Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

LE OLOMATAMATA (LOMIGA MO SU‘ESU‘EGA) TESEMA 2016

ʻO Lou Uaʻi Atu i le Agaga, e Iʻu ai i le Ola ma le Filemu’

ʻO Lou Uaʻi Atu i le Agaga, e Iʻu ai i le Ola ma le Filemu’

“O ē e naunau i le agaga, e taulaʻi atu i mea a le agaga.”ROMA 8:5.

PESE: 45, 36

1, 2. Aiseā e matuā tāua ai le Roma mataupu e 8 i Kerisiano faauuina?

PE NA e faitauina le Roma 8:15-17 e fesootaʻi atu i le faamanatuina o le maliu o Iesu i tausaga taʻitasi? Atonu na e faia faapea. O lenā mau tāua o loo faamatala ai le auala e iloa ai e Kerisiano ua faauuina i latou, e molimau le agaga paia i o latou agaga. I le fuaiupu muamua o lenā mataupu, o loo faasino atu i “ē o autasi ma Keriso Iesu.” Ae pe e na o ē ua faauuina e faatatau atu i ai le Roma mataupu e 8? Po o aofia ai foʻi ma Kerisiano e faamoemoe e ola i le lalolagi?

2 O loo faatatau patino atu lenei mataupu i Kerisiano faauuina. Ua latou maua “le agaga” o ni ē e “faatalitali atu e avea ma ataliifai, ma le faasaʻolotoina mai i o [latou] tino [faaletino].” (Roma 8:23) O lo latou faamoemoe, o le avea lea ma atalii o le Atua i le lagi. Ua mafai lenei mea ona ua papatisoina i latou o ni Kerisiano, ua faatatau e le Atua iā i latou le tāua o le togiola, faamagalo a latou agasala, ma taʻuamiotonuina i latou o ni atalii faaleagaga.Roma 3:23-26; 4:25; 8:30.

3. Aiseā e faapea atu ai e tāua foʻi le Roma mataupu e 8 i ē e maua le faamoemoe i le lalolagi?

3 Peitaʻi, e tāua foʻi le Roma mataupu e 8 i ē e maua le faamoemoe i le lalolagi, ona e silasila le Atua iā i latou o ni ē  e amiotonu. E tatou te iloa lenā manatu i upu na tusia muamua e Paulo. I le Roma mataupu e 4, o loo talanoa ai e faatatau iā Aperaamo. O lenā tane faatuatua na soifua a o leʻi tuuina atu e Ieova le Tulafono iā Isaraelu, ma a o leʻi taitai maliu Iesu mo a tatou agasala. Peitaʻi, na mātauina e Ieova le faatuatua malosi o Aperaamo, ma silasila i ai o sē e amiotonu. (Faitau le Roma 4:20-22.) E faapena foʻi Kerisiano faamaoni i aso nei o ē e maua le faamoemoe o le ola e faavavau i le lalolagi, e silasila Ieova iā i latou o ni tagata amiotonu. O lea, e mafai foʻi ona latou maua aogā mai i fautuaga mo tagata amiotonu, ia o loo i le Roma mataupu e 8.

4. O ā fesili e ao ona tatou mafaufau i ai e tusa ai ma le Roma 8:21?

4 I le Roma 8:21, o loo faamautinoa mai ai o le a oo moni mai lava le lalolagi fou. Ua folafola mai i lenei fuaiupu o le a “saʻoloto . . . le foafoaga mai i le faapologaina i mea leaga, ma maua ai le saʻolotoga mamalu o le fanau a le Atua.” O le fesili tāua la, po o le a tatou iai i inā, ma po o le a tatou mauaina lenā taui? Po o e mautinoa o le a e mauaina? O loo iai i le Roma mataupu e 8 fautuaga e fesoasoani iā i tatou.

“UAʻI ATU I LE TINO”

5. O le ā le mataupu tāua na taʻua e Paulo i le Roma 8:4-13?

5 Faitau le Roma 8:4-13. O loo taʻua i le Roma mataupu e 8 se faaeseesega o ē e savavali e “tusa ma le tino,” mai i ē e savavali “e tusa ma le agaga.” E ono manatu nisi o loo faasino atu lenei faaeseesega i ē e lē o i le upu moni ma ē o loo i le upu moni, po o ē e lē o ni Kerisiano ma Kerisiano. Peitaʻi, sa tusi atu Paulo “iā i latou uma o i Roma ua alofagia e le Atua, o ē ua valaauina e avea ma le ʻaupaia.” (Roma 1:7) O lea la, na faia e Paulo se faaeseesega i Kerisiano na savavali e tusa ma le tino, ma Kerisiano na savavali e tusa ma le agaga. O le ā la le eseesega?

6, 7. (a) O ā nisi o auala e faaaogā ai le upu “tino” i le Tusi Paia? (e) O le ā na faasino atu i ai Paulo ina ua ia faaaogā le upu “tino” i le Roma 8:4-13?

6 Seʻi o tatou talanoaina muamua le upu “tino.” O le ā na faasino atu i ai Paulo? E eseese auala o loo faaaogā ai le upu “tino” i le Tusi Paia. E iai taimi e faasino atu ai i o tatou tino faaletino. (Roma 2:28; 1 Kori.  15:39, 50) E mafai foʻi ona faasino atu i faiā faaleaiga. O se faataʻitaʻiga, na fanau Iesu mai i le “aiga o Tavita i le itu faaletino,” ma na vaai Paulo i tagata Iutaia o lona “aiga i le tino.”—Roma 1:3; 9:3.

7 Peitaʻi, o manatu na tusia e Paulo i le Roma mataupu e 7, e tatou te iloa ai le mea o loo faasino atu i ai le “tino” lea e taʻua i le Roma 8:4-13. Na ia faafesootaʻi atu le “ola e tusa ma le tino,” i “tuʻinanauga agasala” ia ʻna galulue i o latou tino.’ (Roma 7:5) O lea la ua tatou malamalama ai i le uiga o le faaupuga “i latou e naunau i le tino,” lea na taʻua e Paulo “e taulaʻi atu o latou manatu i mea a le tino.” Sa faasino atu i ē ua pulea pe uaʻi atu i o latou tuʻinanauga ma faanaunauga o ni tagata lē lelei atoatoa. O i latou ia e lolo atu i o latou faanaunauga, manaʻo, ma tuʻinanauga i feusuaʻiga po o isi lava mea.

8. Aiseā na talafeagai ai le lapataʻia o Kerisiano faauuina e faatatau i le savavali “e tusa ma le tino”?

8 Ae e te ono tomānatu pe aiseā na faamamafa atu ai e Paulo i Kerisiano faauuina le lamatiaga o le ola e “tusa ma le tino.” Pe e iai se lamatiaga faapea o loo feagai ma Kerisiano i aso nei, o ē ua talia e le Atua o ni ana uō ma silasila i ai o ni ē e amiotonu? O le mea moni, o so o se Kerisiano lava e ono mafai ona savali e tusa ma le tino agasala. O se faaaʻoaʻoga, na tusi Paulo e iai uso i Roma na pologa i o latou lava tuʻinanauga, atonu o ni tuʻinanauga tau feusuaʻiga, po o le tuʻinanau foʻi i meainu, meaʻai, ma isi mea. O nisi na latou “faasesēina ē e lotomamā.” (Roma 16:17, 18; Fili. 3:18, 19; Iuta 4, 8, 12) E iai foʻi se uso i Korinito na iai se taimi na ʻfai avā ai i le avā a lona tamā.’ (1 Kori. 5:1) Ua tatou malamalama la i le māfuaaga na faaaogā ai e le Atua Paulo, ina ia lapataʻia Kerisiano e faatatau i le “uaʻi atu i le tino.”Roma 8:5, 6.

9. O le ā e lē o faatatau atu i ai le lapataʻiga a Paulo i le Roma 8:6?

9 E aogā foʻi lenei lapataʻiga i aso nei. E ono mafai lava ona amata ona taulaʻi atu manatu o se Kerisiano i mea a le tino, e tusa po ua leva ona auauna i le Atua. E lē o faatatau atu i se Kerisiano e fai ma mafaufau i meaʻai, galuega, faafiafiaga, po o faalogona alofa mo lana paaga faaipoipo.  O vala masani ia o le olaga o se auauna a le Atua. Na fiafia Iesu i meaʻai, ma na ia fafagaina foʻi isi. Na ia silafia e tāua meaʻai. Sa tusi foʻi Paulo e talafeagai feusuaʻiga i le va o se ulugalii faaipoipo.

Po o atagia atu i a tatou talanoaga o loo tatou uaʻi atu i le agaga po o le tino? (Tagaʻi i le palakalafa e 10, 11)

10. O le ā le uiga o le faaupuga “uaʻi atu i le tino” o loo i le Roma 8:5, 6?

10 O le ā tonu lava la na faasino i ai Paulo e faatatau i le “uaʻi atu i le tino”? O le upu Eleni lea na taʻua e Paulo, o lona uiga o le “taulaʻi o le mafaufau ma le loto o se tasi i se mea, e uaʻi totoʻa ina ia fuafua lelei se mea.” O i latou la e ola e tusa ai ma le tino, e pulea o latou olaga e o latou faanaunauga agasala faaletagata. Na faapea mai se tagata atamai e faatatau i le faaupuga o loo i le Roma 8:5: “E taulaʻi atu o latou manatu—e matuā naunau, talanoa soo, faia soo, ma latou viiviia mea a le tino.”

11. O ā nisi o mea e tatou te ono faamuamua i o tatou olaga?

11 Sa tatau la i Kerisiano i Roma ona iloilo po o ā moni mea na taulaʻi i ai o latou olaga. Atonu na pulea pe faaautū atu o latou olaga i “mea a le tino.” E tatau foʻi ona iloilo o tatou olaga. O ā mea e sili ona tāua iā i tatou, ma o ā mea e taulaʻi i ai a tatou talanoaga? O ā mea e tatou te faatāuaina i aso taʻitasi? E ono taulaʻi atu nisi ina ia tofo ituaiga uaina eseese, teuteu o latou fale, saʻili ofu fou, faia faaputugātupe, fuafua ni faigāmalaga, ma isi mea faapena. E lē leaga nei mea auā o mea masani o le olaga. O se faataʻitaʻiga, na faia e Iesu le uaina, ma na faatonu e Paulo Timoteo ia inu “sina uaina itiiti.” (1 Timo. 5:23; Ioa. 2:3-11) Ae pe na talanoa soo, inu soo, ma viiviia e Iesu ma Paulo le uaina? Pe na la matuā naunau ma talanoa soo e faatatau i le uaina? E leai. Ae faapefea i tatou? O ā mea e faamuamua i o tatou olaga?

12, 13. Aiseā e tāua ai ona tatou iloiloina mea e uaʻi i ai o tatou manatu?

12 E tāua le iloiloina o le tagata lava ia. Aiseā? Na tusi Paulo: “O le uaʻi atu i le tino, e iʻu ai i le oti.” (Roma 8:6) O se iʻuga faanoanoa, auā o le a oti faaleagaga i le taimi lenei ma oti faaletino i le lumanaʻi. Peitaʻi, e leʻi uiga atu Paulo e faapea pe a “uaʻi atu i le tino,” e mautinoa lava o le iʻuga o lenā tagata o le oti. E mafai ona faia ni suiga. Seʻi mafaufau i le uso lea sa faia amioga lē mamā i Korinito, lea na uaʻi atu i le “tino” ma faateʻaina ai. Na mafai ona ia faia ni suiga. E leʻi toe savali o ia i le tino ma na toe foʻi i le ala saʻo.2 Kori. 2:6-8.

13 Pe afai na mafai ona sui lenā uso i Korinito e ui i le matuiā o lana agasala, e mafai foʻi la e Kerisiano i aso nei ona faia ni suiga, aemaise se tagata e leʻi matuā mulimuli i ona tuʻinanauga faaletino. E mautinoa o le lapataʻiga a Paulo e faatatau i le iʻuga e oo i ai se tasi e “uaʻi atu i le tino,” e tatau ona uunaʻia ai Kerisiano ia faia suiga e manaʻomia!

“UAʻI ATU I LE AGAGA”

14, 15. (a) O le ā na fautua mai Paulo ia tatou uaʻi atu i ai? (e) O le ā e lē uiga atu i ai “le uaʻi atu i le agaga”?

14 Ina ua uma ona lapataʻia e le aposetolo i tatou e faatatau i le “uaʻi atu i le tino,” na ia taʻua le manatu faalaeiau lenei: “O le uaʻi atu i le agaga, e iʻu ai i le ola ma le filemu.” Maʻeu se taui matagofie, o le mauaina o le ola ma le filemu! E faapefea ona tatou mauaina lenei taui?

15 “O le uaʻi atu i le agaga,” e lē uiga atu i le soona maelega valea. E lē faapea e pau mea e mafaufau ma talanoa ai se tasi, o le Tusi Paia, lona alofa i le Atua, ma lona faamoemoe i le lumanaʻi. Ia manatua, sa ola i ni olaga masani Paulo ma Kerisiano  i le uluaʻi senituri, o ē na faafiafiaina le Atua. Na latou aai ma feinu. E toʻatele na faaipoipo ma olioli i ni olaga faaleaiga, ma galulue ina ia tausia i latou.Mare. 6:3; 1 Tesa. 2:9.

16. E ui na faia e Paulo vala masani o le olaga, ae o le ā na ia taulaʻi atu pea i ai?

16 Peitaʻi, e leʻi avea nei vala masani o le olaga ma taulaʻiga autū o olaga o na auauna a le Atua. Ina ua uma ona taʻua Paulo o sē e fai faleʻie, ona faailoa mai lea o mea na taulaʻi i ai lona olaga: Sa taulaʻi atu pea o ia i le galuega faa-Kerisiano o le talaʻi ma le aʻoaʻo atu. (Faitau le Galuega 18:2-4; 20:20, 21, 34, 35.) Na ia fautuaina ona uso ma tuafāfine i Roma ia faia foʻi faapea. Ioe, sa taulaʻi atu le olaga o Paulo i sauniuniga ma galuega faaleagaga. Sa tatau i Kerisiano i Roma ona faaaʻoaʻo iā te ia, ma e faapena foʻi i tatou.Roma 15:15, 16.

17. O le ā le ituaiga olaga e tatou te maua pe a “uaʻi atu i le agaga”?

17 O le ā le iʻuga pe a tatou taulaʻi atu i galuega faaleagaga? E manino le tali o loo i le Roma 8:6: “O le uaʻi atu i le agaga, e iʻu ai i le ola ma le filemu.” O lona uiga e tatau ona taaʻina pe pulea o tatou mafaufau e le agaga paia, ma ia ōgatusa ma le finagalo o le Atua. Pe a taulaʻi o tatou olaga atoa i mea a “le agaga,” o le a tatou maua ni olaga fiafia ma le faamalieloto i le taimi lenei. Ae i le lumanaʻi, o le a tatou maua le ola e faavavau, a lē i le lagi po o le lalolagi.

18. E faapefea i le “uaʻi atu i le agaga” ona tatou maua ai le filemu?

18 Seʻi o tatou manatu i le faamautinoaga e faapea, o le “uaʻi atu i le agaga, e iʻu ai i le . . . filemu.” E faigatā i le toʻatele ona maua le filemu o le mafaufau. O loo latou taumafai malosi ia maua lea filemu, ae ua tatou olioli i lenā faamanuiaga. O se tasi o vala o le mauaina o lenā filemu, o lo tatou taumafai lea e tausia le filemu i totonu o o tatou aiga ma le faapotopotoga. E tatou te amanaʻia o i tatou uma lava ma o tatou uso ma tuafāfine, e lē lelei atoatoa. O lea, pe a tulaʻi mai ni faafitauli, ua aʻoaʻoina i tatou ia mulimuli i le fautuaga a Iesu: ʻIa faalelei ma lou uso.’ (Mata. 5:24) E faigofie ona faia faapea pe a tatou manatua, o loo auauna foʻi o tatou uso ma tuafāfine i “le Atua o lē e foaʻiina mai le filemu.”Roma 15:33; 16:20.

19. O le ā le filemu e lē mafaatusalia e mafai ona tatou mauaina?

19 E iai se isi filemu e lē mafaatusalia. Pe a tatou “uaʻi atu i le agaga,” o le a tatou maua le filemu ma Lē na faia i tatou. Na tusia e Isaia upu nei e faatatau atu i ona aso, ae e iai sona faataunuuga sili i aso nei: “O i latou ua mausalī o latou loto, o le a e [Ieova] leoleoina ina ia filemu pea i latou, auā e faatuatuaina oe.”Isa. 26:3; faitau le Roma 5:1.

20. Aiseā e te talisapaia ai fautuaga o loo i le Roma mataupu e 8?

20 O lea, e tusa pe e faauuina i tatou i le agaga pe e faamoemoe e ola e faavavau i le parataiso i le lalolagi, e tatou te talisapaia uma fautuaga faagaeeina o loo i le Roma mataupu e 8. Maʻeu lo tatou lotofaafetai mo le faalaeiauga ia lē avea le uaʻi atu i “le tino” ma mea tāua i o tatou olaga! Nai lo o lea, ua tatou iloa le atamai o le ola e tusa ai ma le faamautinoaga lenei: “O le uaʻi atu i le agaga, e iʻu ai i le ola ma le filemu.” O le taui o le faia faapea o le ola e faavavau, auā na tusi Paulo: “O le totogi o le agasala o le oti lea, a o le meaalofa a le Atua o le ola e faavavau lea, e ala iā Keriso Iesu lo tatou Alii.”Roma 6:23.