Skip to content

Skip to secondary menu

Skip to table of contents

Molimau a Ieova

Faa-Samoa

Le Olomatamata (Lomiga mo Su‘esu‘ega)  |  Tesema 2016

Pe E te Manatua?

Pe E te Manatua?

Pe na e faitauina māeʻaeʻa lomiga fou o Le Olomatamata? Seʻi vaai pe mafai ona e taliina fesili o loo mulimuli mai:

O ā ituaiga agasala sa faatatau i ai le fautuaga a Iesu o loo i le Mataio 18:15-17?

Na faatatau atu le fetalaiga a Iesu i faafitauli na mafai lava ona foʻia e tagata ia na aafia ai. E lē gata i lea, o se agasala matuiā ua tatau i ai le faateʻaina pe afai ua lē foʻiaina. O se faaaʻoaʻoga, o se agasala na aofia ai le faia o tala taufaaleaga, po o faiga faatogafalea.—w16.05, itu. 7.

O le ā e mafai ona e faia ina ia maua atili ai aogā mai i le faitauina o le Tusi Paia?

Ia mulimuli i fautuaga nei: Ia faitau ma se mafaufau e fetālaʻi, ma taumafai e aʻoaʻoina ni lesona e aogā iā te oe; ia fesili ifo i fesili e pei o lenei ʻE faapefea ona ou faaaogā nei manatu e fesoasoani ai i isi?’; ma faaaogā meafaigaluega ua e maua e fai ai saʻiliʻiliga.w16.05, itu. 24-26.

Pe e sesē ona faavauvau se Kerisiano e ui e talitonu i le toetū?

O le faatuatua i le toetū e lē aveesea ai faalogona o le matuā mafatia o se Kerisiano. Na faavauvau Aperaamo ina ua maliu Sara. (Kene. 23:2) Peitaʻi, o le a faaitiitia le faavauvau o se tasi a o faagasolo taimi.wp16.3, itu. 4.

O ai o loo faaāta mai e le tamāloa ua iai le fagu vaitusi a se failautusi, ma tamāloloa e toʻaono o loo iai auupega i le Esekielu mataupu e 9?

Ua latou faaataina mai ʻautau faalelagi na aofia i le faaumatiaga o Ierusalema, ma o le a latou toe iai foʻi i le faaumatiaga iā Amaketo. I le faataunuuga i aso nei, o le tamāloa o loo iā te ia le fagu vaitusi ua faaata mai ai Iesu Keriso, o lē o loo faailogaina i latou o le a faasaoina.w16.06, itu. 16-17.

O ā lamatiaga sa faasaoina mai ai le Tusi Paia?

Na faasaoina mai i (1) lamatiaga o le faaleagaina o mea na tusia ai, e pei o pepa sa faia mai i paʻu o laau ma paʻu o manu; (2) teteega mai i taʻitaʻi o malo ma lotu o ē na taumafai e faaumatia le Tusi Paia; ma le (3) taumafaiga e sui le feʻau.wp16.4, itu. 4-7.

O ā ni auala e mafai ona faafaigofie ai le olaga o se Kerisiano?

Ia iloa ou manaʻoga moni, ma aua neʻi faaaluina tupe i mea e lē manaʻomia. Ia fai se lisi o mea e tatau ona faaalu ai tupe. Ia aveese mea e te lē o toe faaaogāina, ma ia totogi ni au aitalafu o loo iai. Ia faaitiitia taimi faigaluega, ma ia fuafua le auala e faalautele ai lau faiva.w16.07, itu. 10.

O le ā o loo taʻua i le Tusi Paia e sili atu nai lo o auro po o siliva?

E tusa ai ma le Iopu 28:12, 15, e sili atu le atamai mai i le Atua nai lo o auro po o siliva. A o e saʻili e maua lenā atamai, ia taumafai e faaalia pea le lotomaulalo ma le faatuatua malosi.w16.08, itu. 18-19.

Pe e talafeagai ona fai se ʻavaalalo a se uso i aso nei?

I nisi aganuu, e talia ma talafeagai ai se ʻavaalalo e teu lelei, ma e lē taofia ai le uaʻi mai o tagata i le feʻau o le Malo. E ui i lea, e filifili nisi uso e lē faia ni a latou ʻavaalalo. (1 Kori. 8:9) Ae i nisi aganuu, e lē talafeagai mo se faifeʻau Kerisiano ona fai se ʻavaalalo.w16.09, itu. 21.

Aiseā e mafai ai ona tatou maufaatuatuaina le tala a le Tusi Paia iā Tavita ma Koliata?

O loo taʻua i le Tusi Paia, e sili atu i le ono inisi (15 senitimita) e umī atu ai Koliata nai lo o le tagata aupito i maualuga o loo faamauina i aso nei. O Tavita o se tagata moni lava, e pei ona faamaonia i tusitusiga i aso anamua lea o loo taʻua ai le fale o Tavita, faapea foʻi ma fetalaiga a Iesu. E ōgatusa foʻi le tala a le Tusi Paia i fanua laugatasi, ma faamatalaga moni ua lausilafia e tagata.—wp16.5, itu. 13.

O le ā le eseesega o le poto, malamalama, ma le atamai?

O le tagata e iai le poto, e na te iloa le tele o faamatalaga ma mea moni. O se tasi e iai le malamalama, e na te iloa le auala e fesootaʻi ai faamatalaga ma mea moni ua ia iloaina. Ae o le tagata e iai le atamai, e na te tuufaatasi le poto ma le malamalama, ma faatatau i se auala aogā.—w16.10, itu. 18.