ma upu masoā.”Efe. 4:31.

12 O le mea moni, e te manaʻomia le lotomaulalo ina ia gauaʻi atu ai i le “aao malosi o le Atua,” ma ʻtaʻu atu ou popolega uma iā te ia.’ (1 Pete. 5:6, 7) A o e atiaʻe le lotomaulalo, o le a e maua le finagalo malie o le Atua ma lana fesoasoani. (Mika 6:8) O le iai o se vaaiga saʻo i le mea e gata ai lou malosi i le tino, mafaufau, ma faalogona, o le a faaitiitia ai lou soona popole auā o le a e faalagolago atu i le Atua.

“IA AUA NEʻI OUTOU POPOLE”

13. O le ā na uiga i ai le fetalaiga a Iesu “ia aua neʻi outou popole”?

13 I le Mataio 6:34 (faitau), o loo taʻua ai le fautuaga aogā lenei a Iesu: “Ia aua neʻi outou popole.” Peitaʻi, atonu e foliga mai e faigatā ona faatatau lenei fautuaga. O le ā na uiga i ai Iesu ina ua fetalai “ia aua neʻi outou popole”? E mautinoa e leʻi uiga o ia e faapea o le a matuā leai lava se taimi e popole ai se auauna a le Atua, auā ua tatou iloa upu a Tavita ma Paulo e faatatau i le popole. Peitaʻi, na fesoasoani Iesu i ona soo ia iloa e lē mafai ona foʻia faafitauli, pe afai e  popole i mea e lē tatau ona popole ai, pe soona popole foʻi. E tofu lava le aso ma ona luʻi, e lē manaʻomia la i Kerisiano ona soona popole i mea ua teʻa po o le lumanaʻi, ae ia uaʻi atu i luʻi o le asō. E faapefea ona e faatatauina le fautuaga a Iesu, ma aveesea ai le soona popole naʻuā?

14. E faapefea ona e feagai ma popolega e faatatau i mea na e faia i le taimi ua teʻa?

14 O nisi popolega atonu e māfua ona o ni gaoioiga po o ni mea sesē na faia e se tasi i taimi ua teʻa. Atonu e ōia lona lotofuatiaifo ona o se mea sesē na ia faia e tusa lava po ua mavae le tele o tausaga. O nisi taimi sa lagona e le tupu o Tavita ʻua oo i luga aʻe o lona ulu ona sesē.’ Na ia taʻutino mai: “Ua ou faataiō ona o le ōi o loʻu loto.” (Sala. 38:3, 4, 8, 18) O le ā le gaoioiga atamai sa tatau ona faia e Tavita? O le ā na ia faia? Sa ia maufaatuatuaina o le a alofa mutimutivale ma faamagalo o ia e Ieova. Na ia faapea mai ma le mautinoa: “E fiafia le tagata ua faamagaloina lana solitulafono.”—Faitau le Salamo 32:1-3, 5.

15. (a) O le ā e tatou te aʻoaʻoina mai iā Tavita? (e) O ā ni gaoioiga talafeagai e te faia ina ia faaitiitia ai le popole? (Tagaʻi i le pusa “ Nisi o Auala Lelei e Faaitiitia ai le Popole.”)

15 O isi taimi atonu e te popole e faatatau i mea i le taimi lenei. O se faataʻitaʻiga, ina ua tusia e Tavita le Salamo 55, sa popole o ia e faatatau i lona ola. (Sala. 55:2-5) Peitaʻi, e leʻi avea lenā popolega ma pogai na mou ese atu ai lona maufaatuatuaina o Ieova. Sa tatalo faatauanau Tavita e faatatau i ona faafitauli, ae sa ia iloa foʻi le tāua o le faia o ni gaoioiga talafeagai ina ia taulima ai le faafitauli. (2 Samu. 15:30-34) E iai se lesona aogā e aʻoaʻoina mai iā Tavita. Nai lo o le lofitūina i popolega, ia faia ni gaoioiga ina ia taulima ai le faafitauli, ma ia tuu atu ma le mautinoa na popolega i aao o Ieova.

16. E faapefea i le uiga o le suafa o le Atua ona faamalosia ai lou faatuatua?

16 E masani ona soona popolevale se Kerisiano pe afai e faamamafa i lona mafaufau faafitauli e ono tutupu i le lumanaʻi. Peitaʻi e lē manaʻomia ona e soona popole e faatatau i mea e leʻi tutupu. Aiseā? Auā e masani lava e lē matuiā tele mea e tutupu e pei ona tatou mafaufau i ai. E leai foʻi se mea e faigatā i le Atua o lē e mafai ona tuu uma atu i ai ou popolega. O le uiga tonu o lona suafa, “E Gaoioi o Ia e Tusa ai ma Tulaga Manaʻomia.” (Eso. 3:14) O le uiga o lona suafa ua faamautinoa mai ai iā i tatou, e matuā mafai e le Atua ona faataunuu lona finagalo mo ana auauna. E mafai foʻi ona e mautinoa e tauia e le Atua ana auauna faamaoni, ma fesoasoani iā i latou e feagai ma popolega e faatatau i le taimi ua teʻa, i le taimi nei, ma le lumanaʻi.

TALANOA MAI I LE LOTO

17, 18. E faapefea i le lelei o fesootaʻiga ona fesoasoani iā te oe e feagai ai ma popolega?

17 O le auala lona fā e mafai ona fesoasoani iā te oe e feagai ai ma popolega, o le lelei lea o fesootaʻiga, e ala i le faailoa atu o ou faalogona i se tagata e te maufaatuatuaina.  E mafai e lau paaga faaipoipo, se uō vavalalata, po o se toeaina o le faapotopotoga, ona fesoasoani iā te oe ia maua se vaaiga saʻo e tusa ai ma ou popolega. Ua taʻua i le Faataoto 12:25: “O popolega i le loto o le tagata e faavaivai ai le loto, a o tala lelei e olioli ai le loto.” O le talanoa saʻo atu ma le faamaoni e fesoasoani tele iā te oe e te malamalama ai ma feagai ai ma ou popolega. Ua faapea mai le Faataoto 15:22: “E faalēaogāina fuafuaga pe a lē iai ni talanoaga i mataupu faalilolilo, a o le toʻatele o le ʻaufaufautua e taunuu ai mea.”

18 E fesoasoani foʻi Ieova i Kerisiano ina ia feagai ma popolega, e ala mai i sauniga a le faapotopotoga i vaiaso taʻitasi. O sauniga e tatou te faatasitasi ai ma uso ma tuafāfine o ē e manatu mamafa iā te oe, ma e mananaʻo ia faalaeiau e le tasi le isi. (Epe. 10:24, 25) O le “fefaalaeiauaʻi” o le a fesoasoani e faamalosia ai lou itu faaleagaga, ma faigofie ai ona e feagai ma so o se popolega.—Roma 1:12.

O LAU FAIĀ MA LE ATUA O LE FESOASOANI SILI LEA

19. Aiseā e te mautinoa ai o la oulua faiā ma le Atua o le a faamalosia ai oe?

19 Seʻi mātau pe na faapefea i se toeaina i se faapotopotoga i Kanata, ona iloa le tāua o le tuu atu o ona popolega iā Ieova. E tele popolega e feagai ma ia i lana galuega o se faiaʻoga ma o se faufautua, ma e maua foʻi i le maʻi o le popolevale o le mafaufau. Na faapefea ona feagai lenei uso ma nei tulaga? Ua ia faapea mai: “Ua ou iloa o le taumafai malosi ia faamalosia la ma faiā ma Ieova, o le fesoasoani sili lea ou te feagai ai ma faafitauli tau faalogona. E tāua tele le fesoasoani a uō moni ma uso faaleagaga i taimi o mafatiaga. Ou te talanoa ma faailoa saʻo atu i laʻu avā oʻu faalogona. Sa fesoasoani isi toeaina ma la matou ovasia o le matagaluega iā te aʻu, ina ia iai se vaaiga saʻo i oʻu faafitauli. Sa ou saʻili foʻi se fesoasoani faafomaʻi, sui le auala e faaaogā ai loʻu taimi, ma faatulaga se taimi ou te mālōlō ma faamalositino ai. A o faagasolo taimi, na amata ona ou iloa taulima oʻu faafitauli. Pe a iai ni faafitauli e lē mafai ona ou taulimaina, ou te tuu atu na faafitauli i aao o Ieova.”

20. (a) E mafai faapefea ona tuu atu o tatou popolega i le Atua? (e) O le ā o le a talanoaina i le mataupu o loo sosoo mai?

20 I se aotelega, ua tatou aʻoaʻoina e tāua ona tuu atu o tatou popolega i le Atua e ala i le tatalo mai i le loto, ma faitau ma manatunatu loloto i lana Afioga. Sa tatou iloiloina foʻi le tāua o le atiaʻe o le fua o lona agaga, faailoa atu o tatou faalogona i se tagata e maufaatuatuaina, ma maua le malosi mai i faatasiga faa-Kerisiano e atiaʻe ai. O le a talanoaina i le mataupu e sosoo mai le isi auala e fesoasoani mai ai Ieova, e ala i le aumaia iā i tatou o le faamoemoe o se taui.Epe. 11:6.